SARA insape imnaisu ro fararur ḇyena ḇo myam ḇe farsyos iyaswa. Nya manfamyan ma binfamyan ḇebor ḇena fararur nabor, ḇape simarisen snar fyarkin si kuker fawinanem. Mboi, Sara mankundi dakmyaren fa dakfararur ro rum ya. Wawasenpan, isya damkepen ḇramin ḇemor ḇyesuya ḇo kyarauser roi nabore. Imbude insape isip kaḇer rum kruḇen ḇemuk. Kruḇen sifrur ro kambing burya naḇyeḇa kwar snaro samsam ya ndrapna ma mekem ya ifnakna ro taun ḇe taun. Ine nafrur fa Sara iswarepen snar sisae fa sikenem ro moḇ oser ḇa ro swaf kawan kwar. Myam mboi mandira kwar, orisyun nafrur fa farsyos iyaswa isnai farawriwek. Arwanja, myam Abraham * rya, ma kirine iwaf swari ibur muma ro nyan imbran ker ro na. Fyor myam swari imbran ro urek ḇefanam ya, marafrifya isnai ro mka ḇedoser ḇyedi.

Wampasi wambarek risamfur ḇyenande kwar rofyor Abraham dun kina ḇyesi fa simbranuk Warḇeki Efrat ḇe sup Kanaan. Sifawi moḇ imbe srayoḇ ya ḇa, mboi Sara imarisen ifnoḇek swari ḇesya kwar fafisu sifrur marandan anya snar ifawi swari duf fararur ḇefandun kaku fa ifrur mnis Allah marisen Ḇyena, isoine iso nari ḇekapar up ma er oso ḇesmai kyaremso ro Allah. Ḇape, rariso Sara ifnoḇek swari rai? Ima pyansnasem ma ḇyeumur wampasi wambarek ri 75 kwar. Imbude na kyara ḇo doḇe, ’Snar aya iso ḇe swa faro Abraham i, inja na rariso Yahwe asas ḇyena ndarirya rai?’ Kakuḇae na ḇyeḇirḇar, ḇaido imewer iwaf kawanwan wer.

Fyorno ido, na kakfuken fafisu risai Allah asas Ḇyena nari ndarirya kaku. Na komewer kowaf kawanwan wer, iba syadiwer rofyor kowaf kaker roi komander kaku na. Rosai kofarkor ro bin ḇena kakyar ḇesambraḇ ine?

Kina ine insape skaḇer muma ro sup Masir. (Kejadian 13:1-4) Sḇarek ro rum kruḇen ro moḇ ḇekaki ro ḇar wamurem Betel, ḇaido snonkaku Kanaan sya sap kota ani ḇe Luz. Ro moḇ ya, Sara bisa myam mura ḇe Sup Ḇaḇeasas anya ḇesiper. Snonkaku Kanaan mnu-mnu sena ma sampak ḇeyuk ḇe sup ḇese naisya ro dia. Myam mboi moḇ nane napyum raris mnu marin ḇyeja ḇa. Sara iba ro Ur, kota oso ḇero Mesopotamia, kawanwanya kilometer ri 1.900 ro moḇ ani. Ḇar ḇeba ro kina ḇyesya sḇarek ro kota ibur ani. Ro kota ḇenana ine, sifrur pasar ma toko naisya nabore. Sara rum ḇepyum ḇyedi kyain ro dia, sifrurna kuker tembok ma sengk ḇesambraḇ, ma sfasos war ḇesren ḇedaf! Ḇape, fyor kokara bin ḇesoasuser ine myam ḇe ḇar wamurem ḇo ḇyesneso ma myander ḇe rum ḇepyum ḇyedi ibur kwar ani ido, kokara sasar.

Mampan rosai manwawan Paulus fyas ro fafisu indokada swaf wampasi wambarek ri 2.000 ḇe ḇarpon ya. Fyasepen Sara ma Abraham kakyar suḇena ḇo doḇe, ”Mnu seknam ro ma sibur kwar ani skaraya ḇa. Snar rarirya ido sisma fafisu kwar faskaḇer  ḇemnu ani wer.” (Ibrani 11:8, 11, 15) Sara ma Abraham sumander ker fafisu iwara ḇa. Suna kakara ḇerarirya ido, na suisya suyun snemuk kwar fa sukaḇer. Mboi fyor sukaḇer ḇe Ur ido, nari susmai fararur ḇepyum syadi kaku ro Yahwe I ḇa. Ma nari snonkaku syakam sḇefnder su kwar, nari kakyar suḇena nḇuk farari ḇemnis faro snonkaku riyuta ma yuta sya ḇa.

