1, 2. Romawa babo ḇefarmyan ḇe Yahwe I, fafisu ono rosai sifuken ya, ma ananun rosai Refo ḇyukna?

INBESRAR oso ro Inggris min ro rumfarkor ḇyedi ikofen ḇe i, ”Yakara ḇaḇeri snar ḇepande mboi wakyar Allah ima isya.” Naek oso ro Jerman fyas, ”Guru-guru ayesi smam fasfas ḇero Refo kuker roi nakam naisya snar neḇefrur ima fawar sinan monda. Ma skara romawa farkor syakam sikyar faro farkarkor evolusi.” Inbesrar ḇebabo oso ro Prancis doḇe, ”Guru ro rumfarkor ayedi sya skara ḇaḇeri snar romawa farkor sino sisya sikyar kaker faro Refoya.”

² Snonkaku ḇebor ro baboine sikyar ḇa snar Allah iso ḇefrur snonkaku sya. Auma romawa babo oso ḇefarmyan ḇe Yahwe ḇaido wafarkor kaker kuker I ido, fafisu ono na wafuken rariso wafasnai kaku rai snar Yahwe iso Manḇedaw koḇedi. Refo ifnoḇek ko fa kokara pyum kaku rosai korowerna ḇaido kowasyana. Refoya doḇe, ”Samambraḇ ro swaruser nari nmamwarek au pdef”. Nyan ya? Nari ifnoḇek Au fa wapampum kakara ḇekakuḇa ma syambraḇser kakyar Bedi ḇe Yahwe I.​—Wasya Amsal 2:10-12.

3. Rosai na kawawos ro artikel ine?

³ Infa kona kakyar ḇenako faro Yahwe I, fandun fa komambir pyum I. (1 Timotius 2:4) Inja rofyor wawasya Refo ma syap-syap  koḇena ido, ipyum syadi wamnai resari ma wawasen rosai ikofenna. Swewar kaku fa wafawi rosai wawasya na. (Matius 13:23) Fyor wafarkor kuker nyan ine ido, nari wasmai roi ḇebor ḇefasnaḇair Yahwe ima Manḇedaw koḇedi ma Refo iso syap ḇeramuma ro I. (Ibrani 11:1) Rwama kawawos rariso kofrur roi ine.

4. (a) Ro knam risai snonkaku ḇekyar faro evolusi imnis kako kuker snonkaku ḇekyar faro roi nakam nasya snar neḇefrur? (b) Rosai fandun fa kofrur ya?

⁴ Imbude snonkaku oso ifuken Au, ”Yakyar faro farkarkor evolusi snar manbefawinanem sya sikofen snar roi anna nkaku. Inja rariso wakyar faro Allah pok fa snonkaku osoḇaḇeri myam I ḇa ya?” Snonkaku ḇebor sya skara rarirya. Kakuḇae, snonkaku osoḇaḇeri ḇemam Allah ḇaido ḇemam I rofyor ifrur roi nakam ya. (Yohanes 1:18) Ḇape rariso kuker snonkaku ḇekyar faro farkarkor evolusi sya? Si kako sikyar faro roi smamḇa na. Manbefawinanem sya ḇaido snonkaku osoḇaḇeri ḇemam rariso roi ḇekenem oso isur ḇaido fyadwer ḇe roi ḇesewer. Imnis radine, snonkaku osoḇaḇeri ḇemam kera oso ḇye evolusi ḇaido fyadwer ḇe snonkaku. (Ayub 38:1, 4) Inja fandun fa kokame komam mnis kakaku ḇyena resari, kokara pyum kaku na, ma insape kofawi rosai ḇefasnai kaku roi anna nkaku ke roḇa. Snonkaku ḇebor smam kwar roi ḇero farsyos ḇeba ine ma ’smam’ snar Allah ima isya. Snonkaku sine ’smam ro simkasna ḇana’ snar iso Manḇedaw ḇaido Manḇefrur, ima syambraḇ kaku, ma nya rari-rari ḇepyum kaku.​—Roma 1:20.

