Sima raryur beba kaku ro binbaryas abar ḇepyum Karajan Allah. Mazmur 68:11 ḇyardi ḇekur bin ansine, ”Yahwe manggundi dawos wos ine; bar bin ḇebaryas angganginem ḇeḇye sya siso sordade ḇeba kaku.”

Imbape, bar bin ḇero Saksi Yahwe roi sifrur ro fararmyan sena naḇesebur rosai bin ḇeḇe pendeta ḇero agama ḇese roi sifrur ro fararmyan sena. Ma roi ḇeḇese ine nasnaibos kaku ro fandu si. Roi risai monda ḇefrur fa siḇese yae?

Ḇerower si sya siḇese. Bin ḇeḇe pendeta ḇero agama ḇebor ḇeyap si ḇe Kristen, sḇe binfarkin ro jemaat yadori, ma ḇerower si sya siso kawasa ro jemaat sya. Ḇape, bin ḇeyuffarmyan ro Saksi-Saksi Yahwe, ḇerower si sya siso kawasa ḇero bandi sidang jemaat sedi, sisrow si ro fararur ḇaḇebaryas ro rum ḇe rum ma ro moḇ ḇesena.

Roi ḇese ya wer iso fararmyan sena ro jemaat yadori. Ro gereja ḇebor ḇeyap si ḇe Kristen ma agama ḇesena, bin ḇeḇe pendeta sḇebukor faro kawasa ro jemaat sedi ma sbuk farkor farkarkor agama yoḇ si. Imbape, bin ḇeyuffarmyan ro Saksi Yahwe, rofyor snon ḇebaptis kwar oso isya ro jemaat ido nari sipok sbuk farkor ro jemaat ya dori ḇa. Snon skinfir kwar sya monda nari skur si ḇe guru ḇebuk farkarkor ro jemaat ya dori.​—1 Timotius 3:2; Yakobus 3:1.

Refo ikofenḇair bar snon sya monda ḇesmai fakamamar fa smamwarek ma sfarkin sidang jemaat. Komam kada manwawan Paulus dap kwar nyan ine fafisu fyas syapram ḇe naek ḇese ḇeḇe mamwarek, Titus i. Doḇe, ”Yaḇur aw kwar ro Kreta kuker swaruser ine, insa . . . wakanaw penetua-penetua ro mnuna.” Paulus ikofen wer bar snon ḇeḇekanaw ansine fandun fa ’sefarorewḇa, sna swa oser monda’. (Titus 1:5, 6) Paulus byuk kako akurfasnai ḇe Timotius ro syapram fyarem ḇe i na, ”Snonkaku ḇemarisen nasan manfarkin ro jemaat imarisen snar fararur ine iḇye kaku. Eḇedari manfarkin ro jemaat iḇye snonkaku ḇefarorewḇa, snon ḇefakawin kuker bin oser, . . . ifawi ḇyuk farkarkor.”​—1 Timotius 3:1, 2.

Rosai ḇefnai fa bar snon sya monda ḇesyus fa ḇefarkin sidang jemaat ya? Paulus doḇe, ”Yaḇuk kaku ro binsya ḇa fasakḇuk farkarkor oroḇa kako yaḇuk kaku ḇa fasawawos syadi snonsya; iḇye sefasis ro ḇinkunsi. Snar Adam i sifrur ḇeponya, raimnai insape Hawa.” (1 Timotius 2:12, 13) Inja, Allah ifrur ḇepon snon ya, ine fyasnai Allah imarisen snon sya siso ḇena fakamamar fa sḇuk farkor ma sfarkin jemaat ya.

Ḇeyuffarmyan ro Saksi Yahwe sya siso nyan ḇepyum ro Manfarkin sedi, Yesus Kristus. Lukas, Yesus manfamyan ḇyedi oso, fyasepen Yesus fararmyan ḇyena ḇo doḇe, ”Yesus imbran yar ro mnu ḇe mnu ma ḇyaryas Ankankinem Ḇeḇye ro Ḇaḇesasoser.” Barpur mura, Yesus iwan ḇeso i sya fa sakfrur fararur ḇemnis, ”sra simbran yar mnu nakam ḇo sḇaryas Ankankinem Ḇeḇye”.​—Lukas 8:1; 9:2-6.

Baboine, ḇeyuffamyan ro Saksi Yahwe, bin ḇaido snon ke, simyaren kaku ro fararur Yesus byardi kwar na isoine: ”Ankankinem Ḇeḇye ro Ḇaḇesasoser ine nari ḇye ḇeḇaryas ro supswan ḇesiper fa ḇyesaksi faro er sya kam, raimnai insape awar papupes ya.”​—Matius 24:14.