Sara myam ḇe ḇarpur ḇa, ḇape myam monda ḇe ḇarpon. Inja, ifnoḇek swari ḇesya kwar ro fafisu sḇarek ro sup ani. Rofyor imbe sraḇe moḇ ḇese wer ido, dakfararur fa fyasos mnis kaḇer rum kruḇen, dun rofanfan sya, ma dakfrur pyan rum kruḇen fa dores wer. Fyarmkuepen rofyor ismai samswen ma fafisu ḇefadadwer. Rofyor Yahwe dap kaḇer asas Ḇyena faro Abraham i, dakawos wos osoḇaḇeri ḇekur ḇe Sara i!​—Kejadian 13:14-17; 15:5-7.

Inja, Sara dun snemuk fa ikofenḇair aw ḇyena faro Abraham i. Wakwasenpan sneḇaḇir ḇyedi ro ras ani rofyor ikofen, ”Waswar aya ke! Yahwe idwarek aya fa yakapar romawa.” Ramnai dor swari fa fyarḇuk kuker binfamyan ḇyedi Hagar i, insama Abraham nya romawa. Wawasenpan fafardun Sara ḇyaḇirna rofyor dor swari fa ifrur roi anna! Ro fafisu koḇedine, Sara fararyor ḇyenane smamna ḇe roi ḇefrur kanandor. Imbape, ro fafisu ani rofyor snon oso fyarḇuk kuker binswa risuru ḇaido binswa ḇese ḇero ḇandi insama nya romawa ido, ima roi ḇefrur kanandor risyaḇa. * Na Sara kyara ine iso nyan insama Allah marisen Ḇyedi fa ifrur er oso roro Abraham i ndarirya ke? Kofawi mnis roi ḇeḇewari ḇa, ḇape kuker sne ḇesiper Sara ifrur roi ḇesamswen anine. Rosai Abraham ifrurya? Kowasya kada ”imnaf rosai [Sara] ikofen na”.​—Kejadian 16:1-3.

Fawar anna nfasnaiḇair Yahwe iso ḇefara Sara i fa ifrur fararyor insanja anna ke? Roḇa. Ḇape, fararyor ḇyenane nfasnaiḇair moḇ snonkaku koine kokara ndraya. Kyara monda Allah iso na ḇekamar samswen ḇekuri na. Kyara ḇaḇeri snar Allah bisa ḇyuk nyan ḇese fa isaeḇur ro samswen ḇyena. Sara fararyor ḇyenane nari nun samswen kaku ḇe mankundi. Ḇape, rosai ifrur anya nfasnai ima fyandun mankundi ḇa. Baboinema snonkaku ḇebor sisewar syadi fandun mankun sena ḇardi ro snonkaku ḇesesya. Inja, Sara ifrur roi ḇepyum kaku. Koisya kofakapon Allah marisen Ḇyena syadibur ro marisen mankun koḇena ido, nari kofarari Sara kakyar ḇyedi.

Fyoroḇa mura Hagar imoḇesḇa. Ine nafrur fa  kyara i mande iba syadi ro Sara i. Muniwara myamkyof Sara i. Inja, Sara fyafko kaku snar pyansnasem! Rofyor ismai farfnoḇek ro Allah ma Abraham i, Sara ḇyuk samamyai faro Hagar i kuker nyan neḇekofenḇair ro Refoya ḇa. Ramnai, Hagar kyapar romawa oso ma nyir i ḇe Ismael. Swaf wampasi wambarek ḇyenande kwar. (Kejadian 16:4-9, 16) Farfyar ḇeuserya wer ikofenḇair Yahwe ananun Ḇyena faro Abraham ma Sara su. Fafisu ani Sara ḇyeumur 89 ma swari 99. Ananun anna nafrur kanandor kaku faro su!

Yahwe ḇyeasas wer faro maniḇoḇ Ḇyedi Abraham i, snar nari ifrur up ḇyesi fa sibor kaku. Allah ḇyuk kako snonsnon ḇebabo faro i. Ḇeponya sor i ḇe Abram. Ḇape, Allah fyadwer snonsnon ḇyedi ḇe Abraham, knam ya iso ’Kma ro Er-Er Ḇebor’. Kirine, insape ro randak kaku Allah ikofenḇair Sara fararur ḇyena fa ifrur marisen Ḇyedi. Snonsnon Sarai, imbude knam ya iso ”Ḇefamfaḇri Ker”, Allah fyadwer i ḇe snonsnon kofawi kam kwar isoine, Sara. Knam ro snonsnon ine iso ”Infun”! Yahwe ikofenḇair rosai ḇefnai fa ḇyuk snonsnon anine faro bin ḇefrurpyum ine, ”Nari yaḇebarakas i ma yaḇuk kako ḇe au romawa oso ro i, nari yaḇebarakas i ma nari ḇye er-er sya, raja er-er sya nari srama ro i.”​—Kejadian 17:5, 15, 16.

