HENOKH ikenem kawan kaku kwar. Imbude samswen ḇeko fa kowasen na, ḇape snon ine ikenem kawan rawo ḇyeumur pasi barek ri 365. Umur ḇyeja nakwan syadi kali rifyak ro umur snonkaku ḇekenem ro baboine! Ḇape ro fafisu ḇyedi, ima ḇye mansarkuf ḇa. Pasi barek ri 5000 ḇepon iwara ro fafisu Henokh ikenem ḇaim, snonkaku sya sikenem kawan syadi. Adam umur ḇyeja pasi barek utin riwonem kwar insape Henokh ḇyeḇeaḇen, ma ikenem ro pasi barek utin rikyor wer! Adam kpu ḇyesi sino sisya sikenem kawan syadi ro i. Inja rofyor Henokh ḇyeumur 365, syambraḇ kaker ma nya swaf ḇekwan kaker ḇe ḇarpon. Ḇape faḇye kaku, ine ndarirya ḇa.

Henokh ismai roi ḇemun ro kankenem ḇyedi. Wawasenpan kada, ifrar iyokefbur snonkaku ḇefafayaf ḇerower Allah ananun Ḇyena ḇerama ro i. Kyandor kaku snar myam ro simkasna simsor fafayaḇa. Sayin i, skoryae rosai ikofenna ma Allah ḇewani ya. Sipok fa smun Henokh Allah ḇyedi, Yahwe I ḇa, ḇape bisa fa smun kaku manwawan ḇyedine! Imbude Henokh kyara nari isrow kaḇer kuker kina ḇyesi werḇa. Inja, na iwasen mura ḇe swari, inai ḇyesi, ḇaido romawa ḇyedi, Metuselah ḇaido kpuri Lamekh sko ke? (Kejadian 5:21, 23, 25) Kenem ḇyedi imnai rodine monda ke?

Refo fyasḇair Henokh farfyar ḇyeja nabor ḇa. Syap rikyor monda ḇefasbair i. (Kejadian 5:21-24; Ibrani 11:5; Yudas 14, 15) Imbape, fasfas nane nafnoḇek ko fa kofawi naborwer kuker snon ḇena kakyar ḇeba kaku ine. Ausya ḇebukor ro kina ke? Ausya nwa samswen fa wamk nako faro roi ḇenapes ya ke? Rarirya ido, na wafarkor nabor farari ro Henokh kakyar ḇyedi.

Ro fafisu Henokh ḇyeḇeaḇen ya, snonkaku sya sifrur ḇarḇor kaku. Ine ndarirya ro fafisu syos ḇeḇefik ro Adam i. Snar snonkaku sya sfanam kaker kankenem ḇenapes ya imnis Adam ma Eva susmaina, inja snonkaku ro fafisuya sikenem kawan kaker. Ḇape, sna kenem ḇeḇyeḇa ma sfanam kuker Allah I ḇa. Snonkaku sya smamunmun. Nyan kenem ḇeradine naisya kwar ro syos ḇeḇesuru ya, rofyor Kain myun ḇedar ḇyedi Habel i. Oser ro Kain kpu ḇyesi ḇye snonkaku ḇeararer. Ima ḇyeḇarḇor ma ikram masasor syadi ro Kain i! Ro syos ḇeḇekyor ya, snonkaku sya sifrur roi ḇeḇarḇor ḇese wer. Sap famfnom Yahwe snonsnon Ḇyedi ma sanonef Allah snonsnon ḇesren Ḇyedine.—Kejadian 4:8, 23-26.

Agama ḇekaku ḇa sisya sibor kwar ro Henokh fafisu ḇyedi. Fyor Henokh iba kwar, fandun fa kyinfir. Inja daksowarpu snonkaku ḇebor ro fafisu ḇyedi ke? Ḇaido syewar Allah ḇekaku, Yahwe I, ḇefrur farsyos ma supswan ine ke? Kaku ya, dun farkarkor ḇepyum ro Habel i, imar snar iḇriwarek ḇaḇesamsyom ḇekaku ḇe Yahwe I. Henokh dun wos ḇemuk fa fyarari Habel i. Kejadian 5:22 doḇe, ”Henokh imbran pdef kuker Allah ḇekaku”.  Wos nane nfasnaiḇair snar Henokh ima snonkaku ḇenapes ro dunya ḇefrur roi ḇenapes ḇa sya. Iso snonkaku ḇerandak Refo dap ḇe snonkaku ḇembran kuker Allah I.

