Refo Fyadwer Kankenem

RARISO ḇefnak musik punk rock ḇeḇe antisosial oso bisa iswar ma ifnoḇek snonggaku ḇesesya rai? Rosai ḇedif snon oso ro Meksiko fa isawen kenem ḇeḇyeḇa ḇyena? Rosai ḇefnai fa pembalap sepeda ḇekir kaku ibur fararur ḇyena ḇe pembalap fa duffarmyan ḇe Manseren Allah? Mampan farfyar skoḇenane.

”Randakya Yararmomen, Yararer Aya, ma Yadafdifer.”​—DENNIS O’BEIRNE

ḆYEḆEAḆEN RO: 1958

SUP RYAMA YA: INGGRIS

FARFYAR ḆYEJA: ḆEFNAK MUSIK PUNK ROCK ḆEḆE ANTISOSIAL

KENEM AYEDI RO RANDAKYA: Kamam yedi kina ḇyesya srama ro Irlandia, ma yaba ro agama Katolik Irlandia. Ḇape rasras na ido, yemir yara ḇe gereja, kokofen kada ayama yamewer yara ḇe gereja ri. Rariryano, ayama yambrow anan rur ya. Ro ras ḇe ras yap ker Nadi Ḇeba, ma yakarauser nadi ani fyor yenef ḇaim. Yakinfir wosna oser-oser ma yaḇesewar fa yamam rosai ḇekurfasnaiḇair wos anna.

Fyor yaḇeumur 16, yakso ro gerakan Rastafari. Yamarisen faro organisasi polotik kako, imnis ra Liga Anti-Nazi. Ḇape, ayama napyan fa yaso gerakan punk rock ḇemarisen ḇefrur napnap sine. Yaḇepake narkoba, ḇoi yaḇepake rasras ker iso ganja na. Yaḇefandun snonggaku oso ḇa, ma yafarandinem syadi, yamgak yamar ḇa, ma yafandun snonggaku ḇesesya ḇa. Ayama snon ḇeḇe anti sosial risaya, ayama yamewer yawos kuker snonggaku ḇesesyandi, ḇoi yamam nefandun kaku ido insape yawose. Ayano yamewer sefoto ayandi. Yaswarepen kaḇer na ido, randakya ayama yararmomen, yararer aya, ma yadafdifer. Yafrur pyum ma yafasnai snemura monda ḇe snonggaku ḇefanam kwar kuker ayansya.

Rofyor yaḇeumur 20 syadi kwar, insape yamarisen faro Refo ya. Bati yedi ḇeboḇ narkoba kako, rofyor ryo bui insape dakwasya randak Refo ya. Nuyawos nabor kaku kuker agama, Gereja, ma Setan fararur ḇyena ro dunya ine. Yakoḇes ḇeri Refo ma yawasya randak ro manggundaya. Bati yedine ma aya nuwasya ḇar ḇeḇeso ro Refo ya, ramnai nusrow fa nuyawos rosai nufarkorna ma nukara roi ine. Roi ine ndarirya ro paik ḇe paik.

Rodine nukofen kakara riḇeso nukarauser na: kokenem ro rasras ḇepupes dunya ine; snonggaku Kristen fandun kaku fa sbaryas abar ḇepyum Karajan Allah; sipok siwaira ḇar osoḇa ro dunya ine, isoine polotik na; ma Refo byuk akurfasnai ḇepyum kaku. Ḇape, rodiso? Nukara ḇepon iso gereja-gereja na, kuker roi ḇepyum ma upacara sifrur na, ma sakso warpu ro polotik na, ḇape Yesus dakfrur rarirya ḇa. Insape nufawi kaku snar Manseren Allah ḇyepake si ḇa, inja numamuser kaku agama riḇeso nufawi pyum ḇa na fa nusewar infa nufawi farkarkor sena.

