Yaba ro moḇ snonggaku ḇesabarar sisya ro ya ḇero kota Montreal. Kamam yedi imar fafisu yaḇeumur taun ri wonem. Fafisu ani Awin iso ḇefaduru kina nggobedi. Nggoḇe mambekanaek ri war ma aya iso ḇekasun ya.

Fafisu yaba muryase, yan narkoba, yafnak judi, yapakpik, ma yamamunmun. Imnis ra, fafisu yaḇe umur taun ri samfur yafararur faro bin ḇefrur fararur farḇuk famfnom sya ma ḇebuk nyaki sya. Yanggarkar ker snonggaku sya ma fyor sikyar aya ido yamarisen. Inja, samswen fa yamnai yanggarkar ri.

Fyor yaḇe umur 14, yafawi nyan nabor fa yafrowes snonggaku sya. Imnis ra yakoḇes jam tangan nabor, gelang, ma cincin ḇeḇepom kuker brawen. Ramnai yafas brawen 14 karat ro roeḇor annakam. Mura yabow na wer ro nyan andire ḇaido ro moḇ srir oto na ro toko ḇeba na. Yamarisen snar napyan fa yasmai pipi. Fyorno ido, yasmai pipi dolar AS ri 10.000 ḇaido kokor ido rupiah ri 140.000.000 ro ras oser monda!

Yafarkor ro rumfarkor sifrur faro romawa ḇefrur roi ḇeḇye ḇa sya, mboi sisasyar aya fyor yaḇe umur 15. Yana rum fa yaḇarek ro ya ḇa. Inja yenef ro sampak na, ro taman, ḇaido ro bati yesi rum sena.

Polisi sfor ker aya snar yanggar snonggaku sya. Ḇape sisun aya ḇe bui ḇa snar roebor yaḇow na nama roi yakaraw naisya ḇa. Imbape, fandun fa yabuk ḇaḇyak ḇeba snar yanggarkar, yafrur roebor ḇekaku ḇa na, ma yaḇow fasis roeḇor na. Yafararur ḇe ḇeyor nyaki snar yamakakak faro manseirirya ḇa kako. Fararur ine bisa nafnai fa smun aya, inja yun senjata. Aya kako yafararur kayam fnoḇek snonggaku ḇemamun sya.

Fyor yaḇeumur taun ri 17 insape yawasya randak Refo ya. Fafisu ani, yaḇarekus bin yedi, insape fyarkor Refo kuker Saksi-Saksi Yahwe. Ḇape, yamarisen faro roi Refo dor fa kofrur ro kenem koḇena ḇa. Inja yabur bin yedi, ma yaḇarekus bin ḇese ya wer.

Roi ḇefrur fa yafadwer kenem yedi iso bin yedine kako dakfarkor kuker Saksi Yahwe sya! Ifrur fararwei ro kenem ḇyedi, ma yamanen i snar imyaren asuser ma ḇyekaḇaḇaḇ. Mura, yara fa yaso fananjur ari ro Balai Kerajaan Saksi-Saksi Yahwe. Snonggaku ḇero diansya sisaser pyum aya, sifrur pyum, ma sfasnai syowi. Siḇese kaku kuker snonggaku yamamḇir sya! Yaḇaḇir kina yedi sisawen aya kwar, fyor yaḇaba ya siswar ma sifurpyum aya ḇa. Inja, sawarwar Saksi sya sfasnai na naiso roi yafandun kaku nairi. Fyor sor aya fa yafarkor Refo, yamarisen ḇeri.

Roi yafarkor ro Refo nun ḇaḇye kaku ḇe aya. Yakara kwar fa yaso bati yesu fa nggokarawraw. Pipi nggosmai na nari yabukiḇak nyaki yedi ro fafnak judi barborya dolar AS ri 50.000 ḇaido rupiah ri 700.000.000. Ipyum ya, yaso su fa nggokarawraw ḇa! Sufrur pdef aw subena ma ine nafnai ra bati yedi oso sfor i ma sumin ya smun i fa imar.

Snar yafarkor Refo ya pdef, yafawi fandun fa yafrur fararwei nabore. Imnis raris 1 Korintus 6:10 ikofen, ”Mankarawraw, ḇeyanfarmbram ma ḇemasaser, snonkaku ḇeyonef min sesi, ma ḇeyankarkar snonkaku ḇese snonkaku ḇeradinesya kam nari sakḇe kina ro Allah kawasa ḇyesiḇa.” Fyor yawasya mnuk ine, yakanes snar yafawi yafrur sasar ḇeba kwar. Yafawi fandun fa yafrur fararwei ḇeri. (Roma 12:2) Ro kenem yedine, ayama snonggaku ḇemasasor ma ḇeanggarkar ker.

Yafarkor kako ro Refo, Yahwe Ima ifrur pyum ma imarisen byuk ampun. (Yesaya 1:​18) Yaḇenadi ker fa yor fafnoḇek ro Yahwe insa yabur kenem ḇekwar yena. Kuker fafnoḇek ro Yahwe, fawas mura yafadwer kenem yedi. Roi ḇepon yafrur ya iso aya ma bin yedi nufasepen farḇakḇuk nuḇedi.

Yafarḇuk kwar ma yana romawa ri kyor fyor yaḇe umur taun ri 24. Kirine fandun fa yasewar fararur ḇepyum. Yafarkor mnis ḇa inja samswen fa yasmai fararur ma yamamḇir snonggaku oso ḇa fa ifnoḇek aya insama yasmai fararur. Inja yaḇenadi kuker kakaku faro Yahwe I wer, mura yasewar fararur. Fyor sewawancara aya, yafawar snar yamarisen yafrur fararwei ma yamewer yanggarkar ro fararur yena. Ono ido yakofen yafarkor Refo ma yamarisen yaḇe snonggaku ḇefrur pyum. Ḇeyuf fararur ḇebor simarisen faro aya ḇa. Inja, rofyor sewawancara aya wer yafawar kenem ḇekwar yedi ḇe ḇeyuf fararur ine. Ḇeyuf fararur ani ikofen, ”Yafawi ḇa mboi, yamarisen wafararur ro dine.” Yakyar ine iso kankarem ro nadi yena. Ḇarpur mura aya ma swa yedi nuḇebaptis ḇe Saksi Yahwe.

Yakenem kaker snar yafrur rosai Refo ikofen ya ma iso nyan kenem yedi. Yana kina ḇeaski, sneuser ḇesren snar yakyar Yahwe ipyos sasar yena kwar.

Taun ri 14 kwar yafarmyan ro oras nakam fa yafnoḇek snonggaku sya fa sfarkor Refo. Ma kirine swa yedi dakfarmyan ro oras nakam. Ro swaf taun ri 30 ḇarpur ine, yafnoḇek kwar bati yedi ri 22 ro moḇ yafararur ya fa saksyom ḇe Yahwe I. Yara kaker ḇe toko beba na, ḇape imbe yanggar snonggaku sya ḇa, mboi yaḇaryas angganginem ḇeḇye ḇe snonggaku sya. Imbe yakofen ḇe si saneraro fa kokenem ro supswan nari snonggaku ḇeanggarkar sisya wer ḇa.​—Mazmur 37:10,11