Ḇeyek kuda rifyak ansya rya sifrur makakak kero, ḇape kaku rarirya ḇa. Rosai ḇefnai ya? Snaro Refo ma rosai ḇeḇejadi ro fafisu ine nfasnaibair ḇeko manseisirya. Rarama sena ḇeḇair kandera ro supswan ine, ḇape roi anna kako bisa nḇuk abar ḇepyum faro Au ma kina Bedi. Rosai ḇefnai fa rarirya? Ḇeponya, rwama kosewar ḇepon resari mansei ḇeyek kuda rifyak ansya.

Randak fasasna ani ryadine, ”Yamam, kuda ḇepyoper oso ḇeyekroiya duf saren oser, ma ssḇuk faroi wower oser. Ma rya imnis snon oser ḇesma fainda faḇefaḇri ḇaḇefaindaya.”—Wahyu 6:2.

Mansei ḇeyek kuda ḇepyoper anine? Kankarem ḇyeja nasya ro syap Wahyu kako, ma sap i ḇe ”Allah wos Ḇyedi.” (Wahyu 19:11-13) Nasan ani kyurḇe Yesus Kristus monda snar iso ḇeyawosḇair Allah wos Ḇyena. (Yohanes 1:1, 14) Ma sap kako i ḇe ”Wairek robo waireksya, ma Tuan robo tuansya” ma ”Ḇesouser ma Ḇekaku.” (Wahyu 19:16) Inja, ine kyurfasna ismai papoik fa ḇye raja ma sordade, ma ḇyuk papoik ḇyena kuker nyan ḇesasar ḇa. Ḇape, roi nane naser fakfuken ḇese wer.

Mansei ḇeḇuk Yesus papoik fa ḇyefaḇri ḇaḇefaindaya? (Wahyu 6:2) Nabi Daniel myam fasasna oso, myam Mesias imnis raris ”rumkun snonkaku”. Ma sḇuk ḇe i ”papoik ma baba ma karajan” ma roro ”Mankun Ḇeumur Syadi Kaku”, Allah Yahwe I. * (Daniel 7:13, 14) Inja, Allah ḇena Papoik Syadi iso ḇeḇuk ḇe Yesus papoik ma hak fa ḇyeparenta ma ḇyuk samamyai. Inja kuda ḇepyoper ani imnis kaku fa ḇyekakopḇair faro mamamun ḇenapes Allah Rumkun Ḇyedi ifrurna, snar ro Refo roi ḇesnai ḇe ḇepyoper ḇyekakopḇair faro napnapesya.—Wahyu 3:4; 7:9, 13, 14.

Fafisu risai nari ifrar ya? Yesus, ḇeyek kuda ḇerandak ine, ifrar ḇeri rofyor isma ramrem ya. (Wahyu 6:2) Fafisu risai Yesus ḇyeḇeryem ro nanki? Refo ikofenḇair rofyor Yesus kyaḇer ḇe nanki, ḇye raja ḇeri ḇa, ḇape iwaf isof fafisu isma ramrem ya namnis. (Ibrani 10:12, 13) Yesus ikofenḇair kakop oso ḇe manfamyan ḇyesi insama sifawi fafisu ḇaḇewafwaf ani imnai kwar ma kirine Yesus ḇye raja ro nanki kwar. Ikofenḇair snar randak ro fafisu ḇaḇepapoik ḇyena, fafisu dunya ine nari naḇyeḇa syadi. Nari mamamun, basbiser, dafduf nabor nasya. (Matius 24:3, 7; Lukas 21:10, 11) Rofyor Perang Dunya I ikpef ro 1914 ya, kokam kofawi koisya koro fafisu ḇefo kuker kandera, Refo dapna ḇe ”ras ḇepupesna”.—2 Timotius 3:1-5.

