Refoya ikofenḇair snar insama Allah marisen Ḇyena ndarirya, fyorno ido Allah iwan malaikat sya fa skadaunwarek kawasa Ḇyesi. (Mazmur 34:7) Raris:

• Rofyor Yahwe imbe myunpres mnu Sodom ma Gomora ḇeḇarḇor ani, malaikat risuru sufnoḇek Allah manfamyan Ḇyesi, isoine Lot warpu kina ḇyesi fa sisasyar.​—Kejadian 19:1, 15-26.

• Ro mnu Babilon ro fyor iwara, imbe sḇuk samamyai marmar faro snonkbor Ibrani rikyor kuker srap sko ro for. Mura, Allah ”iwan malaikat ḇyedi ma fyaspar manfamyan ḇyeskoya”.​—Daniel 3:19-28.

• Sisawen nabi Daniel i ḇe aḇyaḇ singa ma kyain iwaren ro aḇyaḇ anna. Ikofenḇair ḇo doḇe ismai samswen oḇa snar ’Allah ḇyedi iwan malaikat ḇyedi ma pyanoser singa sya sisḇasna’.​—Daniel 6:16, 22.

Fyorno ido, malaikat sya saksowarpu ro fararur ḇero sidang Kristen ro randak siwara. Sifrur nakam faro Allah marisen Ḇyena. Raris:

• Malaikat oso syeḇen kedwa ro bui ma fyarkin manwawan sya fa siḇaryas pdef ro Allah rum Ḇyedi.​—Farfyar 5:17-21.

• Malaikat fyarkin manḇaryas oso, isoine Filipus i fa ryaḇe nyan ḇeusḇa rofandu Yerusalem ḇe Gasa insama ḇyaryas faro snonkaku Etiopia ḇebur mumbre ro ḇaḇeari sena ro Yerusalem.​—Farfyar 8:26-33.

• Rofyor Allah ḇyuk swaf faro snonkaku ḇe Yahudi ḇa sya fa sakḇe snonkaku Kristen, malaikat oso fyasnai mankundi faro mambri sarar ḇaido sordade oso ro Roma, ḇenir ḇe Kornelius, ma iwan i fa dor manwawan Petrus i ḇe rum ḇyeja.​—Farfyar 10:3-5.

• Rofyor sisun manwawan Petrus i ro bui, malaikat oso isyae ma fyaspar Petrus i ro bui ani.​—Farfyar 12:1-11.

Kakuḇae, ro baboine na Allah iwan malaikat sya fa sifnoḇek ko kuker mujisat werḇa kwar raris moḇ ifrur faro snonkaku ḇero awar Refo siwara. Ḇape, ro fafisu koḇedine, Yesus doḇe, ”Ankankinem Ḇeḇye ro Ḇaḇesasoser ine nari ḇye ḇeḇaryas ro supswan ḇesiper fa ḇyesaksi faro er sya kam, raimnai insape awar papupes ya.” (Matius 24:14) Wakfawi snar malaikat sisya smamwarek fararur ro Kristus manfamyan ḇyesi roi sifrurna ke?

Syap Fasasna (Wahyu) ikofenḇair snar malaikat sya simyaren fa sifnoḇek kawasa ro supswan ḇesiper fa sakfarkor insa sakfawi Allah Yahwe ma marisen Ḇyena faro snonkaku sya. Manwawan Yohanes fyas, ”Yamam malaikat oso ḇese iroḇ ro farsyos nanki. Malaikat ani dun ḇaryas ro Ankankinem Ḇeḇye ḇekain fyoroya ma ḇyaryas faro snonkaku ro sup ine; isoine faro er oser-oser, keret, wos, ma kawasa. Malaikat ani kyaru kuker mkaren ḇeba: ’Mkomkak faro Allah, ma mkosandik baba ḇyedi! Snar fafisuya imnis kwar fa Allah ḇyemankara snonkaku. Mkoḇansuba faroi ḇefrur nanki, supna, soren ma war ssun na kam!’” (Fasasna 14:6, 7) Fawar nabor nasya ro fafisu koḇedine ḇefasnaiḇair snar malaikat sya sifnoḇek fararur ḇaḇeḇaryas ro supswan ine ḇesiper. Kaku ya, rofyor snonkaku ḇesasar oso imbror ma kyaḇer faro Yahwe I, ”nari raryaḇ isyadi fandu Allah malaikat ḇyesi” isya.​—Lukas 15:10.

Inja rosai nari ḇeḇejadi rofyor fararur ḇaḇeḇaryas ya posa kwar? Nari sordade ḇero nanki boiyaswa sya sifnoḇek Yesus Kristus, Raja robo raja kam, ro Allah Ḇepoik Syadi ras mamun ḇeba Ḇyedi, ro Armagedon. (Fasasna 16:14-16; 19:14-16) Malaikat ḇesambraḇ sya nari sḇeoser fa sḇeraryur ḇemamun ro Allah ras mankara Ḇyedi, ro fafisu ani Yesus Kristus nari ”myunsu faro [snonkaku] . . . ḇeḇeuser Ankankinem Ḇeḇye ro Yesus, Manseren koḇedi ḇa” sya.​—2 Tesalonika 1:7, 8.

Rarirya, kokyar kaku snar malaikat sya simarisen kaku faro ko oser-oser. Simarisen fa sifnoḇek snonkaku ḇemarisen ḇeyuffarmyan faro Allah insama sismai payamyum. Yahwe ḇyuk malaikat ansine ker fa sisambraḇser ma skadaunwarek manfamyan ḇesoasuser Ḇyesi ro supswan ine.​—Ibrani 1:14.

Inja, ko oser-oser fandun fa kofrur wos snemuk ḇefandun kaku. Koisya komarisen korower ankankinem ḇeḇye isya sḇaryas na ro supswan ḇesiper ine ke? Saksi-Saksi Yahwe ḇero supswan ḇesiper simarisen kaku sifnoḇek Au insama waksmai fainda ro farfnoḇek ḇeramuma ro Allah malaikat Ḇyesi.