Snonggaku risuru na suḇebati fyor sufanam kaku snar suswar yae ḇaido suḇesyowi yae su. Imnis ra Yonatan ma Daud su. Suḇebati yae rofyor Daud myun Goliat i. (1Sam 18:1) Suna rari-rari ḇepyum, ḇefrur sumarisen suḇebati yae su. Inja, snonggaku risuru na suḇebati yae rofyor sumamḇir yae su, ma ine nefandun swaf ma fandun fa suḇesewar kaku. Ḇape ro media sosial, snonggaku sya na ”sebati yae” kuker spanepen ḇaido seklik oser monda. Osower ido, ro media sosial snonggaku na skara ḇepon rosai imbe sikofen na ma sfasnai roi ḇepyum ḇese faro ḇekur manggun si. Roi ine nafnai fa, samswen ḇe ko fa kofawi mansei kaku si. Inja, ipyum ya kosasor ko rofyor kokinfir bati ro media sosial. Imnis ra, rariso fyor snonggaku oso isya wamamḇir kaku i ḇa bo dor fa waḇebati kuker i ro media sosial? Wamgak awer fa wapampum fararyor sena snar wamgak wafrur duf sne sena. Syadi wer ono sisya skinfir fa sepake media sosial anna ḇa snar sifawi roi ḇemun ḇerodori na. Ḇape, fyor wakinfir fa ḇepake media sosial ido, rosai monda na waswarepen kaku ya?

MAM VIDIO BUK JEJARING SOSIAL KUKER FAWAWINANEM, RAMNAI KWAREM FAKFUKEN-FAKFUKEN NANE:

• Rosai na waswarepen kaku fyor wafarem ḇaido wrir wos ma foto Bena ḇaim?

• Rosai ḇefnai fa wasasor Au rofyor kwinfir bati ro media sosial?

• Rosai ḇefnai kaku fa wap ḇaido wakofenḇair oras ḇepake ro media sosial na?​—Ef 5:15, 16