Fakfuken Ro Ḇewasya
Fakfuken Ro Ḇewasya
Snar Refo byuk parenta fa kobuk sasar rik na awer, inja moḇsa Saksi-Saksi Yahwe smam nyan sbuk pararei kuker sepake rik manggun sena rai?
Rofyor snonggaku Kristen oso dun snemuk ipyum ya neknam no marisen manggun ḇyena ḇardi awer ḇaido snar dokter sya sikofenḇair ḇe i, mboi snar kyara kaku rosai Refo ikofen ya. Kukro roi kyinfir na nari nawyae wis ḇyena kuker Yahwe I.
Yahwe, iso Allah ḇebuk kankenem ḇe ko, ma ikofen kwar kan rik na awer. (Kejadian 9:3, 4) Ro Sasoser Moses, Allah byuk faro snonggaku Israel randak iwara, Yahwe idwarek si fa san awer rik na snar rik ḇyeḇair ḇe kankenem ya. Ikofen, ”Nyawa [ḇaido kankenem] ro roi ḇekenem syakam naisya ro rik ḇyena. Yap namuk kwar insama sisḇawer rik na ro rokef farsarser fa sor payasyos faro sasar mgoḇena.” Rariso fyor snonggaku oso myun aiwan fa dan na? Allah ikofen, ”Fandun fa isḇawer rik ḇyena ma iḇayek na kuker saprop.” * (Imamat 17:11, 13) Yahwe dap kaḇer ker sasoser ine. (Ulangan 12:16, 24; 15:23) Syap Yahudi Soncino Chumash fyas, ”Sipok sikram rik na ḇa ma smam na ḇe roi sipok san awer na kuker sisḇawer na ḇe saprop.” Snonggaku Israel sipok sikram ma sepake rik ro roi ḇekenem ḇesesya awer, ḇeyaksmai kankenem ro Allah.
Koso Sasoser Moses wer ḇa rofyor Mesias imar kwar. Ḇape Yahwe mamam Ḇyena ḇekur saranden ro rik ya nfadwer ḇa. Rur ḇesren ro Allah nadif manwawan sya fa sikofenḇair ḇe snonggaku Kristen insama sḇinggwanḇur rik ya. Ine sasoser ḇefandun kaku imnis sasoser ḇekofen fandun fa sḇinggwanḇur fararur farḇuk ma samsyom amfyanir na. (Farfyar [Kisah] 15:28, 29; 21:25) Ro abad ḇe 20 ine, snonggaku sibor sedonor ḇaido sbuk rik sena ḇe snonggaku ḇese ma sismai rik ḇe transfusi, imbape Saksi-Saksi Yahwe sifawi snar nyan pararei ḇeradine namnis Allah Wos Ḇyena ḇa. *
Fyorno ido, dokter sikofen ḇe snonggaku ḇeduf ya fa ikram rik manggun ḇyena swaf minggu ḇeḇeso fyor seoprasi i ḇaim (pendonoran darah autologus praoperasi ḇaido PAD) insama fyandun rik na ido, na sepake snonggaku ḇeduf ani rik manggun ḇyena. Ḇape sun rik na, sikram, ma sisun na wer ḇe baken nasrow kuker rosai ḇekofen ro syap Imamat ma Ulangan ḇa. Rik nama sipok sikram na ḇa; fandun fa sisḇawer na—ine imnis ra sbuk kaḇer na ḇe Manseren Allah. Kaku ḇae, kosouser Sasoser Moses wer ḇa. Rarirya mboi, Saksi-Saksi Yahwe sisouser wos farkin ḇefesepen kuker sasoser ani, ma sun snemuk fa sḇinggwanbur rik na. Iso ḇefnai fa, kobuk rik koḇena faro snonggaku ḇese ḇa ḇaido kokram na fa nari setransfusi na ḇe baken koḇena ḇa kako, kukro rik anna fandun fa sisḇawer na. Kofrur na ido koyuk Allah sasoser Ḇyena kwar.
Nyan pararei ma tes ḇeḇeso sepake ḇeduf sya rik manggun sena, mboi nasnai manggun ḇa roi ani nayuk Allah sasoser Ḇyena ke roḇa. Imnis raris, snonggaku Kristen ḇebor simarisen sun rik sena faro tes ḇaido analisis, ramnai sisawen na. Nono ido, dokter ikofen nyan pararei ḇese wer ḇesamswen syadi ḇepake rik manggun sena.
