Long ol yia we i jes pas, Veneswela i kasem bigfala trabol long saed blong mane mo fasin blong ol man, i bitim olgeta yia bifo. Wan Witnes we nem blong hem Edgar, i talem se: “Long sot taem nomo, laef blong mifala i jenis. Mifala i no moa gat mane mo ol sas samting. !Nating se mifala i stap nomo long haos blong mifala, be i olsem se mifala i stap long narafala kantri!”

 ?Wanem i halpem Edgar? Hem i se: “Mi mo waef blong mi Carmen, mitufala i tingbaot ol misinari we oli muv i go long ol pua kantri. Nao mitufala i lanem blong laef wetem smol samting nomo. Hemia i mekem se mitufala i wantem gat wan simpol laef mo traem ol niufala samting, olsem mekem prapa garen blong mitufala.”

 Be Edgar mo Carmen i mekem moa. Tufala i kamfotem ol brata mo sista, wetem olgeta we tingting blong olgeta i foldaon. (1 Tesalonaeka 5:11) Edgar i talem se: “Mitufala i no kamfotem olgeta nomo, be mitufala i pulum olgeta tu blong kasem glad ya we i kamaot taem yumi halpem narafala.”—Ol Wok 20:35.

 Long stat blong COVID-19 pandemik, Argenis i mekem desisen blong prij long ol famle blong hem. Sam long olgeta oli agri blong stadi Baebol tru long telefon.

 Mo tu, Argenis i wantem se ol famle blong hem oli wajem bigfala asembli blong 2020, be oli no gat Intenet. Ale wan Witnes long wan taon klosap, i pasem ol rikoding blong program long olgeta. Mo famle blong Argenis i askem blong oli yusum bigfala skrin mo ol spika blong wan man. Argenis i ringim olgeta bifo we program i stat, blong prea wetem olgeta. From we Argenis i traehad olsem, i gat 4 famle blong hem mo 15 narafala we oli wajem asembli ya.

 Long wan kongregesen, Jairo mo Johana nomo i gat trak. Tufala i glad blong yusum trak ya blong givhan long ol narafala, be problem se bensin i sot long Veneswela. Jairo i talem se: “Mitufala i spenem plante aoa, mo samtaem fulnaet, blong wet long laen blong kasem bensin.”

 Be Jairo i harem se hadwok blong tufala blong givhan long ol narafala i no blong nating nomo, i se: “Taem mitufala i tekem ol samting i go long ol brata mo sista, mitufala i glad tumas taem oli talem tangkiu, i no long mitufala, be long Jehova, from we hem i givim evri samting we ol man blong hem oli nidim.”—2 Korin 9:11, 14.

 Wan sista we i gat 28 yia, nem blong hem Norianni, i ting se maet hem i yangfala tumas blong givhan long ol narafala. Biaen, hem i ridim 1 Timoti 4:12 we i se: “Yu no mas letem man i luklukdaon long yu from we yu yu yangfala. Be long fes blong ol man we oli holemstrong long God, yu mas soemaot gudfala eksampol.”

 Vas ya i pulum Norianni blong givhan long ol olfala long kongregesen. Hem i halpem olgeta blong oli raetem ol leta, mo i askem olgeta blong joenem hem long sam Baebol stadi. Mo tu, hem i ring long olgeta, mo i sanem ol teks mesej blong leftemap tingting blong olgeta. Norianni i talem se: “Jehova i soemaot long mi se i gat plante samting we mi save mekem.”

 Ol brata mo sista long Veneswela oli fesem hadtaem. Nating se i olsem, oli wok strong long wok blong prij mo ‘oli givgivhan bigwan’ long olgeta.—Kolosi 4:11; 2 Timoti 4:2.