Long 2011, wan man Eritrea i kam stap long Nowei olsem wan refuji. Taem ol Witnes blong Jehova oli mitim hem mo toktok long hem, hem i talem long olgeta se hem i bin mitim finis ol Witnes long kantri blong hem. Hem i talem se taem hem i bin joen long ami longwe, hem i bin luk we ol Witnes blong Jehova we oli go kalabus from bilif blong olgeta oli no wantem nating blong joen long ami, nating se oli tritim nogud olgeta.

 Wan samting i hapen kwiktaem nomo we i mekem se oli putum man ya long prisen. Long ples ya hem i stap wetem tri Witnes, hemia Paulos Eyasu, Negede Teklemariam, mo Isaac Mogos, we oli bin kalabus from bilif blong olgeta stat long yia 1994.

 Long prisen, man ya i luksave se ol Witnes blong Jehova oli folem gud olgeta samting we oli stap tijim ol narafala man long hem. Hem i makem se oli tok tru oltaem mo se oli serem kakae blong olgeta tu wetem ol narafala prisena. Hem i luk se ol Witnes we oli stap long kalabus wetem hem oli stap stadi Baebol tugeta evri dei mo oli invaetem ol narafala tu blong oli joenem olgeta. Taem oli givim pepa long olgeta blong oli saen long hem blong talem se oli lego bilif blong olgeta, blong oli save go fri, olgeta oli no wantem saen.

 Fasin blong ol brata ya mo ol samting we oli mekem, i mekem man ya i sapraes tumas, mo afta we hem i gobak long Nowei, hem i wantem tumas blong faenemaot from wanem ol Witnes blong Jehova oli gat strong bilif olsem. Nao, taem ol Witnes blong toktok wetem hem, kwiktaem nomo hem i stat blong stadi Baebol wetem olgeta mo hem i stap go long ol miting.

 Ale long Septemba 2018, hem i baptaes olsem wan Witnes blong Jehova. Naoia hem i tekem evri janis we hem i gat blong toktok wetem ol man long Eritrea mo Sudan, i leftemap tingting blong olgeta blong oli stadi long Baebol mo gat strong bilif.