Mi mi bon long smol taon blong San Juan Chancalaito, long Chiapas, Meksiko. Mi mi wan man Chol, hemia wan laen blong ol man Maya. Mi mi namba faef blong 12 pikinini. Mi wetem ol brata mo sista blong mi, mifala i stadi Baebol wetem ol Witnes blong Jehova taem mifala i smol. Sore tumas, taem mi mi kam yangfala, mi no moa folem advaes blong Baebol.

Taem mi gat 13 yia, mi stat blong tekem drag mo stil. Mi lego famle, mo mi muv i go long ol defdefren ples. Taem mi gat 16 yia, mi stat blong wok long wan plantesen blong mariuana. Afta we wan yia i pas, wan grup we olgeta tu oli stap salem drag, oli traem sutum mifala long masket taem mifala i stap putum plante bag blong mariuana long bot. Mi mi jam long reva, mo mi swim i godaon longwe. Afta, mi ronwe i go long Amerika.

Long ples ya, mi gohed blong salem drag mo mekem trabol. Taem mi gat 19 yia, mi go long prisen from we mi stil mo mi traem kilim narafala i ded. Long prisen, mi joenem wan rabis grup mo mi gohed blong kilim ol man. Ale, oli muvum mi mi go long wan prisen blong ol man we oli denja, long Lewisburg, Pennsylvania.

Long ples ya, fasin blong mi i kam moa nogud. From we mi gat ol tatu blong rabis grup we mi bin joenem, i isi blong faenem sem grup ya bakegen. Mi kam raf moa, mo mi faet oltaem. Wan taem mi joen long wan faet we ol memba blong rabis grup oli mekem long yad blong prisen. Mifala i kilkilim mifala wetem ol kriket bat mo ol hevi aean we ol man oli leftemap blong mekem eksasaes. Ol gad oli yusum wan rabis gas blong stopem faet ya. Afta, oli putum mi long wan spesel haos blong ol prisena we oli denja tumas. Oltaem mi faerap long kros, swea, mo faetem ol narafala. Blong talem stret, mi harem gud blong faet, mo mi no sore from ol rabis samting we mi mekem.

Long spesel haos ya, mi stat blong ridim Baebol from we klosap fuldei oli lokem mi long rum blong mi. Wan dei, gad i givim wan buk long mi, hemia Yu Yu Save Laef Foreva Long Paradaes Long Wol. a Taem mi ridim, mi tingbaot plante samting we mi lanem long Baebol stadi blong mi wetem ol Witnes blong Jehova taem mi smol. Mi tingbaot olsem wanem mi mi kam nogud from we fasin blong mi i raf tumas. Mo tu, mi tingbaot famle blong mi. Tufala sista blong mi i kam Witnes blong Jehova finis, mo mi tingbaot se, ‘Bae tufala i laef olwe.’ Mi askem se: ‘?From wanem mi tu mi no save laef olwe?’ Long taem ya nao, mi mekem desisen blong jenisim laef blong mi.

Be mi save se mi nidim help blong jenis. Ale, mi askem help blong Jehova God long prea, mo mi raet i go long branj ofis blong ol Witnes blong Jehova long Yunaeted Stet, blong askem wan Baebol stadi. Branj ofis i sanem toktok i go long kongregesen klosap long prisen. Be long prisen, oli letem ol famle blong mi nomo oli kam visitim mi. Taswe, wan brata long kongregesen i stap raetem leta mo sanem ol buk blong eksplenem Baebol long mi. Samting ya i mekem se mi wantem tumas blong jenisim fasin blong mi.

Mi mekem bigfala desisen blong lego rabis grup ya we mi joenem plante yia finis. Lida blong grup ya i stap long sem prisen haos we mi mi stap long hem, ale mi go luk hem long wan taem we mifala i stap pleplei, mo mi talem se mi wantem kam wan Witnes blong Jehova. Mi sapraes long ansa blong hem se: “Sipos yu stap talem tru, i oraet nomo. Mi no save blokem samting we God i wantem. Be sipos yu jes wantem aot long mifala nomo, yu save finis wanem bae i hapen.”

Long tu yia we i kam biaen, ol gad oli luk se mi jenis bigwan. From samting ya, oli kaen moa long mi. Oli no moa putum hankaf long mi taem oli tekem mi mi go swim. Wan gad i kam talem long mi se mi mas gohed nomo blong traehad blong mekem ol jenis. Long las yia we mi stap long prisen, oli muvum mi mi go long wan kamp blong ol prisena we oli no denja. Long 2004, afta we mi bin stap ten yia long prisen, mi kam fri mo oli tekem mi mi gobak long Meksiko long wan bas blong prisen.

Kwiktaem nomo, mi faenem Haos Kingdom blong ol Witnes blong Jehova long Meksiko. Mi werem yunifom blong prisen long fas miting, from we mi no gat wan narafala klos we i gud. Nating se i olsem, ol Witnes oli welkamem mi. Taem mi luk kaen fasin blong olgeta, mi harem save se mi stap long medel blong ol trufala Kristin. (Jon 13:35) Long miting ya ol elda oli mekem plan blong stadi Baebol wetem mi. Wan yia biaen, long 3 Septemba 2005, mi mi baptaes blong kam wan Witnes blong Jehova.

Long Jenuware 2007, mi stat blong mekem wok blong prij fultaem, we mi spenem 70 aoa evri manis blong tijim ol man long Baebol. Long 2011, mi go long Baebol Skul Blong Ol Brata We Oli No Mared (naoia oli kolem Skul Blong Ol Man Blong Talemaot Kingdom). Skul ya i givhan long mi bigwan blong mi mekem ol wok blong mi long kongregesen.

Long 2013, mi maredem Pila. Hem i smael taem i talem se i had blong bilivim ol samting we mi tokbaot long laef blong mi. Mi neva gobak long ol rabis fasin we mi mekem bifo. Mitufala i luksave klia se laef blong mi tede i soemaot bigfala paoa we Baebol i gat blong jenisim laef blong man.—Rom 12:2.

Mi harem se ol tok blong Jisas long Luk 19:10 oli stret long mi. Hem i se: “[Mi] kam blong lukaotem ol man we oli lus mo blong sevem olgeta.” Mi no moa harem se mi lus, mo mi no moa stap spolem ol man. Baebol i halpem mi blong mi faenem wan gudfala risen blong laef, mi gat pis wetem ol narafala, mo samting we i moa impoten, mi fren gud wetem God ya we i wokem mi, Jehova.