1-2. Rosai nari kawos ro farkarkor ineni?

FAFISU ono ido, imbude kofuken rosai ḇefnai fa kenem koḇenane nakwan ḇa ma nafo kuker kandera. (Ayb. 14:1) Fyoro mura roi nane nari nafnai fa koryaḇ wer ḇa ḇaido koḇesanekar. Yahwe manfamyan Ḇyesi ro fafisu naiwara sino sisya sakḇaḇir rarirya. Ḇepyum ḇa syadi, sia skara ipyum ya simar monda. (1 Raj. 19:2-4; Ayb. 3:1-3, 11; 7:15, 16) Imbape, Yahwe byuk sneprei ma syambraḇser si ḇesya kwar. Inja, sikyar Yahwe I pdef. Farfyar sena sfas na ro Refo fa nfarkor ma nsambraḇser ko.​—Rm. 15:4.

² Ro farkarkor ine, nari kawos Yahwe manfamyan Ḇyesi ḇero fafisu naiwara ḇeḇaḇir siryaḇ wer ḇa. Siso Yakub roma ḇyedi, Yusuf i, Naomi bin ḇekabom ani ma imbikin ḇyedi Rut i, snon Lewi oso ro farfyar ḇero Mazmur 73, ma Manwawan Petrus i. Moḇsa Yahwe syambraḇser si rai? Farkarkor rosai kun ḇe manggunko ro farfyar sena? Kankarem ro fakfuken anna nari nafrur fa kokyar ”Yahwe fyanam kuker snonggaku ḇesanekar ma snonggaku ḇena raryaḇ ḇa kwar fyaspar si”.​—Mz. 34:18.

3-4. Rosai ḇekur Yusuf i fafisu byabo kaker?

³ Fafisu Yusuf ḇyeumur indokada taun ri 17, ismai mafafu risuru ḇeramuma ro Allah. Mafafu ansuine nḇair nari ras oso, Yusuf duf nasan ḇefandun kaku ma kina ḇyansi nari sesyowi kaku i. (Kej. 37:5-10) Ḇape ismai mafafu fyoro ḇa mura, roi ḇeḇye ḇa kyur i. Eba ḇyesi sesyowi i ḇa kaku ma sboḇ i ḇe ḇebarara oso ḇenir ḇe Potifar. Inja, Yusuf fyararur ḇe women ro rum ḇyedi. (Kej.  37:21-28) Kankenem ḇyedi nfadwer ḇeri, ḇyarek wer ḇa kuker kmari ḇemanmin kaku i ani, mboi ḇyewomen faro ḇebarara Masir ḇefawi Yahwe I ḇa.​—Kej. 39:1.

⁴ Mura Yusuf ismai roi ḇeḇye ḇa syadi wer. Potifar swari kyursof famfnom Yusuf ḇo doḇe Yusuf imbe ḇyeraro i. Potifar syewar fa ifawi roi ḇekaku ya ḇa ḇo isun Yusuf i ḇe bui, ma sfes wemin ḇyesuya kuker kabrai manggarmom. (Kej. 39:14-20; Mz. 105:17, 18) Kowasenpan moḇsa na Yusuf ḇyaḇir rai, ḇye romawa babo kaker ḇo soḇe imbe denfus amber ḇyedi swari. Kokarapan, na snonggaku sya sanonef snonsnon Yahwe, Allah Yusuf isyom ya. Roi nane nafnai fa Yusuf iryaḇ ḇa kaku ma ḇyesanekar!

5. Rosai Yusuf ifrur insama ḇyesanekar manggenem ḇa?

⁵ Fafisu ḇyewomen ma ismai ro bui, ipok ifrur roi oḇa fa fyadwer kenem ḇyedi insama ipyum kaḇer. Rosai ḇefnoḇek i fa nya kakara ḇepyum? Kyara monda faro samswen ismai anna ḇa. Mboi syewar kaku fa imyaren pdef fa ifrur fararur sbuk ḇe i na. Ḇefandun syadi ya, Yusuf ifrur Yahwe sneri imarisen. Iso ḇefnai fa Yahwe ḇyebarakas roi risai monda Yusuf ifrur na.​—Kej. 39:21-23.

6. Rariso Yusuf mafafu ḇyena nsambraḇser i rai?

⁶ Yusuf ismai samambraḇ kako kuker iwasenkara mafafu Yahwe byuk ḇe i ro taun naiwara. Ro mafu ḇyedi, ifawi na isrow kaḇer kuker kina ḇyesi ma kenem ḇyedi na ipyum kaḇer wer. Ma roi myafu anya ndarirya kaku. Fafisu ḇyeumur taun ri 37, mafu ḇyena oser-oser ndarirya ḇeri kuker nyan kyara na ḇaḇeri!​—Kej. 37:7, 9, 10; 42:6, 9.

