Sipos yu yu wan Witnes blong Jehova, yu traem tingbaot se wan polis i stap folem yu, taem yu stap go long ol haos wanwan blong talemaot gud nius. Hemia nao ekspiriens blong Josef long Maekronesia, long 2017. Hem wetem tri narafala Witnes oli joen long wan spesel kampen blong prij long ol man we oli laef long ol aelan we i stap longwe.

 Klosap long medel dei, ol fo Witnes ya oli kamtru long wan smol aelan we i gat samwe long 600 man long hem. Mea blong aelan ya i kam long sanbij blong welkamem ol Witnes ya. Josef i eksplenem nekis samting we i hapen i se: “Mea ya i talem se wan polis trak i save tekem mifala i go long olgeta haos. Mifala i sapraes long samting ya, be wetem respek, mifala i talem no. Mifala i wantem visitim ol man olsem we mifala i stap mekem oltaem, blong go long ol haos wanwan.”

 Ale ol pablisa ya oli stat blong wokbaot, oli gat strong tingting blong traem toktok wetem plante man. Ol Witnes ya oli talem se: “Ol man oli welkamem gud mifala mo oli intres long mesej we mifala i talemaot. From samting ya mifala i spenem moa taem long ol haos wanwan, hemia i bitim samting we mifala i bin tingbaot.”

 Klosap long en blong dei ya, wan polis trak i pasem Josef tu taem mo nambatri taem hem i stop. Wan Polisman i askem long Josef sipos oli save tekem hem i go long ol haos we hem i mas go long olgeta yet. Josef i se: “Mi talem no, be oli stap talem long mi se: ‘Yu gat sot taem nomo i stap, taswe bambae mifala i tekem yu yu go long ol haos ya we yu no go long hem yet.’ Mi no save talem no long olgeta, from we i gat plante haos lelebet we mi no go long olgeta yet. Taem mifala i kasem ol haos ya, polisman ya i talem nem blong famle ya long mi mo i talem se sipos i no gat wan i kam long doa afta we mi noknok, bambae oli pipip blong givim woning long man blong haos”.

 “Wetem help blong olgeta, mifala i naf blong visitim olgeta haos long dei ya. Mifala i seremaot plante buk lelebet mo mifala i mekem plan blong kambak long ol man we oli intres.”

 Polisman ya i talem long Josef se oli “glad tumas blong serem sam gud nius.” Taem san i godaon, ol Witnes ya oli aot, mo ol polis ya oli stanap long sanbij oli sakem han blong talem tata, we fes blong olgeta i glad tumas mo oli holem sam buk long han blong olgeta.