Rasras na, nura nusrow snonggaku ro agama-agama ansine fa nubuk fakfuken faro si. Snar nuna kankarem Refo kwar faro fakfuken anna kam, inja bisa nufawi ḇeri kankarem sena namnis kuker Allah Wos Ḇyena ke roḇa. Rofyor fananjur ya raposa, na yaḇenadi ker ḇe Manseren Allah I, ’Snonggaku ansine sna agama ḇekaku ido, buk ḇe aya marisen fa yasrow kuker si wer.’ Ḇape paik ḇe paik kwar, yasrow raryur ḇebuk kankarem ro Refo sine ḇaim kako; yamewer kwar fa yasrow kuker si werdi.

Ḇarpur ya, aya ma bati yedi nusrow Saksi-Saksi Yahwe sya. Imnis ra rasras na, nubuk fakfuken ḇemnis kako ḇoi sbuk kankarem ro Refo ya. Rosai sikofen anna nasrow kuker rosai nufarkor kwar na. Inja, nufuken wer roi nufawi ḇaim kankarem ḇyena ro Refo ya—imnis ra, Allah mamam Ḇyena faro anan tabaku ma narkoba. Roi nufuken nane bisa sikarem naro Refo. Inja numarisen fa nurama ḇe moḇ seari rona isoine ro Balai Kerajaan.

Ayama, yarama ro fananjur ari inema napyan ḇa. Yamewer yaḇebati ri, inja fyor snonggaku ḇefrur pyum ma ḇesansun pyum ansi sfanam aya ido rya yamarisen ḇa kero. Yawarki rosai ḇefnai fa sifrur rarirya, ma yamewer yara ḇe fananjur ari sena werdi. Ḇape, yaḇenadi ḇesya kwar insama Allah byuk marisen fa yasrow kuker si. Sima sna agama ḇekaku ido, na yasrow kuker si wer. Ma kali ine yamarisen kaku fa yafarkor Refo kuker Saksi sya.

MOḆSA REFO FYADWER KENEM YENA RAI: Yafawi fandun fa yamnai yaḇepake narkoba ma roi ani samswen ḇa. Ḇesamswen iso yaḇor yarir anan tabaku ya. Yaḇesewar kaku fa yamnai ḇoi jadi ḇa. Yarower snonggaku sia simnai ḇeri ma sikun tabaku wer ḇa kwar. Inja, yaḇenadi yakofenḇair roi ine ḇe Yahwe I. Mura, kuker fafnoḇek ro Yahwe I, bisa yamnai ro anan tabaku ya. Fawar ine nfarkor aya fa yawos roi ḇekaku ma yakofen nakam ḇe Yahwe ro nadi.

Fararwe ḇeba ḇese yafrur wer iso moḇ yasansun aya ma famanggor ayena. Rofyor yarama randak ro Balai Kerajaan ya, snomburyam yena nasar ḇo nores ḇebo ma negaris-garis ḇeramen raris merak bur ḇyena. Ḇarpur mura, snomburyam yedi secat nafa nenanyar kaku. Yasun jeans ma jaket kulit spom slogan-slogan na. Saksi sya sikofenḇair myaren ḇe aya kuker roi ine kwar, imbape yakara fararwe ine nefandun manggenem ḇa. Ḇape ḇarpur ya, yakarauser wos ḇero 1 Yohanes 2:​15-​17, ”Mkoswar awer supswan ine, roḇa rosai isya ro supswan ine. Rofyor mkoswar supswan ine, nari mkoswar Kmaya ḇa.” Inja, yaḇaḇir ro manggundaya snar moḇ yasnai rai nfasnaiḇair yaswar dunya ine. Yafasnai yaswar faro Manseren Allah ido, fandun fa yafrur fararwe. Iso yafrur ya.

Ḇarpur mura, yaḇaḇir ro manggundaya snar Saksi sya monda ḇa ḇemarisen insama yaso fananjur ari na. Ibrani 10:24, 25 fyasnaiḇair Allah imarisen ayaisya rodiwa. Fyor yaso fananjur kam raposa ma yamamḇaḇir snonggaku ḇero diwansya, mura yun snemuk fa yabuk kenem yedi ḇe Yahwe kuker yaḇebaptis.

