1-2. Rosai ḇefnai fa snonggaku Kristen syakam fandun fa sifawi kaḇakḇok ḇe nanggi ya?

YAHWE kawasa Ḇyesi ḇero baboine, ḇebor sya sima sna saneraro fa sikenem fyoro ro supswan ine. Mboi snonggaku ḇesmai ramrem ḇekenem kaker ro supswan ine sna saneraro fa sek ḇe nanggi. Sima sibor ḇa. Ḇesmai ramrem ansine simarisen sifawi moḇsa kenem sena ro nanggi na ḇyerai. Imboi snonggaku nari ḇekenem ro supswan ine moḇsa na serai? Kero kawosḇair kaḇakḇok ḇe nanggi nari dun barakas kako faro snonggaku ḇekenem ro supswan ine. Inja kokenem ro nanggi ke supswan ine ke, fandun fa komarisen kofawi kaḇakḇok ḇe nanggi ine.

² Allah fyarkin Yesus manfamyan ḇyesi ḇeḇeso ro abad randak siwara fa sfasepen kaḇakḇok ḇe nanggi ine. Manwawan Yohanes fyas radine, ”Baboine koine Allah romawa ḇyesi ko, ḇape rariso kuker ko, ima ḇyeḇefasnai ḇaim maro ko. Mboi kofawi rofyor Kristus ryama nari komnis i.” (1 Yoh. 3:2) Inja snonggaku Kristen ḇesmai ramrem sya na sifawi ḇaim moḇsa sḇerai fyor seḇeḇawes ḇe nanggi kuker baken rur. Mboi rofyor sismai sasuref sena, nari smam kaku Yahwe I . Refo ikofen snai roi nakam ḇekur kaḇakḇok ḇe nanggi ḇa, mboi bisa kofawi kermgun ro Manwawan Paulus fasfas ḇyena. Ḇesmai ramrem ansi nari sisya fnoḇek Yesus ro nanggi kwar rofyor Yesus ikafyo pamarenta, ḇaḇepapoik, ma samambraḇ nakam.  Ma ”mbroḇ ḇepupes nari ifrur kafyo ya isoine marmari”. Ḇarpur ya Yesus ma ḇepoik kayam fnoḇek i sya na sikunem faro Yahwe ma sbuk kaḇer roi nakam ḇe Yahwe I. (1 Kor. 15:24-28) Ine iso fafisu ḇepyum kaku! *

3. Imnis wos ḇero 1 Korintus 15:30-32 ya, Paulus kakyar ḇyeja faro kaḇakḇok ya nafnoḇek i fa syambraḇ ḇo ifrur rosai?

³ Paulus ikyar saneraro kaḇakḇok ya isya, inja imkuepen pdef ro samswen ḇekur i na. (Wasya 1 Korintus 15:30-32.) Ikofen ḇe snonggaku Korintus sya snar ras nakam ismai roi ḇemun. Paulus ikofen wer, ”Yaḇesewar fayasampum aiwan-aiwan ḇeyanḇepek ro Efesus.” Imbude isya dawos ḇekur famfaḇri kuker aiwan ḇeyan ḇepek ro stadion ḇero Efesus ro fafisu anya. (2 Kor. 1:8; 4:10; 11:23) Ḇaido rya kyur ḇe snonggaku Yahudi ma ḇesesya ḇembroḇ i sya ḇemnis raris ”aiwan ḇeyan ḇepek”. (Kis. 19:26-34; 1 Kor. 16:9) Paulus ismai roi ḇemun nabore, mboi ikyar kaku nari ismai saneraro ḇepyum ro ras ḇarpon iyama.​—2 Kor. 4:16-18.

4. Moḇsa saneraro kaḇakḇok ine nafrur fa snonggaku Kristen kakyar sena syambraḇ syadi? (Mam sonin ḇero ḇarpon.)

⁴ Koisya kokenem ro fafisu ḇesamswen kaku. Ono sisya sifrur roi ḇeḇye ḇa yoḇ naek srar koḇesi. Ḇesesya sḇarek ro moḇ mamun na naisya ker ma nane nafnai fa ras oso sakmar kako. Sia wer sro moḇ sidwarek fararur koḇena, mboi sifarmyan pdef ḇe Yahwe I. Sifawi roi sifrur nane bisa nafnai fa sisun si ḇe bui ḇaido smun si. Imboi sisusu ḇaḇeri ḇo sisyom pdef ḇe Yahwe I. Sifawi kaku simar ro fafisu ine kako ke, sikyar Yahwe iswarepen si fa ḇyawes kaḇer si ro fafisu iyama. Sfasnai nyan ḇepyum kako fa koso na.

