“Sipos yu rili wantem save moa long saed blong God, gohed blong stadi wetem ol Witnes blong Jehova.” Mi mi sapraes tumas blong harem tok ya. Long taem ya, mi stap stadi wetem ol Witnes blong Jehova. Be blong savegud mi, bae mi tokbaot smol laef blong mi.

Mi bon long wan taon long El Salvado, we nem blong hem Kwesaltepeku. Mi mi namba 6 blong 15 pikinini. Papa mo mama blong mifala i tijim mi blong no giaman mo obei long loa. Mo tu, wan brata we nem blong hem Leonardo mo sam narafala Witnes bakegen oli stap kam tijim Baebol long mifala. Be mi no folem ol samting we mi lanem mo mi mekem plante nogud desisen. Taem mi gat 14 yia, mi stat blong dring alkol mo tekem drag wetem ol fren blong mi long skul. Wanwan long olgeta oli lego skul blong joenem wan gang, mo mi tu mi folem rabis eksampol blong olgeta. Long dei, mifala i stanap long rod blong askem mane long ol man mo go stil, blong mifala i save pem alkol mo ol drag blong mifala.

Gang ya i kam famle blong mi. Mi bilif se mi mas holemstrong long olgeta. Eksampol, wan dei wan memba blong gang blong mifala i tekem tumas drag, nao i kilim nogud wan neba blong mi. Long faet ya, neba blong mi i winim man ya, i holemtaet hem mo i ringim polis blong kam tekem hem. Mi kros, nao mi stat blong spolem trak blong neba ya wetem wan aean, blong mekem se hem i letem fren blong mi i go fri. Neba blong mi i plis long mi blong mi stop, be mi no lesin long hem, mi gohed nomo, mi smasem ol windo blong trak blong hem mo spolem gud trak blong hem.

Taem mi gat 18 yia, gang blong mi i faet wetem ol polis. Mi wantem sakem wan bom we mifala nomo i wokem, be bom ya i bosta long han blong mi. Mi no save olsem wanem samting ya i hapen. Mi tingbaot nomo se mi luk han blong mi i brokbrok long ol smosmol pis, nao ae blong mi i dak. Taem mi wekap long hospital, mi faenemaot se mi lusum raet han blong mi, mo raet sora blong mi i fas. Mo tu, klosap raet ae blong mi i blaen.

Nating se mi kasem bigfala kil, be afta we mi kamaot long hospital, mi gobak joenem gang blong mi. Smoltaem afta, ol polis oli kam arestem mi, mo oli putum mi long kalabus. Long kalabus, fasin fren blong mi wetem ol memba blong gang blong mi i kam strong moa. Mifala i spenem fuldei tugeta, stat long moning mifala i smokem faswan mariuana blong mifala mo mifala i gohed olsem kasem we mifala i go slip.

Taem mi stap long kalabus, brata Leonardo i kam visitim mi. Taem mitufala i stap toktok, hem i poentem wan tatu long raet han blong mi mo i askem se: “?Yu save se trifala dot long tatu ya i minim wanem?” Mi se: “Yes, hem i minim seks, drag, mo rok miusik.” Be Leonardo i se: “Maet bae mi se i minim hospital, kalabus, mo ded. Yu go long hospital finis, mo naoia yu stap long kalabus, ?yu save nekis samting we bae i kamaot?”

Samting we Leonardo i talem i mekem mi sek. Hem i tru ya. Fasin blong laef blong mi i soemaot se mi stap digim gref blong mi wan. Leonardo i askem mi blong stadi Baebol wetem hem, mo mi agri. Samting we mi lanem long Baebol, i pusum mi blong jenisim laef blong mi. Eksampol, Baebol i talem se “ol rabis fren oli save spolem ol gudfala fasin.” (1 Korin 15:33) Taswe, faswan samting we mi mas mekem, hemia blong faenem sam niufala fren. Ale mi no moa go long ol miting blong gang blong mi, be mi stat blong go long ol miting blong ol Witnes blong Jehova we oli mekem insaed long kalabus. Long miting ya, mi mitim wan Witnes blong Jehova we i baptaes insaed long kalabus, nem blong hem Andrés. Hem i askem long mi sipos mi save go dring ti wetem hem. Stat long taem ya, mi no moa statem dei blong mi wetem mariuana, be mi mo Andrés i tokbaot wan vas blong Baebol tugeta evri moning.