BARAKAS YASMAI NA: Yamarisen kaku kukro Yahwe imarisen kona wis ḇefanam kuker I. Ḇaḇenaḇye ma sawarwar Ḇyena nadif aya fa yasofarari romawa Ḇyedi, Yesus Kristus nyan ḇepyum ḇyena. (1 Petrus 2:​21) Inja yafarkor fa yana rari Kristen ḇebabo bisa nasur ḇoi yafrur manggundaya ḇe snonggaku ḇese awer. Yaḇesewar kaku fa yaḇe snonggaku ḇesawarwar ma ḇefandun faro snonggaku ḇesesya. Yasewar fa yaso Kristus ro nyan yafrur pyum swa yedi ma romawa yedi. Ma, yaswar kaku naek srar Kristen sya. Kuker yaso Kristus i, yasmai syowi, yaḇemaeja, ma yasambraḇ fa yafasnai saswar faro snonggaku ḇesesya.

”Sifrur Pyum Kaku Aya.”​—GUADALUPE VILLARREAL

ḆYEḆEAḆEN RO: 1964

SUP RYAMA YA: MEKSIKO

FARFYAR ḆYEJA: YANA KENEM ḆEḆYEḆA

KENEM AYEDI RO RANDAKYA: Ayama romawa snon risaya, yaba kayam kuker eba kasun riwonem yesi ro Hermosillo, moḇ ḇepyum ḇa ma ḇesabarar ro Sonora, Meksiko. Fyor yabaḇa kaker ya, kamami ryobur inggo inja awin iso ḇefaduru inggo. Ro rasras yasower royoḇa kukro pipi noḇa fa yakoḇes sepatu. Fyor yabaḇa ya, yafararur kwar fa yasewar pipi fa yakfnoḇek kina yesi. Raris kina ḇebor ḇesesya, nggoḇarek ro rum mgun ḇefyosdam ma ḇekain pampam na.

Ras ḇesiper, awin isya ro rum ḇa fa kyadaunwarek inggo. Rofyor yaḇe umur taun ri 6, roma snon ḇeumur taun 15 ḇyeraro aya. Roi ine ndarirya ker ro swaf kawan kaku. Iso ḇefnai fa yakmom mansei yamarisen ya, snon sya ke bin sya. Faro manggundaya, marisen faro snon kuker snon ima roi ḇesasar risya ḇa. Rofyor yasewar fafnoḇek ro dokter ma pastor, soḇe yapyum monda ma roi yafrur nama roi ḇesasar risyaḇa.

Fafisu yaḇeumur taun 14, yun snemuk fa yaḇe snon ḇemarisen faro snon sya ḇaido yaḇe homoseksual. Kenem ḇeḇyeḇa yena yambran na taun swaf ri 11. Ro swaf ani, yana pacar snon sya riḇeso, ma yaḇarkus si. Ḇarpur ya, yun kursus penata rambut ma yafararur ro salon oso. Ḇape, yasmai aski noḇa, yaḇaḇir yapyumḇa kwar ma sifrowes aya kwar. Yaḇaḇir kenem yedine imnis ḇa. Yafuken ker, ’Snonggaku ḇepyum ma ḇefasnai syowi ono sisya ke?’

Yaswarepen mura ro srar ḇeba yedi. Fyarkor Refo kuker Saksi-Saksi Yahwe ma ḇarpur ya ḇyebaptis. Fyawar ker rosai isya fyarkor na, ḇape yabuk swaruser yena ḇe roi ani ḇa. Rariryano, yamanen i kaku ma kenem ro kina ḇyesi. Swari su suswaryae su, suḇesyowiyae ma sufrur pyum yae su. Ḇarpur mura, yakfarkor Refo kuker Saksi Yahwe oso. Randak ya, yaso monda, ḇoi yamarisen manggun ḇa. Faḇaḇye mura, mamam yena nefadwere.

