1-3. (a) Rosai ḇeḇejadi rofandu Euodia ma Sintikhe su? (b) Rariso roi ḇesamswen ḇeradirya bisa fa koḇinkwanbur na? (Mam sonin ro randak artikel ine.)

KOḆESYOWI kaku Refoya snaro Syap ine ryamuma ro Allah. Refoya naser ananun ḇefnoḇek ko fa koḇinkwanbur roi ḇesamswen. Refoya kako isonek ko rofyor kofrur sasar. Rariso kakara koḇena faro ananun Refo ḇyukna ine? Rwama komam bin risuru ro abad randak ya, isoine Euodia ma Sintikhe. Refoya ikofen snar susya suna roi ḇesamswen, mboi Refo ikofenḇair ḇeko ḇa rosai ḇefnai ya. Rwama kokarapan rosai ḇeḇejadi kwar ya.

² Imbude Euodia dor naek srar ḇeḇeso sya fa sanan ro rum ḇyedi. Ḇape, dor Sintikhe i ḇa. Ḇarpur mura, Sintikhe ryower snonkaku sya sfawar roḇean sanna nanpyum kaku. Inja imsor fafaya ḇa. Imbude kyara, ’Rosai ḇefnai fa dor aya ḇa? Numa nuḇebati pyum ḇesyabo.’ Sintikhe kyara snar Euodia iswar faro i ḇa inja ḇyinkwanbur i. Inja, Sintikhe dor naek srar insanja ansya wer fa saknan kuker i, mboi dor Euodia i ḇa! Roi ine nafrur fa snonkaku ḇese ḇero sidang sya sfafayaf. Refoya fyas  snar Paulus isonek srar suine ma dor su fa suḇedasi. Imbude surower ananun ro Paulus i ma sufarmyan pdef ḇe Yahwe I kuker marisen.​—Filipi 4:2, 3.

³ Ro sidang ya, fyorno ido ko kako kona samswen kuker naek ḇaido srar oso. Ḇape, rofyor koso mnis ananun ro Refoya ido, na kofrur mnis roi ḇesamswen ḇeradirya. Iba syadiwer, na bisa fa koḇinkwanbur na. Ma, rofyor kosouser ananun ḇero Refoya ido, ine kyurfasna koḇesyowi kaku Syap ḇerama ro Yahwe I.​—Mazmur 27:11.

4, 5. Ananun rosai Refo ḇyuk ḇeko fa kofara sneḇaḇir koḇena?

⁴ Fyorno ido, samswen fa kofara sneḇaḇir koḇena. Imbude sino sisya skoryae ko ḇaido sifrurpyum ko ḇa snaro budaya, kif koḇena moḇ isnai raya, ma moḇ kosnai raya. Nane nafrur fa kofafardun ḇaido komsor. Ma, nari sne koḇena naduf syadi rofyor ḇefrur roi ine iso naek srar koḇesya. Ananun ḇero Refo rosai na ḇefnoḇek ko?

⁵ Yahwe ifawi rosai na ḇeḇejadi rofyor snonkaku sya sfara sneḇaḇir sena ḇa. Rofyor kofafayaf ḇaido komsor ido, na bisa kawos ma kofrur roi oso ro ḇarpurya kofafko na. Yahwe fyarkor ko fa kofara sneḇaḇir koḇena. Refoya doḇe, ”Rur bedi imsor fasawsaw awer”. Rofyor kosouser ananun ine fa komsor fasawsaw ḇa ido, kwarapan samswen ḇebor na bisa fa koḇinkwanbur na! (Wasya Pengkhotbah 7:9; Amsal 16:32.) Refoya ḇyuk kako anun ḇeko fa koḇuk ampun faro min koḇesi. Yesus ikofen kako snar rofyor koḇuk ampun ḇe snonkaku ḇesesya ḇa ido, nari Yahwe dakḇuk ampun ḇeko ḇa. (Matius 6:14, 15) Inja fandun fa ḇekaḇaḇaḇ syadi ma wamarisen syadi fa buk ampun ḇe ḇesesya ke?

6. Rosai na ḇeḇejadi rofyor kofara sneḇaḇir koḇena ḇa?

⁶ Rofyor kofara sneḇaḇir koḇena ḇa ido, nari komsor ker faro snonkaku oso ma iba syadiwer na kayin i. Oroḇa ido, na kofrur fa snonkaku ro sidang siso nyan koḇena. Kofasnai rya komsor i ḇa ma kayin i ḇa, mboi ḇarpurya nari snonkaku ḇesesya sfawi kako sneḇaḇir koḇena. Ine na nafrur fa naek srar sya sḇinkwanbur ko. (Amsal 26:24-26) Penatua sya nari sisewar fa sifnoḇek ko kuker Refoya fa kosawen masasor ma ayayin koḇena, ramnai koḇuk ampun faro snonkaku ani. (Imamat 19:17, 18; Roma 3:11-18) Komarisen kosmai farkankin ro Refo ḇerama ro penatua sya ke?

