Wawasya kam syap Baryas taun 2020 ido, wafawi kankarem ro fakfuken nane kwar ke?

Moḇsa na komam naek srar ḇesmai ramrem sya rai?

Komarisen kofarari kakyar sena, mboi kopok komanen syadi si awer. (Yud. 16) Kopok kofuken awer moḇsa sifawi Yahwe ryem si kwar, snar naiso fandun manggun senairi.​—w20.01, ram 29.

Rosai ḇefrur fa wakyar Yahwe myambir kaku Au?

Refo doḇe fafisu snami kyapar Au ḇaim, Yahwe ifawi kaku Au kwar. Yahwe ryowerepen nadi Bena kam. Yahwe ifawi roi ḇero snembri ma kakara Bena, ma roi wafrur na bisa nafrur fa imarisen ḇaido imarisen ḇa. (1 Taw. 28:9; Ams. 27:11) Yahwe manggundi iso ḇeyer Au fa fanam faro I.​—w20.02, ram 12.

Fafisu risai fandun fa kawose ma kofasise?

Kobaryas ḇe snonggaku ḇese ḇekur Yahwe I. Kawos rofyor komam oso imbe ifrur roi nari ḇeyun ḇe sasar ḇeba. Penatua sbuk wos anun ḇe ḇefandun sansonek sya. Kopok kofuken ḇaido kofawar rariso sbaryas ma siso fananjur ro sup-sup fararur koḇena sidwarek ro na. Kopok kokofenḇair awer roi snonggaku ḇese sipok sifawi awer na.​—w20.03, ram 20-21.

Rosai ḇeḇese ro kampam ḇero Yoel fasal 2 ma Fasasna fasal 9 ya?

Yoel 2:20-29 ya, Allah iyaw kampam sya ma ḇyeasas nari byuk fadwer rosai skakok kwar na. Raposa, Allah isḇawer rur ḇesren Ḇyedi. Sarisa nane ndarirya rofyor sordade Babilon smun Israel, ma ndarirya wer ro ḇarpur ya. Ro Fasasna 9:1-11 ya, ḇesmai ramrem sya seḇeḇair si simnis ra kampam. Simgak ḇa fa sbaryas anun samamyai faro dunya ḇeḇarbor ine, ma nafnai fa ḇewaira dunya simarisen ḇa kaku.​—w20.04, ram 3-6.

Mansei raja bar wambrur ro baboine?

Rusia ma ḇesowarpu i sya. Sawyae kaku Allah kawasa Ḇyesi, sidwarek fararur ḇaḇebaryas ma sayin kaku Yahwe I ma kawasa Ḇyesi. Raja bar wambrur anine fyamfaḇri kuker raja bar wamires.​—w20.05, ram 13.

’Rur ya bon ḇyena’ kyur monda ḇe rari-rari sap ro Galatia 5:22, 23 ke?

Oroḇa. Rur ḇesren ifnoḇek ko kako fa kofasnai rari ḇesena, rupa ra nanapes. (Ef. 5:8, 9).​—w20.06, ram 17.

Rosai ḇefnai fa kosasor ko fyor imbe korir anun, sonin, ma vidio koḇena ro Internet?

Snaro roi korir ro Internet na bisa nḇeḇair koma kararer manggunko, ma kofasnai sne ḇerun ḇa.​—w20.07, ram 6-7.

Rosai manbaryas Kristen sya sfarkor ro mandaswan ḇekir sya?

Mandaswan ansi na sifawi moḇ risaiso in sya sibore. Sifawi roebor ḇesrow ma sifawi moḇsa sepake na rai. Simgak ḇa fa sisasewar rofyor swan ya ibrin ḇa. Bisa koso nyan sena rofyor kobaryas.​—w20.09, ram 5.

Rariso kofnoḇek snonggaku ḇefarkor Refo kuker konsya insama siswar Yahwe I?

Kanun ḇe si fa siwasya Refo ras ḇe ras. Kofnoḇek si fa siwasenkara rosai siwasya na. Kofarkor si moḇsa senadi rai.​—w20.11, ram 4.

Manseiso sap ro mnuk ine: ”Sikam sikenem wer, snar ḇaḇeoser kuker Kristus”?​—1 Kor. 15:22.

Manwawan Paulus kyur ḇe snonggaku ḇesmai kaḇakḇok syakam ḇa. Ḇape kyurfasnai ḇe snonggaku Kristen ḇesmai ramrem sya, sima ”seḇefasren kwar fa sḇeoser kuker Kristus Yesus”. (1 Kor. 1:2; 15:18)—w20.12, ram 5-6.

Rosai nari snonggaku ḇesmai ramrem sya sifrur na fyor seḇeḇawes ḇeri ḇe nanggi?​—1 Kor. 15:51-53.

Sifnoḇek Yesus i fa sfarandows er syakam kuker angkyon manggarmom. (Why. 2:26, 27)—w20.12, ram 12-13.