1, 2. (a) Rosai ḇefnai na napyanḇa fa sinan sya sfarkor roma inai sesi fa sikyar ḇe Yahwe I, ma nyan oser monda risai sinan sya sḇukifrur roi ine? (b) Roi rifyak rosai nari kofarkor ya?

AWIN ma kamam oso ro sup Prancis sukofen, ”Nukyar faro Yahwe I, mboi nane kyurfasna ḇa snar nari roma inai nuḇesi kako sikyar ḇeri. Kakyar ima roi koḇuk fa ḇewaris ḇa. Romawa nuḇesi na sḇawes kakyar sena kermkun ḇe kermkun.” Naek oso ro Australia fyas, ”Mkofnoḇek fa mkoḇawes kakyar ro roma inai mkoḇesi sne sena, imbude ima roi ḇesamswen kaku mkosmai ro kankenem mkoḇena.” Ikofen wer, ”Imbude mkokara mkokarem pyum kwar fakfuken ro roma inai mkoḇesi. Imbape nari ro ḇarpurya sḇuk fakfuken ḇese ḇemnis radirya wer! Imbude kankarem mkoḇuk ḇe roma inai mkoḇesi ro kirine nasrow kwar mboi ro kankenem sena ro rasras naiwama na nasrow ḇa.” Ro swaf romawa sya siba muryas, sinan sibor sya sḇaḇir fandun fa sifasnaibos kuker kakaku wer farkarkor sḇuk kwar ro ḇepon iwara na. Ma sḇaḇir snar fandun fa sfarkor roma inai sesya kuker nyan ḇebor fa siswar faro Yahwe I.

² Auma sinan disau ido, fyorno ido nari wafuken bisa fa wafarkor roma inai Besi fa siswar faro Yahwe I ma sifarmyan pdef ḇe I, iba syadiwer rofyor siba kwar ke? Kaku ya, snonkaku koine na jadi fa kofrur roi ine kuker samambraḇ mankun koḇena ḇa. (Yeremia  10:23) Iso ḇefnai fa kosnefer ḇe Yahwe I fa ifnoḇek ko. Ḇyuk farkankin nabor faro sinan sya. Rariso wafnoḇek roma inai Besi rai? (1) Mambir pyum roma inai Besi. (2) Farkor si roi ḇaḇir ro snembri kuker Yahwe I faro si. (3) Buk sarḇer. (4) Ḇenadi fa wor rur ḇesren ma ḇekaḇaḇaḇ faro roma inai Besi.

3. Rariso sinan sya sifarari nyan Yesus fyarkor manfamyan ḇyesi rai?

³ Yesus ifukenḇair faro manfamyan ḇyesi ker kuker rosai sikyar ya. (Matius 16:13-15) Bisa fa wakfarari nyan ḇyedine. Rofyor wafarfyar kuker roma inai Besi ḇaido rofyor mkofararur kayam ido, wafukenḇair si rosai skarana ma buk swaf fa sfawar rariso sneḇaḇir mankun sena rai. Imbude fafisu ono sikyar mankunḇa faro roi oso ke? Naek oso ro Australia ḇeumur taun ri 15 doḇe, ”Kma yedi dawos ḇe aya kuker kakyar ayedi ker ma ifnoḇek aya fa yakara. Ifuken ḇe aya, ’Rosai Refo ikofen na?’ ’Wakyar faro rosai ikofenna ke?’ ’Rosai ḇefnai fa wakyar na?’ Imarisen fa yakarem ro sne ayedi ma insama yap kaḇer monda awer rosai Kamam ma Awin sukofenna. Rofyor yaba muryas, yaḇuk kankarem ḇepyum syadiwer.”