Yahwe asas Ḇyena kuker up nari ḇeyun barakas faro er-er syakam nari ndarirya roro Sara romawa ḇyedi! Allah ḇyuk snonsnon ḇe romawa ani isoine Ishak, knam ya iso ”Marafrif”. Fyor Abraham ifawi randak snar Allah imarisen ḇyebarakas Sara i fa kyapar romawa mankun ḇyedi, kyunem ma imbrif ḇeri. (Kejadian 17:17) Kyandor ma iryaḇ kaku. (Roma 4:19, 20) Ḇape, Sara inido?

Fyoroḇa mura, snon rikyor ḇemandaman, skorama ḇe Abraham rum kruḇen ḇyedi. Ras ani dares ya iba kaku, ḇape imbeswa ḇesinan kwar suine fasawdam susaser snon ḇedakam anskoya. Abraham ikofen ḇe Sara i, ”Wasamberen! Wun tepung ḇepyum barborya sea rikyor, waramesna ḇe adonan ma wafrurna ḇe mamami ḇesapdupen.” Ro fafisu ani, imbe sisaser snonkaku ḇedakam sya ido, fandun fa sifrur fararur nabore. Abraham myam monda ḇa swari duf fararur nakame. Myun ḇeri sapi oso ma fyasos anan ma aninem nabore. (Kejadian 18:1-8) Snon anskoya skoma Allah malaikat Ḇyeskorya! Imbude manwawan Paulus iswarepen roi anine rofyor fyas, ’Mkofanander awer mkoḇuk moḇ ḇeḇeryar faro snonkaku, snar fararur ḇerarirya snonkaku ono kuker fawawi ḇa sedakam malaikat ono kwar’. (Ibrani 13:2) Wamarisen fa wakfarari Abraham ma Sara ḇaḇenaḇye suḇena ine ke?

Rofyor malaikat oser dap kaḇer Allah asas Ḇyena ḇe Abraham snar Sara nari kyapar romawa oso, Sara ryower ro rum kruḇen ḇyedi. Sara kyain kyara snar kyapar romawa ro fafisu ḇyebinsar kwar ima roi ḇefrur kanandor kaku, inja imbrif ro mankundi. Ikofen ḇo doḇe, ”Yamaryoi kwar, tuan yedi kako ḇyemansar kwar, inja nari yasmai kaku marasrisen ine ke?” Malaikat ani isonek Sara ḇo ifuken, ”Roi oso isya syamswen syadi ḇe Yahwe I ke?” Sara imkak kaku, isanowareki ma nane nsasar ḇa. Doḇe, ”Yambrif ḇa!” Malaikat ani ikofen wer, ”Roḇa! Ausya wambrif.”​—Kejadian 18:9-15.

Snar Sara imbrif, ine kyurfasnai nya kakyar oḇa ke? Oroḇaḇeri. Refoya doḇe, ”Snar kakyarya, Abraham ma Sara suyaḇen romawa kpu, rofyor Abraham ḇyemansar kaku kwar ma Sara ḇinkundi pyansnasem. Abraham ikyar nari Allah ifrur namnis asas ḇyedi.” (Ibrani 11:11) Sara myamḇir kaku Yahwe I. Inja ifawi nari Yahwe ifrur mnis asas Ḇyena kam. Kokame kofandun kakyar ḇesambraḇ ḇemnis rarirya. Fandun fa komamḇir kaku Allah ḇeḇeyap ro Refoya. Kofrurna ido, nari kofawi rosai ḇefnai fa Sara nya kakyar ḇerarirya. Kakuḇae, Yahwe ima inapes ma ifrur asas Ḇyena ndarirya ḇesya kwar. Fyorno ido, ifrur mnis asas Ḇyena kuker nyan ḇefrur kanandor ko ḇaido ḇefrur kamambrif ko!

Fyor Sara ḇyeumur taun ri 90, ras iwafwaf kawan kaku ya ryama. Kyapar romawa oso ḇe swari  iswar ya, ḇyeumur taun ri 100 kwar! Abraham nyir romawa ani ḇe Ishak, imnis Allah parenta Ḇyena, knam ya iso ”Marafrif”. Na kowasen Sara imbrus mboi imarafrif kuker marisen ḇo ikofen, ”Allah dun marafrif ḇe aya kwar, snonkaku oser-oser ḇerower roi ine nari simbrif snar aya.” (Kejadian 21:6) Sasuref Yahwe ḇyuk kuker mujisat ine, na nafrur Sara imarisen kaku isof ro ras-ras kankenem ḇyedi imnai. Ḇape, ine kako nun fararur ḇeba kaku faro i.

