1. Rariso kofawi snar Allah kawasa Ḇyesi nari simkeibur Babilon Ḇeba, ma fakfuken rosai monda nari kokarem na?

RO ARTIKEL ḇeponya, kofarkor snar Babilon Ḇeba ḇyewomen snonkaku Kristen ḇesouser sya. Ḇape, abar ḇepyum isya isoine na ḇyewomensi isof fyoro ḇa. Refo ikofen, Allah ḇyuk parenta faro kawasa Ḇyesi fa ’sisasyarbur’ imperium agama ḇekaku ḇa ro supswan ḇesiper. (Wasya Fasasna 18:4.) Ine fyasnaḇair snonkaku Kristen nari simkeibur ro Babilon Ḇeba ya. Komarisen kaku fa kofawi fafisu risai na roi ine ndarirya! Ḇape ḇeponya, kokarem fakfuken ḇeuser nane: Snemuk rosai Siswa-Siswa Alkitab sya sifrur kuker Babilon Ḇeba ya, iba syadiwer sifrurna ro taun 1914 ya ḇaim? Rariso raryaḇ ro naek srar ro ḇaḇebaryas ro swaf Perang Dunia I ya? Babilon ḇyewomen Allah kawasa Ḇyesi nane kyurfasna snar Allah imbe isonek si resari ke?

2. Rofyor Perang Dunia I ya ḇaim snemuk rosai Siswa-Siswa Alkitab sun ya?

² Taun ḇe taun fyor Perang Dunia I (1914-1918) ḇaim,  Charles Taze Russell ma Siswa-Siswa Alkitab ḇesesya sifawi kaku snar gereja-gereja sḇuk farkarkor ḇenapes kuker Refoya ḇa. Inja, simewer sisowarpu wer kuker agama ḇekaku ḇa. Ro taun 1879 kako, Zion’s Watch Tower ikofen gereja oser-oser sap mankunsi ḇe bin fakawin ḇesouser ro Kristus i, ḇape sisonem pamarenta-pamarenta sya, kakuya sima ḇar ḇero Babel ḇaido Babilon Ḇeba ya, Refo dapna ḇe pelacur.​—Wasya Fasasna 17:1, 2.

3. Rosai Siswa-Siswa Alkitab sifrurna ḇefasnaḇair simewer sisowarpu ro agama ḇekaku ḇa? (Mam sonin ro randak artikel ine.)

³ Bin ma snon ḇesouser sya sifawi snar fyor sisonem pdef faro agama ḇekaku ḇa ido, nari Allah ḇyebarakas si ḇa. Inja, ḇar ḇeba ro si sfas syapram ḇe gereja fa sikofenḇair imbe sisasyarbur ro gereja. Iba syadiwer, ḇeḇeso sya siswasya syapram sena ro ḇarpon jemaat. Mboi fyor sḇuk ijin fa siwasyana ḇa ido, sfarem syapram ḇe snonkaku oser-oser ro gereja ani. Sifasnaḇair kaku simewer sisowarpu wer ro agama ḇekaku ḇa! Sifrur roi ani ro taun-taun ḇeponya ido, na smunsi. Ḇape ro 1870 ya, pamarenta ro sup ḇeba ḇeḇeso sisonem gereja werḇa raris ḇepon iwara. Inja, snonkaku sya sna mkei fa sawosḇair Refo faro snonkaku ḇese ma na smewer siso gereja ya.

