YAḆEAḆEN ro Wichita, Kansas AS, ro 10 Desember 1936. Aya iso ḇerandak ro roma rifyak. Sinan ayesuya, William ma Jean, suma manfamyan ḇesoasuser pdef ḇe Yahwe I. Kma yedi ḇye hamba sidang, kirine sapna ḇe koordinator badan penatua. Awin ayedi fyarkor napnapes ro snari, Emma Wagner. Emma fyarkor napnapesya faro snonkaku ḇebor, Gertrude Steele i kako, ifarmyan ḇe misionaris ro Puerto Riko. * (Mam fasfas kasun ro sop.) Inja yana farari ḇepyum ḇebor fa yafarari na.

Ro Sabtu roḇ ya rofyor umur yedi taun ririm, kma yedi ma aya nuḇaryas kuker syapmkun Watchtower ma Consolation (kirine Sadarlah!) faro snonkaku ḇembran mura-muma ro nyan. Ro fafisu ani, sup ya siso ro Perang Dunia II. Ḇape kma yedi, dakso ro mamamun yaḇa. Dokter ḇemser oso ryama ma kyursof kma yedi ḇe snonkaku ḇemakakak ma syewar nyan fa iso ro mamamun yaḇa. Dokter ani ḇyuk mkasi fyanam ḇe kma yedi mka ḇyedi ma doḇe, ”Sai ḇefnai fa mun aya ḇa, ḇepimam ra!” Yamkak fafayaḇa, mboi yamanen faro kma yedi ḇaḇebri ḇyena. Ḇyuk ker syapmkun na faro snonkaku ḇemam nko sya. Ramnai sordade oso  imbran, ma dokter ine dawos naba, ”Wafrur roi oso ḇe snonkaku ḇepimam ine!” Sordade ani ifawi snar snon ani imser, inja ikofen ḇe i, ”Wabur mura ma kwain fasise!” Ramnai sura subur. Yakofen kasumasa kaku snar Yahwe ḇyuk kwar ḇaḇebri faro kma yedi. Demir duf moḇ risuru snonkaku sya sikapnik snomburyam sena ro Wichita, ma dokter ani ima pelanggan oso ḇyedi!

Rofyor yaḇeumur taun riwar, sinan ayesu subow rum ma toko suḇena ma sufrur rum kasun ro oto insama napyan fa sunna mura-muma. Ramnai nkobur ḇe Colorado, fanam ḇe Grand Junction, fa nkofarmyan ro moḇ ḇefandun syadi manḇaryas sya. Sinan ayesuya suḇe perintis ma sufararur ro oras nakam ḇa, sufararur ro yaf ma sufaduru rofanfan. Kuker barakas ro Yahwe ma fararur ḇeraryaḇ suḇena, sidang oser dores. Ro 20 Juni 1948, kma yedi ḇyebaptis aya ro warbeki ro bon oso, kuker snonkaku ḇese ḇesmai napnapesya, Billie Nichols ma swari su kako. Ḇarpurya sufarmyan randak ḇe pengawas wilayah, ma roma ḇyedi ma swari su kako.

Nkoḇebati pyum kaku kuker snonkaku ḇemyaren ḇefarmyan ḇe Yahwe, ḇefandun ya iso Steele kina ḇyesi—Don ma Earlene, Dave ma Julia, ma Si kuker Martha. Nkosmai marasrisen rofyor nkawawos Refo kuker si, ma yasmai farari ḇepyum ro si. Sifasnai ḇe aya snar rofyor nkorir ro ḇarpon fandandun Karajan ya ido, na kankenem nkoḇena nefromo ḇa ma nkosmai aski ḇekaku ya.

Rofyor yaḇeumur 19, Bud Hasty, karyer ḇefanam nkoḇedi, dor aya fa yaso i fa nuḇe perintis ro ḇar wamires Amerika Serikat. Pengawas wilayah dor nu fa nuraḇe Ruston, Louisiana, Saksi ḇeḇeso se aktif ḇa sisya rodiwa. Snonkaku ono ḇese srama ḇa mboi dor nu fa nufarkin fananjur ro minggu ḇe minggu. Nusrow moḇ fananjur ma nufrur fananjur ya ḇeri. Nufrur fananjur nakam, mboi fyorno ido nuyemir monda ker. Nufadadwer fa nuyun ḇar-ḇar ro fananjur ya, oso fyarkin ido oso ya kyarem fakfuken nakam. Rofyor fasasna isya ido, na nuḇekayam ḇe ḇarpon fa nufasnaina mboi snonkaku sisyaḇa! Ḇarpurya mura, srar oso ḇesinan kwar insape ryama dakso fananjur ya. Ramnai, ḇefarkor Refo ḇeḇeso ma naek srar ḇe aktif ḇa sya sakrama fa sakso fananjur ya, ma fyoroḇa mura nkakḇe sidang oso.