5. Nyan kakara ḇerariso na ḇefnai fa kokyar faro saneraro kaḇakḇok ya wer ḇa?

⁵ Paulus ikofen ḇe naek srar sya insama spampum nyan kakara ḇemnis ḇa. Doḇe, ”Rofyor snonkaku ḇemar ansi sḇeḇeḇawes kaḇer werḇa, oh, iḇye syadi: ’Mkorama kankinem ma koryaḇ, snar nari meser komar.’” Snonggaku ḇekenem ḇepon ro Paulus i, sakna kenem ḇerarirya. Rya Paulus dap kaḇer Yesaya 22:13, ḇekofenḇair snonggaku Israel sya kenem sena. Simewer sfanam faro Yahwe I, mboi sisewar marasrisen ḇe manggunsi. Rya soḇe sifrur roi simarisen na ro fafisu anya kukro ras meser ido swaf ya naisya wer ḇa. Snonggaku ḇero dunya ine sakna kakara ḇerarirya. Imbape, Refo fyasḇair er Israel sya sismai roi ḇeḇye ḇa kukro sna kakara ḇesasar.​—2 Taw. 36:15-20.

6. Rariso bati koḇesya bisa sawyae kakyar koḇena faro saneraro kaḇakḇok ya?

⁶ Kofawi Yahwe na ḇyawes kaḇer snonggaku ḇemar sya, inja fandun fa kosasor ko rofyor kokinfir bati koḇesya. Naek srar ḇero Korintus siwara simewer sḇebati kuker snonggaku ḇekyar ḇa faro saneraro kaḇakḇok ya. Farkarkor ḇyena ḇe ko, koḇebati kuker snonggaku ḇesewar marisen manggun sena ḇardi ḇo simewer skara mura ḇe ras ḇarpon naiwama ido, faḇaḇye mura na kofrur ra si. Snonggaku ansi sawninyan ko fa nari kona kenem ḇepyum ḇa ma kofrur roi Yahwe dayin na. Iso ḇewar fa Paulus danun kaku ḇo doḇe, ”Baḇir beri, ma wafrur sasar kaker awer.”​—1 Kor. 15:33, 34.

7. Imnis wos ḇero 1 Korintus 15:35-38 ya, fakfuken rosai imbude snonggaku sya sifuken na?

⁷ Wasya 1 Korintus 15:35-38. Snonggaku ono sisya simarisen sifrur fa ḇesesya seḇirḇar faro saneraro kaḇakḇok ine. Imbude na sifuken radine, ’Rariso snonggaku ḇemar sya sikenem kaḇer wer rai?’ Ipyum fa kokara pyum kaku Paulus kankarem ḇyena kukro snonggaku ḇebor ḇero baboine sya sna kakara ḇesisye ḇekur snonggaku ḇemar sya. Ḇape, rosai Refo fyarkor ḇe ko na?

8. Wos sarḇer rosai ḇefnoḇek ko fa kofawi kaḇakḇok ḇe nanggi ya?

⁸ Rofyor snonggaku oso imar, baken ḇyedi na ipokem. Imboi, Allah Yahwe syambraḇ fa ḇyawes i fa ikenem kaḇer ma byuk baken ḇebabo ḇe i. (Kej. 1:1; 2:7) Paulus ikofen wos sarḇer oso fa byukifasnai Allah nari byuk kaḇer Paulus baken ḇekwar ḇyedi faro i ḇa. Kokarapan gandum mor ḇaido mor ro rokaker ḇese. Rofyor koker mor ḇyena ro saprop ya dori, nari mor anna nasur ḇe rokaker ḇebabo. Nari rokaker ḇebabo ine isnai ḇese kuker mor koker anna. Paulus fyawar wos sarḇer ine fa fyasnaiḇair Manḇedaw koḇedi nya samambraḇ fa ifrur baken oso imnis marisen Ḇyedi.