7. Imnis wos ḇero 1 Petrus 5:10 ya, rosai ḇefnoḇek ko fa komkuepen ro samswen ḇekur ko na?

⁷ Farkarkor ya ḇe ko. Yusuf fawar ḇyena  nafrur fa koswarepen snar dunya kokenem inema dunya ḇeḇarḇor kaku, inja snonggaku sya nari sifrur pyum ko ḇa. Min Kristen koḇesi kako bisa sakfrur pyum ko ḇa. Ḇape kokyar Yahwe iso Bon Karui, ḇaido Moḇ Fadadiren koḇedi ido, nari kopok koḇesanekar ḇa ḇaido komnai kofarmyan ḇe Yahwe I ḇa. (Mz. 62:6, 7; wasya 1 Petrus 5:10.) Koswarepen, Yahwe byuk mafu ḇe Yusuf i fafisu ḇyeumur taun ri 17. Inja komam Yahwe ikyar kaku Yusuf i fyor byabo kaker. Ro baboine kako, roma inai babo sibor sisya simnis ra Yusuf i. Sikyar kaku faro Yahwe I. Sibor sisya sisun si ḇe bui kukro sisoasuser sifarmyan pdef ḇe Allah.​—Mz. 110:3.

8. Rosai ḇekur Naomi ma Rut su?

⁸ Naomi ma kina ḇyesi sibur sup Yehuda fa sra sḇarek ro Moab kukro basbiser ya myun sup sedi. Ro sup Moab, Naomi swari Elimelekh i, imar ibur Naomi ma roma risuru suḇesuya. Ḇarpur ya, roma ḇyansuya suyakfarḇuk kuker bin Moab ḇenir ḇe Rut ma Orpa. Swaf taun risamfur nande mura, Naomi roma ḇyesuine suyakmar kako ḇo suyakna romawa ḇaim. (Rut 1:1-5) Bin rikyor anskoine na skoḇesaneso kaku! Kakuḇae, Rut ma Orpa bisa sufarḇuk wer, mboi mansei na ḇemam faduru Naomi ḇebinsar kwar ani? Naomi ḇyesanekar kaku isof ro ikofen, ”Wor awer aya ḇe Naomi. Wor aya ḇe Mara monda kukro Manḇepoik Syadi ifrur fa kenem ayena nsarmar kaku.” Roi nane nafrur fa Naomi ḇyesaneso, inja Naomi dun snemuk fa ibur kaḇer ḇe Betlehem ma Rut iso i.​—Rut 1:7, 18-20.

9. Imnis wos ḇero Rut 1:16, 17, 22 ya, rariso Rut ifrur sneprei Naomi i?

⁹ Rosai ḇefrur fa Naomi syambraḇ ya? Isoine saswar ma soasuser. Imnis raris Rut fyasnai saswar ma soasuser kuker kyainus pdef Naomi i. (Wasya Rut 1:16, 17, 22.) Ro Betlehem, Rut fyararur marḇak fa iryur gandum ḇe Naomi su. Inja, sifawi i ḇe bin ḇefrur pyum ma ḇefararur myaren.​—Rut 3:11; 4:15.

10. Rariso Yahwe fyasnai saswar Ḇyena faro snonggaku ḇesaḇarar raris Naomi ma Rut su rai?

¹⁰ Ro Israel, Yahwe iwan kawasa Ḇyesi fa sunpres awer afuf sinek ro yaf sena. Mboi sbuk kerno fa nḇarek ro yaf andir ya insama ḇesaḇarar sya bisa sakryur ḇedawer na. (Im. 19:9, 10) Ine iso sasoser ḇeknam ro Yahwe saswar Ḇyena. Rarirya Yahwe kyadaunwarek snonggaku ḇesaḇarar sya, raris Naomi ma Rut su. Inja, na supok sufararyor roḇean ro snonggaku ḇesesya ḇa. Bisa susewar roḇean ro manggunsu.

11-12. Rosai Boaz ifrur ya fa ifnoḇek Naomi ma Rut insama suryaḇ kaḇer?

¹¹ Snon ḇenana oso ḇenir ḇe Boaz iso ḇena kaku yaf Rut rya ker fa iryur gandum ani. Imarisen kukro ifawi Rut iswar ma isouser kaku faro Naomi i. Inja, Boaz kyoḇes kaḇer saprop sbuk ḇe waris faro Naomi kina ḇyesi ma fyarḇuk kuker Rut i. (Rut 4:9-13) Mura suna romawa sunir i ḇe Obed, iso nari ḇye Raja Daud kpuri.​—Rut 4:17.

