Refo Fyadwer Kankenem

SNON Skotlandia oso rosai myam na ḇe roi ḇepyum syadi ro fararur ḇena ḇaḇyak ḇekaki ya? Rosai ḇefnoḇek snon oso ḇero Brasil fa ibur nyan kenem ḇeḇye ḇa ḇyena ma imnai ḇyepake narkoba sor ḇe kokain? Rariso snon oso ro Slovenia bisa imnai ro farandinem swan ya? Wawasya kada fawar skoḇena.

”Kenem Yedi Rya Napyum Kwar.”​—JOHN RICKETTS

ḆYEḆEAḆEN RO: 1958

SUP RYAMA YA: SKOTLANDIA

FARFYAR ḆYEJA: PENGUSAHA ḆEBA

KENEM AYEDI RO RANDAKYA: Yaba ro kina ḇena pipi nabore. Kamami ismai nasan perwira ro angkatan darat Inggris, inja nggoḇarek ro moḇ oser ḇa. Nggoḇarek ro Skotlandia monda ḇa, mboi ro Inggris, Jerman, Kenya, Malaysia, Irlandia, ma Siprus kako. Rofyor yaḇeumur taun ri war, yasun ro rumfarkor asrama ro Skotlandia. Ḇarpur ya, yamnai ro Cambridge University.

Rofyor yaḇeumur taun ri 20, insape yakfararur ro bisnis minyak, yambran na swaf taun ri war. Yafrur randak fararur ine ro Amerika Selatan, mura Afrika, ma pupes ya ro Australia Barat. Yaḇarek ro Australia ramnai, yaḇawes perusahaan investasi, nari ḇarpur ya yaḇoḇ na.

Snar pipi yasmai anna, bisa yaḇepansion ro umur taun ri 40. Yana oras nabor, ma yabuk na fa yambran farma. Rarwan ri suru yek motor bo yafrar yaryar Australia, ma yambran yar supswan ḇesiper kako. Kankenem ayedi rya napyum kwar.

RARISO REFOYA FYADWER KENEM YEDI: Fyor yafararur kaker anya, yamarisen fa yafawi moḇsa yakofen kasumasa ḇe Manseren Allah faro payamyum yasmai ro kankenem yedi. Inja yasun ro Gereja Anglikan, gereja yaso rofyor yabaḇa ya. Ḇape, ro gereja ani sfarkor manggun Refo ya ḇa. Mura, yafarkor ro gereja Mormon, mboi yamnai kukro sisouser Wos Refo ya ḇa.

Ras oso, Saksi Yahwe srama ḇe rum yedi. Yafawi beri roi sbukfarkor na ndrama kaku ro Refo ya. Mnuk oso ro Refo siwasya ḇe aya iso 1 Timotius 2:​3, 4, ḇekofenḇair Allah imarisen insama ’snonggaku syakam sisma ḇaḇye ma sismai fawawi ḇemnis ro kakaku ya’. Yamanen Saksi sya kukro sfasnai kaku kofandun fawawi monda ḇa mboi fawawi ḇemnis ro Refo ya.

Snar yafarkor Refo kuker Saksi Yahwe sya, sifnoḇek aya fa yasmai fawawi ḇemnis ya. Imnis raris, yafarkor fa yafawi Allah ma Yesus suma suru ro roi sor ḇe Tritunggal anya ḇa; fama suma mangggun ri suru suḇese yae. (Yohanes 14:28; 1 Korintus 11:3) Yamarisen kaku snar napyan fa yafawi kakaku ine. Mboi yafafko kako snar fyoro kwar yasewar marmar fa yafawi doktrin ḇesamswen ine!

Fyoro ḇa mura, yaso fananjur ari ro Saksi-Saksi Yahwe. Yamanen kaku frur pyum ma kenem ḇesren ro snonggaku ḇero dia​—simnis ra malaikat. Saswar ḇekaku sfasnai na nafrur fa yakyar yasrow agama ḇekaku ya kwar.​—Yohanes 13:35.

BARAKAS YASMAINA: Yaḇebaptis raposa, yasrow bin oso ḇefrur pyum snori Diane. Iba ro kina ḇeḇe Saksi ma nya rari ḇepyum yamarisen na. Ramnai ido, nufarḇuk. Ḇaḇebati kuker Diane ma fafnoḇek ḇyena nama barakas ro Yahwe nairi.

Diane ma aya numarisen kaku fa nura ḇe moḇ ḇefandun syadi manbaryas sya. Ro taun 2010, nura ḇe Belize, Amerika Tengah. Ro dine, nufnoḇek snonggaku ḇeswar Allah sya ma ḇefandun kaku fawawi ro Refo ya.