9. Rosai 1 Korintus 15:39-41, ikofen ḇekur baken ro roi ḇekenem sya?

⁹ Wasya 1 Korintus 15:39-41. Paulus doḇe Allah ifrur roi ḇekenem sya baken sena namnis kam ḇa. Imnis raris baken ro sapi iḇese ro man ma in sya. Paulus ikofen kako ori ya payamyum ḇyena iḇese ro paik ma payamyum ro mak sya oser-oser iḇese kako. Komam ḇeri mak ansine ḇa mboi ḇefawinanem sya soḇe mak sya sisya sibor kaku. Ono sisya siba, ono sisya sikasun ma ono sisya sisnai ḇe ḇerik, ḇepyoper, ḇenanyar, imnis ra komam ori ya. Paulus ikofen kako ḇekenem ro nanggi sya baken sena neḇese ro  ḇekenem ro supswan ine. Ine kyurfasnai ro supswan, baken koḇena neḇefrur ro kraf ma rik, ḇape ḇekenem ro nanggi sya sna baken rur, rupa ra malaikat sya.

10. Snonggaku Allah ḇyawes fa sikenem ro nanggi, na sismai baken ḇemnis rariso?

¹⁰ Paulus ikofen wer, ”Rarirya kako nari snonkaku ḇeḇawes kaḇer ro marmar. Baken sikrirya baken ḇekain fyoroḇa ḇape baken sḇawes kaḇerya baken ḇekain fyoro-fyoro.” Kakuḇae, fafisu snonggaku oso imar, baken ḇyeja kyaḇer ḇe saprop. (Kej. 3:19) Inja rosai kofawi ro wos ’baken sḇawes kaḇer ya baken ḇekain fyoro-fyoro’? Roi Paulus ikofen inema snonggaku Allah ḇyawes kaḇer kwar fa sikenem ro supswan ḇa, raris Elia, Elisa ma Yesus sko. Mboi Paulus kyur ḇe snonggaku Allah ḇyawes si kuker baken faro kankenem ro nanggi isoine baken rur.​—1 Kor. 15:42-44.

11-12. Yesus nya baken ḇemnis rariso fafisu Allah ḇyawes i kwar, ma rariso snonggaku ḇesmai ramrem sya sakmnis raris i?

¹¹ Fafisu Yesus ikenem ro supswan ine kaker, baken ḇyeja ima baken ḇena kraf ma rik. Imbape, fafisu Allah ḇyawes i ḇe nanggi, ḇye ’rur ḇebuk kankenem’. Rarirya kako, snonggaku Kristen ḇesmai ramrem sya nari sismai baken ḇesrow fa sikenem ro nanggi fyor seḇeḇawes kwar. Paulus doḇe, ”Ko ro baboine komnis kuker Adam sifrur ro saprop, mboi ko kako nari komnis i ḇerama ro boiyaswa ani.”​—1 Kor. 15:45-49.

¹² Koswarepen fyor Yesus ikḇok ro marmar ya kwar, ismai baken ḇena rik ma kraf ya ḇa. Paulus dap kaḇakḇok ine ḇo doḇe ”baken sifrur ro kraf ma rik, nari dakḇekina ro Allah kawasa ḇyesiḇa” ro nanggi. (1 Kor. 15:50) Fafisu manwawan ma ḇesmai ramrem ḇesesya sikḇok kaḇer nari sakna baken kraf ma rik wer ḇa. Mboi fafisu risai nari  seḇeḇawes kaḇer ya? Paulus doḇe rofyor simar, sikḇok ḇeri ḇe nanggi ḇa, mboi siwaf kaker isof fafisu iyama. Fyor Paulus fyas syap 1 Korintus ine, manwawan sia sisya simar kwar, raris Manwawan Yakobus i. (Kis. 12:1, 2) Manwawan ma snonggaku ḇese ḇesmai ramrem sya insape simar ḇarpur.​—1 Kor. 15:6.