Kwiktaem nomo, ol memba blong gang blong mi oli luksave se mi jenis. Ale, wan memba blong gang i talem se hem i wantem storian wetem mi. Mi fraet tumas. Mi no save se bae hem i talem wanem long mi, sipos hem i faenemaot samting we mi wantem mekem, from wan man i no save lego gang blong hem. Hem i se: “Mifala i luk se yu no moa kam long miting blong mifala, be yu stap go long ol miting blong ol Witnes blong Jehova. ?Yu stap plan blong mekem wanem?” Mi talem long hem se mi wantem gohed blong stadi Baebol mo jenisim laef blong mi. Mi mi sapraes tumas taem hem i talem long mi se, bae ol memba blong gang oli respektem mi, sipos mi pruvum se mi rili wantem kam wan Witnes blong Jehova. Nao hem i se: “Sipos yu rili wantem save moa long saed blong God, gohed blong stadi wetem ol Witnes blong Jehova. Mifala i wantem se yu stop blong mekem ol nogud samting. Mi glad tumas long yu. Yu stap long stret rod. Ol Witnes oli rili save halpem yu. Mi stadi wetem olgeta long Yunaeted Stet, mo sam memba blong famle blong mi, oli ol Witnes blong Jehova. Yu no fraet. Yu gohed nomo.” Mi mi fraet yet, be long semtaem mi glad tumas. Mi talem tangkiu long Jehova long hat blong mi. Mi harem se mi olsem wan smol pijin we i kamaot long kej blong hem, i kam fri, mo mi kasemsave toktok blong Jisas, se: “Bambae yufala i save trutok, mo trutok bambae i mekem yufala i kam fri.”—Jon 8:32.

Sam fren blong mi oli givim drag long mi blong traem mi. Blong talem stret, samtaem mi foldaon. Be plante taem afta we mi prea strong, mi winim fasin ya blong dring mo smok.—Ol Sam 51:10, 11.

Afta we mi kamaot long kalabus, plante man oli bilif se bambae mi gobak long olfala laef blong mi, be mi no mekem olsem. Plante taem mi gobak long kalabus blong serem trutok we mi lanem long Baebol long ol fren blong mi. Naoia ol fren blong mi oli bilif se mi jenis. Be ol enemi blong mi blong bifo, oli no ting se mi jenis.

Wan dei mi go prij wetem wan brata, nao mitufala i sek we sam memba blong wan narafala gang, we oli ol enemi blong gang blong mi bifo, oli kam raonem mitufala, blong kilim mi. Brata we i prij wetem mi, i eksplenem long olgeta long kaen fasin se, mi mi no moa wan memba blong gang we mi joen long hem bifo. Long taem ya, mi traem stap kwaet nomo. Afta we oli kilim mo wonem mi se bae mi no moa go long eria ya, oli letem mitufala i go. Baebol i rili jenisim laef blong mi. Bifo mi wantem givimbak nogud samting we narafala i mekem long mi. Be naoia mi folem advaes blong Baebol we i stap long 1 Tesalonaeka 5:15 we i talem se: “Yufala i mas lukaot se i no gat wan long yufala i givimbak fasin nogud we narafala i mekem long hem, be yufala i mas traehad oltaem blong mekem i gud long yufala mo long ol narafala man tu.”

Stat long taem we mi kam wan Witnes blong Jehova, mi traehad oltaem blong no giaman. I no isi. Be, wetem help blong Jehova God, ol advaes blong Baebol, mo sapot blong ol niufala fren we mi gat, mi naf blong winim ol slak fasin blong mi. Neva mi wantem gobak long ol nogud fasin ya.—2 Pita 2:22.

Bifo mi wan man blong faet we i fulap long kros. Mi sua gud se bae mi no save stap laef naoia, sipos mi bin gohed blong folem rabis laef ya. Samting we mi lanem long Baebol i jenisim laef blong mi. Mi no moa drong mo tekem drag. Mi lanem blong gat pis wetem ol enemi blong mi blong bifo. (Luk 6:27) Mo naoia, mi glad blong gat ol fren we oli halpem mi blong gat ol gudfala fasin. (Ol Proveb 13:20) Naoia mi hapi mo laef blong mi i gat mining, taem mi stap mekem wok blong God ya we i rere blong fogivim evri nogud samting we mi bin mekem.—Aesea 1:18.

Long 2006, mi joen long wan spesel skul blong ol Kristin we oli no mared. Sam yia biaen, mi maredem gudfala waef blong mi, mo mitufala i gat wan gel. Naoia mi spenem plante taem blong tijim ol narafala long ol advaes blong Baebol we oli givhan long mi. Mi mekem wok olsem wan elda tu long kongregesen blong mi, mo mi traem blong givhan long ol yangfala blong oli no mekem sem mastik we mi mekem taem mi yangfala. Bitim we mi digim gref blong mi wan, naoia mi stap rerem mi wan blong save laef long wan gudfala fiuja we God i promes long Baebol, blong givim long ol man.