• ḆYEḆEAḆEN RO: 1963

• SUP RYAMA YA: INGGRIS

• FARFYAR ḆYEJA: NYA FARARUR ḆEPYUM SYADI

KENEM AYEDI RO RANDAKYA:

Yaḇeaḇen ro Croydon, London Selatan, nggoḇe mamḇekanaek ri siw ma aya ḇe wonem ya. Sinan ayesuya surama ker Pulau St. Vincent ro Karibia. Awin yedi ima jemaat ḇero gereja Metodis. Ayama yamarisen kaku fa yafarkor roi nabor mboi yamarisen manggun ḇa fa yafarkor ḇekur Allah. Nggofarkor ḇa ido, na yara ḇe danosen ḇo yakain yawasya syap nabore yor ro perpustakaan na.

Taun riḇeḇeso ramnai fyor yamnai ro rumfarkor, yakara ipyum syadi fa yafnoḇek snonggaku ḇena royoḇa sya. Inja, yafararur fa yafnoḇek snonggaku ḇesabarar sya, ḇemanis, ma ḇesambraḇ fa sfarkor ḇa. Mura, yafarkor ro farkarkor ḇekaki ma yun jurusan ilmu kesehatan. Yamnai raposa, yana fararur ḇepyum kaku ro kantor ḇeḇeso, ma yana nana arasai nabor kaku. Snar yafararur ḇe peneliti sosial ma konsultan ro bidang manajemen, inja yafandun monda leptop ma internet fa yabuki fararur. Yara ker ḇe sup bondi minggu ḇeḇeso, yaḇarek ro hotel yamarisen kaku, yamam roi ḇepyum naḇore, ma yabuk moḇ sfasos kwar na fa yasmai pararei raris spa ma gym. Yakara ine kankenem ḇekaku ya kwar. Ḇape, sne yedi iduf kaku fafisu yamam snonggaku ḇekandera sya.

RARISO REFOYA FYADWER KENEM YEDI:

Yafakfuken ker bo yoḇe, ’Rosai ḇefnai fa kokenemri, ma rosai imḇe kosewar kaku ro kenem ine?’ Imbape, yasewar kankarem ya ro Refo ya ḇa. Ras oso, ro taun 1999 kasun yedi, Margaret ima ḇye Saksi Yahwe kwar, ryama ḇe aya fnoḇek min Saksi ḇyedi, fyasnai furpyum ḇe aya. Yamarisen yafarkor Refo kuker kasun yedine bati ḇyedi. Ḇape, yasur fasaw ḇa ro rur ya, ine snaro fararur ma moḇ yakenem rai nafrur fa oras yena nabor ḇa fa yafarkor Refo ya.

Ro musim panas taun 2002, yara fa yaḇarek ro Inggris bar barat daya. Rodiwa, yun program pascasarjana jurusan penelitian sosial, ma yamarisen fa yun nasan doktor. Insape yaso ker fananjur ari ro Balai Kerajaan fnoḇek roma yedi ḇekasun kaker. Yamarisen faro farkarkor ḇekaki mboi, farkarkor Refo nafnoḇek aya fa yafawi roi ḇefnai kaku koḇekandera ma ras oso nari napromes. Yamam snai kakaku ro wos ḇero Matius 6:24, ḇekofen na kopok kofarmyan faro tuan ri suru ḇa. Fandun fa yakinfir Allah ke nana arasai. Insape yafawi, fandun fa yarir ro ḇarpon roi ḇefandun kaku ro kankenem yena.

Ro taun ḇepon ya, yaso ker farkarkor Refo kuker Saksi Yahwe ḇeḇeso sya nggofarkor syap Apakah Ada Pencipta yang Mempedulikan Anda? * Yakyar monda Manḇedaw koḇedi, Yahwe I, ḇefawi nyan fa ipyos kandera ḇekur snonggaku sya. Mboi ro universitas, sifarkor bo soḇe kokyar faro Allah ḇa yo bisa kosmai kankenem ḇepyum syadi. Yamsor fafaya ḇa. Paik ri suru mura, yamewer fa yafarkor wer ro universitas ani ma yun snemuk fa yabuk oras nabor syadi wer fa yafanam faro Yahwe I.