Sne yedi iknon kaku snar yafawi kakaku ḇekur Allah ma Wos Ḇyena, Refo ya. Yasun ro fararur ḇesren oras nakam, yamarisen kaku yabukfarkor Refo ḇe kawasa ḇebor sya. Roi oso ḇaḇeri nun marisen syadi ro komam kakaku ro Refo nafnoḇek kankenem ro snonggaku oso​—raris ḇejadi ro aya. Imbe yakofen ido, yasrow kwar nyan ḇepyum kaku fa yakofen kasumasa ḇe Allah faro payamyum yasmai ro kankenem yedi.

”Sifrur Pyum Kaku Aya.”​—MAURÍCIO ARAÚJO

ḆYEḆEAḆEN RO: 1967

SUP RYAMA YA: BRASIL

FARFYAR ḆYEJA: IKENEM IḆYE ḆA

KENEM AYEDI RO RANDAKYA: Yaba ro Avaré, kota kasun ro sup ḇero São Paulo. Kawasa ḇero dine ḇebor sya sna fararur.

Kamami ryoe fafisu yaro Awin snekapar ḇyedi kaker. Rofyor yabaḇa ya, Awin isya rya ido yamarisen yaksun pan sansun ḇyeja. Yafrur raris bin sya inja snonggaku sya smam aya homo. Ḇarpur ya, yafrur farḇuk kuker roma babo ma snon ḇeba sya.

Rofyor yaḇeumur fanam taun ri 20, yasewar ker min fa yafrur fararur farḇuk kuker ya (snon ḇaido bin) ro moḇ sairirya​—bar, kelab malam, ma gereja kako. Fafisu sifrur karnaval, na yasun sansun bin ma yaryur kuker ḇefyer samba sya. Mura ido yaḇesnosno kwar.

Yaḇebati kuker snonggaku homo, pelacur, ma ḇepake narkoba sya. Ḇeḇeso ro si sembuk aya fa yaḇepake kokain, ma fyoro ḇa mura yaḇepake ker na. Fyorno ido, nggofrur festa kokain ro roḇ ḇesiper. Ma fafisu ono yaḇarek monda ro sim yedi ro ras ḇesiper fa yasyor kokain. Baken yedi ḇyekorkor isof snonggaku sya soḇe yasmai dafduf AIDS.

RARISO REFOYA FYADWER KENEM YEDI: Rya ro fafisu anya, yasrow kuker Saksi Yahwe sya. Sima sifrur pyum kaku. Siwasya mnuk oso ro Refo ḇe aya isoine Roma 10:​13, ḇekofen, ”Snonkakukam ḇeyor Manseren snonsnon ḇyedi [Yahwe], nari sisma koreri.” Wos nane nafrur fa yafawi fandun kaku fa kap snonsnon Yahwe. Nono ido, fyor yasyor kokain ro roḇ ḇesiper raposa, yaḇas kekbir ya, yamam ḇe farsyos iyaswa, ma yaḇenadi ḇe Yahwe I bo yakanes, yor fa ifnoḇek aya.

Yakara mboi Awini na ḇyesneso fafayaḇa myam kenem yedine iḇyeḇa kaku snar narkoba, inja yun snemuk kaku fa yamnai. Fyoro ḇa mura, Saksi sya sor aya fa yafarkor Refo ma yamarisen. Sifrur fa yakyar farkarkor anane nari nafnoḇek kaku aya fa yamnai yaḇepake narkoba​—ma roi sikofen na nkaku!

Fafisu yafarkor Refo ya, yafawi fandun fa yafadwer nyan kankenem ayedi. Ḇesamswen syadi ḇe aya iso yabur fararur homoseksual ya, kukro ine nerares kaku ro baken ayedine. Imbape, napyan syadi rofyor yafadwer snonggaku yaḇebati kuker sya. Yamewer yaḇebati kuker bati ḇekwar ayesya ḇaido yara ḇe bar ḇaido kelab malam wer ḇa.

Yafrur fararwe nane napyan ḇa, mboi yasmai sneprei kukro yafawi Yahwe iswar aya ma ifawi samswen ayena. (1 Yohanes 3:​19, 20) Taun 2002, yabur fararur homoseksual ya kwar, ma ro taun ani yaḇebaptis ḇe Saksi Yahwe.

BARAKAS YASMAINA: Awini myanen kaku aya snar yafrur fararwe kwar inja imarisen fa dakfarkor Refo. Ḇape faḇye, fyoro ḇa mura ismai stroke. Imbape, iswar Yahwe I ma kakaku ro Refo ya pdef.

Ro swaf taun ri war ine, yaksun ro fararur ḇesren oras nakam isoine yabuk oras nabor fa yabukfarkor Refo ḇe ḇesesya. Imbo ḇae, nono ido yasewar kaker fa yapampum marisen ḇesasar na. Ḇape, yasmai sneprei kukro yafawi fyor yaso marisen anna ḇa ido na yafrur Yahwe imarisen.

Snar yafanam kuker Yahwe ma yakenem imnis marisen Ḇyena nafnoḇek aya fa yaḇaḇir siswar aya. Kirine yaḇeaski kaku.

