Cody: Naek o, yamarisen yasrow au wer. Yamarisen kukro bisa kukain kuyawos Wos Refo ya ro minggu nakam. * Kuyawos boi wapyum monda ke?

Jon: Imbo yapyum monda, kasumasa.

Cody: Bo ipyum naek. Ras aniyafa, kuyawos roi ḇefrur fa Saksi Yahwe sikyar Karajan Allah irandak fa ḇyepoik ro taun 1914. * Raris kuyawos kwar, roi ḇepon kaku ḇefrur fa sikyar roi ine, naisya ro ḇardadi ḇero Refo ro syap Daniel fasal eḇe 4 ya. Waswarepen kaker na ke?

Jon: Raja Nebukhadnezar mafu ḇyeja ḇekur ai knam ḇeba kaku anya ke?

Cody: Irya ḇeri. Ro mafu anya, Raja Nebukhadnezar myam ai knam oso iba ma ikaki raryas ro farsyos iyaswa. Ryower malaikat oso iwan fa skar ai knam ani, mboi knam ma rares ḇyena sḇe na fa nḇarek. ”Swaf fafisu ri fik” nawas mura, ai knam ani isur wer. * Kuyawos kwar roi ḇefnai fa ḇardadi anya ndarirya rarwan ri suru. Naek waswarepen kaker ḇardadi ḇerandak ya kyur ḇe?

Jon: Kyur ḇe Raja Nebukhadnezar manggundi, syawo isof ro swaf taun ri fik in?

Cody: Kaku ḇeri. Nebukhadnezar swaruser ḇyena namnis ḇa ro swaf ono, inja ḇyepoik wer ḇa. Ḇape, ḇardadi ani kyur kako ḇe roi ḇese ḇefandun syadi isoine ḇaḇepapoik ro Allah nari dakmnai ro swaf fafisu ri fik. Kofawi kwar swaf fafisu ri fik anya irandak ro taun 607 MḆ rofyor simkok mnu Yerusalem. Ro taun anya, raja-raja ḇero supswan ine ḇefaker faro Manseren Yahwe fa sḇepoik kawasa Ḇyesya, sisya ḇa kwar. Ḇape ro papupes swaf fafisu ri fik anya, Allah nari ikanow Manḇepoik ḇebabo oso faro kawasa Ḇyesya. Inja, rofyor swaf fafisu ri fik anya imnai, Karajan Allah irandak fa ḇyepoik ro nanggi. Kofawi kawanwan ro swaf fafisu ri fik anya ido, na insape kofawi ras risai Karajan Allah irandak fa ḇyepoik ya. Inja isof ro dine, bisa wafawi na ke?

Jon: Imbo, insape yaswarepen syadi na wer.

Cody: Inja, rwama kuyawos fa kufawi syadi, swaf fafisu ri fik anya kawanwan ya ḇyefis. Yawasya ḇepon roi anine kwar insama yaswarepen knam ḇyena. Inja imbe yafasnai na ḇe au.

Jon: Iryaido.

Cody: Ḇardadi anya ndarirya ro Nebukhadnezar ido, swaf fafisu ri fik anya kyur kaku ḇe taun ri fik monda. Ḇape, rofyor ḇardadi anya ḇyefasfes kuker roi ḇefandun syadi isoine Allah Karajan Ḇyedi ido, swaf fafisu ri fik anya kyur ḇe swaf taun ri fik monda ḇa boi kyur faro swaf ḇekwan syadi.

Jon: Rarirya ke?

Cody: Imbo. Kofawi kwar swaf fafisu ri fik anya irandak rofyor skakok mnu Yerusalem ro taun 607 MḆ. Kokor ro taun ani ḇe taun ri fik ḇe ḇarpon ido, na isapi ro taun 600 MḆ. Ḇape ro taun ine, sarisa ḇefandun ḇefasfes kuker Allah pamarenta Ḇyedi naisya ḇa. Oso wer ido, raris kuyawos kwar anya, taun utin nawas mura, fafisu Yesus ryama ḇe supswan ine, isya dakkofenḇair bo doḇe swaf fafisu ri fik anya imnai ḇaime.

Jon: Yo iri. Yaswarepen kaker.

Cody: Inja, swaf fafisu ri fik kyur kaku ḇe taun ri fik monda ḇa, mboi swaf ḇekwan syadi.

Jon: Oh, inja kawanwan ya ḇyefis?

