Long 2017, 12 Witnes oli aot long Moskito, wan rijen long Nikaragwa, long bot blong olgeta we nem blong hem Sturi Yamni. Wan long ol kru we nem blong hem Steven, i talem se, “Mifala i go blong leftemap tingting blong wan smol grup blong ol Witnes we oli stap longwe, mo blong givhan long olgeta blong talemaot gud nius long bigfala teritori blong olgeta.”

 Ol 12 Witnes ya oli aot long Pearl Lagun blong go long Río Grande de Matagalpa, we hem i 200 kilometa longwe. Oli no save se nem blong bot blong olgeta, we i minim “Gud Nius” long lanwis blong Moskito, bambae i gat spesel mining long ol man we oli laef long saed blong reva. Afta we oli travel 12 aoa, (hemia oli no kaontem taem we oli stop blong slip long naet), oli kasem La Cruz de Río Grande. Sikis Witnes we oli stap long ples ya oli welkamem olgeta.

 Long naet ya, wan strong win i blu, mo bigfala ren i fulumap reva blong Río Grande de Matagalpa. Nao smoltaem biaen, reva ya i solap i kam antap mo i gohed olsem blong tu dei. Wota i kam insaed long Haos Kingdom mo plante haos long La Cruz. Ol brata we oli bin kam, oli halpem ol man blong oli aot long haos blong olgeta. Plante man oli spenem tu naet bakegen, long stori haos blong wan Witnes.

 Long namba tri naet, mea blong La Cruz i kam luk ol Witnes ya, blong askem help blong olgeta. Hem i luk se bot ya Sturi Yamni i strong inaf blong ron long reva ya, taswe hem i wantem se ol Witnes ya oli tekem wan tim blong rilif wok, oli go long ol komuniti we oli nidim help. Ol Witnes oli glad tumas blong givhan.

 Long nekis moning, tri Witnes oli aot wetem tim ya. Steven i talem se: “Long taem ya, reva i ron strong, mo ol tri we oli gat ol bigfala rus oli stap flot long hem. Mo tu, i gat sam welpul long reva, mo wota i ron long spid blong 18 kilometa long wan aoa.” Nating se i had, be bot i kasem tri komuniti.

 Trifala Witnes we oli go wetem tim ya, oli tekem janis blong leftemap tingting blong ol man blong vilej. Oli givimaot Wekap! blong 2017 we taetel blong hem se, “Long Taem Blong Disasta—?Yu Save Mekem Wanem?”

 Ol man we oli laef long saed blong reva ya oli glad tumas long gudfala wok we ol Witnes oli mekem, mo help we oli givim long saed blong spirit. Sam man blong vilej oli tokbaot olgeta se: “Olgeta oli glad nomo blong halpem yumi long trabol taem ya.” Sam narafala oli talem se: “Olgeta oli gat trufala lav long ol neba blong olgeta.” Afta we ol man oli luk samting we ol Witnes oli mekem blong givhan long ol narafala Witnes mo ol man, plante man long vilej oli glad moa blong lesin long mesej blong Baebol we i blong leftemap tingting.