5. Roi risai monda na ḇefnoḇek ko fa kofarkor nabor kuker Allah braur bramin Ḇyena?

⁵ Rofyor komam ḇe farsyos ḇeba ine ma kowasen mnis na ido, na bisa kofawi snar Allah braur bramin Ḇyena nafrur fa komanen. Manḇedaw ima komam I ḇa, ḇape ”snar kakyarya, kofawi” ima isya. Kofawi kaku snar ima nya rari-rari ḇepyum ma fawawinanem ḇeba kaku. (Ibrani 11:3, 27) Bisa fa kofarkor nabor kuker braur bramin Ḇyena kam kuker kowasya rosai manbefawinanem sya sisrow kwar na. Fasasnai ḇeḇeso bisa fa kosmaina ro roi ḇebor ḇefnoḇek ko fa kofarkor nabor syadiwer raris vidio Keajaiban Ciptaan Menyingkapkan Kemuliaan Allah, syapmkun Benarkah Kehidupan Diciptakan? ma Asal Mula Kehidupan—Lima Pertanyaan yang Patut Direnungkan, ma syapmkun Apakah Ada Pencipta yang Mempedulikan Anda? Ro syapmkun Sadarlah!, naser wawancara kuker manbefawinanem ḇaido snonkaku ḇesesya, ḇefasnaḇair snar rosai ḇefnai fa kirine sikyar faro Allah I. Ma ro seri artikel ”Apakah Ini Dirancang?” nfasnaḇair nabor kuker aiwan sya ma roi ḇese ḇero farsyos ḇeba ine ma rariso manbefawinanem sya sifarari rari ro aiwan sya fa sḇukifrur roi oso.

6. Rosai fainda wasmaina ro syap-syap ḇefnoḇek Au fa wafarkor nabor syadiwer?

⁶ Naek oso ro Amerika Serikat ḇeumur taun ri 19 dawosḇair syapmkun risuru neḇeyap ḇepon ya, ”Syapmkun suine nefainda kaku ḇe aya. Yafarkor syap-syap nane kali riḇeḇeso kwar.” Srar oso ro Prancis fyas, ”Artikel ’Apakah Ini Dirancang?’  yamanen kaku na! Artikel nane nfasnaḇair snar manbefawinanem sya na sifarari monda rancangan ḇesamswen ro farsyos ḇeba ine, ḇape pok fa sifrurna fa namnis rariryaḇa.” Inkbor oso ro Afrika Selatan ḇeumur taun ri 15 sinan ḇyesuya sukofen, ”Roi ḇepon kaku inai nuḇedi iwasya ker ro syapmkun Sadarlah! iso artikel ’Wawancara’.” Syap-syap nane na nafnoḇek Au kako fa mam fasasnai snar Manḇedaw ima isya, ma nari mambir pyum kaku ma pampum farkarkor ḇekakuḇa. Nari kakyar Bena nsambraḇ isof wamnis raris aiknam ḇerares ḇedo kaku ma ḇeyores nako rofyor wamdoḇer ya myun.​—Yeremia 17:5-8.

7. Rosai ḇefnai fa Allah imarisen buk ”samambraḇ ro swaruser” Bena?

⁷ Imbude na wafuken, ’Rosai ḇefnai fandun fa yakyar faro rosai Refo ikofen na?’ Fakfuken ḇeradine nsasar ke? Aroḇa ḇeri. Yahwe imewer fa wakyar monda roi oso snar snonkaku ḇesesya sikyarna. Imarisen buk ”samambraḇ ro swaruser” Bena fa wafawi Refoya ma wasmai fasasnai snar Refo ine kaku ḇeri ryamuma ro I. Kuker wafawi nabor kaku rosai Refo ikofen na, nari kakyar Bedi faro Refoya syambraḇ kaku. (Wasya Roma 12:1, 2; 1 Timotius 2:4.) Nyan oser fa wafawi Refoya iso kuker wafarkor roi oso wamarisen wafawi nabor na.

8, 9. (a) Farkarkor risai monda snonkaku ḇeḇeso simarisen sfarkor na? (b) Rariso sismai fainda rofyor siwasen rosai siwasya na?

