Moḇsa Wafawi Kaku Ras Ḇarpon Bedi Iyama Rai?
Snonggaku sikyar ḇo soḇe ras ḇarpon sena ndramuma ro roi oso smam ḇana. Iso ḇefnai fa sifrur roi risai monda skara nari nafrur kankenem sena napyum syadi wer.
ROI SNONGGAKU ḆEBOR SYA SIKYAR NA
SMAM RO MAKSYA: Ono sikyar snar ras ḇarpon sena na smam ro moḇ maksya sroroya fyor seaben ya. Inja, insama sfawi ras ḇarpon sena ma sbinggwanbur roi ḇemun na, fandun fa siwasya roi sorḇe ramalan zodiak ḇaido ramalan bintang.
FENGSUI: Ono sikyar snar sḇawes rum sena imnis roi snonggaku ḇebor sikyar na ido na sismai payamyum ḇaido barakas. Lo Wing, * ḇeḇarek ro Hong Kong, ikofen ḇo doḇe, ”Insamaido ḇekowes ro toko yedine sibore, ahli fengsui oso ikofen ḇe aya ḇo doḇo yarir karui kristal ro moḇ oso ḇero toko yeja.”
SAMSYOM FARO SINAN ḆEPON SIWARA: Ono sisya sikyar snar insama sismai kadaun ma barakas, fandun fa sifruro kina ḇemar kwar sya simarisen ḇaido sesyowi dewa nakam. Van, ḇeḇarek ro Vietnam, fyawar ḇo doḇe, ”Randak yakyar fyor yabuk farsarser ḇe sinan ḇepon ayesiwara ido, na kenem yedi ipyum syadi. Ras ḇarpon ayena ma romawa ayesi kako nari napyum.”
REINKARNASI: Snonggaku ḇebor sikyar snar rofyor snonggaku oso imar kwar, snonggaku ani nari ḇyeḇeaben kaḇer ma ine na ndarirya pdef. Sikako sikyar rosai sifrur ro kirinena iso bon sifrur ro kenem ḇepon sena.
Inja snonggaku ḇebor sikyar manggun ḇa kuker roi ḇeradinena. Ḇape sisewar fa sifawi na kukro smam naro sibrasna, zodiak, papan Ouija®, kartu tarot, shio, ma ḇesena. Snar skara ḇo soḇe imbude roi sifawi nane nama nkaku.
ROSAI SISMAI NA?
Roi sḇuki mam nane nari ifrur snonggaku oso kenem ḇyedi ipyum syadi ma nbuko payamyum ḇe i ro ras ḇarpon iyama ke?
Mampan fawar ro Hào ḇeḇarek ro Vietnam. Randak ya ikyar faro ramalan bintang ma fengsui. Ikako isyom ḇe sinan ḇepon siwara ḇyedi. Ḇape roi ine nafrur kenem ḇyedi ipyum syadi ke? Hào fyawar ḇo doḇe, ”Pipi yena nabro ma yakain kuker nyaki, kina yesi nggosmai masala, ma yaḇoryae kaku.”
Qiuming, ḇero Taiwan, ikyar kako faro ramalan bintang, reinkarnasi, nasib, fengsui, ma isyom faro sinan ḇepon ḇyedi. Ḇape rofyor myam kaku roi anna wer, doḇe, ”Insape yafawi snar farkarkor ma rari ḇeradine nafrur yakmom kaku ma naḇeseyae. Ramnai ramalan bintang nane nkaku ḇa. Ma faro farkarkor reinkarnasi ine, yafawi kankenem yedi ro ḇeponiwara ḇa, inja moḇsa na yafrur mnis kenem yedi ro kirine rai?”
”Insape yafawi snar farkarkor ma rari ḇeradine nafrur yakmom kaku ma naḇeseyae.”—QIUMING, TAIWAN
Raris Hào, Qiuming, ma snonggaku ḇebor ḇesesya insape sifawi ro ḇarpur snar ras ḇarpon koḇedi ndrama ro nasib ḇa, ro ramalan bintang ḇa, sinan ḇepon ḇemar kwar sya, ḇaido reinkarnasi ḇa. Rarirya ido, moḇsa kofawi kaku ras ḇarpon koḇena rai?
Snonggaku ḇebor skara snar ras ḇarpon sena na napyum syadi fyor sfarkor kaki, ma sna pipi nabore. Ḇape, roi nane nbuk payamyum ḇe si ro ras ḇarpon iyama ke?
^ syos 5 Snonsnon ḇeḇeso ro syap ine sfadwer na kwar.
^ syos 16 Wos nane sun naro syap Galatia 6:7 ḇero Refoya. Farkarkor ine imnis kuker wos peper Tiongkok sifawi kam na: ”Koker melon ido, nari kosmai melon; koker abrui ido, nari kosmai abrui.”
Wamarisen Ido Mam Ine Kako
BARYAS
Astrologi ma Kinsasor—Nyan fa Kofawi Ras Ḇarpon Iyama Ke?
Na wakyar kaku faro roi sḇuki kinsor nane ke?
BARYAS
Rosai Refo Ikofen Kuker Kankenem ma Marmarya
Rofyor komar kwar, nari ḇar oso ro baken koḇedi ikenem pdef ke? Snonkaku ḇemar sya moḇsa sroyo?