Mnuk-mnuk ro Refo nane nakofenḇadir kako Henokh imbran pdef kuker Yahwe I rofyor daḇen Metuselah i. Inja, kofawi Henokh ḇyebukor ro kina kwar rofyor ḇyeumur 65. Nya binswa oser, sfas snonsnon ḇyedi ro Refoya ḇa. Ma nya romawa snon ma bin kofawi mnis barbor seja ḇa. Kma oso ḇesouser faro Allah ido, nari iso mnis Allah nyan Ḇyena rofyor myamfaduru kina ḇyesi. Henokh ifawi kaku Yahwe dor i fa kyain pdef kuker swari. (Kejadian 2:24) Ma isewar kaku fa fyarkor romawa ḇyesi fa sifawi Allah Yahwe I. Bon rosai ismaina?

Refo ikofenḇair nabor roi ine ḇa. Henokh roma ḇyedi Metuselah i, nya umur ḇekwan syadi mboi imar ro fafisu Faḇruḇ Ḇeba ya, nane kako Refo fyasḇair na ḇa. Metuselah nya romawa ḇenir ḇe Lamekh. Lamekh ikenem kayam kuker kpuri ro swaf pasi barek ri utin oser syadi. Lamekh fyasnai kakyar ḇeba kaku. Yahwe fyarkin i fa ikofenḇair ḇardadi oso ḇekur ḇe Lamekh romawa ḇyedi, Nuh i. Ḇardadi ani ndarirya rofyor Faḇruḇ ya ḇyebejadi kwar. Raris kpuri Henokh i, Nuh i kako snon ḇembran kuker Allah I. Nuh myam Henokh i ḇaime. Ḇape, Henokh ḇyuk waris ḇepyum kaku ḇe i. Imbude Nuh fyarkor kakyar ma soasuser ro kmari Lamekh i, ḇaido ro apus ḇyedi, Metuselah i, ḇaido ro Henokh kmari, Yared i, ḇemar ro fafisu Nuh ḇyeumur 366.—Kejadian 5:25-29; 6:9; 9:1.

Henokh iḇese ro Adam i. Adam, ḇye snonkaku ḇemnis kaku, ḇape ifrur sasar kuker pyampum Yahwe I ma ḇyuk waris ḇe kpu ḇyesi ḇaḇemḇroḇ ma kandera. Henokh, ima snonkaku ḇesasar kwar, ḇape imbran kuker Allah ma ḇyuk waris ḇepyum kaku faro kpu ḇyesi isoine kakyar ya. Adam imar rofyor Henokh ḇyeumur 308. Inja rofyor Adam imar ya, kina ḇyesi sefafardun kaku ke? Kofawi mnisna ḇa. Ḇape kaku ya, Henokh ima ”imbran pdef kuker Allah ḇekaku.”—Kejadian 5:24.

Ausya ḇebukor ro kina ido, kwarapan rosai na wafarkor ro Henokh kakyar ḇyedi. Wafasos mnis fandandun ro rasrasya nama roi ḇefandun kaku, ḇape ḇefandun syadiya iso fandandun rurya. (1 Timotius 5:8) Ine wafrurna ro wos monda ḇa, ḇape wafasnai na ro rosai wafrurna kako. Waso mnis kaku Allah wos Ḇyena ido, na wakmbran kuker Allah raris Henokh i. Inja, na buk waris ḇepyum kaku ḇe kina Besi ma nari siso mnis farari ḇepyum Bena.

Imbude Henokh ḇyaḇir demir monda ḇe snonkaku ḇena kakyar ro dunya ḇeḇarḇor ḇeradirya. Ḇape Allah ḇyedi, Yahwe I, myam faro i ke? Imboḇae. Ine iso fafisu ḇe Yahwe I fa dawos faro manfamyan ḇesoasuser ḇyedine. Allah danun ḇe Henokh i fa ḇyuk swarapepen faro snonkaku sya ro fafisu ḇyedi. Allah ḇye Henokh i fa ḇye nabi, iso ḇerandak Refo ikofenḇair ya. Kofawina snar, ḇarpurya mura Yesus naek pari ḇyedi, Yudas i, ismai  sḇayo fa fyas Henokh ḇardadi ḇyena ro pasi barek utin ḇe utin ro ḇarpon ya. *

