Artur, wan eria elda long Armenia, i visitim wan kongregesen blong ol Witnes Blong Jehova. Hem i faenemaot se kongregesen ya i no prij yet long ol pablik ples. Hemia blong yusum ol troli blong soemaot ol buk we oli tokbaot Baebol. Ale blong leftemap tingting blong olgeta blong mekem wok ya, Artur mo waef blong hem, Anna, wetem wan nara brata, nem blong hem Jirayr, oli go setemap troli long wan smol taon. Oli jusum wan ples we plante man oli stap gokam long hem.

 Kwiktaem nomo ol man oli intres mo oli stat blong tekem ol buk. Be i no longtaem ol man we oli agensem trutok tu oli luk niufala rod ya blong prij. Ale tu pris i kam long troli, mo wantaem nomo wan long tufala i kikim troli ya i foldaon. Mo i slavem fes blong Artur, nao glas blong hem i foldaon. Artur, Anna, mo Jirayr oli traem blong mekem tingting blong ol pris ya i go daon, be nogat nomo. Tufala i lego leg long troli ya nao ol magasin oli go wanwan, mo tufala i swea long ol witnes ya mo traem mekem olgeta i fraet, afta tufala go.

 Ale Artur, Anna, mo Jirayr oli go long ofis blong polis blong mekem wan ripot. Oli eksplenem samting we i hapen mo oli tekem smoltaem blong tokbaot Baebol long sam polisman mo ol narafala wokman. Biaen oli tekem trifala Witnes ya i go long ofis blong polisman we i lukaot long olgeta. Fastaem polis ya i jes wantem save nomo evri samting we i bin hapen. Be taem hem i luk we Artur, we i wan saesman, i no faet bak taem pris i slavem hem, hem i no moa askem ol kwestin long saed blong samting we i hapen, be i stat blong askem kwestin long saed blong bilif blong ol Witnes. !Ale oli storian blong fo aoa! polisman ya i glad tumas long samting we hem i harem, nao i talem se: “!Relijen ya i gud we! !Mi wantem joenem tu!”

 Long nekis dei, taem Artur i go prij bakegen long pablik ples, wan olfala man we i bin luk samting we i hapen yestede, i go luk hem. Man ya i talem gudfala toktok long hem from we hem i stap kwaet mo i no traem givimbak. Hem i gohed se samting we hem i luk, i mekem se hem i no moa gat respek long ol pris.

 Long sem sapa ya, polisman we i lukaot long ol narafala polis i singaot Artur i gobak long polis stesen. Be hem i no tokbaot kes blong Artur, hem i girap i askem plante moa kwestin long saed blong Baebol. Ale tu narafala polisman i kam joen long storian ya.

 Nekis dei, Artur i go visitim polisman ya bakegen, be naoia blong soem sam video blong yumi long hem we oli tokbaot Baebol. Ale polis ya i singaot ol narafala polisman tu blong kam wajem ol video ya.

 Nogud fasin blong tufala pris ya, i mekem se plante polisman we oli neva harem trutok, oli harem. Samting ya i mekem se oli gat gudfala tingting long saed blong ol Witnes Blong Jehova.