Fakfuken Ro Ḇewasya

Ro 2 Korintus 6:14, rofyor Paulus dap ”snonkaku ḇekyar faro Yesusḇasya” isya kyur ḇe mansei?

Ro 2 Korintus 6:14, kowasya, ”Mkomarisen mkoḇe oser awer kuker snonkaku ḇekyar faro Yesusḇasya.” Komam ro wos ine ido Paulus isya dawos ḇekur snonggaku ḇero bandi sidang Kristen sya. Kokofen radine kukro ro mnuk-mnuk ḇesena Paulus dap kako ”snonkaku ḇekyarḇasya” ḇaido ”ḇeḇe Kristen ḇa”.

Rupa ra, Paulus isonek kaku snonggaku Kristen kukro sra ḇe kankain karkara ”snonkaku ḇeḇe Kristen ḇa” sya. (1 Korintus 6:6) Snonggaku ḇekyar ḇa ansine skur ḇe mankara ḇero pengadilan Korintus. Ro Paulus syapram ḇesuru ḇyedi, Paulus ikofen Ibiris ”irup kakara snonkaku ḇekyarḇasya”. Kakara senane neḇerup inja sfawi abar ḇepyum ya ḇa. Snonggaku ḇekyar ḇa ansine simewer sfarmyan ḇe Yahwe I kukro Paulus randak ya ikofen kwar, ”Rofyor snonkaku oso kyaḇer wer faro Allah, mar ḇerup ani kako ḇyeḇekanow bur ḇarpon ḇyedi.”​—2 Korintus 3:16; 4:4.

Snonggaku ḇekyar ḇa ansine saksowarpu kako ro samsyom amfyanir ma sisouser pamarenta sya ḇa. (2 Korintus 6:15, 16) Ḇape, snonggaku ansine ono sisya sidwarek Yahwe kawasa Ḇyesi ḇa. Sia simarisen fa sifawi kakaku ya. Ḇebor ro si swa sesi sima snonggaku Kristen siri ma sismai payamyum ro farḇakḇuk sena. (1 Korintus 7:12-14; 10:27; 14:22-25; 1 Petrus 3:1, 2) Imbape, ro mnuk-mnuk anya Paulus dap ker ”ḇekyar faro Kristus ḇa”, ”ḇekyar ḇa”, ”ḇeḇe Kristen ḇa” fa kyur ḇe snonggaku ḇeyaksun ro sidang Kristen ḇa. Snonggaku ”ḇekyar faro Manseren” monda sap si ḇe sidang Kristen.​—Farfyar (Kisah) 2:41; 5:14; 8:12, 13.

Wos farkin ḇero 2 Korintus 6:14 ima anun ḇepyum kaku faro kankenem snonggaku Kristen sya ma sap ker mnuk ine rofyor sbuk ananun faro snonggaku Kristen ḇesewar snon ḇaido bin imḇe byuk ya. (Matius 19:4-6) Kakuya, snonggaku Kristen oso ḇebaptis kwar na syewar awer snon ḇaido bin ḇena kakyar oser kuker i ḇa kukro fawawi, roi sisewar ro kenem sena, ma kayaryar sena nabese kaku ro snonggaku Kristen ḇekaku sya.

Ḇape, rariso kuker ḇefarkor Refo ma ḇeso kwar fananjur sya? Rariso kuker manbaryas binbaryas ḇebaptis ḇaim sya? Sima snonggaku ḇekyar ḇa sya kako ke? Oroḇa. Ḇefarkor kakaku kwar sya ma ḇesewar fa sisur pdef isof ro sebaptis na kap si ḇa ḇe snonggaku ḇekyar ḇa. (Roma 10:10; 2 Korintus 4:13) Fyor Kornelius ḇyebaptis ḇaim, Refo dap i kwar ḇe snon ’ḇesouser ma ḇemgak faro Allah’.​—Farfyar (Kisah) 10:2.

Kofawi Paulus anun ḇyena ḇefas ro 2 Korintus 6:14 kyur ḇe mansei. Inja nasrow fa snonggaku Kristen ḇebaptis kwar nya wis saswar, ma kyara fa fyarbuk kuker manbaryas ḇaido binbaryas ḇebaptis ḇaim ke? Nasrow ḇa. Snaro? Paulus isya byuk wos anun ḇepakrek kaku faro kabom Kristen sya, ”Imkei fa ḇyekawin kuker snon sai imarisenya; mboi fakawin ani fakawin Kristen rirya.” (1 Korintus 7:39) Imnis wos anun ine snonggaku Kristen ḇebaptis kwar na syewar ”fakawin Kristen” kuker fyarḇuk kuker snon ḇaido bin ḇena kakyar oser kuker i.