4. Rosai ḇefnai fandun fa ḇekaḇaḇaḇ ma kwarem fakfuken ro roma inai Besi? Fasnai fawar oso.

⁴ Rofyor roma inai Ḇesya sikyar ḇeri ḇa faro rosai Refo fyarkor na ido, ḇekaḇaḇaḇ. Wafnoḇek si fa sismai kankarem ro fakfuken-fakfuken sena. Kma oso doḇe, ”Rwower pyum fakfuken ro romawa Besi. Fasnai awer snar fandun si ḇa, ma pampum awer roi oso sifukenna snar kwara nama roi ḇemnisḇa.” Kaku ya, rofyor romawa Besi sifuken roi oso ḇe Au ido ima roi ḇepyum snar ima kyurfasna simarisen sakfawi na. Yesus mankundi kako ḇyuk fakfuken rofyor ḇyabo kaker. (Wasya Lukas 2:46.) Roma babo oso ro Denmark ikofen, ”Kaku ya, sinan ayesuya suisya sumkakwarek aya mboi, rofyor yafukenḇair snar agama nkoḇedine ima agama ḇekaku ke, sinan ayesuya surmomen aya ḇa. Sukarem fakfuken ayenakam kuker sufasnaina ro Refoya.”

5. Rofyor sinan sya smam mboi rya roma inai sesya sna kakyar faro Yahwe I kwar, ḇape rosai fandun fa sifrur ya?

⁵ Mambir pyum roma inai Ḇesya. Kwara awer sna kakyar ḇe Yahwe I snar sakso ro ḇaḇeḇaryas ma fananjurya kwar. Rariso sneḇaḇir ḇekaku sena ḇe Yahwe I rai, ma rariso smam Refoya rai? Swewar kaku fa wafawi snar roi oso isya ḇefrur samswen si fa sisouser pdef ḇe Yahwe I ke roḇa. Wawosḇair Yahwe I ro ras ḇe ras rofyor wafrur roi nakam kuker roma inai Besi. Ḇenadiwarek fandandun ro roma inai Ḇesya, rofyor Ausya ḇekayamyam kuker si ḇaido rofyor wemir monda.

6. Rofyor sinan sya sifarkor pdef farkarkor kuker Yahwe ma Refoya ido, rariso nane nafnoḇek si fa sḇuk farkarkor faro roma inai sesi rai?

⁶ Snonkaku sya simarisen srower Yesus i snar iswar Yahwe I ma ifawi pyum Refoya. Sḇaḇir snar Yesus iswar si kako. Inja srower mnis rosai ikofenna. (Lukas 24:32; Yohanes 7:46) Kuker nyan ine kako, rofyor romawa sya smam snar waswar Yahwe I ido, nane na nafnoḇek si fa siswar I kako. (Wasya Ulangan 6:5-8; Lukas 6:45.) Inja farkor mnis Refoya, ma wawasya syap-syap koḇena ro ras ḇe ras. Swewar fa wafawi nabor kuker roi Yahwe ifrur kwar nakam. (Matius 6:26, 28) Nwa fawawi nabor kuker Yahwe I ido, na nwa roi nabor syadiwer fa bukfarkorna faro roma inai Besi.​—Lukas 6:40.

7, 8. (a) Rariso fawawi wasmaina kuker Yahwe I nun fainda faro romawa Bedi? (b) Buk fawar oso kuker rosai sinan ḇeḇeso sifrur kwar ḇe romawa sesya.

⁷ Rofyor wafawi farkarkor oso kuker Yahwe I ido, fawarna ḇe roma inai Besi. Wafrur radine  ro fafisu sairirya monda rofyor ḇekayamyam kuker si, rofyor mkofasos fananjur ḇaido ro nadi kina mkoḇena monda ḇa. Ine iso awin ma kamam oso ro Amerika Serikat roi sufrurna. Sufawar fawawi kuker Yahwe I ḇe roma inai suḇesya rofyor skomam roi oso ḇesnai pyum ro farsyos ḇeba ine ḇaido rofyor san roḇean ḇeyan pyum. Sukofen, ”Nuḇuk swarapepen ḇe roma inai nuḇesi faro saswar ma rosai Yahwe kyara ḇeponna fa fyasos roi nakam ḇeko na.” Inbeswa oso ro sup Afrika Selatan sumarisen sufawar braur bramin nakam rofyor sufararur ro yaf kuker inai suḇesuya. Imnis ra, sufawar kuker rariso mor kasun oso isur ḇe rokaker. Sukofen, ”Nusewarpan fa nuḇawes syowi ro inai nuḇesuine sne suḇena fa suḇesyowi kankenem ma payamyum ro kankenem anna.”

