Faswan taem we Ed mo waef blong hem Jennie i traem blong prij long telefon, hemia long 2010. a Jennie i talem se: “Mi no laekem nating. Mi talem long hasban blong mi se, ‘!Bae mi neva prij long telefon bakegen!’” Ed tu i gat sem tingting, i se: “Mi no laekem taem samfala we oli wantem salem samting oli kolem mi, taswe mi ting se maet ol man oli gat sem tingting mo mi no wantem kolem olgeta.”

 I no longtaem COVID-19 pandemik i stat, mo ol Witnes blong Jehova oli no moa go long ol haos wanwan. Be oli gohed blong obei long oda we Jisas i givim blong talemaot gud nius. Blong mekem olsem, oli raetem ol leta mo prij long telefon. (Matiu 24:14; 28:19, 20) Mo tu, oli mekem ol miting blong olgeta mo ol miting blong prij, long video konfrens. Long wan miting, Ed i mekem tingting blong hem i strong blong traem prij long telefon bakegen. ?Wanem filing blong hem taem hem i rere blong mekem faswan kol long telefon? Hem i talem se: “!Mi stap seksek, ale mi prea long Jehova blong i halpem mi! Afta mi ring, mo mi toktok long wan man we nem blong hem Tyrone.” b

 Tyrone mo waef blong hem, Edith, tufala i stap long Kentucky, Yunaeted Stet, long wan ples afsaed long taon. Tyrone i gat 83 yia, mo hem i gat problem wetem ae blong hem, mekem se i no save lukluk gud. Nating se i olsem, Ed i askem long hem sipos hem i wantem stadi Baebol, mo hem i talem se ‘yes.’ Hem i yusum wan strong glas blong ridim buk mo stadi evri wik wetem Ed long telefon.

 Wan manis biaen, Tyrone mo Edith i stat blong joen long ol miting blong kongregesen. Be tufala i no gat Intenet, ale tufala i lesin long ol miting long telefon. ?Wanem i pulum Edith blong intres long trutok?

 Taem Ed mo Jennie i stadi wetem Tyrone, tufala i harem voes blong Edith biaen, hem i stap givhan long Tyrone blong kasem ansa long ol kwestin mo faenem ol vas long Baebol. Be hem i no joen fulwan long stadi. Jennie i talem se: “Voes blong Edith i soemaot se hem i harem nogud, be mi mo Ed i no save from wanem.”

 Wan dei, Jennie i harem se hem i mas toktok wetem Edith. Ale taem hem i luk se i stret, hem i askem long Ed blong givim telefon long hem. Hem i talem long Tyrone se: “Tyrone, mi harem voes blong waef blong yu biaen, mo mi wantem askem long hem blong i ridim wan vas o givim wan ansa.”

 Smoltaem biaen, Edith i holem telefon mo i talem long smol voes nomo se: “Mi bin wantem toktok wetem yu. Mi mi wan Witnes blong Jehova, be 40 yia nao mi no moa joen wetem kongregesen o prij.”

 Jennie i sapraes tumas. Hem i talem se: “!Yu yu sista blong mi!” Nao tufala tugeta i krae.

 Smoltaem biaen, Ed i givim buklet ya Kambak Long Jehova i go long Edith. Long ol wik biaen, Ed mo Jennie i luk se fasin blong Edith i stap jenis. Ed i talem se: “Fastaem voes blong hem i soemaot se hem i harem nogud. !Be naoia hem i toktok wetem glad!” Edith i gohed gud mo i kam wan pablisa blong gud nius bakegen. Long Julae 2022, hasban blong hem i baptaes blong kam wan Witnes blong Jehova.

 Taem Ed i tingbaot we fastaem hem i no laekem blong prij long telefon, hem i tingbaot wan storian blong hem wetem Tyrone. Ed i ridim Jon 6:44 long hem mo i eksplenem se Jehova i pulum ol man oli kam long trutok, nao Tyrone i agri mo i talem se: “Mi stap wet blong yu kolem mi.” Jennie tu i glad se hem mo hasban blong hem tufala i mekem tingting i strong mo joen long wok blong prij long telefon. Hem i talem se: “Taem yumi traehad blong mekem samting we i no isi long yumi, Jehova i blesem yumi.”