Maud i stap long Franis mo hem i wok long wan skul. Wok blong hem i blong halpem ol pikinini we oli handikap, long taem blong klas. I no longtaem i pas, ol studen long wan klas oli lanem long saed blong Holokos mo ol rabis kalabus blong ol Nasi. Oli lanem se ol prisena we oli stap long kamp long taem ya, oli mas werem wan yunifom we oli somap wan pis kaliko we i gat kala long hem. Kala mo sep blong pis kaliko ya i soemaot risen from wanem man o woman we i werem yunifom ya i stap long kalabus.

 Taem tija i tokbaot pepol traeangol long yunifom blong sam prisena, hem i talem se: “Mi ting se hemia from we oli homoseksuol.” Afta long klas, Maud i toktok long tija ya mo i eksplenem se ol Nasi oli yusum wan pepol traeangol blong soemaot olgeta ya we oli Witnes Blong Jehova. a Biaen hem i askem sipos hem i save karem sam moa infomesen long saed blong topik ya i kam long hem. Tija ya i agri mo i askem long Maud blong i serem infomesen ya long ol studen.

 Taem Maud i stap long wan narafala klas, klas ya i tokbaot sem sabjek ya be wetem wan defren tija. Tija ya i yusum wan jat we i soem ol defdefren simbol we oli stap long ol yunifom blong ol prisena. Jat ya i soem stret se pepol traeangol i soemaot se olgeta we oli werem yunifom ya, oli Witnes Blong Jehova. Afta long klas, Maud i askem long tija ya sipos hem i save givim sam moa infomesen long saed blong topik ya. Tija ya i agri mo i arenjem blong Maud i toktok long ol studen.

 Maud i rerem wan smol tok blong 15 minit, blong i save givim long faswan klas, be long stret taem blong hem, tija i talem long hem se: “Yu save toktok blong wan aoa.” Ale blong stat, Maud i soem wan dokumentri video we i tokbaot bigfala trabol we ol Nasi oli mekem long ol Witnes Blong Jehova. Taem video ya i talem se ol Nasi oli tekemaot 800 pikinini long ol perens blong olgeta, Maud i stopem video ya blong smoltaem, mo i ridim stori blong tri long ol pikinini ya. Afta we Maud i soemaot video ya, hem i ridim wan leta we wan yang Witnes blong Ostria we i gat 19 yia, hemia Gerhard Steinacher, i raetem long yia 1940, blong talem tata long ol perens blong hem, jes sam aoa bifo we ol Nasi oli kilim hem i ded. b

 Maud i tokbaot sem samting ya long seken klas tu. From we Maud i no fraet blong toktok, naoia tufala tija ya i meksua se tufala i tokbaot ol Witnes Blong Jehova taem oli tijim ol studen long saed blong ol man we ol Nasi oli putum olgeta long ol rabis kalabus mo kilim olgeta oli ded.