Rofyor Ishak ḇyeumur taun ririm, snari pyafi ro aninem sus ma kina ḇyesi sifrur munara. Ḇape, roi nakam ḇa nambran kuker payamyum. Sara myam mboi Ismael, Hagar romawa ḇyedi ḇyeumur taun ri 19 kwar, ikyaren ker Ishak i. Inema farfnak monda risyaḇa. Ḇarpurya, manwawan Paulus doḇe Ismael ḇyewayam Ishak i. Sara ḇyaḇir roi Ismael ifrur nane nari nun roi ḇemun ḇe romawa ḇyedi. Sara ifawi romawa ḇyedine duf fararur ḇefandun kaku fa ifrur mnis Yahwe marisen Ḇyedi. Inja, imkak ḇa fa ryama ḇe Abraham ma dawos snai ḇe i. Dor Abraham i fa iyawbur Hagar ma Ismael su.​—Kejadian 21:8-10; Galatia 4:22, 23, 29.

Moḇsa Abraham kyara rai? Kowasya kada, ”Rosai ikofen kuker romawa ḇyedi nafrur fa Abraham imarisen ḇaḇeri.” Abraham iswar kaku Ismael i, ma roi ḇyaḇir ine nafrur fa kyara mnis ḇa. Imbape, Yahwe ima ifawi mnis kaku fafisuya, inja ifnoḇek Abraham i. Kowasya kada, ”Mura Allah ikofen ḇe Abraham i: ’Wafafayaf awer faro rosai Sara ikofen kuker romawa ani ma binfamyan bani. Rwower roi ikofen na, snaro rosai nari ḇeḇeyap ḇe up besi iso nari ndrama roro Ishak i.’” Yahwe ḇyuk kakakyar ḇe Abraham i snar nari fyasos fandandun ro Hagar ma romawa ḇyedi. Abraham snon ḇesoasuser ani isouser na.​—Kejadian 21:11-14.

Sara ima binswa ḇepyum ḇefnoḇek kaku Abraham i. Ifrur swari imarisen kuker wos ḇyena monda ḇa. Rofyor myam roi ḇesamswen isya nkur kina ḇyedi ma nawyaye fafisu ḇepyum na sismai ro ras-ras ḇeramaya ido, dawosbos na faro swari. Ḇape, inema kyurfasnai ḇa ḇyesyowi i ḇa. Iba syadiwer, manwawan Petrus kako, snon ḇefarḇuk kwar, dap Sara i ḇe binswa ḇeḇuk farari ḇepyum snar ḇyesyowi kaku swari. (1 Korintus 9:5; 1 Petrus 3:5, 6) Kaku ya, rofyor Sara dawos roi ḇesamswen ani ḇa ido, ima ḇyesyowi Abraham i ḇa, snar bisa nun bon ḇeḇyeḇa faro Abraham ma kina ḇyesi kam. Kuker mayaryaren Sara dawos rosai fandun fa ikofen na.

Binswa ḇebor sya sesyowi Sara farari ḇyenane. Sfarkor ro Sara i moḇsariso sawosbos kaku kuker mayaryaren faro swa sesya rai. Fyorno ido, imbude binswa sino sisya simarisen fa Yahwe ifnoḇek si raris moḇ ifnoḇek Sara i raya. Ḇape, sifarkor ro Sara fa sna kakyar ḇesambraḇ kaku, saswar, ma ḇaḇekaḇaḇaḇ.

Yahwe mankundi fyadwer snonsnon ro bin ḇefrurpyum ine ḇe Sara ḇaido ”Infun”, ḇape imewer snonkaku sya sifrur i raris inai raja. Naiso ḇefrur fa rofyor imar ro fafisu ḇyeumur wampasi wambarek ri 127, Abraham ”ḇyesneso ma kyanes kaku Sara i.” * (Kejadian 23:1, 2) Myander kaku faro ”Infun” iswar anine. Yahwe I kako myander bin ḇesoasuser ine ma nari ḇyawes kaḇer i fa ikenem ro firdaus ro supswan. Kankenem fyoro ḇefo kuker aski nefasos ḇe Sara ma snonkaku syakam ḇefarari kakyar ḇyedi.​—Yohanes 5:28, 29.