¹² Naomi na iryaḇ kaku fafisu fyorepen Obed i. Na ḇyenadi ḇeri fa ikofen kasumasa faro Yahwe I. Ḇape ḇesyadi ya, fafisu Naomi ma Rut sukḇok kaḇer ro marmar ya, nari sukandor fafaya kaku faro roi ḇepyum ḇese wer. Na sumarisen  kaku kukro insape sufawi Obed iso kpu up ro Yesus i.

13. Farkarkor ḇepyum rosai kun ro Naomi ma Rut su?

¹³ Farkarkor ya ḇe ko. Rofyor kosmai fafrowes, imbude na koḇesanekar ma koryaḇ wer ḇa. Kokara rya samswen ḇekur ko na napok namnai ḇa. Radine ido, fandun fa kokyar faro Kma koḇedi ro nanggi ma kofanam pdef kuker naek srar koḇesya. Yahwe nari ipyos ḇeri fafrowes kosmai na ḇa. Imnis raris dun samswen bur Naomi ḇa. Ḇape, na ifnoḇek ko fa komkuepen pdef kuker fafnoḇek kosmai ro naek srar koḇesi.​—Ams. 17:17.

14. Rosai ḇefnai fa snon Lewi oso rya iryaḇ wer ḇa?

¹⁴ Manfasfas Mazmur 73 ima snonggaku Lewi diri. Inja, isyus fa ifarmyan ro Allah bait Ḇyedi. Ḇape, ras oso iryaḇ ḇa kaku kukro sneri fyafayaf faro snonggaku ḇefrur roi ḇeḇarḇor ma ḇeararer sya. Fyafayaf faro rari ḇeḇye ḇa sena ḇa, mboi myam sikenem mararen monda. (Mz. 73:2-9, 11-14) Rya sna roi nakame, pipi nabor, sikenem pyum, ma sna makakwarek noḇa. Myam mararen sena mura nafrur i fa iryaḇ ḇa, inja fyas ḇo doḇe, ”Yamamwarek sne yedine fa isren nama nefromo monda ma yakofen yasasar ḇa.” Nasnaibos kaku kakara ḇyenane bisa nafnai fa imnai ifarmyan ḇe Yahwe I.

15. Imnis wos ḇero Mazmur 73:16-19, 22-25 ya, rariso snon Lewi ḇefas Mazmur ani iryaḇ kaḇer wer rai?

¹⁵ Wasya Mazmur 73:16-19, 22-25. Snon Lewi ani rya fa syun ḇe Allah ḇeba syadi moḇ ḇesren Ḇyedi ḇaido bait. Snar isya ro fandu Yahwe kawasa Ḇyesi ḇesesya ro diwa, inja ine nafrur fa iknon, nya kakara ḇemnis, ma ḇyenadi ikofenḇair roi ḇyaḇir na. Ismai roi ḇepyum isoine ifawi nya kakara ḇesasar kwar, ma bisa nafnai fa wis ḇyena kuker Yahwe I namuk. Ifawi kako snonggaku ḇeḇarḇor simbran ro ”saprop ḇekyuk” ma kenem sena nari napyum ḇaḇeri ro papupes ya.  Inja, fandun fa snon Lewi ine nya kakara raris Yahwe insama sneri fyafayaf ḇa. Rarirya ido, sneri naknon ma nya aski kaḇer. Doḇe, ”Fyor yana [Yahwe I] kwar, roi oso ḇaḇeri yamarisen ro supswan ine.”

16. Farkarkor rosai kun ro snon Lewi ani?

¹⁶ Farkarkor ya ḇe ko. Sne koḇena nfafayaf awer fyor komam rya snonggaku ḇeḇarḇor sya sikenem mararen. Marasrisen sismai na nari napromes fasaw ma nari sikenem fyoro ḇa. (Pkh. 8:12, 13) Kofafayaf faro si ido, nari koryaḇ wer ḇa ma nari wis koḇena kuker Yahwe I namuk. Inja rya kofafayaf kwar faro snonggaku ḇefrur roi ḇeḇarḇor sya ido, koso snon Lewi ani nyan ḇepyum ḇyena. Korower wos anun ḇeramuma ro Allah, ma koḇebati fanam kuker snonggaku ḇefrur Allah marisen Ḇyena. Koswar syadi Yahwe I ro roi ḇese ido, na kona aski kaku. Ma koisya ro nyan ḇeyun ḇe ’kankenem ḇekaku ya’.​—1 Tim. 6:19.