⁸ Ono sisya simarisen sfarkor ḇardadi ḇero Refo. Ḇesesya simarisen smamkara fasfas ḇero Refo kuker rosai sejarawan, manbefawinanem, ḇaido arkeolog sya sikofenna. Oser ya iso, Kejadian 3:15. Yahwe ikofenḇair ḇardadi ḇefandun kaku ine rofyor Adam ma Eva suḇembroḇ I ma nyan ḇyepoik raya. Ḇardadi ḇerandak kaku ro Refo ine na nafnoḇek ko fa kofawi rariso Karajan Allah nari fyasnaibos snar nyan Allah ḇyepoik ya iso ḇepyum syadi ma rariso nari Karajan ani ifrur kandera nakam napromes. Rariso na wafarkor wos ḇero Kejadian 3:15 ya rai? Bisa fa fas mnuk-mnuk ḇese ḇero Refo ḇeḇuk fasasnai nabor syadiwer kuker rariso ḇardadi anine ndarirya. Ramnai, swewar fa wafawi fafisu risai sfas mnuk anna ma wasyosna imnis kuker sasyos oras ḇyena. Kuker wafrur rarirya, na wafawi ḇefas Refo sya sikenem ro fafisu oser ḇa, mboi si oser-oser roi sifas na nefasnaibos ḇardadi anna. Ine na nafnoḇek Au fa wakyar kaku snar Yahwe rur ḇesren Ḇyedi fyarkin si.​—2 Petrus 1:21.

⁹ Naek oso ro Jerman iwasen rariso syap oser-oser ro Refo sfas naborwer kuker Karajan Allah. Doḇe, ”Ḇefas Refoya iso snon ri 40, mboi rosai sfasna namnis kam. Ma sibor ro si sikenem ro fafisu oserḇa ma sifawiyaye si ḇa.” Inbesrar oso ro Australia fyarkor ro artikel oser ro syapmkun Menara Pengawal ma fyarkor rariso ras ḇeba Paskah ḇyesfesepen kuker Kejadian 3:15 ma Mesias i. ^[1] (Mam fasfas ḇepupes.) Fyas, ”Farkarkor anna nbas mka yena insape yamam Yahwe baba Ḇyedi. Roi ḇefrur fa yamanen kaku iso rariso Yahwe fyasos anan Paskah faro snonkaku Israel sya ma rariso ine ndarirya ro Yesus mankundi. Yaḇaḇir fandun fa yamnai resari ma yawasen ḇardadi ḇeba kaku anine!” Rosai ḇefnai fa inbesrar anine ḇyaḇir radine? Snar iwasen kuker kakaku rosai iwasyana ma ifawina. Ine nafnoḇek i fa syambraḇser kakyar ḇyena ma fyanam syadiwer ḇe Yahwe I.​—Matius 13:23.

10. Snar manḇefas Refo sya sfas kuker kakaku, rariso ine nsambraḇser kakyar koḇena faro Refoya rai?

¹⁰ Kwarapan kako, rariso manḇefas Refo sya sifasnai kuker kakaku. Simkak ḇaḇeri fa sifas roi ḇenapes ḇesya kwar. Manḇefas ḇese ro fafisuya sifas ker roi ḇepyum kuker er sena ma manfarkin sesya monda. Ḇape Yahwe nabi Ḇyesi sfas roi ḇepyum monda ḇa, sfas kako roi ḇeḇyeḇa er Israel ma raja-raja sesya roi sifrur na. (2 Tawarikh 16:9, 10; 24:18-22) Iba syadiwer, sfas sasar mankun sena ma snonkaku  ḇese ḇefarmyan ḇe Allah I. (2 Samuel 12:1-14; Markus 14:50) Naek ḇebabo oso ro Inggris doḇe, ”Kakaku ḇemnis radirya yasrow nabor ḇa. Yakyar kaku snar Refo ima syap ḇeramuma ro Yahwe I.”