4. Sarisa rosai komam ro Siswa-Siswa Alkitab ro fafisu Perang Dunia I ya?

⁴ Siswa-Siswa Alkitab sikofenḇair ḇe kina, bati, ma jemaat ro gereja sena monda ḇa, snar sisonem werḇa faro agama ḇekaku ḇa ya. Simarisen dunya ine fyawi snar Babilon Ḇeba ima agama ḇekaku ḇa raris pelacur! Inja, ro Desember 1917 isof randak ro 1918 ya, syaran ro Siswa-Siswa Alkitab siryaḇ kaku fa sirwas syapram ri 10.000.000 ḇeser artikel ”Kejatuhan Babilon”. Syapram ani fyasnaibos gereja-gereja sya ankarkar sena. Raris rosai skara na, manfarkin agama sya simsor fafayaḇa! Ḇape, Siswa-Siswa Alkitab simnai ḇaḇeri. Sun snemuk fa sbaryas pdef ma ’siso syadi faro Allah ro siso snonkaku.’ (Farfyar 5:29) Rosai komam ro sarisa ine? Bin ma snon ḇesouser sya sewomen si ro Perang Dunia I yaḇa, ḇape sisya sḇensewar pdef fa simkeibur agama ḇekaku ḇa ma sifnoḇek snonkaku ḇesesya fa sakfrur rarirya

5. Rosai ḇefnai fa kokofen naek srar sya siryaḇ kaku ro fafisu Perang Dunia I ya?

⁵ Fyor iwara, kofawi snar fafisu Perang Dunia I ya, Allah imarisen faro kawasa Ḇyesi ḇa snar sbaryas kuker raryaḇ ḇa. Inja, kokyar Yahwe myam monda Babilon Ḇeba ḇyewomen si ro swaf ḇeḇeso. Ḇape, naek srar ḇefarmyan kuker soasuser pdef faro Allah ro 1914 isof 1918 ḇarpurya sifasnaḇair snar sḇeraryur oser, sḇensewar kaku kwar fa sbaryas pdef. Kuker kofawi nabor syadiwer roi ḇejadi kuker Siswa-Siswa Alkitab ro fafisu ani, nari kofawi mnis sarisa ḇeḇeso Refo fyas na.

6, 7. (a) Roi ḇedwarek rosai monda Siswa-Siswa Alkitab sismai ro fafisu Perang Dunia I ya? (b) Rosai ḇefasnaḇair snar Siswa-Siswa Alkitab siryaḇ kaku?

⁶ Kakuya, ro fafisu Perang Dunia I, Siswa-Siswa Alkitab siraryaḇ kaku ro ḇaḇebaryas. Ḇape sismai roi ḇedwarek ḇeḇeso kako. Mkorama komam roi risuru suine. Oserya, Siswa-Siswa Alkitab sifawi ḇaim nyan fa sḇaryas kuker Refo monda. Snar sirwas monda syapna ro ḇaḇebaryas ma syap-syap ani iso ḇefasnaḇair napnapes ya. Inja, rofyor pamarenta sya sidwarek  syap The Finished Mystery (Rahasia yang Tergenap) ro randak 1918 ya, naek srar sibor sḇaḇir sḇekir mankun fa sḇaryas ḇa. Ḇesuruya, ro taun ani kako dafduf flu Spanyol myun moḇ nakam. Dafduf ḇeyun marmar ine myun snonkaku oso ido na ikren ḇe snonkaku ḇesewer, inja naek srar sine samswen faro si fa sra sḇaryas. Rariryano, Siswa-Siswa Alkitab sifrur roi ḇepyum fa sḇaryas pdef.

⁷ Ro taun 1914, raryur mkun ro Siswa-Siswa Alkitab sfasnai ”Drama-Foto Penciptaan” sapna ḇe ”Drama”. Isoine raryur sonin ma felem warpu rakrok mkarem na. Roi sfasnai nane ima roi ḇebabo ro fafisuya. Drama ani fyawar sarisa snonkaku rofyor Adam ḇyeḇefrur isof papupes ro Ḇaḇesasoser Kristus. Ro taun ḇerandak sifasnaina ro 1914, snonkaku ḇemam sya sisyadi ro 9.000.000. Kwarapan kada. Barbor sena nasyadibur barbor ro Saksi-Saksi Yahwe ḇero supswan ḇesiper ro baboine! Kafkofenḇadir ḇesena, ro 1916 snonkaku ḇerama ro fananjur ḇero Amerika Serikat sisyadi ro 809.000, ma taun 1918 karkor ani nek wer fa nasyadi fanam ḇe snonkaku ri 950.000. Siswa-Siswa Alkitab ansya siryaḇ kaku!