Rosai Henokh ḇyardi na? Ikofen radine, ”Mkomam, [Yahwe, Kitab Suci Terjemahan Dunia Baru, (NW)] nari ryama kuker malaikat syaran-syaran ḇesren ḇyesya, fasḇuk kakara faro snonkaku kam. Manseren nari ḇyuk samamyai faro fararur ḇeḇarḇor ro ḇefawi i ḇasya. Ma nari ḇyuk samamyai kako faro wos anonef ro kawasa ḇesasar ma ḇeḇeankarkar sikofen faro i kwar.” (Yudas 14, 15) Henokh ikyar kaku ḇardadi ani nari kaku ndarirya. Dawos rya ḇardadi ḇyena Allah ifrurna fa namnis kwar. Knam ya isoine: Nabi Daniel ikyar kaku snar rosai Allah ḇyardi kwar rya roi anna ndarirya kwar!—Yesaya 46:10.

Rosai Henokh ḇyaḇirna rofyor ikofenḇair wos anna ḇe snonkaku ḇemarisen ḇerower syakam? Komam kada, fyasnaibos kaku swarapepen anna faro si. Kali rifyak ḇyuk wos ”fararur ḇeḇarḇor” fa isonek snonkaku sya, roi sifrurna, ma nyan sifrurna rai. Ḇardadi ani kako nḇuk swarapepen faro snonkaku syakam snar rofyor Adam ma Eva susaebur yaf Eden ya, dunya ḇyeḇarḇor syadiwer. Roi nanekam na namnai rofyor Yahwe ryama kuker ”malaikat syaran-syaran ḇesren ḇyesya” isoine sordade ḇeba ro malaikat sya ḇeḇefasos kwar faro mamamun ya. Henokh demir monda ḇeḇuk Allah swarapepen Ḇyedine, ḇape imkak ḇa! Imbude ro fafisuya Lamekh ḇyabo kaker. Myam ma myanen kaku rosai kpuri ifrurna kuker makakak ḇa. Inja rarirya, kofawi pyum rosai ḇefnai fa ḇyebri.

Henokh kakyar ḇyedi idif ko fa komam dunya koḇarek ine imnis Allah mamam Ḇyedi raya. Wos samamyai Henokh ikofenna nkur kako ḇe dunya ḇero baboine. Imnis Henokh wos swarapepen ḇyukna, Yahwe ḇyuk Faḇruḇ Ḇeba fa myun dunya ḇeḇarḇor ro Nuh fafisu ḇyedi. Ḇape farmakakok ine kyur ḇe farmakakok ḇeba kaku nari ḇeramaya. (Matius 24:38, 39; 2 Petrus 2:4-6) Baboine, Allah ma malaikat syaran-syaran Ḇyesya sfasos kwar fa sḇuk samamyai faro dunya ḇeḇarḇor ine. Mankunko oser-oser fandun fa kokram Henokh swarapepen ḇyedine ro kosnesna ma kokofenḇair na ḇe snonkaku ḇesesya. Kina ma bati koḇesi imbude sḇinkwanbur ko. Fyorno ido koḇaḇir kemir monda. Ḇape Yahwe ryir Henokh i ḇaḇeri; rarirya kako na ipok ryir ḇaḇeri manfamyan ḇesoasuser Ḇyesya ro baboine!

Rariso Henokh imar rai? Marmar ḇyedi nafrur fa kokmom syadi ro kankenem ḇyedi. Syap Kejadian doḇe, ”Henokh imbran pdef kuker Allah ḇekaku. Ramnai isya werḇa, snar Allah dun i.” (Kejadian 5:24) Rariso nyan Allah dun Henokh i rai? Ḇarpurya manwawan Paulus fyasnaiḇair, ”Snar kakyarya, Henokh imarḇa, mboi ḇyeḇekanow ma ḇyeḇeyun faro Allah. Snonkaku oso isrow iḇa kako, snar Allah i kanowi kwar. Sfas ro Refo mboi rofyor Henokh ḇyeḇekanow ḇaim, isma ḇaḇesaksi, ifrur marisen Allah ḇyedi kwar.” (Ibrani 11:5) Rosai knam ro wos ”imarḇa, mboi ḇyeḇekanow”? Terjemahan Refo ḇeḇeso nakofenḇair Allah dun Henokh i ḇe nanki. Ḇape rarirya ḇa. Refo fyasnaiḇair Yesus Kristus iso snonkaku ḇerandak ḇesmai aḇiḇer fa ḇeyek ḇe nanki boiyaswa.—Yohanes 3:13.