11. Rariso farkankin kosmai ro Refo nḇuk kakakyar ḇeko snar Refo ima ryamuma ro Allah I rai?

¹¹ Rofyor snonkaku sya simarisen Refo fyarkin kankenem sena ido, na smam fainda ḇepyum. Ine na nḇuk kakakyar besi snar Refoya ryamuma ro Allah I. (Wasya Mazmur 19:7-11.) Inbesrar ḇebabo oso ro Jepang fyas, ”Snar kina ayedi nkoso mnis farkarkor ḇero Refoya inja, nkosmai payamyum ḇeba kaku. Nkosmai ḇaḇeaski, ḇaḇeoser ma saswar.” Refoya ifnoḇek snonkaku ḇebor sya fa smam roi ḇeḇeso sikyarna nkaku ḇa. (Mazmur 115:3-8) Refoya fyarkin kako snonkaku sya fa sfanam ḇe Yahwe, Allah Ḇepoik Syadi, ma ḇyuk asas ḇepyum kaku ro fafisu naiwama. Ḇape ro ḇar ḇese, snonkaku ḇekyar Allah ḇa sya, sifrur farsyos ḇeba ine ḇe allah sena. Ḇesesya sikofen snar snonkaku sya bisa fa sḇuk payamyum ro ras-ras naiwama. Ḇape komam kada isof ro kirine, sipok fa sifrur mnis roi ḇesamswen ro dunya ine ḇa.​—Mazmur 146:3, 4.

12, 13. Rariso kawosḇair roi nakam nasya snar neḇefrur ḇaido kawos Refoya ḇe snonkaku ḇesesya rai?

¹² Rofyor wawosḇair roi nakam nasya snar neḇefrur ḇaido wawos Refoya ḇe snonkaku ḇesesya ido, ḇepon ya swewar fa wafawi rosai sikyar kaku ya. Waswarepen snar ḇeḇeso ḇekyar faro evolusi sikyar kako snar Allah ima isya. Sikofen snar Allah ifrur roi ḇekenem nakam ro evolusi na. Ḇesesya sikyar snar evolusi ima nkaku snar sfarkorna ro rumfarkor. Ma ḇeḇeso sya sikyar faro Allah werḇa snar sfafko faro agama na. Inja, ḇepon ya wafuken snonkaku oso rosai ikyar ya ma rosai ḇefnai fa ikyar roi anna. Ramnai rwower pyum rosai ikofenna. Wafrur rarirya ido, imbude na imarisen fa ryower rosai wokofenna.​—Titus 3:2.

¹³ Rofyor snonkaku oso ikofen snar Auma wafawi roi noḇa snar wakyar faro Manḇedaw ya isya ido, na rariso kwarem na rai? Kuker syowi wor i fa fyasnaḇair ḇe Au rosai karkara ḇyedi kuker moḇsa kankenem ya ryama rai. Bisa fa wakofenḇair ḇe i, insama roi ḇekenem ḇerandak oso ikenem pdef ido, fandun fa ifrur mankundi fa ibore. Imbape, profesor oso ḇenanem ro fawawi kimia, ikofen insama bisa fa ifrur roi ine ido, roi ḇekenem oso fyandun (1) roi oso ḇemnis kif fa nadwarek i, (2) samambraḇ fa nya energi ma ḇyuki fararur, (3) informasi fa fyara moḇ isnai raya ma moḇsa isur rai, ma (4) samambraḇ fa ifrur informasi anna nabor syadiwer. Ikofen wer, ”Ḇaḇesamswen ro roi kasun ro kankenem monda nun kanandor kaku faro snonkaku sya.”

14. Karkara ḇepyan rosai bukna rofyor wawos roi nakam nasya snar neḇefrur?

¹⁴ Rofyor wawos roi nakam nasya snar neḇefrur ido, bisa fa buk karkara ḇepyan monda raris manwawan Paulus moḇ ifrur raya. Fyas, ”Snon oso ḇefawinananem ḇaḇawes rum ḇape snon ḇefawinananem ḇaḇawes roi ḇeborkam isoine Allah.” (Ibrani 3:4) Kakuḇae, rum ḇekaku ya isya snar snonkaku oso kyara mnis ma ḇyawes na. Rarirya kako, roi ḇekenem ḇesamswen syadi ro rum ya, nkaku ḇeri snar mankun oso isya ḇekara mnis ma ḇefrur na. Bisa fa buk kako publikasi koḇena. Inbesrar oser dawos kuker snonkbor oso ḇekyar Allah ima isya ḇa. Ḇyuk syap risuru ḇeḇeyap insanja na ḇe snonkbor ine ma minggu oser ḇerama ya, doḇe, ”Kirine yakyar faro Allah I.” Snonkbor ine fyarkor Refo ma ḇarpurya dakḇe naek koḇedi.

