Desicar we i wan singel mama, i wantem mekem moa long wok blong prij mo kam wan fultaem paenia. Hem i laef long Veneswela, wan kantri we i fesem plante problem long saed blong mane. Nating se i olsem, hem i gat strong tingting blong mekem wok blong paenia. Nao hem i stat blong paenia mo hem i glad tumas, be biaen COVID-19 pandemik i stat.

 Long stat blong COVID-19 pandemik, Desicar i faenem i had blong lan long ol niufala rod blong prij. Hem i harem se i had blong raetem leta. Mo tu, hem i no save yusum video kol long wok blong prij, from we intenet i sas tumas long ples blong hem. Hem i talem se: “Tingting blong mi i foldaon bigwan. Situesen ya i mekem se mi no moa save prij olsem we mi stap mekem bifo. Mo mi harem se mi no stap mekem gud wok blong mi olsem wan fultaem paenia.”

 Biaen, long Jenuware 2021, branj ofis blong ol Witnes blong Jehova long Veneswela i apruvum wan spesel kampen. Oli mekem plan wetem samwe long 60 radio stesen mo 7 defren janel blong televisen, blong oli save plei long ol pablik tok long ol faef wiken blong manis ya. Branj ofis i leftemap tingting blong ol Witnes blong oli invaetem olgeta we oli intres, blong oli wajem o lesin long ol program ya. Branj ofis i givim wan lis blong ol kwestin mo ol vas we oli joen wetem ol tok ya, blong ol brata mo sista oli yusum long ol leta blong olgeta mo taem oli prij long fon. Mo tu, branj ofis i tokbaot wan niufala rod blong prij we plante Witnes long Veneswela oli neva yusum bifo, hemia blong sanem ol teks mesej.

 Desicar i glad tumas blong joen long kampen ya. Hem i wantem traem yusum teks mesej long wok blong prij, nating se hem i neva mekem bifo. Be hem i nidim help blong narafala. Desicar i talem se: “Mi mi no save yusum gud teknoloji.” Ale hem i askem long gel blong hem blong i givhan long hem, mo smoltaem biaen, Desicar i redi blong joen long kampen ya.

 Desicar i sanem teks mesej long plante long olgeta we hem i save olgeta, blong oli lesin long ol pablik tok ya. Mo hem i sapraes long gudfala frut we i kamaot. Plante long olgeta we hem i invaetem olgeta oli lesin long ol pablik tok ya, mo oli askem plante kwestin. Ol narafala we oli no gat janis blong lesin, oli askem long Desicar blong i eksplenem long olgeta ol poen we oli kamaot long ol tok ya. Desicar i talem se: “Mi serem ol not we mi tekem, wetem olgeta.” Hem i gohed i se: “Mi neva mekem bitim 5 visit long wan manis. !Be long en blong kampen ya mi sek se mi bin mekem 112 visit!” a

 Mo tu, Desicar i invaetem sista blong hem we i no wan Witnes, we i laef klosap long hem, blong i lesin long ol tok ya long radio. Desicar i talem se: “Mi sapraes tumas taem sista blong mi i agri blong lesin. Ale, evri Sande long 8 klok long moning, mi go long haos blong sista blong mi, blong mitufala i lesin long program ya tugeta. Hem i askem plante kwestin long taem blong program mo afta long program.” Sista blong Desicar i joen tu long Memoriol blong ded blong Jisas tru long Zoom, mo hem i letem Desicar i yusum intenet blong hem long wok blong prij.

 Desicar i se: “Mi talem bigfala tangkiu long Jehova. Mo mi talem tangkiu tu long ol elda long kongregesen from we oli leftemap tingting blong mi. Oli halpem mi blong glad bakegen long wok blong prij.” (Jeremaea 15:16) Desicar i gohed blong mekem wok blong paenia, mo i gohed blong visitim olgeta we oli soem intres taem hem i bin sanem teks mesej long olgeta.