Famle blong mi i blong Tonga, wan kantri we i gat samwe long 170 aelan, mo i stap long saotwes Pasifik. Long Tonga mifala i gat wan simpol laef. Mifala i no gat elektrik o trak. Be mifala i gat wota saplae long haos blong mifala, mo mifala i fidim sam faol. Taem mifala i spel long ol holide blong skul, mi mo tufala brata blong mi i givhan long papa blong mifala, blong lukaot long garen blong mifala, we i gat banana, yam, taro, mo maniok. Papa blong mifala i lukaot long famle wetem mane we hem i winim long ol kakae ya mo sam narafala smosmol wok bakegen. Olsem ol narafala man long aelan, famle blong mi i respektem Baebol, mo mifala i go long jos oltaem. Be yet, mifala i bilif se wan rod nomo blong harem gud long laef, hemia blong muv i go long wan rij kantri.

Taem mi gat 16 yia, angkel blong mi i mekem plan blong mifala i muv i go long Kalifonia, U.S.A. !I no isi from we mifala i mas lan long wan niufala kalja! Nating se laef blong mifala i kamgud moa, mifala i laef long wan eria we pua, mo ol man oli faet oltaem mo oli tekem drag. Plante taem long naet mifala i harem masket i faerap, mo bighaf blong ol neba blong mifala oli fraet long ol grup blong ol rabis man. Plante man oli yusum masket blong protektem olgeta wan o blong stopem wan faet. Mi stil gat wan mak blong bolet long jes blong mi from wan faet olsem.

Long hae skul, mi wantem joen wetem ol narafala yangfala. Sloslo mi stap joen long ol rabis lafet, mi dring bitim mak, faet, mo yusum ol drag we loa i blokem. Biaen mi kam slef blong drag ya kokain. Mi stat blong stil blong pem ol drag blong mi. Nating se ol memba blong famle blong mi oli strong long jos, mi neva kasem ol advaes blong jos we oli save givhan long mi blong blokem ol rabis fren mo ol rabis fasin. Plante taem mi kasem kil mo oli arestem mi from we mi stap yusum masket blong faet. !Mi no moa save kontrolem laef blong mi! Samtaem biaen mi go long kalabus.

Wan dei long yia 1997, taem mi stap long kalabus, wan narafala prisena i luk se mi stap holem wan Baebol long taem blong Krismas. Hemia wan taem we plante man Tonga oli luk se i tabu tumas. Hem i askem long mi sipos mi save samting we Baebol i talem long saed blong dei we Jisas i bon, be mi no save wan samting long saed ya. Hem i soem ol vas blong Baebol we oli tokbaot taem we Jisas i bon, mo mi luk se ol vas ya oli no tokbaot plante samting we oli stap hapen long taem blong Krismas tede. (Matiu 2:1-12; Luk 2:5-14) Mi mi sapraes tumas, mo mi wantem save sam moa samting we Baebol i talem long saed blong Krismas. Man ya i stap go long ol miting evri wik we ol Witnes blong Jehova oli stap mekem insaed long kalabus, nao mi mekem plan blong go wetem hem. Long taem ya, oli stap stadi long buk blong Revelesen. Nating se mi kasemsave smol nomo, mi luksave se evri samting we oli tijim oli stanap nomo long Baebol.

Taem wan brata i askem mi sipos mi wantem stadi Baebol, mi akseptem. Hemia fastaem we mi lanem ol promes blong fiuja we Baebol i tokbaot long saed blong wan paradaes long wol ya. (Aesea 35:5-8) I kam klia long mi se, blong mekem God i glad mi mas mekem sam bigfala jenis long laef blong mi. Mi luksave se Jehova i no save letem mi laef long paradaes sipos mi stap gohed long ol rabis fasin blong mi. (1 Korin 6:9, 10) Taswe mi gat strong tingting blong kontrolem kros blong mi, stop blong smok, mo no moa gobak long fasin blong dring bitim mak mo tekem drag.

Long yia 1999, bifo we mi aot long kalabus, oli sanem mi i go long wan imigresen kamp. Bitim wan ful yia mi no luk nating wan witnes blong Jehova. Be mi gat strong tingting blong gohed blong mekem ol jenis long laef blong mi. Long yia 2000, gavman i kanselem visa blong mi taem mi askem blong gohed blong stap long Yunaeted Stet, nao oli sanem mi gobak long Tonga.

Long Tonga, mi wantem tumas blong faenem ol Witnes blong Jehova mo gohed long Baebol stadi blong mi. Mi laekem samting we mi stap lanem, mo mi glad tumas taem mi luk ol tijing blong ol Witnes long Tonga oli stanap long Baebol, sem mak olsem ol Witnes long Yunaeted Stet.

Ol man long Tonga oli savegud papa blong mi from we hem i holem wan impoten wok long jos. Taswe, fastaem tingting blong ol famle blong mi i fasfas mo oli no laekem we mi joen wetem Ol Witnes blong Jehova. Be biaen, papa mo mama blong mi i glad se ol advaes blong Baebol oli halpem mi blong mi gat wan laef we i klin.

Wan samting we i had tumas blong mi lego, hemia wan lokol dring. Plante man Tonga oli spenem plante aoa evri wik blong dring kava, wan strong dring blong kwaetem tingting blong man we oli wokem long rus blong kava. Taem mi stap long ples blong mi long Tonga, mi tu mi stat blong go long nakamal klosap evri naet, mo mi dring kava kasem mak ya we mi drong gud long hem. Haf blong problem ya, hemia se mi joen wetem ol fren we oli no tinghevi long Baebol. Biaen, mi luksave se fasin ya i mekem Jehova i harem nogud. Ale mi mekem sam jenis blong hem i save glad long mi mo i blesem mi.

Mi stat blong go long evri miting blong Ol Witnes blong Jehova. Taem mi joen wetem ol man we oli wantem mekem God i glad, samting ya i givhan long mi blong blokem ol samting we i traem mi. Long 2002, mi baptaes olsem wan Witnes blong Jehova.

From we Jehova i gat longfala tingting long mi, mi kasem blesing from longfala tingting blong hem olsem we Baebol i talem, i se: “Jehova . . . i gat longfala tingting long yufala, from we hem i no wantem se wan man i ded, hem i wantem se olgeta man oli tanem tingting blong olgeta.” (2 Pita 3:9) Hem i save spolem ol rabis man longtaem finis bifo, be hem i gat longfala tingting blong letem taem i pas blong ol man olsem mi, oli save tanem tingting blong olgeta mo kam fren blong hem. Mi glad blong tingbaot se hem i save yusum mi blong givhan long ol narafala olsem mi blong oli tanem tingting.

Wetem help blong Jehova, naoia mi save kontrolem laef blong mi bakegen. Mi no moa stilim ol samting blong ol narafala blong pem ol samting we oli save kilim ded mi. Defren olgeta, naoia mi traem blong givhan long ol man raonabaot long mi, blong oli kam fren blong Jehova tu. Taem mi stap joen wetem ol Witnes blong Jehova, mi mitim gudfala woman blong mi, Tea. Mitufala mo smol boe blong mitufala i gat wan hapi famle laef. Mitrifala i joen tugeta blong tijim ol narafala long samting we Baebol i talem long saed blong wan gudfala laef long fiuja, long paradaes long wol ya we bambae i gat pis nomo long hem.