IMNIS ro Matius 13:24-26, Yesus doḇe, ”Ḇaḇesasoser Boiyaswa imnis raris snonkaku ḇekekef mor ḇepyum ro yaf ḇyedi. Ḇape rofyor kawasa syakam senef, mbroḇ ḇyedi ryama ma dakkekef ampyampumber mor ro fandu gandum ansi, raimnai ibur. Ro fafisu gandum ansi sisur ma simarem randak ya, ampyampumber ansi kako saksur.” Manḇefas ḇeḇeso sikyar mankenem ḇa snar sarḇer ine ḇyeknam ro sarisa ḇekaku, ḇape ro fasfas Roma ḇekwar ḇekaku ya, roi ḇeradine bisa fa nejadi.

Syap kamus Refo oso ikofen snar ro ḇaḇ sasoser Roma, snonkaku oso ḇeker ampyampumber ro snonkaku ḇese yaf ḇyedi ima roi ḇeḇarḇor. Kakaku snar sfandun sasoser oso kyurfasnai snar roi anna nkaku ndarirya. Sejarawan Alastair Kerr fyasnaḇair snar ro taun 533 M, Kaisar Roma Justinian ikofenḇair syap ḇyedi Digest. Ine iso fasfas ḇeknampu ro sasoser Roma ma naser rosai snonkaku ḇefawinanem sya sikofenna kuker sasoser ro swaf taun 100-250 M. Imnis kuker syap Digest ya, oser ro snonkaku ḇefawinanem ansya, ḇenir ḇe Ulpian, dap parkara oser ro abad ḇesuru ya. Sino sisya ḇekef ampyampumber ro snonkaku ḇese yaf ḇyedi, ma nane nafnai fa rokaker na naḇyeḇa. Syap Digest dawosḇair kuker snonkaku ḇena yaf oso nya hak ḇekaku fa dor ḇaḇyak kaḇer, pipi faro afuf ḇyena ḇepromes anna.

Roi ḇeradine nejadi kwar ro Kekaisaran Romawi, nane nfasnaḇair snar fafisu Yesus dap ro sarḇer ani ḇyeḇejadi kaku ro kankenem ya.