Manwawan Paulus fyasnaḇair Yahwe * I ḇe ”Allah ḇeḇuk samambraḇ sne faro snonkaku. Ḇyuk samambraḇ ro kosnesna, ro fafisu ḇaḇekandera kosma na”. (2 Korintus 1:3, 4) Inja Refoya ḇyuk kakyar ḇeko snar mankun osoḇaḇeri ḇeḇuk farfnoḇek nasyadi ro Allah I ma samswen osoḇaḇeri ḇeba syadi ḇedwarek Kma koḇedi ro nanki fa ḇyuk sneprei ḇeko.

Kakuḇae, komarisen kona ḇaḇesneprei ro Allah ido fandun fa kofrur roi oso. Rariso na dokter oso ifnoḇek ko rai rofyor kokofenḇair ḇepon ḇa fa kosrow kuker i? Nabi Amos ifuken, ”Nari snonkaku risuru sumbran kayam ḇape susrow su snar sufrur asas ḇepon ḇa ke?” (Amos 3:3) Refoya idif ko fa, ’Kofanam faro Allah, ma nari Allah fyanam faro ko.’​—Yakobus 4:8.

 Rariso na kokyar kaku snar nari Allah fyanam faro ko? Oser ya, snar ikofenḇair ker ḇeko imarisen ifnoḇek ko. (Mam  kotak.) Ma ḇesuru ya, snar kona fasasnai ḇesambraḇ kaku ro snonkaku ḇesmai kwar ḇaḇesneprei ro Allah ro fafisu koḇedine ma fafisu aniwara sya.

Raris snonkaku ḇebor ro fafisu ine ḇesewar farfnoḇek ro Allah I, Raja Daud ḇesmai samswen nabor ifrur rarirya kako. Dor kaku faro Yahwe I, ”Rwower fararyor ayena rofyor yakanes yor farfnoḇek faro au”. Inja Allah kyarem nadi ḇyena ke? Imbo. Daud doḇe, ”Yasmai farfnoḇek ḇyedi kwar, ma sne yedi iryaḇ”.​—Mazmur 28:2, 7.

Allah kyur Yesus i fa duf fararur ḇefandun kaku insa ḇyuk ḇaḇesneprei ya. Allah ḇyuk fararur nabor ḇe Yesus i, oserya iso infa ’pyarek snonkaku ḇesanekar’ ma infa ḇyuk ”sneprei faro mansei ḇefafardun syakam”. (Yesaya 61:1, 2) Raris neḇardadi kwar, Yesus fyandun kaku faro snonkaku ”ḇemor ma ḇembrus” sya.​—Matius 11:28-30.

Yesus ḇyuk sneprei ḇe snonkaku sya kuker ḇyuk ananun ḇepyum, kuker ifrurpyum si, ma iba syadiwer, ro fafisu ḇeḇeso, ḇyuk pararei ḇe ḇeduf sya. Ro ras oso snon ḇeduf pado dor faro Yesus i, ”Sye, Wamarisen ido Buk pararei ḇe aya!” Snar sne ḇesawarwar ḇyedi nadif i fa kyarem, ”Yamarisen. Waprei ro dafduf bedi!” (Markus 1:40, 41) Ma snonkaku ḇeduf pado ani iprei.

Ro baboine, Allah Roma Ḇyedi isya ro supswan ine ḇa fa ḇyuk sneprei ḇeko oser-oser. Ḇape Kmari, Yahwe I, ”Allah ḇeḇuk samambraḇ sne faro snonkaku” sya, na ifnoḇek pdef snonkaku ḇefandun farfnoḇek sya. (2 Korintus 1:3) Nari kawawos nyan ḇefandun rifyak rariso Allah ḇyuk ḇaḇesneprei faro snonkaku sya rai.

• Refo. ”Fas-fas ro Refoya kam insa nfarkor ko. Snar farkarkor kosma ro Refoya nafrur fa kodworen ma kosambraḇ isof kokyar faro Allah.”​—Roma 15:4.

• Rur Ḇesren Allah. Fyoroḇa rofyor Yesus imar kwar ramnai, sidang Kristen syakam skain kuker payamyum ro swaf ḇeḇeso. Rosai ḇefnai ya? ”Sikenem kuker araryof faro Manseren [Yahwe]. Dandonek sedi sibor syadi wer kuker fafnoḇek ro Rur Ḇesren ya.” (Farfyar 9:31) Rur ḇesren iso Allah samambraḇ ḇeba Ḇyedi, nsambraḇ kaku. Allah ḇyuk sneprei faro snonkaku oser-oser ro fafisu sairirya monda kuker rur ḇesren ine.

• Nadi. Refo ḇyuk ananun ḇeko, ”Iḇye mkoraryof rosairya wer kako”. Ikofen wer, ”mkofasna roi ḇeḇor kam marisen mkoḇena faro Allah ro nadi ma fararyor kuker kafkofen kasumasa. Saswar-ḇaḇye ro Allah, ḇesyadi ro kakara, nari nfaduru sne ma kakara mkoḇena”.​—Filipi 4:6, 7.

• Min Kristen koḇesi na sḇebati ḇekaku ḇeḇuk ḇaḇesneprei kofandunna ro fafisu ḇesamswen. Manwawan Paulus dap bati ḇyesi ’siso ḇeḇesneprei’ ro fafisu ismai ”ḇaḇewayam ḇeḇor”.​—Kolose 4:11; 1 Tesalonika 3:7.

Ḇape imbude na wafukenker rariso roi nanekam namnis faro ko rai. Rwama komam kaku snonkaku ḇesmai roi ḇesamswen ḇeḇeyap ro artikel ḇepon ya fawawar sena. Raris si, na wafawi kaku snar Allah ifrur mnis kaker asas Ḇyena ḇeḇuk samarawraw, ”Raris awin oso ḇeḇuk sneprei faro roma ḇyedi, rarirya nari yaḇuk sneprei ḇe au pdef.”​—Yesaya 66:13.