Ḇape rosai ḇefnai fa fafisu koḇedine naḇyeḇa syadi rofyor Yesus ḇyeparenta ro 1914 ya? Ine snaro Yesus ḇyeparenta ro nanki, mboi ro supswan ine ḇa. Mamamun isya ro nanki, ma Yesus, Raja ḇebabo ani, sap kako i ḇe Mikhael, isawen Setan ma hantu-hantu ḇyesi ḇe supswan. (Wahyu 12:7-9, 12) Snar ryo supswan ine monda, inja imsor kaku snar ifawi fafisu ḇyedi fyanam kwar. Fyoro werḇa nari Allah ḇyuk samamyai faro Setan ro supswan ine. (Matius 6:10) Kirine, nari komam rariso ḇeyek kuda rikyor ḇeuser ansya nafnoḇek ko fa kofawi kokenem ro ”ras ḇepupesna”. Ḇeyek kuda ḇepyoper ḇerandak kyurfasna ḇe snonkaku oso, ḇape ḇeyek kuda rikyor ḇeuserya nfasnaiḇair ḇe fafisu ḇeḇejadi faro snonkaku sya.

’Kuda ḇese oser isasyar wer. Kuda ḇerik ḇesak. Ḇeyekiya ssḇuk papoik fadun askibur supna ḇesiper, insa snonkaku smunyae si. Ma ssḇuk faroi sumber ḇeba oser’.—Wahyu 6:4.

Ḇeyek kuda ine ḇyekakop ḇe mamamun ya. Komam kada, dun askibur er ḇeḇeso monda ḇa, ḇape ro supswan ine ḇesiper. Ro 1914 ya, mamamun ḇeba kaku ikpef ma er ḇebor sya sakso ro mamamun ani. Inema roi ḇeḇejadi randak ro supswan ine. Ramnai perang dunya ḇeḇesuru ikpef wer ma ine naḇyeḇa syadi. Sino sikofenḇair snar snonkaku ḇemar snar mamamun ro 1914 ya, barbor sena yuta ri 100 syadi! Osower ido, snonkaku ḇekandera sya kako sibor fafayaḇa.

Isof rodiso mamamun ro kirine nari nḇejadi? Imbude bisa ifrur fa snonkaku ro supswan ine ḇesiper sipromes. Iba syadiwer, PBB ḇekofen bo nari smamwarek aski ro supswan ine, jadi fa sidwarek kuda ḇerik ine ḇa.

”Yamam, kuda ḇepaisem oser. Ḇeyekiya duf warnkyara risuru ro ḇraminya. Ma yarower imnis mkaren rofandu roi ḇekenem rifiak ansi ḇekofen, ’Sasuref ras oser fasibu amek oser, ḇyepipi sarak dinar oser; ma sasuref ras oser katera amek rikior, ḇyepipi sarak dinar oser. Ḇape mkokaruk awer zaitun knam ma anggur knam anna.’”—Wahyu 6:5, 6.

Ḇeyek kuda ine ḇyekakop ḇe basbiser ya. Rodine komam roḇean nabor ḇa, inja fasibu ḇaido gandum kilo oser ḇaḇyak ḇyena dinar oser, ine imnis kuker ḇaḇyak ḇefararur ro ras oser! (Matius 20:2) Dinar oser bisa koḇukikowes katera risuru peser dirim, mor ḇeyek syadiḇa imnis gandum. Ine namnis faro roḇean ḇe kina ḇeba oso ke? Snonkaku sya sismai swarapepen insama sesyadadi ḇa faro roḇean san ro ras ḇe ras, raris mani zaitun ma anggur.

Rofyor 1914 ya, komam kwar ḇeyek kuda ine ifrar ke? Imbo! Snonkaku yuta ri 70 simar snar basbiser ro fafisu abad 20 ya. Organisasi oso ikofen snar ”yuta ri 805 ḇaido oser rofandu snonkaku risiw ro supswan sya, sismai dafduf snar basbiser ḇeḇyeba kaku ine ro 2012-14.” Laporan ḇese wer dakofen, ”Ro taun ḇe taun basbiser myun snonkaku sya nabor syadibur dafduf AIDS, malaria ma tuberkulosis.” Sifrur roi oso insama nafnoḇek snonkaku ḇena roḇean ḇa sya raryano, ḇeyek kuda ḇepaisem ine myun snonkaku ḇebor kaku.

