Ro supswan ine ḇesiper, snonggaku ḇebor sfandun roḇean fa san ma rum fa sḇarek. Sia wer sfandun wos samarawraw fa sikyar nari payamyum isya ro ras naiwama. Kosewar fa kosaramper si ido, nari Manseren ḇyuk barakas ḇe ko. Moḇsa ifrur na rai?

”Snonggaku ḇefrur pyum snonggaku ḇeryar ḇa ḇyuk nyaki ḇe Yahwe I, ma nari ḇyak kaḇer snonggaku ani frur pyum ḇyena.”​—AMSAL 19:17.

Yesus fyawar farfyar ḇekur snon oso smun i rawo imbe imar, mura sibur i. (Lukas 10:29-37) Fyoro ḇa, snon oso imbran ro nyan ani, imnai ma isaramper i ḇeri. Ifawi ḇaim snon ḇeparpar ani ma snon ine ryamaker keret ḇesisye, mboi imarisen isaramper i.

Snon ḇefrur pyum ani isbawer mani ro par ḇyena, pyarek apepen na, ma isasyar kum­pan ḇyena fa isaramper i. Oso wer, ḇyuk sneprei faro snon ḇeparpar ani.

Rosai kofarkor ro farfyar ine? Yesus fya­snai ḇe ko fandun fa kosewar nyan fa kosaramper snonggaku ḇefandun fafnoḇek ro ko. (Amsal 14:31) Refo doḇe Manseren Allah iswar ko, inja kero nari ipyos kandera koḇena ma kananjar wer ḇa. Mboi, imbude kofakfuken, ’Ras risai ma moḇsa Manseren Allah ifrur na rai?’ Awawos ḇerama ine nari kawos barakas Sinan fyasos ḇe ko kwar.