Mnuk ḇesambraḇser kaku aya fa yafadwer kenem ḇekwar yedi iso Amsal 3:5, 6, ”Wakyar faro Yahwe I kuker snembri ḇesiper, ma wakyar awer faro fawawi manggun bena. Ro nyan bena kam, mam pyum faro I, ma nari ifrur nyan-nyan bena fa neaḇyoḇer.” Kofarkor ḇekur Allah ḇesaswar koḇedi ima nun marisen syadiburo nana arasai ḇaido fararur yena ḇe doktor. Yafarkor fa yafawi nabor syadi rosai Yahwe marisen Ḇyena faro supswan ine ma rosai ḇefnai fa Yesus imarwarek ko, nane nadif syadi aya fa yabuk kenem yena fa yafarmyan ḇe Manḇefrur ayedi. Yaḇebaptis ro paik April 2003. Ramnai, fawawas yasewar fa yakenem syadadi ḇa.

BARAKAS YASMAINA:

Ḇaḇebati yedi kuker Yahwe ima syowi beba kaku diri. Ine nafrur fa sne yedi iknon ma yamarisen kaku snar yamamḇir pyum I. Yaḇebati fanam kuker Yahwe kawasa Ḇyesi kako nafrur fa yasmai raryaḇ beba kaku.

Marisen yena fa yafawi roi nabor wer yasmai na ro farkarkor Refo ma fananjur Kristen. Yamarisen yafawar roi yakyar ya faro snonggaku ḇesesya. Ine fararur ḇepyum syadi yenairi kukro bisa yafnoḇek kako snonggaku ḇese fa sikenem pyum ro kirine, ma sismai saneraro fa sikenem ro dunya babo. Ro paik Juni 2008, yafarmyan ro oras nakam ma ine nun marasrisen ḇeba kaku ḇe aya. Yasmai kankenem ḇekaku ya kwar, iso ḇefnai fa yakofen kasumasa nabor naba kaku ḇe Allah Yahwe I.

• ḆYEḆEAḆEN RO: 1973

• SUP RYAMA YA: AUSTRIA

• FARFYAR ḆYEJA: IFNAK JUDI

KENEM AYEDI RO RANDAKYA:

Yaḇa ro Braunau, kota kasun ro Austria. Moḇ ya napyan fa sisewar fararur ma roi ḇeḇye ḇa na nabor manggun ḇa. Kina yesi sima Katolik siri ma yaḇa ro agama ine.

Roi ḇejadi fafisu yaḇaḇa ya nawyae kaku kenem ayedi. Ro taun 1984, fyor yaḇeumur taun ri 11, yafnak bola kuker bati yedi. Arkok ya, imar snar oto ifrarpum i. Yaḇesnesno kaku fafisu bati yedi imar. Taun ḇe taun nenande mura, yafakfuken kaker snonggaku ḇemar sya moḇsa sḇerai.

Yamnai ro rumfarkor mura, yafararur ḇe tukang listrik. Yafnak judi ma yabuk kumpan yena nabor kaku, mboi pipi yena naisya kaker. Aya kako yabuk oras yena nabor faro olahraga ma yamarisen kaku musik heavy metal ma punk rock. Yara ḇe diskotik ma yaso festa ker. Kenem yedi ḇyeknam ro marasrisen ma kenem ḇeḇye ḇa na, fama yasmai sneprei oḇa.

RARISO REFOYA FYADWER KENEM YEDI:

Ro taun 1995, Saksi Yahwe ḇesinan kwar oso nyuk kedwa yedi ma byuk syap ḇeknam ro Refo ḇekarem fakfuken, Snonggaku ḇemar kwar sya moḇsa sḇe rai? Ḇati yedi marmar ḇyedi nafrur fa yakmom kaker, inja yamarisen yun syap anya. Yawasya monda ḇa fasal ḇekur snonggaku ḇemar sya, ḇape syap anya ḇesiper!

Rosai yawasya na kyarem fakfuken yedi ḇekur marmar ya. Ḇape, yamarisen yafarkor nabor syadi wer. Snar yaḇa ro agama Katolik, yakyar monda faro Yesus i. Imbape, snar yamyaren yafarkor Refo nafnoḇek aya fa yafanam syadi kuker Yesus Kmari, Allah Yahwe I. Yakandor kaku kukro yafawi Yahwe ima Allah ḇesawarwar ma imarisen snonggaku sya sifawi I, inja fyasnaiḇair manggundi faro snonggaku ḇesewar I sya. (Matius 7:​7-​11) Yahwe ima dakḇaḇir roi koḇaḇir na. Ma, roi ikofen na nari ifrur rarirya. Ine nafrur fa yamarisen fa yafarkor ḇardadi ro Refo ma yasewar fa yafawi ndarirya kwar ke roḇa. Roi yasrow na nafrur fa kakyar yedi faro Allah syambraḇ syadi.