⁸ Kamam oso ro Australia dun romamkun ḇyedi, ḇeumur taun risamfur, fa suraḇe museum. Sinan ine dun fafisu ine fa ifnoḇek romawa ḇyedine fa syambraḇser kakyar ḇyedi ma myam kaku snar Yahwe ima Manḇedaw koḇedirya. Doḇe, ”Numam sfasnai pameran kuker aiwan ḇekenem ro soren ro fafisu ḇepon iwara sap ḇe ammonit ma trilobit. Nukandor kaku snar aiwan ḇepromes kwar ine ipyum kaku. Moḇ isnai raya syamswen ma ḇar-ḇar ro baken ḇyena imnis kam, inja komam na ido imnis kuker aiwan komam ro baboine. Inja rofyor kankenem ya ḇeḇefadwer ro roi ḇekasun ḇe roi ḇemnis kaku ido, rosai ḇefnai fa aiwan ḇekenem ro fafisu ḇepon iwara ansine simnis kaku kwar? Inema farkarkor oso yamanen kaku ma yamarisen yarwas ḇe roma ayedi.”

9. Rosai ḇefnai fa koḇuk sarḇer ima ipyum? Sarḇer rosai awin oso ḇyukna?

⁹ Yesus ḇyuk sarḇer ker. Fyarkor roi ḇefandun kaku kuker fyawar farfyar ḇaido ḇyuk fasasnai oso. (Matius 13:34, 35) Rofyor buk sarḇer ḇe romawa Besi ido, na wafnoḇek si fa sḇuk waswasen sena. Nane nafnoḇek si fa skara farkarkor rosai buk besi kwar, insama sifawi snai kaku, ma siswarepen na. Nari sismai marisen kako rofyor sifarkor. Imnis raris, awin oso ro Jepang imarisen roma ḇyesuya sufarkor snar nyan Yahwe ifrur atmosfer ro supswan ine rai fyasnai iswar kaku ko. Romawa oserya ḇyeumur taun riwar ma sumin ya samfur. Inja ḇyuk sarḇer ḇepyan fa sufawina ḇemnis kuker umur suḇena. Ḇyuk ḇe romawa ḇyesuine gula, susu, ma kopi. Ramnai dor su oser-oser fa sufrur kopi ḇe i. Doḇe, ”Sufrur famfnom na ḇa. Rofyor yafukenḇair su rosai ḇefnai fa sufrur mnis kaku kopi ya, sukofen sumarisen sufrur kopi anna imnis kuker rosai yamarisen na. Yafasnaḇair ḇesu snar Allah ifrur mnis kaku gas-gas ro atmosfer imnis radiri insama ipyum faro ko.” Sumarisen kaku faro farkarkor ine, ma suḇefnder na ḇaḇeri!

10, 11. (a) Sarḇer rosai buk fa wafasnai ḇe romawa Ḇesya snar Manḇefrur ima isya? (Mam sonin ro randak artikel ine.) (b) Sarḇer rosai buk kwar na?

¹⁰ Sarḇer rosai na buk fa fasnai ḇe romawa  Ḇesya snar Manḇefrur ima isya? Au ma romawa Besi bisa fa mkofrur kue kuker mkoḇuk resep oso. Fasnaḇair besi fandun fa mkoso mnis resep anna. Ramnai buk ḇe romawa bansya apel oso ḇaido bon ḇeḇeso, ma wafukenḇair si, ”Mkofawi apel ine nya resep ke?” Ramnai kwaruk apel ya fa ḇyesuru, ma buk mor ya besi. Fasnaiḇair besi snar mor anya imnis raris resep. Ine nḇuk akurfasna kuker nyan rariso apel ya ḇyeḇefrur. Ḇape inema syamswen syadi ro nyan fa sifrur kue na. Bisa fa wafukenḇair, ”Snonkaku oso fyas resep kue na. Inja mansei ḇefas resep apel ya?” Rofyor romawa Ḇesya siba kwar ido, bisa fa wafasnaḇair snar resep fa aiknam apel ḇyuk bon fa naborwer nasya ro DNA ro mor ḇyena. Wafasna kako ḇesi sonin ma fasasna ḇeḇeso ro ram ḇeḇe 10 isof ro 20 ro syapmkun Asal Mula Kehidupan—Lima Pertanyaan yang Patut Direnungkan.

