Mi mi bon long taon blong Calgary long Alberta, Kanada. Taem mi smol, papa mo mama blong mi i divos, ale mi mo mama i muv i go long haos blong abu man mo abu woman. Tufala i lavem mi mo mama, mo mi wan pikinini we mi glad oltaem. Mi stap tingbaot yet ol gudfala memori blong taem ya.

Be taem mi gat seven yia, laef blong mi i jenis i kam moa nogud, taem mama blong mi i mared bakegen wetem papa blong mi mo mifala i muv i go long St. Louis, Missouri, long Yunaeted Stet. Biaen mi faenemaot se papa blong mi i raf lelebet. Eksampol, afta long faswan dei blong mi long skul, taem mi kambak long haos, hem i faenemaot se ol pikinini long skul oli bin spolem mi, be mi mi no givimbak long olgeta. !Ale hem i kros tumas mo i kilim mi strong moa i bitim ol pikinini long skul! Mi lanem lesen from samting we i hapen mo mi stat blong faet wetem ol narafala pikinini taem mi gat seven yia nomo.

Mama blong mi i no glad long fasin blong papa blong mi mekem se tufala i stap toktok strong mo raorao long tufala. Mi mi stat blong tekem drag mo dring alkol taem mi gat 11 yia nomo. Mi stap kam moa nogud, mo oltaem mi stap faet wetem ol man long rod. Taem mi graduet long hae skul, mi mi kam raf moa.

Taem mi gat 18 yia, mi joen long ami blong U.S we i bes long solwota (U.S. Marine Corps). Long ples ya, mi kasem trening blong kilim narafala man i ded. Faef yia biaen, mi lego ami mo mi stadi long tingting blong ol man (psychology) from mi wantem go wok long Federal Bureau of Investigation. Mi stat blong stadi long yunivesiti blong Yunaeted Stet mo mi gohed taem mi muv i gobak long Kanada.

Long yunivesiti mi kros long eni man nomo, from we ol man oli tingbaot olgeta nomo, i no gat wan gudfala samting long wol, mo i luk olsem se i nogat rod blong stretem ol trabol blong ol man. Mi lego tingting ya se ol man oli save mekem wol ya i kam wan gudfala ples.

From we mi luk se mi laef blong nating nomo, mi stat blong tekem alkol, drag, mekem rabis fasin blong sek mo kasem mane long griri fasin. Oltaem samting we mi tingbaot se, wanem pati hem i nekis wan mo hu nekis woman we bambae mi slip wetem hem. Ol trening we mi kasem long ami i givim strong tingting long mi blong faet oltaem. Mi gat prapa tingting blong mi long samting we i stret mo samting we i rong, mo mi stap stretem ol man we mi ting se oli mekem i no stret long narafala. Be blong talem stret, mi mi kam wan slef blong faet.

Wan dei taem mi mo fren blong mi i stap tekem drag long rum we i stap aninit long haos blong mi, mo mitufala i stap rerem sam mariuana blong sanem long sip blong salem, fren blong mi i askem long mi sipos mi bilif long God. Mi talem long hem se, “!Sipos God nao i stap mekem ol man long wol oli safa, mi no wantem save hem!” Nekis dei, long faswan dei blong niufala wok blong mi, wan fren blong wok we i wan Witnes blong Jehova i askem long mi se, “?Yu ting se God nao i stap mekem ol man long wol oli safa?” Mi mi sapraes from we kwestin ya i kamaot long stret taem, hem i sem kwestin we mi bin tokbaot long dei bifo, nao mi wantem save moa. Blong ol nekis sikis manis, mitufala i stori plante, mo hem i yusum Baebol blong ansa long sam had kwestin blong laef we mi stap askem.

Gelfren blong mi we mi stap wetem hem long taem ya, i no wantem se mi tokbaot ol samting we mi lanem wetem hem. Wan Sande, mi talem long hem se mi singaot ol Witnes blong kam long haos blong stadi Baebol wetem mitufala. Long nekis dei, taem mi kambak long haos afta wok, hem i tekem evri samting long haos mo i aot. Mi go aotsaed mo mi krae. Mo tu mi prea long God, mi askem hem blong halpem mi. Hemia faswan taem we mi yusum nem blong God, Jehova, long prea blong mi.—Ol Sam 83:18.