13. Aḇyair rosai monda ḇefasnai Yesus raramuma ḇyedi?

¹³ Yesus ma Manwawan Paulus suyawos ḇekur fafisu ḇemnis kam, isoine Kristus raramuma ḇyedi. Aḇyair ḇefasnai Yesus raramuma ḇyedi iso mamamun, tatawai, basbiser, ma roi ḇeḇye ḇa komam ḇejadi ro dunya ine. Ḇardadi nane ndarirya kwar ro taun 1914. Ḇape aḇyair oso ḇese ḇesnaibos kaku isoine angginem Karajan Allah nari sbaryas na ”ro supswan ḇesiper fa ḇyesaksi faro er sya kam, raimnai insape awar papupes ya” ryama. (Mat. 24:3, 7-14) Paulus ikofenḇair kako ro Yesus ras raramuma ḇyedi, snonggaku Kristen ḇesmai ramrem ”ḇemar kwar sya” nari seḇeḇawes ḇe nanggi.​—1 Tes. 4:14-16; 1 Kor. 15:23.

14. Rosai nari ḇejadi kuker snonggaku Kristen ḇesmai ramrem ḇemar ro fafisu koḇedine?

¹⁴ Snonggaku ḇesmai ramrem ḇemar ro fafisu koḇedine nari seḇeḇawes ma sek ḇe nanggi ḇeri. Kofawi ro ine ro Paulus wos ḇyena ḇero 1 Korintus 15:51, 52, ”Roi ḇeḇesya ani nari ryarirya imnis arḇeḇer, rofyor kḇurya ryok papupes nari komar kamḇa, mboi kokam koḇe ḇesadwer. Roi ḇeḇesya ani nari ryarirya imnis arḇeḇer, rofyor kḇurya ryok papupes.” Wos nane ndarirya kwar ro fafisu ine! Fyor seḇeḇawes kwar, Yesus  naek ḇyesine na siryaḇ kaku, sikame nari ’siwarpu Manseren isof fyoro-fyoro’.​—1 Tes. 4:17.

15. Snonggaku ḇeyek ḇeri ḇe nanggi ansine, rosai nari sifrur ya?

¹⁵ Snonggaku ḇeyek ḇeri ḇe nanggi ansine, rosai nari sifrur ya? Yesus ikofen faro si, ”Mansei ḇeḇefainda, ma ḇefararur pdef isof ro papupesya ḇefrur rosai yamarisen, nari yaḇuk papoik faroi imnis yasma ro Kma yedi.” (Why. 2:26, 27) Snonggaku ḇesmai ramrem ansine nari sifnoḇek Yesus i fa sfarandows er syakam kuker angkyon manggarmom.​—Why. 19:11-15.

16. Rariso snonggaku sya simkei ro marmar ya rai?

¹⁶ Kakuḇae, ḇesmai ramrem ansine sikafyo marmar ya kwar. (1 Kor. 15:54-57) Kaḇakḇok sismai na nbuk swaf ḇe si fa saksowarpu ro mamun Armagedon fa sipyos roi ḇeḇarḇor ro supswan ine kam. Snonggaku Kristen syaran ma syaran nari ”sisaeḇur kandera beba ya” ma sisun ḇe dunya babo. (Why. 7:14) Si kako na smam barakas ḇese wer, isoine kaḇakḇok ro snonggaku syaran ma syaran ḇemar kwar sya. Kwarapan, na komarisen kaku fa komam ro manggunko payamyum ḇeba ine! (Kis. 24:15) Snonggaku ḇesouser faro Yahwe I syakam, nari simkei ro marmar ḇeramuma ro Adam i. Ma nari sikenem isof fyoro-fyoro.

17. Wos anun rosai kosmai ro 1 Korintus 15:58 ya?

¹⁷ Paulus syapram ḇyedi fyas faro sidang Korintus ḇekur kaḇakḇok ya, nsambraḇser snonggaku Kristen ḇero fafisu ine. Inja nane nafrur fa komarisen kosouser Paulus wos anun ḇyena, isoine komyaren pdef ro fararur faro Yahwe I. (Wasya 1 Korintus 15:58.) Kosewar kaku fa kofrur fararur anna ido, kokyar nari kaksmai barakas ḇepyum ro ras ḇarpon iyama. Iso swaf ḇepyum ḇeyun marasrisen ḇeba kaku ro rosai bisa kokara na. Fyor kosmai barakas ya kwar ido, ine nfasnai fararur marḇak koḇena faro Yahwe I nefromo ḇa.