Ro ras oso, Bud ma aya nusrow kuker pendeta ḇerama ro Church of Christ, ma ikofen mnuk-mnuk yafawi ḇa na. Nane nafrur fa sne yedi iknonḇa ma nafrur fa yakara kaku rosai yakyar na. Ro swaf minggu rioser, yafarkor isof ro roḇ kaku fa yasmai kankarem faro fakfuken-fakfuken anna. Nane nafnoḇek aya fa yasambraḇser ḇaḇebati ayena kuker Yahwe I, ma yamarisen kaku fa yasrow kuker pendeta ḇesesya wer.

Fyoroḇa ramnai, pengawas wilayah ani dor aya fa yaraḇe El Dorado, Arkansas, fa yafnoḇek sidang rodiwa. Rofyor yaro diwa, yakaḇer ker ḇe Colorado fa yakrenḇur panitia pendaftaran wajib militer sya. Ro fafisu oso, perintis ḇeḇeso siso kuker aya, ma ro Texas nkosmai roi ḇemun ḇefrur fa oto yedi iḇyeḇa. Nkoḇetelfon naek oso, ryama ma dun nko ḇe rum ḇyedi ma ḇe fananjur ya. Ro diwa sḇuk kafkofenḇair kuker roi ḇekur nko, ma naek srar kuker sneḇenaḇye sḇuk kumpan kermkun ḇe nko. Naek ine ḇyoḇ pyan kako oto ayedi kuker ḇaḇyak ro dolar ri 25.

Nkofrur marandan ḇe Wichita. Ro diwa bati karyer ḇefanam kaku oso, McCartney,  sor i ḇe Doc, iso perintis. Roma ḇesaper ḇyesuya, Frank ma Francis, sukako suma bati ayesu. Suna oto ḇekwar oso suḇoḇ ḇe aya kuker ḇaḇyak dolar ri 25, karkor ya imnis kuker pipi yasmana ro oto ḇepon ya. Inema randak kaku yamam bos snar yarir ro ḇarpon fandandun Karajan ro kankenem ayedi, Yahwe ḇyuk roi yafandun na. Ro fafisuya, McCartney kina ḇyesi sfasnaḇair aya ḇe inbesrar ḇesnai pyum oso, ḇenir ḇe Bethel Crane. Snari, Ruth, iso Saksi ḇeryaḇ ro Wellington, Kansas, ḇye perintis pdef isof ro ḇyeumur taun ri 90 syadi. Syadiḇa ro swaf taun oser, ro 1958, Bethel ma aya nufarḇuk ma nuḇe perintis kayam ro El Dorado.

Numarisen nusomnis farari ḇepyum nusmana kuker nufrur nabor syadiwer. Inja nuyun snemuk fa nuso undangan rosai monda ḇerama ro Yahwe organisasi Ḇyedi. Skur nu fa nuḇe perintis istimewa ro Walnut Ridge, Arkansas. Ramnai ro 1962, numarisen nusma undangan fa nuso Sekolah Gilead kelas ḇeḇe 37. Nuryaḇ kaku snar nufawi Don Steele dakso ro kelas ḇemnis kuker nu. Rofyor numnai ro farkarkor ya, aya kuker Bethel siwan nu fa nuraḇe Nairobi, Kenya. Nuḇesneso kaku snar nubur New York, ḇape numarisen syadi rofyor nusabu ro bandara ro Nairobi ma numam mboi naek srar sisya ro diwa fa sisrow nu!

Nufandun fafisu kawan ḇa fa nuḇarek ro Kenya ma nuḇaryas ro moḇ ya. Manfarkor Refo ḇerandak nuḇedi ḇesun ro napnapesya iso Chris ma Mary Kanaiya. Sufarmyan kaker ro oras nakam ro sup Kenya. Taun ḇerama ya, sor nu fa nuraḇe Kampala, Uganda. Nuiso misionaris ḇerama randak ro sup ani. Ima fafisu ḇeyun marasrisen snar snonkaku sibor simarisen sfarkor napnapes ro Refo, ma sakḇe naek ma srar koḇesi. Imbape, ro taun peser rikyor nuro Afrika ramnai, nukaḇer ḇe Amerika Serikat fa numamfaduru kina nuḇedi. Nuḇesneso fafayaḇa rofyor nubur ro Afrika ḇardibur rofyor nubur New  York ya. Nuswar snonkaku ḇero Afrika sya ma numarisen ro ras oso nukaḇer wer.