MOḆSA REFO FYADWER KENEM YENA RAI: Saksi sya sor aya fa yarama ḇe fananjur ari sena, ma yamarisen. Inema pengalaman ḇebabo ḇe aya kaku. Rasna snonggaku sya skoryae aya, ḇape Saksi sya sradirya ḇa. Sisaser pyum aya, ma sesyowi aya. Ine nsun ro sne yedi kaku.

Yamarisen faro Saksi sya frur pyum sena fyor yaso munara sarawrow. Yamam roi ine kako ro raryur ḇeba na, snonggaku sine simnis raris eba yedi​—sikofen roi ḇekaku ma sifasnai na kuker sne ḇesiper. Yakara, imbude snonggaku ḇepyum ma ḇesyowi sine siso yasewar ker sya. Yamanen si fyor yamam saswar ma ḇaḇeoser sena, imnis ra yamanen fyor yamam skarem fakfuken nakam ro Refo ya. Yafawi snar Refo iso ḇebuk roi ḇepyum ro kankenem sena. Yafawi kako fandun fa yafrur fararwe nabor ḇemnis raris sifrur na.

Inja, fandun fa yafrur fararwe kaku, snar fafisu ine yambran yakenem rya bin sya. Wos yena, roi yafrurna, sansansun yena, moḇ yafrur snomburyam yena, ma bati yakinfir sya​—nakam fandun fa yafarwe na. Bati yesya ro randak iwara skoryae aya ḇo soḇe, ”Rosai ḇefnai fa wafrur fararwe? Wapyum monda bo. Wafarkor Refo awer mura. Wana roi nakam kwar.” Ḇape, roi ḇesamswen kaku iso yabur kenem ḇeḇyeḇa yena.

Rariryano, yafawi fararwe ḇeba nama imbude na ndarirya, snar yakyar kaku faro wos ḇero 1 Korintus 6:​9-​11, ”Wafawiḇake snonkaku ḇeso Allah marisen ḇyenaḇasya, nari sakḇe kinaḇa ro Allah kawasa ḇyesi? Imbude sḇeankar naek uri. Snonkaku ḇefrur farbuk, snonkaku ḇesyom amfyanir, snon ḇefarḇuk kuker snon min sesi, . . . nari sakḇe kina ro Allah kawasa ḇyesiḇa. Naek ono rofandu mko ro randakya rari sena namnis rarirya. Ḇape ḇaḇoine mkoḇe ḇefasren kwar ro sasar na.” Ro fafisu iwara, Yahwe ifnoḇek snonggaku ḇefrur fararwe sya, ma ifnoḇek aya kako. Kakuḇae, fandun fa yaḇesewar marḇak kaku ro swaf taun riḇeso, ḇape farkankin ma saswar ro Saksi sya nafnoḇek kaku aya.

BARAKAS YASMAI NA: Kirine, yakenem mnis kwar imnis ra snonggaku ḇesesya. Yana swa kwar, ma nufarkor roma nuḇedi fa ikenem imnis wos farkankin ro Refo. Kenem ḇeḇyeḇa yena yasawen na kwar, ma kirine yasmai barakas nabor ma fakamaman rohani. Yafarmyan ḇe penatua ro sidang jemaat, ma bisa yafnoḇek snonggaku ḇese sfarkor kakaku ro Allah Wos Ḇyena. Awin yedi imarisen fafayaḇa myam fararwe ḇebor yafrur ro kenem yena. Roi ine nafrur imarisen fyarkor Refo ma ḇarpur ya dakḇe snonggaku Kristen ḇebaptis kwar. Srar kasun yedi randak ya dakkenem mnis ḇa ḇoi kirine dakḇe Saksi Yahwe kako.