8. Rariso naek ḇena fakamamar sya sisambraḇser Siswa-Siswa Alkitab ro fafisu Perang Dunia I ya?

⁸ Ro fafisu Perang Dunia I, naek ḇena fakamamar sya sfararur marḇak fa sḇuk syap-syap ḇeknam ro Refo ma sisambraḇser Siswa-Siswa Alkitab syakam. Snar farfnoḇek sawarwar ine, sḇaryas kuker raryaḇ. Richard H. Barber, manbaryas ḇeraryaḇ ro fafisu ani, doḇe, ”Nkofasos insama pengawas keliling ḇeḇeso srama pdef ḇe sidang ma insa syap The Watch Tower nasya pdef fa sfaremna ḇe sup Kanada moḇ sidwarek syap ine.” Ikofen wer, ”Yamarisen yasmai fararur ḇefaramrem syap The Finished Mystery faro bati ḇena syap ine werḇa snar sunbur si. Syap ine  kyasun inja bisa fa kokafenna ro sak monda. Naek Rutherford dor insa nkofrur kebaktian ro mnu ḇeba ḇeḇeso ro Amerika Serikat ḇar wambarek ma iwan manfaya dakam sya fa sisambraḇser naek srar sya.”

9. (a) Rosai ḇefnai fa Allah kawasa Ḇyesi sfandun sansonek ḇeḇeso ro taun 1914 isof 1919 ya? (b) Ḇape, roi ani kyurfasna ḇe rosairirya?

⁹ Roi ḇeḇeso ro Siswa-Siswa Alkitab fandun kaku fa sismai sonek. Sifawi mnis ḇaim Yahwe parenta Ḇyena fa sikunem ḇe pamarenta. (Roma 13:1) Iso eḇedar fa sḇeraryur oser mboi sḇewaira pdef ḇa rofyor mamamun ya. Raris, rofyor presiden Amerika Serikat dor kawasa sya fa sḇenadi ro 30 Mei 1918 ya, The Watch Tower danun ḇe Siswa-Siswa Alkitab sya fa sakḇenadi. Naek ḇeḇeso sḇuk farsarser fa nafnoḇek mamamun ya. Ma, iba syadiwer ḇeḇeso sya sakḇe sordade ma siso ro mamamun ya. Fandun fa sismai sonek, ḇape inema kyurfasna ḇa snar roi ḇefnaiya iso Babilon Ḇeba ya ḇyewomen si. Kakuya, sḇeoser werḇa kuker imperium agama ḇekaku ḇa ro supswan ḇesiper ro fafisu Perang Dunia I ya.​—Wasya Lukas 12:47, 48.

10. Rariso Siswa-Siswa Alkitab sfasnaḇair sesyowi kaku kankenem ya?

¹⁰ Kakuḇae, Siswa-Siswa Alkitab sifawi mnis ḇaim rosaiso knam ro waira ḇe polotik yaḇa. Ḇape, sifawi mamamun ima nsasar. Inja, naek ḇeḇeso sḇe sordade ma sun romamun ro fafisu Perang Dunia I rariryano, simewer smun min sesya, inja ḇeḇeso ro si siwan si fa sro ḇarpon fyor mamamunya insama simar.

11. Rosai kankarem ro pamarenta fyor Siswa-Siswa Alkitab spampum fa siso ro mamamun ya?

¹¹ Ibiris imsor snar naek ansine sisouser pdef faro Allah. Inja, ”ifrur aw ḇeḇarḇor ḇeknam ro sasoser” ya. (Mazmur 94:20) Jenderal Angkatan Bersenjata Amerika Serikat, James Franklin Bell, ikofenḇadir ḇe naek Rutherford ma Van Amburgh snar pamarenta sḇensewar fa sifrur undang-undang ḇebabo ḇefasnaḇair snonkaku ḇepampum fa iso ro mamamun ido na sḇuk samamyai marmar ḇe i. Roi ikofenya nkur ḇe Siswa-Siswa Alkitab sya. Kuker masasor jenderal ani ikofenḇair ḇe Naek Rutherford snar undang-undang ani sifrurna ḇa. Snar presiden Amerika Serikat idwarek si. Ramnai jenderal ani doḇe, ”Ḇape nkofawi nyan fa nkofor mko, ma nari nkofor mko!”

