Plante turis oli stap visitim ol wotafol we oli stap klosap long taon blong Pagsanjan long Filipin. Hemia nao ples we papa blong mi, Nardo Leron, i gruap long hem, mo hem i pua. Taem hem i luk ol rabis fasin blong ol man blong gavman, ol polis, mo rabis fasin long ples blong wok blong hem, hem i kros tumas.

Papa mo mama blong mi i wok had blong lukaotgud long mifala ol eit pikinini. Plante taem tufala i stap longwe long haos blong longtaem, blong lukaot long ol kakae we oli planem antap long ol hil. Oltaem mi mo brata blong mi, Rodelio, i mas lukaot long mifala ol pikinini, mo plante taem mifala i hanggri. Mifala i no gat plante janis blong pleplei olsem ol pikinini. Stat taem mifala i gat seven yia, mifala wanwan i mas go wok long plantesen. Mifala i mas karem ol hevi bag blong kokonas mo wokbaot folem ol rod long ol hil we oli hae. Sipos bag i hevi tumas blong karem, oli fosem mifala blong pulum nomo long graon.

Papa blong mifala i stap kilim mifala oltaem, be mifala i harem nogud moa taem hem i kilim mama blong mifala. Mifala i traem stopem hem, be mifala i no naf blong mekem. Mi mo Rodelio i mekem plan blong kilim papa blong mitufala taem mitufala i kam bigwan. !Mi mi wantem tumas wan papa we i lavem mifala!

Mi harem nogud mo kros tumas from nogud fasin blong papa, ale mi aot long haos taem mi gat 14 yia. Fastaem mi laef long rod, mo mi stat blong smok mariuana. Biaen, mi wok long wan bot we i stap tekem ol turis i go long ol wotafol.

Sam yia biaen, mi stat blong stadi long wan yunivesiti long Manila. Be from we mi mas travel i gobak long Pagsanjan blong wok long ol wiken, mi no gat inaf taem blong stadi. Mi harem se mi no gat wan mak long laef blong mi i olsem we mi stap go raon raon long wan tredmil nomo, mo mariuana tu i no moa tekemaot ol wari blong mi. Mi stat blong tekem ol narafala drag olsem metamfetamin, koken, mo heroin. Ol drag ya oli pulum mi blong mekem nogud fasin long saed blong seks. Mi luk tu se raonabaot long mi i gat plante man oli pua, i nogat stret fasin, mo ol man oli stap safa. Mi harem se gavman nao i mekem laef blong ol man i nogud olsem, ale mi agensem gavman. Mi askem God se, “?From wanem laef i nogud olsem?” Be ol defdefren jos we mi go long hem blong faenem ansa oli no save givhan long mi. Mi tekem plante moa drag blong haedem ol nogud filing blong mi.

Long 1972, ol studen blong Filipin oli maj long rod blong agensem gavman. Mi joenem olgeta, mo i gat wan faet i kamaot. Polis i arestem plante man, mo sam manis biaen gavman i givim raet long ol ami blong stap arestem ol man olsem long ful kantri.

Mi go laef bakegen long rod, be naoia mi fraet long ol ami from mi bin joen long maj tu. Blong mi save pem ol drag blong mi, mi stap stil, mo biaen mi stap mekem se ol rijman mo ol man blong ol narafala kantri oli pem mi blong oli mekem ol rabis fasin blong man wetem woman. Mi no kea sipos mi laef o mi ded.

Long ol taem ya, mama blong mi mo smol brata blong mi oli stat blong stadi Baebol wetem ol Witnes blong Jehova. Papa i kros tumas, nao hem i bonem ol buk blong tufala. Be tufala i stanap strong mo tufala i baptaes olsem Witnes blong Jehova.

Wan dei, wan Witnes i tokbaot promes blong Baebol long papa se long fiuja bambae stret fasin i stap long fulwol. (Ol Sam 72:12-14) Save ya i tajem hat blong papa blong mi bigwan, nao hem i wantem save moa. Hem i faenemaot se Baebol i no tokbaot nomo se bambae i gat stret fasin long wol aninit long gavman blong God, be tu hem i faenemaot fasin we God i wantem se ol hasban mo ol papa oli mas mekem. (Efesas 5:28; 6:4) Smol taem biaen, hem mo ol sista mo ol narafala brata blong mi oli kam Witnes tu. Mi mi stap longwe long haos mo mi no save ol samting long saed ya.

