Imbo, malaikat ḇeḇarḇor sisya kako. Sramuma ro? Koswarepen snar Allah ḇyuk ḇe malaikat sya ḇaḇemkei fa skinfir ro mankunsi. Rofyor Allah ifrur snonkaku ḇerandak, Adam ma Eva su, malaikat ḇenapes ḇyuk ḇaḇemkei ḇyena fa ḇyembroḇ faro Allah I. Ifrowes Adam ma Eva su fa suyakḇe mbroḇ faro Allah. (Kejadian 3:1-7; Fasasna 12:9) Refo ikofenḇair malaikat ine snori ḇa ḇaido rosai nasan ḇyeja rofyor ḇyembroḇ ḇaim. Ḇape, rofyor ifrur ḇaḇembroḇ kwar anya, Refoya dap i ḇe Setan, isoine ”Manḇesampampum” ma Ibiris, isoine ”Manḇeanonef”.​—Matius 4:8-11.

Faḇye kaku, ḇaḇembroḇ anna nasya isof ro fafisu ine. Ro awar Nuh aniwara, malaikat sibor ”sisasyarbur moḇ kankain sena” ro nanki. Sado ḇe supswan, sfadwer si ḇe snonkaku ma sifrur fararur farḇuk ḇeḇyeḇa, ine iḇese ro kankenem ḇekaku sena ro nanki iyaswa.​—Yudas 6; Kejadian 6:1-4; 1 Petrus 3:19, 20.

Bon risai nari malaikat ḇeḇarḇor ansya sismaina? Randak aniwara fyor Allah ḇyuk faḇruḇ ḇeba fa myunpres roi nakam ḇero supswan ine, malaikat ansya sfadwer si ma skaḇer ḇe nanki. Ḇape, Allah imewer malaikat ḇeḇarḇor ansya skaḇer ḇe moḇ ”papoik sedi” ro randak ya. Mboi, Allah isawen si ro ’aḇyaḇ pampan [rurya]’ isoine Tartarus. (Yudas 6; 2 Petrus 2:4) Setan Ibiris i iso ḇefara fararur ro hantu-hantu sya, snar iso ḇe ’mananir ro [hantu-hantu sya]’ ima isewar ker fa ’fyarari malaikat ḇesren’.​—Matius 12:24; 2 Korintus 11:14.

Refoya fyarkor snar Karajan Allah, ḇyepoik ro nanki, dores ro 1914. * Ramnai, Allah iyaw Setan ma hantu-hantu ḇyesi bur nanki ma siyar monda ro supswan ine. Roi ḇeḇarḇor ḇero moḇ nakam ma fararur farḇuk ḇeḇyeḇa ḇefrur supswan ine fa iḇyeḇa, nama nfasnaiḇair Setan ma hantu-hantu ḇyesi fararur ḇeḇarḇor ma masasor senairi.​—Fasasna 12:9-12.

Imbape ḇekakuya iso, roi ḇeḇyeḇa ma roi ḇeḇarḇor syadi komam ro baboine nḇairbos snar ḇaḇepapoik sena kero monda nari napromes. Fyoro werḇa, mankun rur ḇerarmomen ansine nari simnai ḇeri. Rofyor Karajan Allah ḇyepoik faro supswan ro swaf wampasi wambarek ri 1000, na malaikat ḇeḇarḇor ansya sna swaf oser ḇepupes wer fa sifrowes snonkaku sya. Raposa, nari Allah myunpres si isof fyoro-fyoro.​—Matius 25:41; Fasasna 20:1-3, 7-10.