12, 13. (a) Rosai ḇefnai fa naek riwar ansya sismai samamyai ro bui fyoro kaku? (b) Fyor sisun ro bui kwar sun snemuk fa sisouser Yahwe I pdef ke? Fasnaḇair na.

¹² Ḇarpurya pamarenta sḇuk samamyai faro Siswa-Siswa Alkitab sya. Sfor kako, Naek Rutherford ma Van Amburgh, warpu snonkaku riwonem ḇesesya ḇemanfaker ro Lembaga Menara Pengawal. Hakim ḇeyuf parkara ani doḇe sima sifrur makakak syadi ro sordade Jerman sya. Doḇe fandun kaku sḇuk samamyai ḇemarḇak kaku faro si snar sanonef pamarenta, militer ma gereja nakam. ^[1] (Mam fasfas ḇepupes.) Inja, Siswa-Siswa Alkitab riwar sisun si ro bui ḇekwan kaku ro Atlanta, Georgia. Ḇape, fafisu mamamun ya namnai, sisasyar si ma spas wos kursof sena.

¹³ Sisun si ro bui rariryano, snon riwar ansya sun snemuk fa sisouser Allah sasoser Ḇyena. Kofawina ro? Sfas syapram fararyor ḇe presiden Amerika Serikat fa simkei. Sfasnaḇair snar Refo idwarek snonkaku sya fa smun min sesya, inja mansei monda ḇebuk farsamsyom faro  Allah I kwar ma sifrur sasoser Ḇyena ḇa ido, nari Allah kyaremso si ḇa ma nari myun si. Sifasnaḇair snar roi ine iso ḇefnai fa simewer kaku smun min sesya. Syapram ani kyurfasna simkakḇa ma sun snemuk pdef fa sisouser faro Yahwe I.

14. Neknam ro Maleakhi 3:1-3 ya, fasnaḇair rosai ḇeḇejadi ro 1914 isof 1919.

¹⁴ Maleakhi 3:1-3 fyasnaḇair rosai ḇeḇejadi kuker Siswa-Siswa Alkitab ro taun 1914 isof randak 1919 ya. (Wasya.) Allah Yahwe, ”Tuan ḇekaku”, ma Yesus Kristus, ”manwawan ḇaḇeasas” ya, ryama fa myam kaku ”roma-roma Lewi”, siso snonkaku ḇesma ramrem sya. Fyor Yahwe isonek si ma ḇyensren si kwar ramnai, sifasos kwar fa sifrur fararur ḇebabo. Ro 1919, Yesus ryem ’manfamyan ḇeḇesyowi ma ḇefawi nananem’ suf fararur fa sfarkin ma sfarkor Allah manfamyan Ḇyesya. (Matius 24:45) Allah kawasa Ḇyesi simkeibur ro Babilon Ḇeba kwar. Fyorya ḇeri, fawawi sena kuker Allah marisen Ḇyedi nabor syadiwer. Inja siswar syadi I. Sikofen kasumasa kaku faro barakas Allah ḇyuk faro si nakam! ^[2]—Mam fasfas ḇepupes.

15. Rariso kofasnaḇair kasumasa koḇena snar komkei kwar ro Babilon Ḇeba ya?

¹⁵ Kokofen kasumasa snar komkei kwar ro Babilon Ḇeba ya. Setan jadi fa imkok farsamsyom ḇekaku yaḇa. Ismai bon oḇa! Imbape, fandun kaku fa koswarepen rosai ḇefnai fa Yahwe ḇyuk ḇaḇemkei ḇeko. Imarisen insama snonkaku syakam sismai fasaspar ya. (2 Korintus 6:1) Ḇape agama ḇekaku ḇa fyara kaker snonkaku syaran risyaran ḇesouser sya, snonkaku sine sifandun farfnoḇek koḇena! Mkorama kofrur roi ḇepyum fa kofarari naek ma srar ḇesoasuser koḇesya kuker kofnoḇek snonkaku sya fa simkeibur ro Babilon Ḇeba ya.