Tu dei biaen, tu Witnes, wan man mo waef blong hem i statem faswan Baebol stadi blong mi. Afta we tufala i aot, mi gohed blong ridim buk we mi stadi long hem, hemia Yu Yu Save Laef Foreva Long Paradaes Long Wol, mo mi finisim long sem naet nomo. a Samting we mi lanem long saed blong Jehova God mo pikinini blong hem Jisas Kraes, i tajem hat blong mi. Mi lanem se Jehova i gat sore, mo hem i harem nogud taem yumi safa. (Aesea 63:9) Samting we i tajem hat blong mi, hemia lav we God i gat long mi mo sakrefaes we Pikinini blong hem i mekem long bihaf blong mi. (1 Jon 4:10) Mi save se Jehova i gat longfala tingting long mi “from we hem i no wantem se wan man i ded, hem i wantem se olgeta man oli tanem tingting blong olgeta.” (2 Pita 3:9) Mi harem olsem se Jehova i wantem se mi kam fren blong hem.—Jon 6:44.

Mi stat blong go long ol miting long sem wik ya nomo. Mi gat longfala hea, iaring, mo man i save fraet taem i luk fes blong mi, be ol Witnes oli mekem i gud long mi, olsem se mi wan famle we oli no bin luk longtaem. Oli soemaot ol fasin blong ol tru Kristin. Mi harem olsem se mi stap long haos blong tufala abu blong mi taem mi smol, be naoia i gud moa.

Sloslo ol samting we mi lanem long Baebol oli stap jenisim laef blong mi. Mi katem hea blong mi, stopem ol rabis fasin blong sek, mo lego fasin blong tekem drag mo alkol. (1 Korin 6:9, 10; 11:14) Mi wantem mekem Jehova i glad. Taswe, taem mi lanem se hem i no laekem samting we mi stap mekem, mi no mekem eskius from nogud fasin ya. Be oltaem mi harem olsem se oli stikim hat blong mi, nao mi stap talem long mi wan se ‘mi no save gohed blong mekem olsem.’ Mo kwiktaem nomo mi traem blong jenisim tingting mo aksen blong mi. From samting ya, sloslo mi stat harem se laef blong mi i gud moa taem mi mekem samting we Jehova i wantem. Long Julae 29, 1989—sikis manis afta long taem we mi stat blong stadi, mi baptaes mo kam wan Witnes blong Jehova.

Baebol i givhan long mi blong jenisim fasin blong mi. Bifo, oltaem mi faet taem mi luk ol man we mi no glad long olgeta. Be naoia mi traehad blong gat “pis wetem olgeta man.” (Rom 12:18) I no mi wan we i mekem ol jenis ya, be mi talem tangkiu long Jehova from paoa we i jenisim mi i kamaot long Tok blong hem mo long tabu spirit.—Galesia 5:22, 23; Hibrus 4:12.

Naoia mi no moa slef blong drag, faet, mo nogud fasin blong seks, be mi stap wok had blong mekem Jehova God i glad mo givim bes blong mi long hem. Mo mi halpem ol narafala tu blong save hem. Sam yia afta we mi baptaes, mi muv i long wan narafala ples long wol blong givhan long ol ples we i nidim moa man blong prij. Long ol yia we i pas, mi glad blong tijim plante man long Baebol mo luk olsem wanem Baebol i mekem laef blong olgeta i kam gud moa. Mi glad tumas se mama blong mi i kam wan Witnes blong Jehova, wan risen hemia from we hem i luk ol gudfala jenis we i kamaot long laef blong mi.

Long 1999, mi graduet long Skul Blong Ol Man Blong Talemaot Kingdom we i stap long El Salvador. Skul ya i trenem mi mo i mekem mi naf blong lidim wok blong prij mo tij mo lukaot long kongregesen. Afta long yia ya, mi mared long naesfala waef blong mi, Eugenia. Mitufala i mekem wok blong prij fultaem long Guatemala.

Naoia, mi no kam kros from laef, be mi glad tumas. Taem mi folem ol advaes blong Baebol, mi fri long nogud fasin blong sek mo faet, mo Baebol i mekem laef blong mi i fulap long lav mo pis.