Raryur Naek Ḇefarkin iso raryur kasun oso ro snonggaku Kristen ḇemas kwar ro rur ya. Siso ḇefasos farkankin faro Saksi-Saksi Yahwe ro supswan ḇesiper. Fararur ḇepon sediso suru suine:

•   Smamwarek fasasos fa sfasos farkankin ro Refo ḇero publikasi, fananjur ari, ma farkarkor faro Saksi-Saksi Yahwe sya.​—Lukas 12:42.

•   Smamwarek fararur ro Saksi-Saksi Yahwe sya ro supswan ḇesiper, raris sbuk akurfasnai faro fararur ḇaḇebaryas ma smamwarek nyan sepake farsarser kumpan sbuk na.

 Raryur Naek Ḇefarkin siso nyan ro ”manwawan-manwawan ma penatua-penatua sya” ro abad randak ya, ḇefrur snemuk ḇefandun faro sidang jemaat Kristen nakam. (Farfyar ro Manwawansya (Kisah) 15:2) Imnis ra manwawan ma penatua sya, anggota ro Raryur Naek Ḇefarkin sinema manfarkin organisasi nggoḇedine ba. Sifawi ro Refo ya snar Allah Yahwe kyanow Yesus Kristus i fa ḇyebukor ro sidang jemaat.​—1 Korintus 11:3; Efesus 5:​23.

 Anggota ro Raryur Naek Ḇefarkin ine iso Kenneth Cook, Jr., Samuel Herd, Geoffrey Jackson, Stephen Lett, Gerrit Lösch, Anthony Morris III, Mark Sanderson, ma David Splane. Sifrur fararur sena ro kantor pusat nggoḇedi ro Warwick, New York, AS.

 Raryur Naek Ḇefarkin sifrur panitia ri women fa smamwarek fararur ḇebor na, ma anggota oser-oser sfararur ro panitia oser ḇaido syadi.

•   Panitia Koordinator: Smamwarek masalah-masalah hukum na, bencana alam, wayam Saksi-Saksi Yahwe sismai na snar kakyar sena, ma samswen ḇese ḇekur Saksi-Saksi Yahwe sya.

•   Panitia Personalia: Smamwarek fasasos sifrur faro anggota kina Betel sya.

•   Panitia Penerbitan: Smamwarek nyan sifrur ma sfarem syap ḇeknam ro Refo na, ḇaḇawes moḇ sbuki ari na, kantor penerjemahan, ma fasilitas cabang.

•   Panitia Dinas: Smamwarek fararur ḇaḇebaryas ’abar ḇepyum Karajan’.​—Matius 24:14.

•   Panitia Pengajaran: Sbuk farkankin fa sfasos farkarkor ḇeknam ro Refo nari sawos ro fananjur ari na, sekolah, warpu audio ma vidio ḇyena.

•   Panitia Penulisan: Sbuk akurfasnai fa sfasos farkarkor ḇeknam ro Refo nari secetak na ma nari sfasos ro situs web na, ma smam fararur penerjemahan ya kako.

 Oso wer, Raryur Naek Ḇefarkin sifrur rapat kako ro minggu ḇe minggu na fa sawos fandun ro organisasi. Ro rapat ine, Raryur Naek Ḇefarkin sisewar akurfasnai ro Refo ma siso farkankin ro Allah rur ḇesren Ḇyedi, insama sikam sna wos oser rofyor sun snemuk oso.​—Farfyar (Kisah) 15:25.

 Ḇefnoḇek sine siso snonggaku Kristen sikyar kaku ma sifnoḇek panitia Raryur Naek Ḇefarkin sifrur ine. (1 Korintus 4:2) Ḇefnoḇek sine sna pengalaman ma sisambraḇ fa sifnoḇek ro panitia oso, ma siso kako ro rapat minggu ḇe minggu na. Sakso warpu fa sakfrur snemuk ḇayo, ḇefnobek ansine sbuk sawos kakara sena ma informasi sifandun na kako, simbran snemuk panitia sine sifrur na, ma smamwarek roi sifrur kwar ma bon ro snemuk sifrur ine. Raryur Naek Ḇefarkin sbuk fararur ḇe si kako fa sra smam naek ma srar ro sup ḇebor na ḇaido infa siso ro munara sarawrow taun ḇe taun ḇaido wisuda Gilead.