Imnis radine, rofyor snonggaku oso imbe ḇyeoprasi, nari sḇe rik ḇyena fa nasae bur baken, ine nyan sor ḇe hemodilusi. Rik ḇesya kaker ro baken sifrur na fa newarwar. Mura, rik ḇesae bur baken insanja anna sḇe na fa nsun kaḇer wer ḇe ḇaken, insama rik ḇyena namnis kaker. Rarirya kako, rik ḇedaf ḇe par oso, sidwarek na ma siryan na, insama sel rik ḇerik sisun kaḇer na ḇe ḇaken ḇeduf ya; nyan pararei ine sor ḇe penyelamatan sel (cell salvage). Nyan ḇese wer iso sḇe rik na fa namḇran ḇe mesin ḇefararur pyan fadwer organ ḇero baken koḇena (rupa ra, hati, paru-paru, ḇaido ginjal). Ramnai ro mesin ani, rik na syun kaḇer ḇe baken ro snonggaku ḇeduf ani. Ro nyan ḇese na, sḇe rik fa nambran ḇe mesin sentrifugal, insama sisawen bar ḇepyum ḇa ḇaido ḇeḇye ḇa kwar. Ḇaido imbe sirwas rik ḇe roi ḇeḇeso ma sepake na faro bar ḇese ro ḇaken koḇena. Ono wer sifrur tes kuker sun rik fa skakop na ḇaido sibaren na kuker obat, ramnai sisun kaḇer na ḇe baken snonggaku ḇeduf ya.
Nyan ya oser ḇa, ma prosedur, perawatan, tes ḇebabo na kako sisewar kaker fa smam na. Na komam roi na oser-oser resari sape kun snemuk. Snonggaku Kristen oso fandun dun snemuk ro manggundi rariso rik ḇyena sepake na rai fafisu seoprasi, sifrur tes medis, ḇaido terapi. Ipyum ya ifuken ḇepon ḇe dokter ḇaido teknisi, rariso na sbuk rik ḇyena rai rofyor iso nyan pararei ani, insape ifrur snemuk kuker iso sneuser ḇyena. (Mam kotak.)
Snonggaku Kristen fandun fa siswarepen soasuser sena faro Yahwe ma syowi ḇeba fa sfasnai ’siswar i kuker sne ḇesiper, kenem ḇesiper, samamḇraḇ ḇesiper, ma kakara ḇesiper’. (Lukas 10:27) Saksi-Saksi Yahwe siḇese ro snonggaku ḇebor ro supswan ine, sima sesyowi wis ḇepyum sena kuker Manseren Allah. Allah Ḇeḇuk Kankenem dor snonggaku syakam fa sikyar faro Yesus rik ḇyedi. Kowasya, ”Snar ro Yesus kosmai fasaspar snar rik ḇyedi, isoine ḇaḇepayasyos ro sasar, imnis nana saswar fakamamar ḇyena.”—Efesus 1:7.
[Fasfas Kasun]
^ Professor Frank H. Gorman fyas, ”Sisḇawer rik na nfasnai sesyowi kankenem ro aiwan oso, ma ine kako nfasnai syowi faro Allah, ḇefrur ma ḇemamwarek kankenem ya.”
^ Syap The Watchtower 1 Juli 1951, kyarem fakfuken ḇepon kaku ḇekur roi anine, fyasnaiḇair rosai ḇefnai fa sbuk transfusi rik nama nasrow ḇa.
[Kotak/Sonin]
WAFUKEN ḆE MANGGUNDAW
Rofyor sisayar rik ayena ḇe ḇandi bo namnai koper ido, na yaman rik anna ndro ḇaken ayena kaker, inja ’yasḇawer na ḇe saprop’ awer ke?
Snar fandun diagnosis ḇaido terapeutik, sun rik ayena kerno, siḇyaren na, ma sisun kaḇer na ḇe ḇaken ayedi ido, na sneuser ayedi ḇesmai farkarkor ro Refo kwar ikyaren aya ḇa ke?