Inja, rosai knam ro wos Henokh ”ḇyeḇekanow” insama ”imarḇa” ya? Henokh ḇyabir roi ine ḇa, imbude Yahwe kyanow i ro kankenem ḇyedi ḇe marmarya, insa ḇyaḇir iduf ḇaḇeri. Ḇape ḇeponya  Henokh ”isma ḇaḇesaksi, ifrur marisen Allah ḇyedi kwar.” Nyan ya rariso? Rofyor imar ḇaim, imbude Henokh ismai fasasna ḇerama ro Allah, ḇefasnaiḇair firdaus ro supswan. Fasasna ani fyasnaiḇair kaku Yahwe imarisen faro Henokh i, ramnai denef moser ro marmarya. Paulus fyasḇair Henokh, snon ma bin ḇesoasuser sya radine, ”Sikam snonkaku ḇekyar faswef, isof rofafisu simar”. (Ibrani 11:13) Mbroḇ ḇyesi sisewar baken ḇyedi, ḇape ”snonkaku oso isrow iḇa”, snar Yahwe ifrur baken ḇyedi ipromes, idwarek snonkaku sya fa sifrur mamas i ḇaido sḇukisamsyom ro agama ḇekaku ḇa. *

Ro mnuk-mnuk nane, bisa fa kowasen moḇsa Henokh kankenem ḇyedi imnai raya. Wawasenpan fafyar ine, ḇape waswarepen inema waswasen monda rirya. Henokh ifrarbur snonkaku sya, nafruri fa imor fafayaḇa. Ḇewayam i sya sro ḇarpur ḇyedi, simsor kaku i snar wos samamyai ikofen na. Henokh isrow moḇ fa iyokef ma imnaisu fasaw, ḇape ifawi na iyokef pdef ḇa. Marmarya fyanam kaku kwar ḇe i. Rofyor imnaisu ya ḇyenadi ḇe Allah. Ramnai, ḇyaḇir iprei kaku. Henokh ismai fasasna oso ḇefrur fa rya ḇyaḇir isya kaku rodiwa.

Wawasenpan myam moḇ oso ro ḇarpon ḇyedi, dunya oso ḇeḇesebur kaku kuker dunya ifawi ya. Myam ḇo moḇ ani imnis yaf Eden, ḇape rodiwa kerub sya sisya ḇa fa sidwarek snonkaku fa sisun ro moḇ ya. Snon ma bin syakam sna baken ḇeprei ma sbabo. Sikain kuker payamyum. Ayayin noḇa ma ḇesyom ḇe Allah I sya sismai wayam raris Henokh i werḇa. Henokh mankundi, ḇyaḇir snar Yahwe iswar ma imarisen faro i. Ikyar kaku ine iso moḇ imander kaku ya; nari nḇe rum fa ḇyarek rona. Nanekam nafrur fa sneri iprei kaku, ramnai Henokh daruf mkamor ḇyesuya ma denef moser, kuker mafafu ḇa.

Kakuḇae, kirine Henokh denef kaker ro marmarya. Isya kwar ro Allah Yahwe swarapepen Ḇyedi! Raris Yesus ḇyeasas kwar, rasya nari ryama rofyor snonkaku ḇero Allah swarapepen Ḇyedi nari srower Kristus mkaren ḇyedi ma sisae ro kubir ya, sḇas mkamor sena ma smam dunya babo ḇepyum ma ḇefo kuker aski.—Yohanes 5:28, 29.

Wakmarisen fa wakḇarek rodiwa ke? Wawasen kada nari waryaḇ kaku snar wasrow kuker Henokh i. Kwarapan roi ḇepyum kaku na kofarkor ro i! Na fyawar kaku ḇeko rariso kankenem ḇyedi imnai rai. Ḇape ro kirine roi oso fandun fa kofarkor ro i. Rofyor Paulus fyasḇair Henokh farfyar ḇyedi, ikofen wer, ”Kakyar isyaḇa, snonkaku osoḇa kako ifrur Allah marisen ḇyedi.” (Ibrani 11:6) Inema roi ḇefrur fa ko oser-oser kofarari Henokh kakyar ma ḇaḇeḇri ḇyedi!