Snonggaku randak ḇemamḇaḇir ayansya sikofen ḇo soḇe yafrur fararwe kwar ḇe snonggaku ḇepyum syadi. Ma, yafawi rosai ḇefnoḇek aya fa yafrur fararwe na. Raso yasewar fafnoḇek ro snonggaku ḇefawinanem sya ḇape anun yasmai nama anun ḇepyum ḇa nairi. Ḇape, Yahwe ifnoḇek kaku aya. Yaḇaḇir ro manggundaya yaḇemaeja ḇa, ḇoi myamepen kaku aya ma ifrur pyum aya kuker nyan saswar ya ma kaḇaḇaḇ. Allah ima ipyum kaku, ḇyepande, ma isaswar kuker imarisen myamepen kaku aya ma imarisen insa yasmai kankenem ḇepyum syadi. Iso ḇefnai fa dor aya fa yafrur fararwe.

”Yasmai Doryaḇ Ḇa, Yemire, ma Kenem Yedi Nefromo Monda.”​—KAZUHIRO KUNIMOCHI

ḆYEḆEAḆEN RO: 1951

SUP RYAMA YA: JEPANG

FARFYAR ḆYEJA: PEMBALAP SEPEDA ḆEFAMFABRI

KENEM AYEDI RO RANDAKYA: Yaba ro kota pelabuhan ro Prefektur Shizuoka, Jepang. Kina ayesi, nggokam nggoḇe war, nggoḇarek ro rum ḇekasun. Kamami nya toko sepeda. Rofyor yabaḇa kaker, dun ker aya fa yamam balapan sepeda rawo yakmarisen kuker olahraga ine. Inja, kamami ifrur aw insama yakḇe pembalap ḇekir kaku. Yaro SMP kaker ya, Kamami fyarkor aya kaku. Fafisu yaro SMA ya, kali rikyor aya iso ḇeyun juara ker ro perlombaan atletik nasional taunan. Sor aya fa yaḇe kuliah ro universitas, ḇape yun snemuk fa yasun ḇe farkarkor khusus ḇe pembalap. Fyor yaḇeumur taun ri 19, yaḇe pembalap ḇekir kaku.

Ro fafisu ani, roi yasewar ro kenem yedi iso imbe yakḇe pembalap sepeda ḇepyum kaku ro Jepang. Yamarisen yasmai pipi nabor insama nbuk aski ro kankenem ma payamyum ro kina. Yaḇesewar marḇak kaku fa yaḇe latihan. Fyor imbe yasusu ro latihan ḇemarḇak yafrur na ḇaido moḇ fanandi ine syamswen ido, yakofen ro sneri ḇo yoḇe ayama sikapar aya fa yaḇepembalap sepeda inja oso na ḇedwarek aya ḇa ma na yasusu ḇa! Inja, iso yafrur na. Fararur marḇak ayena nun bon ḇepyum. Ro taun ḇerandak, yun juara oser ro tingkat junior. Taun ḇeuser ya, yakso kwar kompetisi fa imbe sisewar mansei pembalap nomor oser ro Jepang. Kali riwonem yun juara suru ro tingkat ine.

Snar yafrarpon kaku ro pembalap sya, sifawi aya kwar ḇe wemin ḇesambraḇ ḇerama ro Tokai, snonsnon oso ro moḇ ḇero Jepang. Yafabri manggun kaku. Simgak aya kaku snar yafrar fawas ḇa ro nyan nggofrar roya. Yasmai pipi nabore, inja bisa yakoḇes rosai monda yamarisen na. Yakoḇes rum ya ma sim sifrur oso fa srir roebor ḇepyum kaku fa yabuki olahraga na. Yakoḇes oto sun ro bandi muma nek fafayaba imnis ra rum ya. Insamaido pipi yena nabro awer, yaḇeinvestasi ro bidang properti ma pasar saham.

