Refo Fyadwer Kankenem

RARISO bin ḇebabo oso ḇesmai roi ḇebye ḇa fyor iba ḇa kaker ḇarpur ya ifawi knam ro kankenem ya? Rariso snonggaku ḇemasasor ma ḇembroḇ faro polotik ḇye manfamyan Kristus ḇemarisen faro aski? Wawasya kada farfyar suḇena fa wasmai kankarem ḇyena.

”Yamander Kaku Saswar Ma Aski Ya.”​—INNA LEZHNINA

ḆYEḆEAḆEN RO: 1981

SUP RYAMA YA: RUSIA

FARFYAR ḆYEJA: ISMAI ROI ḆEḆYE ḆA FAFISU IBA ḆA KAKER

KENEM AYEDI RO RANDAKYA: Yaproi kwar fyor yaḇeaḇen ya, sinan yesuya kako. Taun ri wonem randak ro kenem yedi yamarisen. Ḇape, ḇarpur mura sinan yesuya suḇesisye. Yababo kaker mboi yafawi imbeswa suḇesisye ido rosai na ḇejadi ya, ma nane nafrur sanerine iduf kaku. Mura, Kamam i ma eba yedi suḇarek ro Troitsk, fama awin dun aya fa nuḇarek ro Chelyabinsk. Ḇarpur mura, Awin i dakfarḇuk wer. Kma ḇebabo yedine fyarandinem, ma myun ker aya ma Awin nu.

Ro taun 1993, eba yedi yaswar kaku ya imsar ma ryoe. Yakara ḇaberi roi ḇeḇejadi nane nkur kina yedi. Awin yedi dakfarandinem, ma raris Kamam i iwos masasor ker ḇe aya ḇefrur fa yamgak kaku. Yakara fa imbe yasewar kenem ḇepyum syadi. Yamander kaku saswar ma aski ya. Inja, yara ḇe gereja ḇeḇeso insama yasmai sneprei, ḇape yasrow royo ḇaberi.

RARISO REFOYA FYADWER KENEM YEDI: Fafisu yaḇeumur taun ri 13, bati yedi ro rumfarkor ima Saksi Yahwe diri, fyawar ḇe aya farfyar ḇeḇeso ro Refo. Yamarisen faro fafyar snonggaku ḇefas ro Refo raris Nuh ma Ayub, susmai samswen rariryano sufarmyan pdef ḇe Manseren I. Fyoro ḇa mura yafarkor Refo kuker Saksi Yahwe ma yaso fananjur ari sena.

Farkarkor Refo ya nafnoḇek aya fa yamam kakaku ḇebor ḇepyum na. Yamarisen kaku fa yafawi Manseren Allah snonsnon Ḇyeja. (Mazmur 83:18) Yamarisen snar yamam rariso Refo fyasnai mnis kaku rosai na ḇeḇejadi ”ro ras ḇepupesna”. (2 Timotius 3:​1-5) Ma yaryaḇ kaku faro saneraro kaḇakḇok ya. Ras oso nari yasrow kaḇer kuker eba yedi wer!​—Yohanes 5:​28, 29.

Ḇape, snonggaku syakam ḇa ḇemarisen faro roi yasmai babo nane. Awin i ma Kma ḇebabo yedi sumarisen faro Saksi-Saksi Yahwe sya ḇa. Susewar fa sudwarek aya insama yamnai yafarkor Refo ya. Ḇape yamarisen faro rosai yafarkor kwar na, yamewer yamnai ri.

Roi ḇedwarek ḇerama ro kina yesine inema roi ḇepyan risyaḇa. Samswen ḇese wer ndrama fyor srar kasun yedi, ḇeso ker aya ḇe fananjur ya, dakmsar bo ryoe. Yaḇe saneso kaku. Ḇape ro fafisu anya Saksi sya sifnoḇek aya. Snar yafanam kuker si, yasmai saswar ma aski ro kenem yedi ḇesiper raris yamander ani. Yakyar kaku ine agama ḇekaku diri. Ro taun 1996, yaḇe baptis ma yakḇe Saksi Yahwe kako.

BARAKAS YASMAINA: Taun ri wonem ḇarpur ine, yafarḇuk kuker snon ḇepyum oso snoriso Dmitry. Nufarmyan kam ro kantor cabang Saksi-Saksi Yahwe ro St. Petersburng. Ḇarpur mura, sinan ayesuya sufadwer mamam suḇena faro roi yakyar na.

Yakofen kasumasa snar yamamḇir Yahwe I! Yafarmyan ḇe I nafur fa yasmai marasrisen ḇeba ro kenem yedi.

”Yana Fakfuken Nabor Kaker.”—RAUDEL RODRÍGUEZ RODRÍGUEZ

ḆYEḆEAḆEN RO: 1959

SUP RYAMA YA: KUBA

FARFYAR ḆYEJA: ḆYEMBROḆ FARO POLOTIK

KENEM AYEDI RO RANDAKYA: Yaḇeaḇen ro Havana, Kuba, ma yaba ro moḇ kawasa ḇero diansya sesabarar ma srakrok ker. Fyor yaḇe romawa babo, yamarisen faro olahraga judo ma olaraga mamamun ḇese na.