17. Rosai monda ḇefrur fa Petrus iryaḇ wer ḇa ma ḇyesneso?

¹⁷ Manwawan Petrus ima snon ḇeryaḇ kaku. Ḇape, fyorno ido kyara ḇepon roi imbe dawos ma ifrur na ḇa. Ḇarpur mura insape fyafko ma ḇyesneso faro roi dawos ma ifrur na. Imnis ra fafisu Yesus ikofenḇair ḇe manfamyan ḇyesya nari ḇyekandera isof ro imar, Petrus doḇe, ”Roi ḇeḇesya ani ipok kyur awer au.” (Mat. 16:21-23) Yesus isonek Petrus i ḇeri. Fyor snonggaku sya srama imbe sfor Yesus i, Petrus kyara resari ḇa ḇo pyas sumber ro sower ya ma kyarukbos imam ḇeba manfyan ḇyedi kneram ḇyedi. (Yoh. 18:10, 11) Yesus isonek Petrus i wer. Fawar oso ḇese isya wer. Fafisu oso Petrus dararer i ḇo doḇe ḇesesya sibur Yesus i ido,  ima na ipok ibur Yesus i ḇa! (Mat. 26:33) Ḇape fyoro ḇa mura, iso ḇemgak ma rarwan rikyor fyamyun Yesus i. Petrus ḇyesneso fafaya ḇa, mura isasyar ḇe ḇondi ma ”kyanes kuker sne ḇefafardun”. (Mat. 26:69-75) Imbude Petrus kyara Yesus nari byuk ampun ḇe i ḇa.

18. Rariso Yesus ifnoḇek Petrus i fa iryaḇ kaḇer rai?

¹⁸ Petrus imewer ḇyesanekar ma iryaḇ ḇa. Fyor ifrur sasar raposa, imbror ro sasar ḇyena ma ifarmyan pdef ḇe Yahwe fnoḇek manfamyan ḇesesya. (Yoh. 21:1-3; Kis. 1:15, 16) Rosai ḇefnoḇek i fa iryaḇ kaḇer? Iswarepen fafisu oso Yesus ḇyenadi dor insama kakyar ḇyena nako pdef. Yesus i kako dor Petrus fa kyaḇer ma syambraḇser naek ḇyesi. Yahwe kyarem Yesus nadi ḇyenane. Ḇarpur mura, Yesus fyasnai manggundi faro Petrus i fa syambraḇser i. (Luk. 22:32; 24:33, 34; 1 Kor. 15:5) Yesus i kako fyasnai manggundi faro manfamyan ḇyesi kam fyor smun pam, ḇape smun in oḇaḇeri. Fafisu anya, Yesus byuk swaf fa Petrus fyasnai saswar ḇyedi faro Yesus i. Inja, ine fyasnai Yesus byuk ampun faro bati iswar kaku ine ma ikyar i fa duf fararur nabor.​—Yoh. 21:15-17.

19. Imnis wos ḇero Mazmur 103:13, 14 ya, rariso Yahwe myam ko rai rofyor kofrur sasar?

¹⁹ Farkarkor ya ḇe ko. Komam moḇ Yesus ifrur pyum Petrus i raya, kofawi Yesus ima isawarwar kaku, fyasnai mnis Kmari rari ḇepyum Ḇyena. Inja, rofyor kofrur sasar, kokara awer Yahwe nari byuk ampun ḇe ko ḇa. Koswarepen Ibiris imarisen kaku kona kakara ḇeradirya. Fandun fa kofawi Yahwe ima iswar ko ma ifawi pyum koinema snonggaku ḇesasar siko, ma imarisen byuk ampun ḇe ko. Inja, komarisen koso Yahwe nyan Ḇyena fafisu min Kristen koḇesi ono sifrur pyum ko ḇa.​—Wasya Mazmur 103:13, 14.

20. Rosai nari kawos ro farkarkor ḇerama ya?

²⁰ Ro Yusuf, Naomi ma Rut, snon Lewi oso, ma Manwawan Petrus farfyar sena ine, kofarkor Yahwe ima ”fyanam kuker snonggaku ḇesanekar”. (Mz. 34:18) Fafisu ono ido ḇye ko fa kosmai roi ḇedwarek ma koryaḇ wer ḇa. Ḇape, komkuepen pdef ma kokyar faro fafnoḇek ro Yahwe ido, nari kakyar koḇena nsambraḇ syadi. (1 Ptr. 1:6, 7) Ro farkarkor ḇerama ya, nari kawos moḇsa Yahwe syambraḇser manfamyan Ḇyesi ḇesouser sya, mboi siryaḇ wer ḇa kukro sasar sena ḇaido samswen sismai ro kenem sena.