Ḇape, yasmai doryaḇ noḇa, yemire, ma kenem yena nefromo monda. Ro fafisu anya, yafarḇuk kwar ma yana romawa kwar, ḇape ayama yamasasor si fasawsaw. Roi ḇekasun monda bisa nafrur fa yarmomen. Snar simgak aya, inja sfarkor fa smam mgasi insa sifawi ayaisya yamsor ke roḇa.

Ḇarpur muma, swa yedi fyarkor Refo kuker Saksi-Saksi Yahwe. Roi ine nun fararwe nabore. Imarisen iso fananjur ari Saksi sena, ma imarisen nggoḇe kina oser nggora ḇe diwa. Yaswarepen kaker fafisu roḇ oser penatua ryama ḇe rum ma ḇerandak farkarkor Refo kuker aya. Yamarisen kaku faro rosai yafarkor na.

MOḆSA REFO FYADWER KENEM YENA RAI: Nari yaswarepen ḇesya kwar wos ḇero Efesus 5:5 ḇebuk payamyum ḇeba ḇe aya. Mnuk ani ryok radine, ”Snonkaku ḇefrur farbuk, ḇefrur mamas roḇaido snonkaku ḇefrur famfnom, isoine ḇesyom faro amfyanir, osoḇaḇeri fanari isma rarwas ro Kristus ma Allah Ḇaḇesasoser suḇedi.” Yafawi snar balap sepeda fyesepen kuker srir pipi ma olahraga ani bisa nafrur anan fambram nasure. Nakyaren sneuser yedi. Yakara, yaḇe yafrur Allah Yahwe imarisen ido, yaḇe pembalap awer. Ḇape, inema snemuk ḇepyan risyaḇa.

Insape yabur taun ḇepyum, ma yamarisen syadi. Ḇape, yaḇaḇir snar yafarkor Refo nbuk ḇe aya ḇaḇedame ma kakara yena naknon​—eḇese kaku kuker raryaḇ ḇefamfabri fa bemenang ro fanandi! Randak yafarkor Refo ya, kali rikyor monda yaso fanandi, ḇape sne yedi myarḇak kaku fa yabur na. Yakmom kako, moḇsa na yafamfon kina yesi raya. Yaḇor famfnom kaku, yaḇe yasusu jadi ḇa, ma karyer yesi sawos nabor aya snar yafarkor. Kamami fyafko kaku. Roi nane kam nafrur yaḇoryae kaku ma yaduf lambung yedi.

Yabur rasras ḇesamswen ani snar yafarkor Refo pdef ma yaḇeari kayam kuker Saksi-Saksi Yahwe. Fababye mura, kakyar yena nsambraḇ kaku. Yor ro nadi insama Yahwe ryower nadi yena ma ifnoḇek aya fa yafawi roi ani. Roi ḇefrur yaḇoryae naisya nado fawas rofyor swa yedi ikofen snar fyandun rum ḇeba ḇa fa bisa yaḇe aski. Ḇarpur mura, yafrur kemajuan.

BARAKAS YASMAI NA: Yesus wos ḇyena ro Matius 6:​33 nefasnai kaku faro aya. Ikofen, ”Inja mkosewar bepon Ḇaḇesasoser Allah ma napnapes ḇyedi, nari nakaem neḇeḇuk fnoḇek faro mko.” Raso ḇa ngoḇesabarar roi ”nakaem”, isoine fandandun rasras faro kankenem ya. Pipi yasmai ro kirine na indokada persen samfur rikyor yasmai ḇe pembalap, ḇape ro swaf taun ri 20 ḇepupes ine kina yedi raso nggonanjar roi oso ḇa.

Ma ḇepyum syadi wer, rofyor yafrur fararmyan ma yaḇeari kayam kuker min Kristen sya, yasmai marisen ma doryaḇ randak yasmai ḇa na. Oras ya ḇyenande fasaw kaku. Kankenem ro kina yedi ipyum syadi kako. Roma rikyor ayesi, kuker swa skoḇesya, sikam sifarmyan ḇe Yahwe kuker souser.