Mi gruap olsem wan Katolik, long Rochester, New York. Taem mi gat eit yia, papa mo mama blong mi i seraot. Long ol dei blong wik mi stap wetem mama blong mi long wan haos we i no flas nating, mo long wiken mi go stap wetem papa blong mi long wan rij eria. Taem mi luk olsem wanem i had blong Mama i lukaot long sikis pikinini, mi wantem tumas blong kam rij blong halpem evriwan long famle.

Papa blong mi i wantem se mi gat wan gudfala wok mo mi win gud, taswe hem i mekem plan blong mi go visitim wan skul we i trenem ol maneja blong hotel. Mi laekem skul ya, mo mi putum nem blong mi blong kasem trening. Mi ting se God i stap ansarem prea blong mi blong kam rij mo hapi. Mi stadi blong faef yia, long wok blong maneja blong hotel, ol loa long saed blong bisnes, mo olsem wanem blong winim bigfala mane. Long semtaem, mi wok long wan hotel long Las Vegas, Nevada, we ol man oli kam long hem blong plei laki.

Taem mi gat 22 yia, mi kam namba tu man blong givhan long presiden blong wan hotel olsem. Ol man oli luk mi olsem wan rijman mo oli respektem mi. Mi kakae ol gudfala kakae, mo plante taem mi dring waen mo ol strong dring we i sas we i sas. Ol fren blong mi we olgeta tu oli bisnesman, oli stap talem se: “Yu mas tingbaot se mane i impoten moa i bitim ol narafala samting long wol.” Long tingting blong olgeta, mane nomo i save givim trufala glad.

Wok blong mi i blong lukaot gud long ol rijman mo woman we oli kam long Las Vegas blong plei laki, mo givim evri samting we oli wantem. Be nating se oli rij, mi luk se oli no glad. Mi tu mi stat blong lusum glad blong mi. Blong talem stret, moa we mi kam rijman, moa we mi wari mo mi no slip gud. Mi harem nogud tumas long laef blong mi, mo mi tingbaot blong kilim mi wan i ded. Mi askem long God se: “?Olsem wanem mi save faenem trufala glad?”

Taem mi stap harem nogud olsem, tu sista blong mi we tufala i kam Witnes blong Jehova, tufala i muv i kam long Las Vegas. Mi no wantem ol buk blong tufala, be mi agri blong ridim Baebol blong mi wetem tufala. Long Baebol blong mi, ol tok blong Jisas i stap long raeting we i red. From we mi bilif long evri samting we Jisas i talem, tufala sista blong mi i yusum ol tok blong hem. Mo tu, mi gohed blong ridim Baebol mi wan.

Mi sapraes long plante samting we mi ridim. Wan samting, hemia tok blong Jisas se: “Taem yu prea, yu no mas ripitim ol tok oltaem olsem ol man blong ol narafala nesen. Oli ting se god bambae i harem olgeta from we oli talem plante toktok.” (Matiu 6:7, The New American Bible) Nating we tok ya blong Baebol i klia, wan pris i givim pija blong Jisas long mi, mo i talem se sipos mi talem Lodsprea 10 taem mo prea we i go long Meri 10 taem long fored blong pija ya, God bambae i givim bigfala mane long mi. Be mi tingbaot se sipos mi mekem olsem, mi stap ripitim ol semfala toktok. Mi ridim narafala tok ya blong Jisas tu se: “Yufala i no singaot wan man long wol ya se ‘papa,’ from we yufala i gat wan Papa nomo long heven.” (Matiu 23:9, NAB) Mi tingbaot se: ‘?From wanem mi mo ol narafala Katolik i singaot pris se “Papa”?’

Taem mi ridim buk blong Jemes long Baebol, mi stat blong tingting dip long fasin blong mi blong traem win gud long wol. Long japta 4, Jemes i raetem se: “?Yufala i no save se man we i laekem wol ya, hem i badfren blong God? Taswe, man we i laekem wol ya, i mekem hem wan i kam enemi blong God.” (Jemes 4:4, NAB) Vas 17 i gat moa paoa long mi, i se: “Taem man i save samting we i stret blong mekem be hem i no mekem, hemia wan sin.” Nao mi girap mi ring long tufala sista blong mi, mo mi talem long tufala se bambae mi lego wok ya long hotel, from we naoia mi save se i no stret blong plei laki mo griri.

Mi wantem fren moa wetem God, mo tu wetem papa mo mama mo ol brata mo sista blong mi. Blong gat taem blong mekem olsem, mi mas jenisim sam samting long laef blong mi. Be i no isi blong mekem ol jenis ya. Eksampol: Mi gat janis blong kasem wok we i hae moa long hotel, mo pei blong mi bambae i 2 o 3 taem antap long pei blong mi bifo. Be afta we mi prea, mi luksave se mi no moa wantem kaen laef olsem. Ale, mi lego wok ya, mi muv i go stap long garaj long haos blong mama blong mi, mo mi statem wan smol bisnes blong flasem ol menu blong ol restoron.

Baebol i givhan finis long mi blong kasem save samting we i moa impoten, be mi no wantem go long ol miting blong ol Witnes blong Jehova. Tufala sista blong mi i askem from wanem mi no laekem ol Witnes. Mi ansa se: “From we God blong yufala, Jehova, i seraotem ol famle. Mi gat taem blong stap wetem famle long Krismas mo ol betde nomo, be yufala i no kipim ol holide ya.” Wan sista blong mi i stat blong krae mo i askem se: “?Olsem wanem long ol narafala dei blong yia? Mifala i wantem se yu kam enitaem blong luk mifala. Be yu yu kam long ol holide nomo, mo yu mekem olsem from we yu harem se yu mas kam long ol dei ya.” Ol tok blong hem i kasem hat blong mi stret, mo mi tu mi krae.

Taem mi luk se mi gat rong tingting, mo mi kasem save se ol Witnes blong Jehova oli lavem tumas ol famle blong olgeta, mi stat blong go long ol miting long Haos Kingdom. Long ples ya, mi mitim Kevin, we i tijim plante man finis long Baebol, ale hem i statem wan Baebol stadi wetem mi.

Mi luk se laef blong Kevin mo waef blong hem i no fasfas, taswe tufala i save spenem plante taem blong tijim ol narafala long Baebol. Mo tu, tufala i winim naf mane blong mekem sam narafala samting, olsem go long Afrika mo Sentrol Amerika blong givhan blong bildim ol branj ofis blong ol Witnes. Tufala i glad, mo tufala i lavlavem tufala. Mi stap tingting se: ‘Kaen laef ya i olsem samting we mi mi drim long hem.’

Kevin i soem wan video long mi we i tokbaot wok blong misinari mo olsem wanem oli glad. Ale, mi mekem desisen se hemia nao samting we mi mi wantem. Afta we mi stadi gud long Baebol blong sikis manis, mi baptaes long 1995 olsem wan Witnes blong Jehova. Mi no moa askem long God blong i mekem mi mi kam rijman, be mi prea se: “Yu mekem we mi no kam pua mo mi no kam rij tu.”—Ol Proveb 30:8.

Naoia mi mi rijman tru. Hemia from we mi fren gud wetem God, be i no from we mi gat mane. Mi mitim naesfala waef blong mi, Nuria, long Honduras, mo mitufala i mekem wok blong misinari long Panama mo Meksiko. !Baebol i tru tumas taem i talem se: “Blesing blong Jehova, hemia nao samting we i mekem man i rij, . . . mo hem i no ademap trabol i go wetem”!—Ol Proveb 10:22.