AWAWOS ḆEPON YA | FASASNA KUKER NANKI
Fakfuken kuker Manseisi bero Nanki Sya
Fafisu ono nwa fakfuken kuker rariso nanki ya isnai rai ma manseiso ḇekenem rodiwa ke? Rarirya ido, wemir ḇena fakfuken ḇeradine ḇa. Ro swaf taun syaran ma syaran, snonkaku sibor sna kakara ḇesisye kuker roi ine. Sino sikyar snar nanki ima moḇ sinan apus sesi ro ḇepon siwara sikenem ro na inja fandun fa sesyowi si. Ḇesesya wer skara snar ima moḇ ḇefo kuker aski ma ḇeknon, ma ḇekenem rodiwa iso malaikat ma snonkaku ḇefrurpyum ḇemar kwar sya. Sino sisya kako skara snar nanki iso rum faro dewa se yuta riutin.
Snonkaku sibor sisya skara snar nari kopok fa kofawi kaku nanki yaḇa snar snonkaku osoḇaḇeri ḇemam moḇ ine fa ḇerama ḇekofenḇair na ḇeko. Mboi, kakara ḇeradine nsasar. Yesus Kristus ikenem kwar ro nanki, rofyor ryama ḇe supswan ḇaim. Ikofenbos faro manfarkin agama ro abad randak sya, ”Ayai ḇesabu kwar ro boiyaswa, insa yafrur marisen ayena ḇa, ḇape yaḇeuser Allah marisen ḇyena ḇewan aya kwar.” Inja, bisa fa Yesus ikofen faro manfamyan ḇyesi, ”Ro Mami rum ḇyedi moḇ kankain nasya nabor.”—Yohanes 6:38; 14:2.
Yesus Kmari iso Allah ḇenir ḇe Yahwe, ma ”rum ḇyedi” isya ro nanki. (Mazmur 83:18) Inja, Allah Yahwe ma Yesus Su iso monda na ḇeḇuk fasasna kuker nanki ya moḇsa isnai raya. Suḇuk fasasna nabor kuker nanki ya roro fasasna ḇeba kaku faro snonkaku ḇesouser sya.
Artikel ḇeuserya nari dawosḇair ḇar ro Refo ḇefasnaḇair fasasna rosai monda snon riḇeso smam na. Rofyor swewar fa wafawi fasasna ine, waswarepen snar nanki ima isnai ḇe roi oso ḇa, inja na kopok kopan ḇaido komamna ḇa. Iso ḇefnai fa, Allah fyasnaḇair fasasna ani kuker wos ḇepyan fa kofawi na. Fasasna ine nari nafnoḇek Au fa wafawi manseisi ḇeḇarek ro ’moḇ kankain nabor’ ro nanki ya.