7, 8. (a) Rariso Yahwe fyarkin kawasa Ḇyesi rai? (b) Farkankin riḇeso rosai monda kosrow ro Refoya, ma rosai ḇefnai fandun fa kosouser na?

⁷ Yahwe fyarkin ma fyarkor snonkaku ḇero organisasi Ḇyedi ro supswan ine sya. Rariso ifrurna rai? Ifrurna roro ’manfamyan ḇeḇesyowi ma ḇefawi nananem’ Kristus ryem kwar fa ’sḇebru ro jemaat’ ya. (Efesus 5:23; Matius 24:45-47) Raris badan pimpinan ro abad randak sya, manfamyan ine sya sisyowi kaku Refoya snaro naser Allah Wos Ḇyena. (Wasya 1 Tesalonika 2:13.) Farkankin riḇeso rosai monda kosrow ro Refoya?

⁸ Refoya dor ko fa koso mnis ro fananjurya pdef. (Ibrani 10:24, 25) Kosmai farkarkor kako fa kona fawawi oser ro rosai Refo fyarkor na. (1 Korintus 1:10) Allah Wos Ḇyena dor kako ko fa ’kosewar bepon [Karajan]’. (Matius 6:33) Refo iwan kako ko fa koḇaryas ro rum ḇe rum, ro moḇ snonkaku sibor, ma ro moḇ nakam. (Matius 28:19, 20; Farfyar 5:42; 17:17; 20:20) Syap ḇerama ro Allah iwan penatua sya fa sfaduru sidang ya isren pdef. (1 Korintus 5: 1-5, 13; 1 Timotius 5:19-21) Ma, Yahwe dor ko fa kofaduru baken koḇena nasren ma kosawen swaruser ma rari ḇeḇyeḇa dayin na.​—2 Korintus 7:1.

9. Mansei Yesus ryem fa ḇefnoḇek ko insa kofawi kaku Allah Wos Ḇyena ya?

⁹ Sino sisya sḇaḇir snar snonkaku osoḇaḇeri ḇefnoḇek si ḇa rariryano, bisa sfarkor Refoya. Ḇape ro taun 1919 ya, Yesus ḇyuk ’manfamyan ḇeḇesyowi ma ḇefawi nananem’ sya fa sifnoḇek Allah kawasa Ḇyesi fa sifawi kaku farkarkor ḇero Refoya ma sisouser na. Kuker kosouser ananun ḇero Refoya ido, na kofaduru sidang ya fa isren pdef, ḇyeaski, ma ḇyeoser. Kwarapan, ’Nari yasoasuser faro Yesus ma yaso mnis farkankin ḇerama ro manfamyan ḇeḇesyowi sya ke?’

10. Rariso Yehezkiel fyasnaḇair Yahwe organisasi Ḇyedi ḇero nanki ya?

¹⁰ Ro Refoya kofawi snar Yahwe manfamyan Ḇyesi ro nanki sya kako ḇyeorganisasi si. Imnis raris, Yehezkiel ismai fasasna kuker Yahwe isya ro kereta oso yabori, ima iruren fasaw ḇe moḇ nakam imnis kuker rosai Yahwe imarisen na. (Yehezkiel 1:4-28) Kereta ani fyasnaḇair organisasi Ḇyedi ro nanki, ḇeruren fasaw imnis kuker farkankin Ḇyedi. Ma, ine nawyae organisasi Ḇyedi ro supswan ya. Kwarapan fararwei ḇeba kaku ḇeḇejadi ro Allah organisasi Ḇyedi ro swaf taun risamfur ro ḇarpur ine. Waswarepen snar Yahwe iso ḇefarkin fararwei ine na. Fyoro werḇa, nari Kristus ma malaikat ḇyesi skakok dunya ḇeḇarḇor ine. Rarirya, snonkaku ḇekoryae Yahwe ma snonsnon Ḇyedi ḇaido ḇeyawos nyan ḇyeḇepoikya na sisya werḇa!

11, 12. Rosai monda Yahwe organisasi Ḇyedi ifrur kwar ro rasras ḇepupes ine?