Yafawi kaku Saksi-Saksi Yahwe si monda ḇemarisen ḇefnoḇek snonggaku sya fa sifawi kaku Refo ya. Yamam mnuk-mnuk ḇero Saksi sya syap sena mura yabas mnuk anya ro Refo Katolik yedi. Yamam kaku na ido, yakyar syadi yasrow kakaku ya kwar.

Snar yafarkor Refo, yafawi Yahwe imarisen yakenem imnis wos farkin Ḇyena ro Refo ya. Ro rosai yawasya ro Efesus 4:22-24, yafawi kaku, fandun fa yasawen ”kankenem ḇekwar ḇepon” ayena, ma fandun fa yakenem ”babo, imnis raris Allah ifrur kwar ma marisen ḇyedi”. Inja, yaḇur kenem ḇeḇye ḇa yena kam. Yafawi fandun fa yamnai fa yafnak judi, snar kenem ḇeradirya nafrur fa snonggaku sya sisewar untung faro manggunsi bardi ma san fambram. (1 Korintus 6:​9, 10) Yafawi snar yafrur kwar fararwei anna kwar, fandun fa yamnai yaḇebati kuker bati ḇekwar yesya ma yasewar bati ḇebabo sya ḇeso mnis wos farkankin ro Refo ya kako.

Yafrur fararwei anna ima roi ḇepyan risyaḇa. Imbape, yasewar fa yaso fananjur ari ro Saksi-Saksi Yahwe ro Balai Kerajaan ma rodiwa yasrow bati ḇebabo ro sidang ani. Aya kako yasewar fa yafawi Refo ya ro manggundaya. Roi nane kam nafnoḇek aya fa yafadwer musik yarower na ma roi imḇe yasewar ro kenem yena, ma yasansun pyum aya ma moḇ yasnai rai. Ro taun 1995, yaḇe baptis ḇe Saksi Yahwe oso.

BARAKAS YASMAINA:

Kirine yana mamam ḇemnis ḇekur pipi ma nana arasai na. Randak ya yamasasor fasawsaw, ḇape kirine yafrur rarirya wer ḇa. Aya kako yamgak syadi wer ḇa faro ras ḇarpon iyama.

Yamarisen kaku yaksun ro organisasi ḇefarmyan faro Yahwe ro supswan ḇesiper ine. Sima snonggaku ḇesmai samswen ro kenem sena mboi sfarmyan souser pdef faro Yahwe. Kirine yasmai aski kaku snar yabuk oras ma samambraḇ yena werḇa fa yasewar marisen ro manggundaya, ḇape fa yasyom ḇe Yahwe ma yafrur roi ḇepyum faro snonggaku ḇesesya.

• ḆYEḆEAḆEN RO: 1963

• SUP RYAMA YA: INGGRIS

• FARFYAR ḆYEJA: FYAFKO KWAR FARO KENEM ḆYEDI

KENEM AYEDI RO RANDAKYA:

Yaḇeaḇen ro Inggris, boi fafisu yaḇe umur taun ri fik ido, nggoḇur ḇe Australia. Nggoḇarek ro Gold Coast, moḇ wisata oso ro Queensland, Australia. Nggoma nggona nabor syadi ḇa raryano, roi nggofandun na nasya rarya pdef.

Yaba kuker payamyum, fama yaḇeaski ḇaḇeri. Mura yafafko kuker kenem yedi. Kamami ima fyarandinem swan ya. Imser ido myun ker Awini nafrur fa yamarisen i ḇa. Ḇarpur ya insape yafawi roi ismai rofyor ḇye sordade ro Malaya anya ḇefnai fa ifrur radiri.

Yafarandinem kwar rofyor yaro SMA. Rofyor yaḇeumur taun ri 16, yasae ro rumfarkor ma yakso ro angkatan laut. Yakan narkoba ma yasyor tabaku. Ras ḇe ras yasewar fa yinem swan ya monda. Randak ya yinem ro minggu pupes monda, ḇape mura ido yinem ro ras nakame.

Fanam ḇe umur 20, yafakfuken kuker Allah I, ima isya ke roḇa. Kakara yena, ’Allah isya ido, rosai ḇefnai fa myam monda ḇo snonggaku sya sekandera ma simar?’ Ma yafas puisi ḇeser wos ḇebuk sasar ḇe Allah snaro ḇaḇeḇarḇor ḇero dunya ine.