Rosai knam ro wos ”fakawin Kristen” ma wos ḇesena ḇekofen, ’ḇeḇeoser kwar kuker Kristus’? Wos anna Paulus dap na ro Roma 16:8-10 ma Kolose 4:7. Fyor wawasya mnuk-mnuk anna ido, na wafawi roi Paulus ikofen kaku iso kyur ḇe ”min koḇedi”, ”naek koḇedi koswar kaku”, ”manfamyan ḇeḇeuser”, ma ”min ḇeyuffarmyan”.

Ro fafisu risai snonggaku oso ḇye ’Manseren Yesus Kristus manfamyan ḇyedi’? Isoine rofyor kuker sne ḇesiper ifrur fararur ḇyedi ḇe manfamyan ma fyamyun manggundi. Yesus ikofen, ”Mansei ḇemarisen ḇeso aya, fyamyun mankundi, ḇoi ḇyar [ai kandera] ḇyedi ma iso aya.” (Matius 16:24) Snonggaku oso na dakso Yesus i ma ifrur Allah marisen Ḇyena fyor byuk kenem ḇyedi ḇe Yahwe I. Ramnai, imarisen ḇyebaptis ma ḇye manfamyan ḇesmai kyaremso ro barpon Allah Yahwe I. * Inja, ”fakawin Kristen” ine kyurfasnai fyarḇuk kuker snonggaku ḇebuk kenem ḇyena ḇe Yahwe I kwar ma fyasnai kaku ima snonggaku ḇekyar, ḇye ’Manseren Yesus Kristus manfamyan ḇyedi’ ḇesoasuser kwar rirya.​—Yakobus 1:1.

Komarisen kaku fyor komam snonggaku oso fyarkor Refo kuker Saksi-Saksi Yahwe ma isur ro rur ya pdef. Imbape ima byuk kenem ḇyedi ma ifur asas fa ikenem ma ifarmyan monda ḇe Yahwe I ḇaim. Irya monda ḇa mboi na fyadwer kenem ḇyena ari. Fandun fa ifrur fararwei ḇeba ḇepon infa dakḇe snonggaku Kristen ḇebuk kenem ḇyedi ḇe Yahwe ma ḇyebaptis. Insape kyara fa ifrur fararwei ḇeba ḇesena ro kenem ḇyedi, raris kyara fa fyarbuk.

Snonggaku Kristen oso bisa nya wis saswar kuker ḇefarkor kaker Refo ḇefrur fararwei ḇepyum ro kenem ḇyedi, ma kyara fa fyarḇuk kuker i fyor ḇyebaptis kwar ke? Oroḇa. Ḇefarkor Refo ya ifawi snonggaku Kristen ḇebaptis kwar ani imarisen fa fyarḇuk kuker i fyor ḇyebaptis kwar monda ido, roi ḇedif i fa ḇyebaptis neknam ro kakara ḇesasar.

Komam ido manbaryas ḇebaptis ḇaim fyandun swaf kawan ḇa isof ro dakḇe baptis. Inja anun ro Refo fa kofarbuk kuker min ḇena kakyar oser ima wos anun ḇesrow kaku diri. Ḇape, rariso fyor snonggaku Kristen oso nya wis saswar kuker manbaryas ḇebaptis ḇaim mboi umur ḇyeja isrow kwar fa fyarbuk, sinan ḇyesuya suro kakaku, ma imyaren ro sidang taun ḇe taun kwar? Rosai ḇedwarek manbaryas ani fa byuk kenem ḇyedi ḇe Yahwe I? Rosai ḇewar fa ikawawur radirya? Ikyar manggun ḇa faro roi fyarkor na ke? Ima snonggaku ḇekyar ḇa risyaḇa, mboi na komam si ḇe snonggaku ḇesrow faro ”fakawin Kristen” ḇa.

Paulus wos ananun ḇyedi ḇekur farḇakḇuk ya ima faro payamyum koḇena. (Yesaya 48:17) Snonggaku risuru sufasos kwar fa sufarḇuk ma subuk kenem suḇena kwar ḇe Yahwe ido, nari asas farḇakḇuk suḇena neknam ro kakyar ḇenako. Suna kakara oser ma roi imḇe sufrur ro kenem suḇena namnis kam. Ima roi ḇefandun kaku insama farḇakḇuk suḇena nun payamyum. Kofarbuk kuker min ḇena kakyar oser ido, kofasnaiḇair kosoasuser ḇe Yahwe I, rarirya nari kosmai barakas ḇekain fyoro, kukro ”Yahwe fyasnai soasuser faro snonggaku ḇesoasuser sya”.​—Mazmur 18:25.

[Fasfas Kasun]

[Sonin]

”Yahwe fyasnai soasuser faro snonggaku ḇesoasuser sya”