Cody: Roi sfas ro syap Fasasna, ḇaido syap Wahyu, nya fasfes kuker syap Daniel. Inja, syap ani na ifnoḇek ko fa kofawi kawanwan ro swaf fafisu ri fik anya. Ro dia, doḇe fafisu ri kyor munya kawanwan ya iso ras ri 1.260. * Inja kokor na rarwan ri suru ido, na kosrow swaf fafisu ri fik, ḇaido ras ri 2.520. Moḇsa kwara rai?

Jon: Imbo nasnai kwar. Ḇape yafawi mnis ḇaim moḇsa ine kyur kako ḇe Karajan Allah irandak fa ḇyepoik ro taun 1914 anya.

Cody: Kwara roi ine pan. Ḇardadi ro Refo ono sap ras oser kyur ḇe taun oser. * Kokor ras oser faro taun oser ido, na swaf fafisu ri fik imnis kuker taun ri 2.520. Kokor swaf taun ri 2.520 ro taun 607 MḆ ḇe ḇarpon ido, na isapi ro taun 1914. Inja iso ḇefnai fa koḇe taun 1914 ima papupes ro swaf fafisu ri fik ma Yesus irandak fa ḇyepoik ḇe Raja ro Allah Karajan Ḇyedi. Ḇefandun syadi wer, ro taun 1914 ḇe bo, komam sarisa ḇeba ḇejadi ro dunya ine, namnis kuker ḇardadi ro Refo ḇekur ḇe ras-ras ḇepupes na.

Jon: Sarisa sairiri?

Cody: Kumam ro Matius 24:7 ya. Ro mnuk anine, rofyor Yesus ikofen ḇekur swaf nari irandak fa ḇyepoik ro nanggi, doḇe, ”Er nari sikḇawes sisampum er ḇese, ma ḇaḇesasoser sisampum ḇaḇesasoser ḇese na. Nari basbiser isya ma rim ḇeba nmun ro moḇ nabor.” Inja, Yesus dap ḇepon kwar ro fafisu ya nari basbiser ma tatawai naisya. Ro fafisu naiwara isof baboine, komam samswen ḇeradine nejadi kwar ḇae.

Jon: Imbo in.

Cody: Ro mnuk ine, Yesus ikofen ḇepon kwar bo doḇe rofyor ḇye Raja ro Allah Karajan Ḇyedi, nari mamun na naisya. Syap Fasasna ikofen ḇepon mamun na nari nejadi ro moḇ oser monda ḇa, mboi nari nejadi ro supswan ine ḇesiper ro awar ḇepupes ya. * Naek waswarepen kaker fafisu risai mamun dunya oser ḇyejadi ya?

Jon: Taun 1914 ya. Kaku in, raris naek wakofen insanja, ine iso taun Yesus irandak fa ḇyepoik! Yakara ḇaḇeri sarisa ansuine suna fasfes.

Cody: Komam sarisa nakam ido, ḇardadi ḇekur swaf fafisu ri fik ma ḇardadi ḇese ro Refo ḇekur ras-ras ḇepupes, nakam namnis kaku. Inja, Saksi-Saksi Yahwe sikyar Yesus irandak fa ḇyepoik ḇe Raja ro Allah Karajan Ḇyedi ro taun 1914 ma kosun ro ras-ras ḇepupes ro taun ani kako. *

Jon: Sye, rya yafandun swaf nabor syadi fa yakfawi pyum farkarkor ine.

Cody: Imbo sasar oḇa. Randak iwara, ayano rupa iri. Rarirya mboi, yamarisen roi kuyawos nane nafnoḇek au fa wafawi snar taun 1914 ima sap na ro Refo ya ḇa, imboi roi Saksi-Saksi Yahwe sikyar nane neknam ro Refo nairya.

Jon: Yo, naiso ḇewar fa ayama yamanen kaku mgo. Roi mgokofen nakam ndramuma ro manggun kakara mgoḇena ḇa boi ro Wos Refo ya. Ḇape yakara samswen roi ine kaker. Rosai ḇefnai fa Manseren Allah dapḇair ḇeri Yesus na irandak fa ḇyepoik ḇe Raja ro nanggi ro taun 1914 anya fa nasnai ḇaboi.

Cody: Irya wer in. Kaku ḇa bo, roi nabor ro Refo naisya sikofenḇair mnis na ḇa. Inja, snonggaku koya fandun fa kosewar kaku insama kofawi pyum na. Rosai ḇefnai fa Manseren Allah iwan fa sfas Refo ya kuker nyan ḇeradine? Ras ḇese insape kuyawos na in. Rariso?

Jon: Imbo, yamarisen.