Fyor yaba ḇa ya, yamarisen kaku faro roi yamam ro dunya ine. Kina yesi nggombran farma ker ḇe sup yado ma danosen ḇepduk ḇefanam kota nggoḇarek ro ya, Jyväskylä, ro Finlandia Faduri. Yamarisen kako faro aiwan sya. Fafisu anya, yamam makei ma pus ido yaḇe yaforepen ker si. Fyor yaba muryas, yamewer kaku yamam snonggaku sya sewayam aiwan sya. Inja yaksun ro raryur oso sor ḇe pembela hak binatang ma yasrow kuker snonggaku ḇeswar aiwan ḇemnis ra aya.

Nggomyaren nggokofenḇair aiwan sya hak sena. Nggorwas anun ma nggofrur demo fa nggopampum ḇeḇow sansun sifrur roi aiwan kif ma sḇe aiwan sya fa setes pan fa smam. Nggofrur organisasi fa nggokadaunwarek aiwan sya kako. Nggofrur roi nane kuker rarmomen ker, inja sun ker inggo ḇe ḇeyuf papoik sya. Sfor aya rarwan riḇeso kwar ma sun aya ḇe kankain karkara.

Oso wer ido, yamewer yamam samswen ḇebor ḇese ro dunya ine na. Inja, yakso kako organisasi ḇeḇeso raris Amnesty International ma Greenpeace. Yabuk samambraḇ yena kam fa yasaramper fararur sena. Yasewar fa yasaramper snonggaku ḇena roi oḇa sya, ḇebiser, ma roi sismai na nasrow kuf ḇa.

Fama, fawawas mura yafawi na yapok fa yafadwer dunya ine ḇa. Organisasi anna kam naksaramper samswen ḇekasun na kwar, mboi samswen ḇeba na naḇye ḇa syadi wer. Yakara rya papoik ḇeḇarḇor isya ḇeyufepen dunya ine ḇesiper ma snonggaku oso fyandun faro roi ine ḇaḇeri. Yapok ḇa kwar.

Yaḇesneso kukro yaḇaḇir jadi fa yafrur roi oḇa kwar. Inja, yakara mura ḇe Manseren Allah ma Wos Refo ya. Randak iwara, yakfarkor Refo kuker Saksi Yahwe sya kwar. Yaḇesyowi Saksi sya frur pyum ma sawarwar sfasnai ḇe aya na, mboi fafisu anya samswen kaker fa yafadwer kenem yena. Imbape kirinema iḇese.

Yun Refo, yawasya na ma yasmai sneprei kaku. Yamam ro Refo mnuk naisya nabor ḇekofenḇair fandun fa kofrur pyum aiwan sya. Imnis raris, Amsal 12:10 ikofen snar ”snonggaku ḇenapes nari myam pyum kenem ro rofanfan ḇyedi”. (Terjemahan Baru) Yafarkor kako Allah iso ḇefnai samswen ro dunya ine ḇa. Samswen ḇekur ko nane naḇye ḇa syadi wer kukro snonggaku sya simewer sisouser faro Allah. Yamarisen kaku fyor yafawi Allah Yahwe ima isawarwar ma iwaf kaker.​—Mazmur 103:​8-​14.

Ḇarpur ya, yasmai kupon fa yor syap Apa yang Sebenarnya Alkitab Ajarkan? ma yafarem na. Fyoro ḇa mura, Saksi ri suru surama sufasnai farkarkor Refo ḇe aya. Yamarisen yakfarkor Refo. Yakso kako fananjur ari ro Balai Kerajaan. Rarirya, kakaku ro Refo nsun kaku ro sanerine. Yakofen kasumasa kaku kukro fawawi yasmai ro Refo fyadwer kenem yena kwar. Yasyor tabaku ma yafarandinem wer ḇa. Yasewar fa yafadwer moḇ yasnai raya ma wos ayena napyum syadi. Yaḇesyowi kako ḇeyuf papoik sya. (Roma 13:1) Kirine yabur kenem ḇeḇye ḇa yena kwar.

Samswen ḇeba yasmai ya iso yafadwer nyan yamam organisasi yaso ro randak kwar anna. Yafrur fararwei ine ro ras oser monda ḇa. Randak ya, yakara yasae ido, yanggar si kwar. Imbape ḇarpur mura, yakyar Karajan Allah iso monda nari ḇebuk saneraro ḇekaku faro dunya ine. Inja, yasewar kaku yabuk samambraḇ yena kam fa yasaramper Karajan ani ma yasaramper snonggaku sya fa sakfawi na.​—Matius 6:​33.

Fyor iwara, yamam snonggaku sya ro nyan ri suru isoine snonggaku ḇepyum ḇaido snonggaku ḇeḇarḇor. Ma yapampum kaku snonggaku ḇeḇarḇor sya. Fyor yafarkor Refo kwar, yayin snonggaku ḇese wer ḇa. Imbape yasewar fa yafasnai saswar Kristen ḇe snonggaku syakam. (Matius 5:​44) Nyan oso yafasnai saswar ine iso yara yakofenḇair angginem ḇepyum Karajan Allah. Yamarisen kukro fararur ḇesren ine naser payamyum, aski, ma byuk saneraro ḇekaku ḇe snonggaku ḇebor sya.

Snar yakyar nari Yahwe iso ḇefrur roi nakam fa namnis, inja yasmai kananon. Yakyar kaku Manḇedaw koḇedine na myam monda aiwan sya ḇa ma snonggaku sya na sifrur pyum si isof fyoro-fyoro, ḇaido na myam monda snonggaku sya skakok supswan ine ḇa. Kero wer, nari ifrur roi nakam fa napyum kaḇer roro Karajan Ḇyedi. (Yesaya 11:​1-9) Yasmai marasrisen ḇeba kaku kukro yafawi kakaku monda ḇa, mboi snar bisa yasaramper snonggaku ḇesesya fa sikyare. Inja yakara fa yafadwer dunya ine wer ḇa.