”Wakmam kada kuda oser sanana ḇyedi [irwai]. Ḇeyekiya snonsnon ḇyedi Marmari. Ma mun aiḇui duserfaku ro dokor ḇyedi. Ssḇuk faro si mun ḇeḇefiak ro supna faro papoik sedi, insa smamun kuker [sumber], kuker fafisu basbiser, kuker dafduf ma kuker aiwan ḇeḇarḇor.”—Wahyu 6:8.

Ḇeyek kuda ḇefyak ine ḇyekapkopḇair marmar snar dafduf kapyowi. Fyoroḇa ro 1914, flu Spanyol myun snonkaku yuta riyuta. Imbude snonkaku yuta ri 500 ḇesmai dafduf ine, ine rya 1 rofandu snonkaku ri 3 ḇekenem sya!

Flu Spanyol ima dafduf oser monda. Manḇefawinanem sya sikofen snonkaku yuta riyuta simar snar dafduf sarampa ro abad ḇe 20 ya. Baboine, sifrur penelitian medis na nabore, ḇape snonkaku sya simar fasaw snar dafduf AIDS, tuberkulosis, ma malaria.

Ḇeḇejadiya iso mamamun, basbiser, ḇaido dafduf nakam nun ḇe marmar. Kubir doren snonkaku sya ḇesya kwar.

Fafisu ḇefo kandera ine nari napromes. Fandun fa koswarepen roi ine: Yesus ”ḇesma fainda faḇefaḇri ḇaḇefaindaya” ro 1914, isawen Setan  ḇe supswan. Ḇape ifrurmnis ḇaim faḇaḇri ḇyena. (Wahyu 6:2; 12:9, 12) Nari ro Armagedon, Yesus ipyos Setan awyae ḇyenakam ma myunpres snonkaku ḇeso i sya. (Wahyu 20:1-3) Yesus nari ifrur fa ḇeyek kuda rikyor ansya simnai monda ḇa, ḇape nari Yesus fyadwer fafisu ḇeḇyeḇa skofrurna ḇe fafisu ḇepyum syadi. Rariso ifrurna rai? Rwama komam rosai Refo ikofen na.

Nari mamamun nasya werḇa, snaro neḇefadwer kwar kuker aski ya. Yahwe nari ”ifrur mamamun ro supswan ine fa namnai. Pyankar saren ya ma kyaruk bom ya”. (Mazmur 46:9) Faro snonkaku ḇeswar aski sya ”nari sismai kaku marasrisen ḇeba snar ḇaḇeaski ḇebor”.—Mazmur 37:11.

Basbiser nari nasya werḇa snar ”Mor ḇesur nabor nari naisya ro supswan; ro bonkor urek bon na naisya nabor kaku.”—Mazmur 72:16.

Nari dafduf ma marmar nasya werḇa, rodiwa nari kosmai pararei ḇemnis ma kokame kokenem isof fyoro-fyoro. Allah ”Nari ipyos mkarui nakambur mka sena, snar marmarya isyaḇa kwar; sne ḇefafardun, kankanes, roḇa dafduf naisyaḇa kako. Roi ḇeḇor ḇekwar napromes.”—Wahyu 21:4.

Ro fafisu Yesus isya ryo supswan ine, ikofenḇair ḇaḇeaski faro snonkaku sya, kuker mujisat ḇyuk anan faro snonkaku ḇebor, ḇyuk pararei ḇe snonkaku ḇeduf, ma ḇyawes kaḇer snonkaku ḇemar kwar sya. Ine roi riḇeso monda ro rosai nari ifrur fyor ḇyeparenta kwar.—Matius 12:15; 14:19-21; 26:52; Yohanes 11:43, 44.

Saksi-Saksi Yahwe simarisen sfasnaibair ro Refoya rariso wafasos mankundaw rofyor ḇeyek kuda ansine simnai fa sifrar. Wamarisen wafarkor nabor syadiwer ke?