”Ayama Drem Ḇemgir Risaya.”​—LUKA ŠUC

ḆYEḆEAḆEN RO: 1975

SUP RYAMA YA: SLOVENIA

FARFYAR ḆYEJA: SNON ḆEYINEM SAMBRAḆ

KENEM AYEDI RO RANDAKYA: Yaḇeaḇen ro Ljubljana, kota ḇepon ro Slovenia. Fafisu yabaḇa ya kenem yedi ifo kuker marasrisen. Imboi, fafisu yaḇeumur taun ri fyak, nakam namnai royfor kamami myum manggundi. Mura ido, awini fyararur marbak kaku fa fyan roma ḇyesuya, aya ma eba yedi.

Ro umur 15, yaḇarek ro Apus yedi rum ḇyedi. Yamarisen yaḇarekusi kukro yana bati sibor ḇeḇarek fanam sya. Yaḇaḇir yamkei syadi. Ro umur 16, yafnakus snonggaku ḇefarandinem sya ro pupes minggu. Yarir pik yena fa nakwan, yasansun famfnome, ma yasyor tabaku.

Yamnasenpan narkoba na, mboi yamarisen syadi yinem swan ya. Randak ya yinem anggur gelas riḇeso monda, rawo yinem botol oser fa ibro. Yakir syadi fa yafrur ra yamser ḇa. Insape na sifawi yamser fyor simnas sananarem yena. Sifawi kako mboi, na skara ḇaḇeri yinem anggur ḇaido bir liter ḇebor kwar​—yaḇaren na kuker vodka!

Fafisu ono, aya iso ḇeyun bati yesya ḇesambraḇ ḇa kwar posa ro kelab disko, fama yinem nabor syadi rarwan ri suru syadi ro si. Ras oso yafawi ḇa bo bati oso doḇe aya iso drem ḇemgir​—wos peper ro wos Slovenia fa sbukidap snonggaku ḇeyinem sambraḇ swan ya. Sne yedine imarisen ḇa kaku.

Mura yakarauser kenem yedine. Yaḇaḇir yafandun ḇa kaku. Rya, yafrur roi ḇepyum noḇaḇeri.

RARISO REFOYA FYADWER KENEM YEDI: Rya ro swaf anya, yamam bati oso ro rumfarkor ifrur fararwe ro kenem ḇyedi; imyaren asuser kaku. Imbe yafawi inja yor i fa nura ḇe kafe. Fafisu nufarfyare, doḇe isya fyarkor Refo kuker Saksi-Saksi Yahwe sya. Ikofenḇair roi ḇeḇeso fyarkor kwar na, nakam insape yarower babo na, kukro fyor yabaḇa anya yakfarkor agama ya ḇa. Yaso fananjur ari ro Saksi sya ma yafarkor Refo kuker si.

Snar yafakor Refo, insape yafawi roi ḇekaku nabor ḇefrur raryaḇ. Imnis raris, yafarkor koine kokenam ro fafisu Refo dap ḇe ”ras ḇepupesna”. (2 Timotius 3:​1-5) Yafawi kako kero wer Allah nari myun pres snonggaku ḇeḇarḇor ro supswan ine sya ma ḇyebarakas snonggaku ḇefrur pyum sya fa sikenem ro Firdaus isof fyoro-fyoro. (Mazmur 37:29) Yana marisen ḇeba kaku fa yafadwer kenem yedi insama aya isya rofandu snonggaku ḇefrur pyum ansi.

Aya kako yafawar kakaku yafarkor ro Refo ya ḇe bati yesya. Sibor skoryae aya, mboi ine dun roi ḇepyum ḇe aya. Roi sifrur anna nafrur fa yafawi sima bati ḇekaku sisyaḇa. Yafawi kako yafarandinem kukro yakinfir sasar bati yesya. Ro minggu nakam, siwaf minggu pupes insama simser wer.

Yaḇebati kuker si wer ḇa mboi yaḇebati kuker Saksi-Saksi Yahwe sya. Sima sbuk awyae ḇepyum​—siswar Allah kuker sne ḇesiper ma sisewar kaku fa sikenem imnis sasoser Ḇyena. Fawawas mura, yamnai ro farandinem swan ya.

BARAKAS YASMAINA: Yakofen kasumasa ḇe Yahwe I kukro yafandun swan ya wer ḇa fa yasmai marasrisen. Yakenem imnis ra ḇepondi ido yafawi ḇa moḇsa kenem yedi na ḇyerai. Imbape, yakyar kirine yakenem pyum syadi.

Ro swaf taun ri fik ine, yana syowi ḇeba fa yafarmyan ro kantor cabang Saksi-Saksi Yahwe ro Slovenia. Yamamḇir ma yafarmyan ḇe Yahwe I nafrur fa yana aski kaku ro kankenem yedi.