Nuraḇe ḇar wambarek ro Colorado, ro moḇ sinan ayesuya suḇarek roya. Fyoroḇa, inaikir ḇepon nuḇedi, Kimberly, ḇyeḇeaḇen, ma paik ri 17 ramnai, nusmai Stephany i wer. Fararur ḇebabo nuḇedi ḇe sinan ya iso roi ḇefandun kaku faro nu. Nufararur marḇak fa nufarkor napnapesya ḇe inai ḇesnai pyum nuḇedi. Numarisen nusomnis farari ḇepyum ro snonkaku ḇesesya. Nufawi snar farari ḇepyum na nḇuk fainda ḇepyum ḇe inai nuḇesuine, mboi ine nfasnaḇair ḇa snar nari suba muryas ido sufarmyan ḇeri ḇe Yahwe I. Faḇye kaku, kasun ma srar ayedi surirbur napnapesya. Yamander kaku ro ras oso sukaḇer wer fa susomnis farari ḇepyum susmai kwar na.

Nusmai marasrisen fa nufaduru inai nuḇesuya ma nusewar fa nkofrur roi nakam ḇe kina oser. Snar nkoḇarek fanam ro Aspen, Colorado inja, nkofarkor fa nkofnak ski insama ro ras ḇesena nkofnak kayamyam wer. Rofyor nkek kayam ro kereta ḇeyun snonkaku ḇefnak ski sya, nane nḇuk swaf ḇe aya fa yawos kuker inai nuḇesuya. Nura nufrur kemping kuker su kako ma nkomarisen nkofarfyar yaryar ro for ḇedapdapen. Subabo kaku kaker mboi, sufuken fakfuken raris ”Rosai nari yafrur rofyor yaba kwar?” ma ”Na yafarḇuk kuker snon ḇemnis rariso?” Nusewar kaku fa nufarkor inai nuḇesuine fa suswar Yahwe I. Nuyanun ḇesu fa suyun cita-cita fa sufarmyan ro fararur ro oras nakam ma sufarḇuk monda kuker snonkaku ḇena cita-cita ḇemnis kuker su. Nufnoḇek su kako fa sufawi snar sufarḇuk kamur awer. Nukofen ker ḇe su, ”Muyores isof ro muḇeumur taun ri 23.”

Nusomnis farari ro sinan nuḇesi ma nusewar kaku fa nkoḇe kina oser nkoso pdef ro fananjur ma fararur ḇaḇeḇaryas. Nufasos mnis fa perintis ḇeḇeso sḇarek ro rum nkoḇedi. Nuyawos ker kako snar nuswar kaku faro fararur nuḇedi ḇe misionaris. Numarisen nuwaf fafisu oso nkoḇe fyak nkofrur marandan kayam ḇe sup Afrika. Inai nuḇesuine sumarisen kaku faro roi ine.

Nkofrur ker farkarkor ro kina. Nkofrur fasasna imnis kuker roi ḇeḇejadi ro rumfarkor, ma inai nuḇesuine sufnak ḇe Saksi ḇeḇuk kankarem faro fakfuken ya. Sumarisen kaku kuker nyan farkarkor ḇeradine, ma nane nafrur su fa sumkak ḇa. Imbape, rofyor suba muryas, susnurem ker kuker farkarkor ro kina ine. Fafisu oso, yamsor inja yawan su fa susun ḇe sim suḇena oser-oser ma yakofen na nkofrur farkarkor ro kina werḇa. Sukandor ma sukanes ma sukofen snar sumarisen sufarkor. Nufawi kaku snar iḇye fa nufnoḇek kaku su insama suna marasrisen fa sufarkor kuker Yahwe I. Fafisuya  ḇyenande mura, sumarisen fa sufarkor, ma sumkakḇa fa sufawar rosai suḇaḇir na. Kakuḇae na samswen fa nurower roi sukofenna snar sumarisen ḇa faro farkarkor oso ro Refo. Ḇape nusewar fa nufawi rosai suḇaḇir kaku na. Rofyor nuyawos kuker su ramnai, sumarisen suso Yahwe farkankin Ḇyena.

Taun ya ḇyenande fasaw kaku rofyor nufaduru inai nuḇesuya. Kuker farfnoḇek ma farkankin ro Allah organisasi Ḇyedi, nusewar kaku fa nufrur roi ḇepyum syadi fa nufaduru inai nuḇesuine fa suswar faro Yahwe I. Nukofen kasumasa kaku rofyor numam susun ro fararur ḇe perintis rofyor sumnai kwar ro farkarkor suḇena. Sufarkor fa suḇekir ro fararur oso fa suna kumpan ro mankunsu insa nesonem su. Suraḇe Cleveland, Tennessee, kuker srar ḇese risuru fa skofarmyan ro moḇ ḇefandun syadi manḇaryas sya. Numander su rawo, mboi numarisen snar suḇuk kankenem suḇena ḇesiper fa sufarmyan ro oras nakam. Aya kuker Bethel nuḇe perintis kaḇer wer, ma ḇarpurya nuna swaf fa nuḇe pengawas wilayah pengganti ma ro kebaktian.

