Ḇekaku ya, mnuk ine ikofen kaku rarirya ḇa. Mboi, mnuk ine dawosḇair snonggaku oso na isapi ker ro samswen ma kandera ro kenem ḇyena, mboi bisa dores kaḇer wer ma isusu ḇa.

Komampan mnuk ḇepon ya ma ḇepur ya kada, ”Mam ker awer fanam ḇe snonggaku ḇenapes ya rum ḇyeja; kwakok awer moḇ imnaisu ro ya. Snonggaku ḇenapes isapi rarwan rifik rariryano, nari dores kaḇer, ḇape snonggaku ḇeḇarḇor nari isapi ḇo dores ḇa kukro roi ḇemun. Fafisu mbroḇ bedi isapi, waryaḇ awer, ma fafisu ikarkar, snembri iryaḇ awer.”​—Ams. 24:15-17.

Snonggaku ono sisya skara mnuk 16 ine kyur ḇe snonggaku ḇefrur sasar ker mboi ḇarpur mura imbror ro sasar ḇyena ma bisa nya wis ḇepyum kaḇer kuker Allah wer. Manfarkin agama risuru ḇeraker Inggris suyoḇe ”pendeta ḇebor ro fafisu naiwara ma kirine, smam mnuk anya” rarirya. Suyoḇe kakara ḇeradirya kyurfasnai ”snonggaku oso bisa ifrur sasar ḇeba, ḇape iswar Allah pdef ma imbror ido, nari Allah byuk ampun faro i”. Kakara ḇeradine na nafrur fa snonggaku sya simarisen sifrur sasar ker. Skara ḇo soḇe sifrur sasar ker rariryano, Allah na byuk ampun faro si ker.

Ḇape iso mnuk 16 ine ikofen kaku ya ḇa.

Wos Ibrani ”isapi” ḇero mnuk 16 ma 17 sepake na faro roi ḇeḇeso. Imnis ra roi oso ḇesapi, raris aiwan sya sisapi ro nyan, snonggaku oso isapi ro rum ḇoya ḇe sop, ḇaido karui mor-mor ḇesapi ḇe saprop. (Ul. 22:4, 8; Am. 9:9) Ḇape wos ani bisa nḇeḇair kako ḇe roi ḇese. Imnis ra mnuk ine ikofen, ”Yahwe fyarkin snonggaku oso wewur ḇyena, fyor imarisen faro nyan kankenem snonggaku ani. Isapi mboi nari ḇyarek pdef ḇa, snar Yahwe damkepen ḇramin ḇyedi.”​—Mz. 37:23, 24; Ams. 11:5; 13:17; 17:20.

Komampan roi Profesor Edward H. Plumptre ikofen na: ”Wos [”isapi”] ro wos Ibrani ḇyeja kyurfasnai faro snonggaku ḇefrur sasar ya ḇa.” Manfawinanem oso ḇese ikofen ḇekur mnuk ine radine, ”Snonggaku ḇewayam Allah kawasa Ḇyesi snar imbe sismai slamat ido, ima sifrur roi ḇefromo monda ma sifrur susa manggunsi, kukro snonggaku ḇeḇarḇor sya na sipok sismai slamat ya ḇa!”

Inja, Amsal 24:16 ikofen ḇa ”isapi” ro sasar, ḇape ine kyurfasnai ḇe snonggaku ḇesmai ker samswen ḇaido farawrowes na. Ro dunya ḇeḇarḇor ine, snonggaku ḇenapes bisa siduf ḇaido sismai samswen ḇesena. Ḇepyum ḇa wer, pamarenta sya sewayam si kukro kakyar sena. Ḇape sikyar kaku Allah ryous ma isaramper si ḇesya kwar fa simkuepen pdef. Kwarapan kada, ras ono mam kwar Allah manfamyan Ḇyesi simkuepen pdef ke? Rosai ḇefrur fa sisambraḇ ya? Ine snaro, ”Yahwe isaramper snonggaku ḇesapi syakam, ma syambraḇser snonggaku ḇeyores aḇyoḇer ḇa syakam.”​—Mz. 41:1-3; 145:14-19.

”Snonggaku ḇenapes” siryaḇ ḇa kukro snonggaku ḇese sismai kandera. Mboi na sismai sneprei kukro sifawi ”snonggaku ḇemgak faro Allah ḇenapes nari sismai bon ḇepyum kukro simgak faro I”.​—Pkh. 8:11-13; Ayb. 31:3-6; Mz. 27:5, 6.