Oroḇa. Fasfas sejarah ḇaido fasfas ro Refo ḇekofenḇair sifrur ḇaḇebaptis ḇeradine naisya ḇa.

Mnuk ine ndrok ḇese ro Refo ḇebor na. Inja, nafrur fa snonggaku sya skara ro fafisu Paulus ikenem ya ono sisya sebaptis faro snonggaku ḇemar sya. Rupa ra ro Refo oso, mnuk ine ryok radine: ”Rofyor ḇemarsya sḇeḇeḇawes kaḇer werḇa, snaro snonkaku ḇekenem ono sisma masi sren faro ḇemarsya?”—Ḇaḇeasas Babo Wos Ḇyak ro Rasras.

Ḇape komampan manfawawi Refo risuru suine roi sukofen ya. Dr. Gregory Lockwood doḇe ”bukti noḇa ro fasfas sejarah ḇaido ro Refo” ḇekofenḇair ”sebaptis snonggaku faro snonggaku ḇemar kwar sya”. Profesor Gordon D. Fee dakkofen roi ḇemnis. Doḇe, ”Fawar sejarah ke fawar ro Refo ke, nakofenḇair sifrur ḇaḇebaptis ḇeradine ḇa. Ro Ḇaḇeasas Babo kako, sfas roi ine ḇa. Ro abad-abad ḇe ḇarpon ya, gereja-gereja ḇesae babo, imnis ra gereja Kristen ortodoks, sakfrur roi ḇeradine ḇa.”

Refo fyawar ḇe ko snar Yesus manfamyan ḇyesi sisouser parenta ḇyena fa ’sfarkor er sya kam ḇe manfamyan ḇyesi ma sḇebaptis si, sfarkor si fa sifrur roi ḇebor kam’. (Mat. 28:19, 20) Fyor snonggaku oso imbe ḇyebaptis ido, fandun fa fyarkor Refo resari, fyasnai kakyar ya, ma isouser faro Allah Yahwe ma Yesus su. Snonggaku ḇemar kwar ma ḇero kubir sya sipok sifrur roi nane ḇa. Ma snonggaku Kristen ḇekenem kaker sya sipok sifrur roi nane fadwer si ḇa.​—Pkh. 9:5, 10; Yoh. 4:1; 1 Kor. 1:14-16.

Inja rosai knam kaku ro Paulus wos ḇyenane?

Snonggaku ḇero Korintus sia sikyar ḇa nari snonggaku ḇemar kwar sya sikḇok kaḇer. (1 Kor. 15:12) Ḇape Paulus fyasnaiḇair roi skara na nsasar. Doḇe ras ḇe ras ismai roi ḇemun na ḇeyun ḇe marmar. Imbape ikyar kaku imar mboi na ikḇok kaḇer fa ikenem ro nanggi raris Yesus i.​—1 Kor. 15:30-32, 42-44.

Snonggaku Kristen ḇero Korintus sya fandun fa sifawi sima sismai ramrem, inja nari sismai roi ḇesamswen ras ḇe ras ma nari simar. Simar raposa insape saksmai kaḇakḇok ya. Sima ’sebaptis ro Kristus Yesus’ inja na ’sebaptis ro marmar ḇyedi’ kako. (Rm. 6:3) Ine kyurfasnai nari sismai samswen imnis ra Yesus i, mura simar ma sismai kaḇakḇok fa sikenem ro nanggi.

Yesus ikofen faro manfamyan risuru ḇyesu, ”Nari muyakmasi masasi Yaḇe Yamasi ya.” (Mrk. 10:38, 39) Wos Yesus ikofen nane kyurfasnai ḇa ḇyebaptis ro war ya dori. Yesus imbe ikofen soasuser ḇyena na nun i ḇe marmar. Paulus doḇe snonggaku ḇesmai ramrem ansine na ’sḇe kandera fnoḇek Yesus kwar, inja si kako nari sismai payamyum fnoḇek Yesus kako’. (Rm. 8:16, 17; 2 Kor. 4:17) Inja ḇesmai ramrem ansine kako nari simar insape sismai kaḇakḇok ḇe nanggi.

Rarirya ido, kaku ya Paulus wos ḇyena ryok radine: ”Snonggaku ḇemar kwar na sikḇok kaḇer ḇa ido, rariso ono ḇebaptis faro ḇemar sya? Rosai ḇefnai sebaptis faro fandun ḇeradine?”