¹¹ Sinan sibor sya siwasya artikel ro Sadarlah! seri ”Apakah Ini Dirancang?” kuker roma inai sesya. Rofyor roma inai sesya sikasun kaker ido, sinan sya sfasnaḇair farkarkor anna kuker nyan ḇepyan. Imnis raris, inbeswa oso ro Denmark sufasnaḇair pesawat ya imnis kuker man sya. Sukofen, ”Komam kada pesawat ya rya imnis raris man. Imbape bisa fa nya pnor nabor ma ramnai nakpef ḇe pesawat-pesawat kasun ke? Man sya sfandun landasan fa sado ro na ke? Ma rariso mambir rakrok ro pesawat ma dasdisen ro man oso rai? Inja mansei ḇefawinanem syadi ya, snonkaku ḇefrur pesawat ya ke Manḇefrur man sya?” Rofyor wawos kuker romawa Besi ma buk fakfuken besi ido, wafnoḇek si fa sḇuk ”samambraḇ swaruser” sena ma sisambraḇser kakyar sena ḇe Yahwe I.​—Amsal 2:10-12.

12. Rariso bisa fa buk sarḇer fa farkor roma inai Besi snar rosai Refo ikofenna nama nkaku?

¹² Bisa buk sarḇer fa farkor romawa Ḇesya snar rosai Refo ikofenna namnis kam. Imnis raris, bisa fa wawasya Ayub 26:7. (Wasya.) Wakofen monda awer wos ḇero mnuk ine ndramuma ro Yahwe I. Imbape, wafnoḇek si fa sḇuk swaruser sena. Bisa fa wakofenḇair snar snonkaku ro Ayub fafisu ḇyedi sikyar ḇaim supswan ine kyain ro moḇ ḇemkei. Sifawi monda roi ḇesena nasnai raris bola ḇaido karui, nakain mboi nefandun roi oso fa syopan na. Ro fafisuya, snonkaku osoḇaḇeri ḇefasnaḇair kaku snar supswan ine kyain ro moḇ ḇemkei, snar teleskop ḇaido pesawat luar angkasa isya ḇaim. Farkarkor ḇyena iso Refoya sifasna fyoro kaku kwar, mboi fasfas ḇero donna nkaku ḇesya kwar snar ndramuma ro Yahwe I.​—Nehemia 9:6.

13, 14. Rariso sinan sya sfarkor roma inai sesya fa sisouser faro rosai Refo ikofen na?

¹³ Inema roi ḇefandun kako fa farkor romawa Besi snar nari sismai aski syadi rofyor sisouser faro rosai Refo ikofenna. (Wasya Mazmur 1:1-3.) Imnis raris, wor si fa siwasen snar sra fa sikenem ro myos oso. Fandun fa skinfir snonkaku na ḇebarek kuker si ro moḇ ya. Ramnai bisa fa wafuken, ”Wamarisen fa snonkakusya kam sikenem fyoro ido, na snonkaku ḇemnis rariso wamarisen wun fa sḇarek kuker au?” Ramnai, wawasya Galatia 5:19-23 fa mam snonkaku ḇemnis rariso Yahwe imarisen fa sikenem ro dunya babo ya.

¹⁴ Kuker nyan ine, na nafnoḇek Au fa wafarkor romawa Besi farkarkor ḇefandun kaku risuru ine. Oser ya, Yahwe fyarkor ko kuker nyan rariso na kosmai payamyum ro kankenem koḇena ro fafisu ine ma kokenem pyum kuker snonkaku ḇesesya. Ḇesuru ya, fyarkor ko kuker nyan rariso kokenem ro dunya babo ya rai. (Yesaya 54:13; Yohanes 17:3) Bisa fa fasnaḇair kako ḇe romawa Ḇesya rariso Refoya ifnoḇek naek srar koḇesi. Imnis ra, swewar farfyar ro kankenem oso ro syap oser koḇena, imnis ro artikel ”Alkitab Mengubah Kehidupan” ro Menara Pengawal. Ḇaido wor snonkaku oso ro sidang fa fyawar ḇe Au ma  romawa Ḇesya rariso Refoya ifnoḇek i kwar fa ifrur fararwei ḇeba ro kankenem ḇyedi fa ifrur Yahwe imarisen.​—Ibrani 4:12.