Yasae ro angkatan laut fyor yaḇeumur taun di 23. Yaḇensewar fa yafararur sarirya monda, ma yara ḇe sup bondi kako taun oser, boi swaruser yena nawayan kaker. Yamewer kwar fa yakara cita-cita yena ḇaido roi yamarisen na. Royo ḇaḇeri ḇeyun doryaḇ faro aya. Kakara fa yana rum, fararur ḇepyum, ma yakna nasan ḇepyum rya nakame nun roi oḇa kwar. Roi ḇeyun doryaḇ faro aya iso aninem swan ma yarower songger na.

Yaswarepen ras risai yamarisen fa yafawi rosai imbe yasewar ro kenem ine. Fyor ya yaro Polandia, yaraḇe kamp konsentrasi Auschwitz. Yawasya ḇaḇeḇarḇor sifrur rodiwa kwar. Imbape, fyor yores ma yamam baba ro kamp ani, sneri ikmom kaku. Yakara ḇaḇeri rosai ḇefnai fa snonggaku sya sifrur ḇeḇye ḇa kaku faro snonggaku eḇesesya. Yambran yaryaro kamp ani bo yakanes ma yafuken, ’Sai ḇefnai sifrur radiri?’

RARISO REFOYA FYADWER KENEM YEDI:

Fafisu taun 1993, fyor yakaḇer ro sup ḇondi kwar, yawasya Refo fa yasewar kankarem na. Fyoro ḇa, Saksi Yahwe ri suru sunuk kedwa ya ma suyor aya fa yakso ro kebaktian sifrur ro stadion ḇefanam kuker rum yedi. Inja, yun snemuk fa yakrama.

Paik ḇeḇeso ḇepon ya, yamam pertandingan ro stadion ani, ḇape ro kebaktian inema iḇese kaku. Saksi sya sifurpyum ma sisansun pyum si, romawa sesya sifamfnom si ḇa. Ma, rosai yamam fyor anan arkok ya nafrur kanandor kaku. Saksi sya sesyaran sanan kayam ro lapangan, boi fyor skaḇer ḇe moḇ skain ya wer ido, papus oser ḇaḇeri ḇeḇarek ro lapangan ani! Ḇefandun syadi iso, siryaḇ ma seaski kaku​—roi yamarisen kaku fa yakḇaḇir na. Yaswarepen faya oso ḇaḇeri ro ras ani, ḇape roi Saksi sya sifrur na nun sneprei kaku ḇe aya.

Roḇ ya, yaswarepen snar napirman yedi imarisen iwasya Refo ma fyarkor agama oser monda ḇa. Taun ḇepon ya, ikofen ḇe aya wos Yesus ikofen na snaro nari komamḇir agama ḇekaku na ro bon ḇyena. (Matius 7:15-20) Yakara fandun fa yasewar fa yafawi rosai ḇefnai fa Saksi-Saksi Yahwe sya siḇeseri. Ine iso randak kaku ro kenem yedine, yaḇaḇir yana saneraro ma yakara roi ḇepyum monda faro kenem ine.

Minggu ḇepurya, Saksi risuru suyor aya fa yakso wer kebaktian. Suyor fa yafarkor Refo, ma yamarisen. Ma yakraḇe fananjur Kristen kuker si.

Rofyor yafarkor Refo ya, fawas ido mamam yedi kuker Allah nfadwer kaku. Yafarkor snar iso ḇeḇewar fa mamamun ma kandera na ḇa mboi sneri iduf kaku fyor myam sifrur roi ḇeḇye ḇa na. (Kejadian 6:6; Mazmur 78:40, 41) Yaḇensewar kaku fa yafrur duf Yahwe sne ḇyeja ḇa. Yamarisen fa yafrur sneri imarisen. (Amsal 27:11) Yamnai fa yafarandinem ma yakun taḇaku wer ḇa, ma kako yakenem famfnom wer ḇa. Ro Maret 1994, yakḇebaptis ḇe Saksi Yahwe.

BARAKAS YASMAINA:

Yamarisen ma yaḇeaski kaku. Aninem swan ḇye nyan fa yaḇuro samswem yena wer ḇa. Imboi, yafarkor insama yasawen samswem yena faro Yahwe I.​—Mazmur 55:22.

Yafarḇuk kuker Saksi ḇedoser oso snoriso Karen taun ri samfur kwar, ma yana inai pari ḇefurpyum ḇenir ḇe Nella. Nggomarisen nggobuk oras naḇor faro fararmyan Kristen. Nggofnoḇek snonggaku sya fa sfarkor kakaku ḇekur Allah. Kirine yafawi rosai imbe yafrur ro kenem yedi.