Roi kwara ya, bukti arkeologi ḇemnis kaku kuker fasfas ḇero Refo nasya ke roḇa? Ro 2014 ya, artikel oso ro majalah Biblical Archaeology Review ḇyuk fakfuken ine: ”Snonkaku riḇeso ro Refo Ibrani snonsnon sena neḇefas ro bukti arkeologi ke?” Kankarem ya, ”Fanam ḇe 50!” Snonkaku oso sfas ro artikel ine ḇa iso Tatenai i. Manseiri? Rwama komam fasfas Refo kuker Tatenai i.

Yerusalem randakya ima ḇar ro Kekaisaran Persia ḇeba kaku. Mnu ani kyain ro ḇar wambarek warḇeki Efrat. Snonkaku Persia sap moḇ ani ḇe ḇar Warḇeki Iḇarwa. Rofyor snonkaku Persia skakok Babilon, sḇuk mkei ḇe snonkaku Yahudi fa sḇawes kaḇer Yahwe bait Ḇyedi ḇero Yerusalem. (Ezra 1:1-4) Ḇape, snonkaku Yahudi mbroḇ sesya simarisen kuker fararur ḇaḇawes ine ḇa. Skursof snonkaku Yahudi sya bo soḇe sifrur mbroḇ kuker Persia sya kuker sḇawes bait. (Ezra 4:4-16) Ro fafisu ḇaḇepapoik Darius I (522-486 SM), ḇeḇarara oser ḇero Persia ḇenir ḇe Tatenai ma ḇewarpu i sya siwan si fa smam kaku parkara ine. Refo dap i ḇe ”gubernur ro ḇar Warḇeki Iḇarwa”.—Ezra 5:3-7.

Karufas ḇeḇeso ḇefas huruf paku naisya kaker isof ro baboine, naser Tatenai snonsnon ḇyeja. Karufas ani naser fasfas ḇekur ḇe kina oso. Karufas oso naser syapram ḇaḇeasas sifas ro taun ḇe 20 ro ḇaḇepapoik Darius I, 502 SM, snonkaku oso isya ḇye saksi ro ḇaḇeasas ani. Sap saksi ani ḇe manfamyan ro ”Tattannu, gubernur ro ḇar Warḇeki Iḇarwa”. Ine imnis kuker Tatenai ḇeḇeyap ro syap Ezra ya.

Tatenai fyararur ḇe? Ro 535 SM, Kores Agung irwas moḇ ḇyepoik rona ḇe provinsi riḇeḇeso. Oserya iso sapi ḇe Babilon ma ḇar Warḇeki Iḇarwa. Ḇarpurya, provinsi ani sirwasna ḇe ḇar risuru, oserya sapi ḇe ḇar Warḇeki Iḇarwa. Knam ro moḇ ḇyepoikya iso Damaskus. Moḇ ḇeyaksun ro papoik ḇyena kako iso Sele-Siria, Fenisia ma Yehuda. Tatenai ḇyepoik ro moḇ ine ro 520 isof ro 502 SM.

Rofyor Tatenai kyaḇer ḇe Yerusalem fa myam mnis ḇaḇembroḇ anna, ikofenḇadir ḇe Darius i snar snonkaku Yahudi sya soḇe Kores ḇyuk papoik faro si fa sḇawes kaḇer bait ya. Ḇarpurya smam kaḇer fasfas karajan ma sisrow snar rosai snonkaku Yahudi sikofen anya nkaku. (Ezra 5:6, 7, 11-13; 6:1-3) Inja, sor Tatenai i fa isowawarek awer ma iso rosai sikofen na.—Ezra 6:6, 7, 13.

Kakuḇae, ”Tatenai gubernur ro ḇar Warḇeki Iḇarwa”, snonsnon ḇyeja nabor ro sarisa ya ḇa. Ḇape, ipyum fa komam snar Refo dap mnis kaku i ma nasan ḇyeja. Kakaku ine, kermkun monda ḇape nafrur fa kokyar snar arkeologi ikofen ker Refo ima imnis kaku ro sarisa na.