Yaḇe romawa farkor ḇepyum, ma sinan yesuya sudif aya fa yakfarkor ro farkarkor ḇekaki. Fafisu yafarkor anya, randak yaḇabir fandun fa sfarwei nyan polotik ro sup yedi. Inja yun snemuk fa yaḇe mbroḇ. Aya ma bati yedi nusewar fa numun polisi oso fa nuyun pistol ḇyedi. Polisi ani ḇyepar ro bukor ḇyedi inja nubur i. Sisun nu ḇe bui snar numun polisi ani, ma sikofen nari spambos nu fa numar. Insape yaḇe umur 20, ma kero wer na yamar!

Fafisu yemir yaro bui ya dori, yakain yakara moḇsa na yaḇerai ro barpon snonggaku na ḇepambos aya sya. Yamewer yafasnai makakak mgun ḇaberi. Ro fafisu ya kako, yana fakfuken ḇebor kaku. Yemir yafakfuken: ’Sai bewar fa ḇaḇenanapes ḇa nabor ro dunya ine? Kenem ine ryadine monda ke?’

RARISO REFOYA FYADWER KENEM YEDI: Ḇarpur ya samamyai marmar sbuk ḇe nu sḇe na fa nasrawen mgun inja nusmai bui taun ri 30 monda. Ine iso, randak yasrow kuker Saksi Yahwe riḇeso ḇero dine sya, sisun siḇe bui snar kakyar sena. Yamarisen kaku snar yamam ḇaḇebri ro Saksi ansine ma simarisen aski ya. Sisasar ḇa, ḇape sisun siḇe bui, rariryano simsor ḇa ma sifafayaf ḇa.

Saksi sya sifarkor aya, snar Allah nya aw faro snonggaku sya. Sifasnai ro Refo snar nari Allah ifur supswan ine ḇe firdaus ma, roi ḇeḇarḇor, ma ḇaḇenanapes ḇa nari naisya wer ḇa. Sfarkor aya snar supswan ine nari ifo kuker snonggaku ḇefrur pyum, ḇesmai swaf fa ḇekenem fyoro ro moḇ ḇepyum kaku.​—Mazmur 37:29.

Yamarisen faro rosai yafarkor ro Saksi sya, ḇape yakara kenem yedi iḇese kaku kuker si. Yakara mboi yawaira ḇe bar polotik ya ḇa ḇaido yafasis fyor sifrur pyum aya ḇa inema roi yapok fa yafur ḇa nairi. Inja yun wos snemuk fa yawasya Refo ya. Fafisu yawasya ra yamnai, insape yafawi kaku Saksi Yahwe si monda ḇekenem raris snonggaku Kristen ḇero randak iwara sya.

Roro farkarkor Refo, yafawi fandun fa yafadwer kaku kenem yedi. Rupa ra fandun fa yafadwer moḇ yawos raya, snar yabuk ker wos fafras ro wos yena. Fandun kako fa yamnai yakun tabaku. Ma kako fandun fa yamnai yaso polotik na. Inema fararwei ḇepyan risyaḇa, ḇape kuker farfnoḇek ro Yahwe, fawas mura bisa yafur fararwei.

Roi oso ḇesamswen kaku fa yafadwer na yaiso, yafarmku masasor yena. Yaḇenadi kaker kuker roi ine. Yasmai kaku fafnoḇek ro mnuk-mnuk bero Refo, ro Amsal 16:32, ”Snonggaku ḇemsor fasaw ḇa ima ipyum syadi bur snon ḇemambri, ma snonggaku ḇefara mnis masasor ḇyena ima syambraḇ syadi bur snonggaku ḇemgok kota.”

Ro taun 1991, yaḇe baptis fa yakḇe Saksi Yahwe oso. Sebaptis aya ro bui yadori ro moḇ sbuki ser ware. Taun riḇeso ramnai, aya ma ḇesmai bui ḇeḇeso sisasyar nggo fa sifarem nggo ḇe Spanyol snar nggona karyer ro diwa. Fyor yasabu ro Spanyol yaso beri fananjur ro Saksi Yahwe sya. Saksi sya siser pyum kaku aya, rya sifawi aya kwar ro swaf taun ḇe taun, ma sifnoḇek aya fa yaḇerandak kenem ḇebabo wer.

BARAKAS YASMAINA: Yaḇe snonggaku ḇeaski, yafarmyan ḇe Allah kuker swa yedi ma inaimos nuḇedi. Yana fakamaman ḇeba kaku fa yabuk swaf ḇebor yena fa yabuki fnoḇek snonggaku ḇesesya fa sakfarkor Refo ya. Fyorno ido, yawasen mura ro fafisu iwara ḇe romawa babo oso kero kada imar ani, ma yaḇesyowi kaku roi ḇebor yasmai kwar ro fyor anya. Kaku ya yakenem monda ḇa, ḇape yana kako saneraro. Yawaf kaku firdaus ḇeḇeasas ani isof fafisu ḇaḇenanapes ya nari isya kaku ma ”marmarya isyaḇa kwar”.​—Wahyu 21:​3, 4.

[Ḇeḇeyap]

”Yamarisen kaku fa yafawi Manseren Allah snonsnon Ḇyeja”

[Sonin]

Aya ma swa yedi numarisen nurwas syapram sifrur faro snonggaku ḇeawer sya