15. Rosai na ḇefnoḇek Au fa farkor romawa Ḇesya?

¹⁵ Buk waswasen Bedi fa wafrur farkarkor ya ipyum ma nun marisen ḇe romawa sya. Kwara pyum nyan nabor fa wafnoḇek si insama simarisen sfarkor farkarkor kuker Yahwe ma sifanam ḇe I. Ma wafrur roi ine ḇesya kwar isof siba muryas. Kma oso doḇe, ”Kopok komor awer fa kosewar nyan-nyan ḇebabo fa kofasnai farkarkor-farkarkor ḇekwar na”.

16. (a) Rofyor farkor romawa sya, rosai ḇefnai fandun fa ḇekaḇaḇaḇ? (b) Rariso sinan ḇeḇeso sya sifasnai kaḇaḇaḇ ya?

¹⁶ Kuker farfnoḇek ro Yahwe rur ḇesren Ḇyedi, na romawa Ḇesya sna kakyar ḇesambraḇ kaku. (Galatia 5:22, 23) Ḇape nane nefandun oras nabor. Inja ḇekaḇaḇaḇ faro romawa Besi, ma farkor si pdef. Kamam oso ro sup Jepang ḇena romawa oso ma inai oso doḇe, ”Aya ma swa yedi numamwarek romawa nuḇesuine monda ḇa. Rofyor subaḇa kaker, nufarkor kayam kuker su ro swaf menit ri 15 ro ras ḇe ras, mboi ro ras fananjurya nama roḇa. Menit risamfur ririm inema roi ḇesamswen ḇenu ma romawa suine ḇa.” Pengawas wilayah oso fyas, ”Rofyor yababo kaker, yana kako fakfuken nabor ma yakmom yakofenna rai. Ro swaf ya ḇyenande, fakfuken-fakfuken ḇebor anna neḇekarem ro fananjur ḇaido farkarkor ro kina ḇaido farkarkor mankun ayena. Iso ḇefnai fandun kaku fa sinan sya sfarkor pdef romawa sesya.”

17. (a) Rosai ḇefnai fandun fa sinan sya sisambraḇser kakyar mankun sena? (b) Rariso awin ma kamam oso ro Bermuda sufnoḇek inai suḇesya fa sikyar kaku ḇe Yahwe I?

¹⁷ Kakuḇae, na romawa sya sfarkor nabor rofyor smam nwa kakyar ḇesambraḇ kaku ḇe Yahwe I. Nari smam rosai wafrurna. Inja fandun fa swambraḇser kakyar Bena pdef. Iḇye kada romawa Ḇesya smam snar Auma wakyar kaku faro Yahwe I. Imnis ra, awin ma kamam oso ro Bermuda rofyor suḇeḇirḇar kuker roi oso, suḇenadi kayam kuker inai inkbor suḇesya ma suyor fa Yahwe ifnoḇek si. Suḇuk anun kako ḇe inai suḇesi fa sḇenadi ro mankunsi. ”Nukofen ḇe inai ḇeba nuḇedi kako, ’Wakyar kaku faro Yahwe I, wamyaren pdef ro fararur Karajan, ma ḇeḇirḇar mankenem awer.’ Rofyor myam bon ya, ifawi snar Yahwe ifnoḇek inko. Nane nafrur fa ikyar kaku faro Allah ma Refoya.”

18. Iḇye kada rosai sinan sya siswarepen na?

¹⁸ Sinan mkoya, mkoḇefnder awer snar mkodif awer roma inai mkoḇesi fa sna kakyar. Mko iso ḇeker ma ḇerupya, mboi ḇefrur fa isur iso Yahwe I. (1 Korintus 3:6) Inja iḇye kada mkofararur marḇak fa mkofarkor roma inai mkoswar sya fa sifawi Yahwe I, ma mkoḇenadi mkor rur ḇesren Ḇyedi insama nafnoḇek si fa sna kakyar. Mkokyar kaku snar nari Yahwe ḇyebarakas fararur marḇak mkoḇena kam.​—Efesus 6:4.