Madián mo Marcela i stap long Medellín, Kolombia. Tufala i gat wan isi laef from we tufala i gat evri samting we tufala i nidim. Madián i kasem gudfala pei from wok blong hem, mekem se tufala i stap long wan naesfala apatmen. Be wan samting i pulum tufala blong askem se, from we tufala i man blong wok blong God, ?wanem nao i sud impoten moa long laef blong tufala? Tufala i eksplenem se: “Long 2006, mitufala i joen long spesel dei asembli we nem blong hem ‘Mekem Ae Blong Yu i Klia Gud.’ Plante tok long asembli ya oli makem strong poen ya se yumi mas mekem laef i simpol nomo, blong yumi save joen fulwan long wok blong God. Taem mitufala i stap aot long asembli ya, mitufala i kasemsave se mitufala i stap mekem samting we i defren olgeta. Mitufala i gat bigfala kaon from we mitufala i gat fasin ya blong pem samting oltaem, nating se mitufala i no gat naf mane blong pem ol samting ya.”

 Ol tok long asembli ya oli mekem Madián mo Marcela i kasemsave se tufala i mas jenisim sam samting, taswe tufala i stat blong mekem laef blong tufala i kam simpol. Tufala i talem se: “Mitufala i stop blong westem mane. Mitufala i muv i go long wan apatmen we i smol moa, mo mitufala i salem trak blong mitufala, biaen mitufala i pem wan moto.” Mo tu, tufala i stop blong go long ol bigbigfala stoa blong pem samting, olsemia tufala i no foldaon long trap ya blong westem mane long ol samting we tufala i luk. Tufala i stat blong spenem moa taem blong tokbaot Baebol long ol neba blong tufala. Mo tufala i joen gud wetem ol fren we oli spesel paenia a mo we oli wok strong long wok blong Jehova.

 I no longtaem biaen, Madián mo Marcela i jusum blong mekem moa long wok blong prij, ale tufala i muv i go long wan smol kongregesen we i nidim help mo we i stap longwe long taon. Madián i lego wok blong hem, blong tufala i save muv i go. Bos blong hem i ting se hem i krangke blong lego wok blong hem. Ale blong mekem bos blong hem i tingting, Madián i askem long hem se: “Yu yu winim plante mane long wok blong yu, ?be yu yu hapi?” Woman ya i talem se nogat, hem i no hapi from we hem i gat plante problem we hem i no naf blong stretem. Ale Madián i talem long hem se: “So samting we i impoten, i no hamas mane we yu winim, be samting we i impoten, hemia wanem samting we i rili mekem yu yu hapi. Samting we i mekem mi mo waef blong mi i hapi, hemia blong tijim ol man long saed blong God, mo mitufala i wantem spenem moa taem long wok ya, blong kasem moa glad.”

 Madián mo Marcela i hapi mo tufala i harem gud fulwan, from we wok blong God i wan impoten samting long laef blong tufala. Long 13 yia we i pas, tufala i givhan long ol kongregesen we i gat bigfala nid, long notwes blong Kolombia. Mo naoia, tufala i glad tumas from we tufala i gat privilej ya blong kam spesel paenia.