¹¹ Kwarapan rosai Yahwe organisasi Ḇyedi ifrur ro rasras ḇepupes ine. Babawes. Naek srar seutin ma utin sfararur marḇak fa sḇawes kantor pusat Saksi-Saksi Yahwe ḇebabo ro Warwick, New York, AS. Naek srar sesyaran ma syaran ḇesesya ro supswan ḇesiper simarisen siso ro babawes Balai Karajan ma kantor cabang. Sismai akurfasna ro Departemen Rancang/Bangun Sedunia. Kokofen kasumasa faro fararur marḇak sena kam! Ma Yahwe manfamyan Ḇyesi ro supswan ḇesiper sḇuk pipi sena fa nafnoḇek fararur babawes anine. Yahwe ḇyebarakas sne ḇerun ma soasuser sena.​—Lukas 21:1-4.

¹² Farkarkor. Yahwe imarisen fyarkor kawasa Ḇyesi. (Yesaya 2:2, 3) Kwarapan farkarkor ḇebor kosmaina. Imnis ra, Sekolah Dinas Perintis, Sekolah bagi Penginjil Kerajaan, Sekolah Gilead, Sekolah Dinas Betel, Sekolah bagi Pengawas Wilayah dan Istri, Sekolah bagi Penatua Sidang, Sekolah Pelayanan Kerajaan, ma Sekolah bagi Anggota Panitia Cabang dan Istri. Osower ido, bisa fa kowasya Refo ma publikasi ḇese ro wos riutin ro situs Web koḇedi, jw.org. Ro situs ine, ḇar khusus faro romawa ma kina sya nasya kako, ma ḇar ro abar isya. Inja Ausya buk jw.org ro ḇaḇeḇaryas ma nadi ro kina Bedi ke?

13. Fakamamar rosai Yahwe kawasa Ḇyesi sismaina?

¹³ Inema syowi ḇeba kaku fa kakro ḇar ro Yahwe organisasi Ḇyedi ma kofawi rosai dor ro ko! Kakuḇae, snar kofawi rosai Allah imarisenna, inja kosouser faro I ma kofrur roi ḇenapes ima fakamamar koḇenairi. Ma snonkaku sibor simarisen sifrur roi ḇeḇyeḇa rariryano, fandun fa kofarari Yahwe fa ’kayin rosai ḇeḇarḇor’.  (Mazmur 97:10) Komewer komnis kuker snonkaku ḇekara snar ”roi ḇepyum ima iḇyeḇa ma roi ḇeḇyeḇa ima roi ḇepyum”. (Yesaya 5:20) Snar komarisen kofrur fa Yahwe imarisen inja, kun snemuk fa kosren ro roi nakam. (1 Korintus 6:9-11) Yahwe ananun Ḇyena ro Refo nefainda faro ko. Koswar I ma komarisen kosouser faro I. Iso ḇefnai fa koso mnis farkankin Ḇyena ro rum, ro sidang, ro moḇ kofararur, ro rumfarkor, ḇaido ro moḇ sairirya monda kako. (Amsal 15:3) Nari kawos ro ḇar risai monda fandun fa kosoasuser faro Allah I.

14. Rariso sinan sya bisa fa sisoasuser faro Yahwe I?

¹⁴ Koḇuk farkarkor ḇe romawa sya. Ro Refoya, Yahwe fyarkor sinan sya kuker nyan rariso sfarkor romawa sesya. Snonkaku Kristen sya fandun fa sisasor si insama dunya dawninyan kakara sena ḇa. (Efesus 2:2) Imnis ra, ro moḇ ḇeḇeso imbude kma oso kyara bo dobo, ’Ro moḇ ayedi, bin sya siso ḇefarkor romawa sya.’ Ḇape, Refoya dor kaku faro kamam sya fa sfarkor romawa sesya fa sifawi Yahwe I. (Efesus 6:4) Sinan ḇeswar faro Yahwe I sya nari simarisen insama romawa sesya sfanam faro I, raris rosai Samuel ḇyaḇir rofyor iḇaḇa kaker.​—1 Samuel 3:19.

15. Rariso bisa fa kosouser pdef faro Yahwe I rofyor kofrur snemuk ḇefandun kaku?

¹⁵ Kofrur snemuk. Rofyor kofrur snemuk ḇefandun kaku ḇaime, komarisen kofawi rosai Yahwe kyarana insama kosoasuser pdef faro I. Refo ma Yahwe organisasi Ḇyedi bisa nafnoḇek ko. Imnis raris, sinan ḇeḇeso ḇefararur ro sup bondi ḇaido moḇ ḇese, sun snemuk fa srir kapira sesya fa sḇarekus kina sesya ro mnu sena. Sifrur radine insama bisa fa sfararur pdef fa sisewar  pipi. Kakuḇae, inema snemuk mankun sena. Ḇape, fandun fa inbeswa sukara resari, ’Rosai Yahwe mamam Ḇyedi faro snemuk nufrur nane?’ (Wasya Roma 14:12.) Inja, rofyor kofrur snemuk ḇefandun kuker kina koḇesi ma fararur koḇena ḇaime, ipyum ya kosewar fa kofawi rosai Refo ikofen kuker roi anna. Kofandun farfnoḇek ro Kma koḇedi snaro jadi fa ’kofara nyan koḇena’ ḇa.​—Yeremia 10:23.

