Inai kasun oso myam pawe nek ro pipa bero pabrik ma iba raris mandep ya. Doḇerada pabrik ya iso ḇefrur mandep ani. Inai kasun ine kyara sasar, ḇape inema roi kasun monda ma nafrur kamambrif ḇeko. Imbape, kakara ḇesasar ḇeba ido nari nun samswen ḇe kankenem koḇena. Imnis raris, kowasya sasar fasfas ro botol obat ido nari nun roi ḇepyum ḇa ḇeko.

Kakara ḇesasar ro rurya na nun samswen ḇeba syadiwer. Imnis raris, snonkaku ḇeḇeso skara sasar Yesus farkarkor ḇyena. (Yohanes 6:48-68) Simewer sfarkor naborwer, mboi spampum Yesus farkarkor ḇyena kam. Faḇye kaku!

Ausya wawasya Refo fa swewar farkankin rona ke? Ima ipyum kaku. Ḇape wasasor Au ḇa ido nari kwara sasar rosai wawasya kwar anna. Ine iso ḇekur snonkaku ḇebor sya. Kwarapan fawar rikyor kuker roi ine.

• Snonkaku ḇeḇeso skara sasar faro parenta ro Refo ḇekofen radine, ”wamkak faro Allah ḇekaku”. Soḇerada inema makakak ḇefrur radadai faro Allah I. (Pengkhotbah 12:13) Ḇape Allah imewer koḇaḇir radirya. Doḇe, ”Wamkak awer, snaro yarous au. Mam mura-muma awer, snaro aya iso Allah bedi. Nari yayarwarek au. Nari yafnoḇek kaku au.” (Yesaya 41:10) Makakak faro Allah inema kyurfasna komanen ma koḇesyowi kaku I.

• Snonkaku riḇeso skara sasar wos ine, ”Faro roi nakam oras ḇeḇeyap kwar isya, . . . oras faro ḇaḇeaḇen ma oras faro marmar.” Soḇerada Allah dap kaku kwar fafisu risai nari snonkaku sya simar. (Pengkhotbah 3:1, 2) Imbape, wos ine dawosḇair marandan ro kankenem ma fyas snar marmar ima roi nari ḇekur ko. Refo fyarkor kako snar snemuk risai kunna nari nawyaye umur koḇena. Imnis ra kowasya, ”Makak faro Yahwe nari nafrur rasras kankenem ya nakwan”. (Amsal 10:27; Mazmur 90:10; Yesaya 55:3) Raris, koḇesyowi Allah Wos Ḇyena ido nari nadif ko fa kopampum fararur ḇeḇyeḇa raris masarser ma farḇakḇuk famfnom ya.—1 Korintus 6:9, 10.

• Sino sisya sikyar ḇeri rofyor siwasya wos ḇero Refo ḇekofen nanki ma supswan ”ḇyeḇefaduru ro for”, ma soḇerada nari Allah kyakokpres supswan ine. (2 Petrus 3:7) Ḇape, Allah ḇyeasas nari ipok myam monda supswan ine simkok na. Allah ’ifrur kwar supswan ro araref ḇyena; nari ipok ikrenbur moḇ yaḇa isof fyoro-fyoro’. (Mazmur 104:5; Yesaya 45:18) Dunya ḇaido snonkaku ḇeḇarḇor sya siso nari ḇepromes isof fyoro-fyoro, imnis srap si kuker for ya, ḇape supswan ine ḇa. Ma nanki, kakaku ro wos ine kyur ḇe farsyos iyaswa, farsyos ḇeba ḇefo kuker mak sya, ḇaido moḇ Allah ḇyarek roro ya. Nanekam neḇekakok ḇa.

Imnis fawar insanja na, snonkaku sya skara sasar mnuk siwasya ro Refoya. Ḇape rosai ḇefnai fa Allah myam monda roi ine ndarirya? Sino sifuken, ’Allah ima nya fawawinanem ma ifawi syadi ido, bisa fa ḇyuk ḇeko syap oser ḇepyan fa kofawi pyum na. Mboi rosai ḇefnai fa ifrur rarirya ḇa?’ Kwarapan roi rikyor ḇefnai fa snonkaku sya skara sasar Refoya.

1. Allah ifrur Refoya fa ḇyuk fawawi faro snonkaku ḇena sne ḇerun ma ḇemarisen ḇefarkor sya. Yesus dawos faro Kmari ”Yakofen kasumasa faro au Mami, Manseren nanki ma  supswan, snar wayokef roi nanebur snonkaku ḇefawi ma beswaruser nananem sya, ḇape fasna na faro [romawa sya, NW].” (Lukas 10:21) Refoya ḇyeḇefas insama snonkaku ḇena kakara ḇenapes sya siso ḇefawi na. Snonkaku ḇena kenem ḇeararer inema rari ro ”snonkaku ḇefawi ma beswaruser nananem sya”, siso ḇekara sasarker Refoya. Ḇape snonkaku ḇewasya Refo raris ”romawa” ḇena sne ḇerun ma ḇemarisen ḇefarkor, siso nari ḇesmai fawawi kuker ananun ro Allah I. Kaku ḇeri, Refo inema Allah ifrurna kuker fawawinanem!

