Rachel, we i stap naoia long Dominikan Ripablik, i talem se: “Taem we mi mi bon, papa mo mama blong mi i stap wosipim Jehova. Sore tumas, taem mi gat seven yia, papa blong mi i lego ol man blong Jehova, mo i agensem trutok fulwan. Hem i mekem i had blong mi gohed blong wosipim Jehova. Hem i givim ol sas samting long mi blong traem switim mi blong lego wok blong Jehova. !Hem i givim wan mobaelfon long mi, i tekem mi mi go long Disneyland, mo i givim wan kredit kad tu! Sam samtaem hem i wipim mi mo faetem mi blong traem ‘tekemaot Jehova long mi.’ Hem i talem se sipos mi no save toktok o wokbaot, bambae mi no save go long ol miting. Be samting ya i neva stopem mi. Oltaem mi gat strong tingting blong go long ol miting.

 “Papa blong mi i meksua se i no kilim mi taem Mama i stap. Hem i talem long mi se sipos mi talemaot long Mama ol raf fasin we hem i mekem long mi, bambae hem i kilim Mama tu. Hem i mekem eskius from ol blu mak olbaot long bodi blong mi, i stap talem se hemia from ol trening we hem i givim long mi long karate, wan samting we hem i fosem mi blong mekem.

 “Mi no talemaot long Mama ol samting we Papa i mekem long mi, from we mi smol nomo mo mi fraet tumas long Papa. Be mi talemaot long Jehova. Mi go wokbaot long bus biaen long haos blong mifala long Maryland, Yunaeted Stet. Long ples ya, i gat wan naesfala oktri, we mi klaem i go antap long hem, mi sidaon long wan han blong hem, mo mi toktok long Jehova. Mi prea blong talemaot ol filing blong mi long hem, mo mi tokbaot ol samting we bambae mi mekem blong hem taem mi gruap, sipos hem i givhan long mi blong stap laef go kasem taem ya. Mo tu, mi tokbaot samting we mi wantem mekem long niufala wol, mo famle we bambae mi gat, mo pis mo glad we bambae mi gat taem mi no moa fraet mo harem nogud long bodi.

 “Taem papa blong mi i switim o wipim mi blong traem mekem mi mi lego Jehova, oltaem mi harem se Jehova i stap kamfotem mi mo givim paoa long mi. Hem i halpem mi blong holemstrong long hem mo blong gat paoa blong gohed.

 “Taem mi gat 10 yia mi baptaes, mo tu yia biaen mi kam wan paenia. Fastaem Papa i no save, be taem hem i faenemaot, hem i faetem mi gogo bun blong maot blong mi i kamaot long joen blong hem.

 “Samfala oli talem se mi mi yang tumas blong paenia, oli ting se mi no kasem save long bigfala desisen ya. I tru, taem ol yia oli pas, mi luk plante yangfala Witnes long ples blong mi we oli no traehad long wok blong Jehova. Oli bisi nomo blong gat gudtaem long ol lafet blong olgeta, mo samting we oli stap mekem i pulum mi. Sam samtaem mi harem se mi wantem joenem olgeta. Mi stap tingting se: ‘Maet i moa gud mi no moa prij be mi go harem gud wetem olgeta.’ Be taem mi gat ol tingting olsem, mi tokbaot wetem Jehova.

 “Taem mi gat samwe long 15 yia, wan bigfala kampani we i stap lukaotem ol gel blong werem ol flas klos mo soemaot long fored blong ol man, i askem long mi blong wok blong olgeta. Oli talem se bambae oli givim bigfala mane sipos mi wok wetem olgeta long Milan, Itali. Mi harem gud blong tingbaot se ol pija blong mi bambae oli stap long ol magasin mo mi save mekem ol so blong soemaot ol sas klos long fored blong ol man. Long taem ya, mi bin stap olsem wan fultaem paenia blong klosap tri yia. Mi tingting se: ‘Sipos mi winim plante mane, mi save gohed blong paenia plante yia.’ From we papa blong mi i lego mifala finis, mi ting se mane ya i save givhan long Mama blong pem ol kaon blong hem.

 “Mi prea long saed ya. Mo mi storian wetem mama blong mi we i bin paenia plante yia finis, mo tu, mi storian wetem wan elda we mi lavem mo respektem hem. Mo olsem oltaem, mi go klaem long bigfala oktri blong mi blong prea. Blong ansa long ol prea blong mi, Jehova i yusum wan elda blong soemaot long mi Prija 5:4, we i talem se: ‘Sipos yu mekem wan strong promes long God, yu mas mekem samting we yu promes blong mekem. Wanem strong promes we yu mekem, yu mas holem.’ Mi bin mekem wan strong promes long Jehova blong wosipim hem wetem fulhat blong mi, mo mi fraet se wok ya blong winim bigfala mane i save mekem se mi no moa fren gud wetem Jehova. Ale, mi mekem desisen blong no akseptem wok ya.

 “Nating se mi kasem plante raf fasin taem mi yangfala, mi stap laef kasem we mi kam bigwan. Naoia mi stap gud wetem hasban blong mi Jaser, mo boe blong mitufala Connor, we i gat naen yia. Jaser i wan elda, mo Connor i wan pablisa we i no baptaes. Klosap 27 yia finis, mi mekem wok blong paenia.

 “Plante taem mi tingbaot ol longfala prea we mi mekem long Jehova taem mi stap antap long oktri, long bus biaen long haos blong mifala. Mi plis long Jehova blong i halpem mi, mo hem i mekem olsem long ol nambawan fasin. Hem i mekem mi mi strong, i kamfotem mi, mo i lidim mi. Bakegen mo bakegen, hem i soemaot se hem i wan nambawan Papa. Mi glad tumas se mi jus blong wosipim hem wetem fulhat blong mi. Jus ya i waes moa i bitim ol narafala jus we mi mekem long laef blong mi.”