16. (a) Rofyor awin oso kyapar kwar, rosai kyinfir fa ifrur ya? (b) Rosai ḇefnoḇek i fa ifrur snemuk ḇepyum?

¹⁶ Inbeswa oso suisya suraḇe sup ḇese. Ḇarpur mura, suna romawa ma sufrur aw fa surir romawa ani faro kpu ḇyesuya ro mnu sena. Ḇape ro fafisu ani, eḇe bin ya fyarkor Refo kuker Saksi Yahwe. Fyarkor snar nya fakamamar fa fyarkor romawa ḇyedi fa ifawi Yahwe I. (Mazmur 127:3; Amsal 22:6) Raris rosai fyarkor kwar ro Refoya, dor farfnoḇek ro Yahwe I fa ifrur roi ḇepyum. (Mazmur 62:7, 8) Dawos kako samswen ani kuker inbesrar ḇeḇuk farkarkor ḇe i ma dawos kuker snonkaku ḇesesya ro sidang. Karyer ma bati ḇyesya sidif i fa ryir kapira ḇyedi faro kpu ḇyesuya. Ḇape, ifawi snar inema roi ḇepyum ḇa. Swari myam snar naek srar sya sḇuk farfnoḇek ḇebor faro swari ma kapira suḇedi. Imarisen kaku, inja fyarkor Refo ma iso fananjur kayam kuker kina ḇyedi. Wawasenpan rariso marasrisen ro awin ḇebabo ine snaro ḇyaḇir Yahwe kyarem nadi ḇyena!

17. Rofyor koḇuk farkarkor Refo, farkankin rosai fandun fa koso mnis na?

¹⁷ Koso mnis farkankin ya. Rofyor kosoasuser faro Allah I ido, nari koso mnis farkankin ro organisasi Ḇyedi. Imnis raris, komampan rosai fandun fa kofrur ḇeri rofyor koḇuk farkarkor Refo kuker syap Apa yang Sebenarnya Alkitab Ajarkan? Kosmai farkankin fa kofasos menit riḇeso rofyor komnai ro farkarkor ya insama nafnoḇek ḇefarkor ya fa myamḇir syadi Yahwe organisasi Ḇyedi. Bisa fa koḇuk vidio Rosai Sifrurna ro Balai Karajan? ma brosur Siapa yang Melakukan Kehendak Yehuwa Dewasa Ini? Rofyor fyarkorpres syap Alkitab Ajarkan ramnai, bisa fa kofnoḇek ḇefarkor Refoya insama ’kakyar ḇyena nadworen syadi’. Iba syadiwer, rofyor ḇyebaptis kwar kako fandun fa kofarkor i pdef kuker syap ”Mkokenem Ḇesya Kwar ro Fadadiren Allah Saswar Ḇyedi.” (Kolose 2:7) Inja waso mnis farkankin ro Yahwe organisasi Ḇyedine ke?

18, 19. Faro rosai monda fandun fa kokofen kasumasa ḇe Yahwe I?

¹⁸ Fandun fa kokofen kasumasa ḇe Yahwe I faro roi nabore! Imnis raris, ”ro i kokenem, komararer, koisya”. (Farfyar 17:27, 28) Ḇyuk kako Syap Ḇyedi, Refoya ḇeko. Raris snonkaku Kristen ḇero Tesalonika sya, komarisen kaku faro syap ine snar syap ine naser anun ḇeramuma ro Allah.​—1 Tesalonika 2:13.

¹⁹ Kuker farfnoḇek ro Refoya, na kofanam faro Yahwe I, ma I kako na fyanam faro ko. (Yakobus 4:8) Kokofen kasumasa kaku snaro Kma koḇedi dor ko fa koryur kuker organisasi Ḇyedi! Koḇaḇir raris manḇefas mazmur ḇefas radine, ”Mkokofen kasumasa faro Yahwe, snaro iso ḇeḇenaḇye ya; sne ḇeḇenaḇye ḇyena ḇefo saswar isya isof fyoro.” (Mazmur 136:1) Ro mnuk nakam ḇero mazmur ani, manḇefas mazmur dap kaḇer ker wos ”sne ḇeḇenaḇye ḇyena ḇefo saswar isya isof fyoro”. Imboḇae, rofyor kosouser pdef faro Yahwe I ma koso mnis farkankin ro organisasi Ḇyedi ido, nari ḇyuk kankenem fyoro ḇeko ma ryir ko ḇa isof fyoro-fyoro bis!