2. Allah ḇyuk Refoya faro snonkaku ḇemarisen ḇesmai farfnoḇek ro I sya fa sfawi na. Yesus fyasnai snar snonkaku sya sfandun farfnoḇek fa sfawi rosai fyarkor na. Rariso sismai farfnoḇek ya rai? Yesus fyasnaiḇair, ”Rur Ḇesren, isoine Rur Ḇeḇuk snepreiya nari Kmaya iwani kuker snonsnon ayedi, iso nari ḇefarkor fa ḇemko.” (Yohanes 14:26) Inja Allah ḇyuk rur ḇesren ya, ḇaido samambraḇ ḇeba Ḇyedi insama nafnoḇek snonkaku sya fa sifawi Refoya. Ḇape, Allah imewer ḇyuk rur ḇesren Ḇyedi faro snonkaku ḇemewer ḇeyor farfnoḇek ro I, inja ine iso ḇefrur fa sfawi mnis Refoya ḇa. Rur ḇesrenya kako idif snonkaku Kristen ḇena fawawi sya fa sifnoḇek snonkaku ḇesewar ma ḇemarisen ḇefawi nabor Refoya.—Farfyar 8:26-35.

3. Snonkaku sya bisa fa sfawi mnuk-mnuk ḇero Refoya ro fafisu Allah dap kwar. Imnis raris, Allah iwan nabi Daniel i fa fyas anun kuker fafisu ḇeramaya. Malaikat oso ikofen ḇe i, ”Daniel, wakram wos nane nḇe kankunes ma ḇematerai syap ine, isof ro awar papupesya.” Ro pasi barek utin ḇe utin, snonkaku sibor siwasya syap Daniel mboi sifawi mnis na ḇa. Kaku ya, Daniel mankundi ifawi mnis roi ḇeḇeso ro rosai fyas na ḇa. Kuker sne ḇerun doḇe, ”Yarower, ḇape yafawi na ḇa.” Ḇarpur mura, snonkaku sya sifawi mnis ḇardadi ani, ḇape ro fafisu Allah dap kwar na. Malaikat ani fyasnai, ”Rwamura, Daniel, snar wos nane neḇekankunes ma neḇematerai isof ro awar papupesya.” Manseiso nari ḇefawi Allah anun Ḇyena ine? ”Snonkaku [ḇeḇarḇor] osoḇaḇeri nari ḇefawi na; imbape snonkaku ḇena fawawi nari siso ḇefawi na.” (Daniel 12:4, 8-10) Inja, nari Allah fyasnaiḇair mnuk-mnuk ḇeḇeso ḇero Refo ro fafisu dap kwar na.

Saksi Yahwe sya kako fafisu oso skara sasar Refoya ke? Imboḇae. Ḇape rofyor Allah fyasnaibos kakara ḇesasar sena, Saksi sya simarisen siso mnis fawawi Allah ḇyukna. Inja, sisofarari Yesus manwawan ḇyesi, ḇefasnai sne ḇerun fa sifrur mnis kakara sena rofyor Yesus isonek si.—Farfyar 1:6, 7.

Inai kasun ḇekara sasar ro moḇ risai mandep ya ryamaya ima kakara ḇesasar kasun monda. Imbape, rosai Refo fyarkorna ima roi ḇeba ḇefandun kaku faro Au. Snar Refo naser anun ḇefandun kaku, inja ipyumya kopok kosewar awer fa kofawi Refoya kuker kowasya na ro mankunko. Rarirya, wor farfnoḇek insama wafawi rosai wawasya na. Swewar fa wasrow kuker snonkaku ḇena sne ḇerun ḇemarisen ḇefarkor Refo sya. Siso snonkaku ḇeyor farfnoḇek ro Allah isoine rur ḇesren Ḇyedi fa sna fawawi ro Refoya, ma ḇekyar kaku snar kokenem ro fafisu Allah dap kwar fa ḇyuk fawawi ḇesnai kaku faro ko. Wamkak awer fa wawos kuker Saksi-Saksi Yahwe sya ḇaido wawasya situs Web sena ro jw.org. Refo ḇyeasas, ”Rofyor wor fa wasmai fawawi . . . , nari wasmai fawawi kuker Allah.”—Amsal 2:3-5.