Rofyor inai nuḇesuya sura ḇaim ḇe Tennessee, sumbran farma ḇe London, Inggris, ma sura sumam kantor cabang. Stephany, ḇeumur taun ri 19, isrow kuker naek ḇebabo oso ḇefararur ro Bethel ḇenir ḇe Paul Norton. Ro marandan ḇesewer, Kimberly isrow kuker Paul min fararur ḇyedi, Brian Llewellyn i. Rofyor Stephany ḇyeumur 23, fyarḇuk kuker Paul i. Taun ḇeramaya, fyor Kimberly ḇyeumur 25, fyarḇuk kuker Brian. Inja suyores ro mankunsu isof ro suḇeumur 23. Numarisen kaku faro snonswa sukinfir pyum kwar.

Inai nuḇesuya sukofen ker ḇe nu snar farari nuḇena ma apus suḇesi nafnoḇek su fa ’susewar bepon Ḇaḇesasoser Allah’, iba syadiwer rofyor suna samswen kuker kumpanna. (Matius 6:33) Ro April 1998, Paul ma Stephany susmai undangan fa suso Sekolah Gilead kelas ḇeḇe 105, ma skur su fa sufarmyan ro Malawi, Afrika. Ro fafisuya kako, sor Brian ma Kimberly su fa sufararur ro Betel London ma ramnai skur su fa suraḇe Betel Malawi. Numarisen fafayaḇa snar romawa nubesi sḇuk kankenem sena ro nyan ḇepyum kaku.

Ro Januari 2001, yasmai telfon ro randak insanja yakofen ani. Naek Marais, ḇefararur ḇe pengawas Departemen Penerjemahan, fyasnaḇair snar naek sya sfasos kursus oso fa nafnoḇek penerjemah ro supswan ḇesiper fa sfawi pyum fasfas ro wos Inggris ya. Umur ayedi 64 kwar mboi, simarisen sfarkor aya fa yaḇe instruktur oso. Aya kuker Bethel nuḇenadi kuker roi ine ma nuyor ananun ro awin nuḇedi. Suḇesinan kaku kwar ma na jadi fa numamfaduru su ḇa rariryano, sumarisen fa nura. Yaḇe telfon kaḇer ma yakofenḇair snar numarisen nuyun fararur ine.

Ramnai awin yedi ismai dafduf kanker. Yakofen ḇe i snar nari nuḇarek ma nufnoḇek srar ayedi Linda i fa nkomamfaduru i. Awin imewer ma doḇe, ”Mura ḇa ido na yaḇaḇir yasasar.” Linda dakḇaḇir rarirya. Nukofen kasumasa snar sumam fandun mankun suḇena ḇa ma nukofen kasumasa kaku faro farfnoḇek ro naek ma srar ro moḇ ya. Ro ras nubur ro Pusat Pendidikan Menara Pengawal ro Patterson, Linda ḇyetelfon nu fa ikofenḇair snar Awin imar kwar. Ḇape, raris rosai Awin danun ḇe nu fa nufrur ya, nufararur raryaḇ pdef ro fararur ḇebabo nuḇedine.

 Numarisen kaku nufawi snar fararur ḇerandak nuḇedi iso kantor cabang Malawi, iso moḇ inai nuḇesuya ma suswasi sufarmyan ro na. Inema fafisu ḇepyum kaku snar nkoryur kayam wer. Ramnai, nuḇuk farkarkor ro wos Zimbabwe ma ḇarpurya ro Zambia wer. Rofyor nuḇuk farkarkor taun peser rikyor ani posa, nukaḇer ḇe Malawi fa nufas farfyar ro Saksi-Saksi ḇesmai wayam rodiwa snar kakyar Kristen sena nafrur fa simewer sakso ro fararur polotik. *—Mam fasfas kasun ro sop.

Ro 2005, nuḇesneso ro fafisu ine wer snar nubur sup Afrika. Nukaḇer ḇe Basalt, Colorado, ro moḇ ine aya kuker Bethel nufararur ḇe perintis. Ro 2006, Brian ma Kimberly sura suḇarek fanam kuker inko fa sufaduru inai suḇesuya, Mackenzie ma Elizabeth. Paul ma Stephany suḇarek pdef ro Malawi, rodiwa Paul ifarmyan ḇe Panitia Cabang. Kirine umur ayedi fanam ḇe 80 kwar, ma yamarisen kaku snar yamam snonkbor sya sifararur kayam fa suf fararur yun ine. Insama nun fainda faro roma inai ma kpu nuḇesya, nusewar fa nusomnis farari ḇepyum ro snonkaku ḇesesya sḇuk faro nu. Nane nḇuk raryaḇ ḇeba kaku ma aski.