Long 1978, mi muv i go long Ostrelia. Be yet mi no gat pis long tingting taem mi stap long gudfala kantri ya we i gat pis. Mi gohed blong dring mo tekem drag. Biaen, long sem yia ya, ol Witnes blong Jehova oli kam visitim mi. Mi laekem wanem we oli soem long mi long Baebol long saed blong wan wol we bambae i gat pis, be mi fraet blong joen wetem olgeta.

Smoltaem biaen, mi gobak long Filipin blong sam wik. Ol brata mo sista blong mi oli talem long mi se papa blong mi i wokhad bigwan blong kam wan gudfala man, be mi mi kros tumas yet, nao mi traem blong no storian nating wetem hem.

Lasbon sista blong mifala, i yusum Baebol blong eksplenem long mi from wanem laef i fulap long rabis fasin mo fasin we i no stret. Mi mi sapraes tumas long wan yangfala gel olsem we i nogat plante save, be hem i save ansa long ol kwestin blong mi. Bifo we mi gobak long Ostrelia, papa blong mi i givim buk ya Yu Save Laef Foreva Long Paradaes Long Wol. a Hem i se: “No yusum fasin we i no stret, blong traem faenem pis mo ansa blong ol kwestin blong laef.” Hem i talem long mi blong mas faenem ol Witnes taem mi gobak long Ostrelia.

Mi folem advaes blong papa blong mi mo mi faenem wan Haos Kingdom blong ol Witnes blong Jehova we i stap klosap long haos blong mi long Brisbane. Mo mi agri blong stadi Baebol. Ol profet tok blong Baebol olsem profet tok blong Daniel japta 7 mo Aesea japta 9 oli soemaot long mi se gavman blong God we i no gat nogud fasin long hem, bambae i rulum yumi long fiuja. Mi lanem tu se bambae yumi save harem gud long wan Paradaes long wol ya. Mi wantem se God i glad long mi, be mi luksave se mi mas lanem blong bos long tingting blong mi, mi mas stop blong tekem drag mo dring alkol, mo mi mas lego rabis fasin long saed blong seks. Mi seraot long gel we mi laef wetem, mo mi lego drag mo alkol. Taem mi stap trastem Jehova moa, nao mi prea long hem blong i halpem mi blong mi mekem ol narafala jenis long laef blong mi.

Sloslo, mi luksave se mi stap jenis i kam wan gudfala man. Baebol i talem se taem yumi traehad, yumi save putum “niufala fasin.” (Kolosi 3:9, 10) Taem mi traem blong mekem olsem, mi luksave se samting we mi harem long saed blong papa blong mi se hem i jenis, i tru. Nao mi no moa kros long hem, be mi wantem mekem pis wetem hem. Ale mi fogivim papa blong mi mo lego nogud filing we mi gat long hem taem mi mi pikinini.

From we mi wan yangfala, oltaem mi folem ol narafala blong mekem ol rabis samting. Woning blong Baebol long saed blong ol rabis fren i tru nomo se rabis fren i save spolem mi. (1 Korin 15:33) Be mi faenem sam gudfala fren we oli ol Witnes blong Jehova, mo oli givhan long mi blong kam wan gudfala man. Mo mi faenem gudfala woman blong mi, Loretta. Naoia mitufala i joen tugeta blong tijim ol narafala long Baebol mo soem olsem wanem Baebol i save givhan long olgeta.

Tangkiu tumas from Baebol, naoia mi luk se papa blong mi i jenis, hemia wan samting we mi no ting se bambae i hapen. Hem i kam wan gudfala hasban long mama blong mi, i gat tingting daon, i gat pis, mo i kam wan Kristin we i gat lav. !Mi baptaes olsem wan Witnes blong Jehova long yia 1987, afta long taem ya, taem mi luk papa bakegen, hem i putum han blong hem i goraon long mi blong fastaem long laef blong mi!

Bitim 35 yia nao we papa blong mi i gohed blong joen wetem mama blong mi blong talemaot ol promes blong Baebol long ol narafala. Naoia ol man oli luk hem olsem wan man we i kea long ol narafala mo wan man we i halpem ol narafala man. Long ol yia ya, mi lanem blong respektem hem mo lavem hem. !Mi glad tumas blong stap olsem wan pikinini blong hem! Hem i ded long yia 2016, be mi lavem hem yet, from we mi save se mitufala tugeta i mekem bigfala jenis long laef blong mitufala taem mitufala i folem ol tijing blong Baebol. Naoia mi no moa gat fasin ya blong no laekem narafala. Mi glad tumas se mi faenem Papa blong mi long heven, Jehova God, we hem i promes blong finisim ol samting we i stap mekem ol famle long fulwol oli stap seraot.