15, 16. (a) Rofyor kofasnai ḇaim ḇe snonkaku oso snar Refo ima ryamuma ro Allah I, rosai fandun fa kofrurya? (b) Rosai fandun fa koswarepen pdef na?

¹⁵ Rofyor snonkaku oso kyorwanan kaker  kuker Refoya ido, rariso na wawos kuker i rai? Raris rosai ḇeḇeyap ro ḇepon ya, randak kaku wafuken ḇe i rosai ikyar ya. Ma, swewar fa wafawi rosai imarisenna. (Amsal 18:13) Imarisen faro fawawi dunya ido, buk mnuk ro Refo ḇefasnaḇair rosai Refo ikofenna namnis kaku kuker fawawi dunya. Imarisen faro fawawi sejarah ido, wapḇair sarisa oser sfas ro syap-syap sejarah, ma fasnaḇair rariso Refo fyas sarisa ani fyoro iwara kwar rofyor sarisa ani ndarirya ḇaim. Snonkaku ḇesesya nari srower Au rofyor fasnaḇair besi mnuk risai ro Refo na ḇefnoḇek si fa sifrur mnis kankenem sena, imnis raris Fafaya ro Urek.

¹⁶ Koswarepen, komewer kawos fababri kuker snonkaku sya. Komarisen srower pyum rosai kawosna ma sfarkor Refoya. Inja kuker syowi koḇuk fakfuken yoḇ si, ma korower pyum si. Rofyor fasnaḇair rosai wakyar ya faro snonkaku oso ido, wafrur pyum i, iba syadiwer rofyor snonkaku ani ḇyeumur syadi ro Au. Ḇesyowi snonkaku ḇesesya ido, nari si kako sisyowi Au. Ma nari smanen Au snar ḇebabo kaker mboi kwara mnis ma wamk nako faro rosai wakyar ya. Imbape, fyor snonkaku oso imbe dawos famfabri ḇaido ikoryae Au monda ido, fandun fa kwarem awerna.​—Amsal 26:4.

17, 18. (a) Rosai na ḇefnoḇek Au fa swambraḇser kakyar Bena faro Refoya? (b) Fakfuken rosai nari kawos ro artikel ḇepurya wer?

¹⁷ Imbude kofawi kwar farkarkor ḇeḇeknam kaku ro Refoya, mboi fandun fa kofrur naborwer fa kona kakyar ḇesambraḇ syadi. Fandun fa kosewar kaku ma kofarkor nabor syadiwer napnapes anine, raris kosewar arasai ḇeyokef ya. (Amsal 2:3-6) Nyan ḇepyum oser fa swambraḇser kakyar Bedi iso wawasya syap ḇero Refo nakam. Imbude na wawasya Refoya fa namnai ro taun oser. Nyan ine nafnoḇek pengawas wilayah oser fa fyanam faro Yahwe rofyor ḇyabo kaker. Doḇe, ”Roi oser ḇefnoḇek aya fa yaḇesyowi snar Refo iso Allah Wos Ḇyena iso kuker yawasya syap-syap na ḇesiper. Insape yafawi syadiwer farfyar ḇero Refo yawasya kwarna rofyor yababo kaker.” Au kako, bisa fa buk roi ḇefnoḇek Au fa wafarkor nabor syadiwer ro wos Bedi fa wafawi rosai wawasya na. Imbude nwa kwar Watchtower Library sifrurna ro DVD, PERPUSTAKAAN ONLINE Menara Pengawal, Indeks Publikasi Menara Pengawal, ḇaido Panduan Riset untuk Saksi-Saksi Yehuwa.

¹⁸ Sinan mkoya, syadibur ro snonkaku ḇesesya, mkoiso na ḇefarkor romawa mkoḇesi farkarkor kuker Yahwe I. Inja rariso na mkofnoḇek si fa sna kakyar ḇesambraḇ kaku ḇe I rai? Ro artikel ḇepurya nari kawawos nyan ḇeḇeso mkofrur roi nane.